1 ဆေ ဘေ ကာဆာင် ဒွါ ကာဒါယ် ဒီ ဒူအီ ဒွန် ခြိုဝ် တဲး န့ ဘဲန် ခါဂုန် ဒီ ဂေ၊ ဘေ လုဝ် ဒိုဝ်း အာဒါ အူ ပ့လုဝ့်၊ အာပ် ဒွါ ဒီ ဇဝ်ဖြာ တဲး န့ ဘဲန် ဒူင် ဘွတ်။ ဒူင် တီ လုဝ် ဒိုဝ်း နာ တူင့် အန် အာ မှိုန့် ဒီ ဖန် ဟြဲန့် ကာနိး။ နာ ကာဝဝ်း အန် အာ မှိုန့် ကာနိး။ ဒူင် တီ ဒီ ဘဲန် တူတ့် ဒူင် ဆီငါ ဘွတ်။ 2 ခဲင် ဒူင် တီ၊ လုဝ် မိုဝ်း အူ ပ့လုဝ့်၊ အီ တူင့် ဘော ကာဝဝ်း ဖန် မာယဝ်း ကာနိး အီ ဆီ နာ ဖွုန် ဘ့လာက်၊ တဲး န့ ဘဲန် ဒူင် ဒီ ဆမ် ဟုဝ် ဇဝ်ဖြာ။ ပီ ဝီ လုဝ် မိုဝ်း ဒူင် တူ မိုဝ်း မာဆေ၊ တဲး န့ ရူပ် ဒူင် တီ၊ ကာဝဝ်း အန် ဖန် ဂိုဝ် ကာနိး။ 3 ခဲင် ဒူင် ဆီငါ ဘွတ် လုဝ် ကာယဝ်း အူ ကာတဲ နာ တူင့် အန် အာ မှိုန့် ဒီ ဖန် ဟြဲန့် ကာနိး၊ နာ ကာဝဝ်း အန် အူ မှိုန့် ကာနိး။ ဒူင် တီ မုး ဒူင် ဆီငါ ဘွတ် လွှိုမ် တူတ့်။ 4 ကာဒါယ် ဒူင် တီ ဝီ ဘဲန် ဒူင် ဆီငါ ဘွတ် အာဒါ ဂေ ဒါ အီ လှူ ဒီ ဇဝ်ဖြာ အီ ဘူင် ဂါန် ဇဝ်ဖြာ။ ဂေ ဘူင် တူတ့် ဒွန် မျုဝ် ခဲ့ ပီ စ်ု ဇဝ်ဖြာ ဂေ ဘူင်။ ဒူင် တီ လုဝ် ဆမ် ကာင် ဂေ ဘော ဟုဝ် ဇဝ်ဖြာ။ 5 အာဒါ ပေါ အူ ကာတဲ အီ ဆီ ဂိတ် အီ ဒူပ် နာ တူင့် အန် အာ မှိုန့် ဒီ ဖန် ဟြဲန့် ကာနိး ဘော နာ ကာဝဝ်း အန် အူ မှိုန့် ကာနိး၊ န့ ဒီ ဘဲန် ကာဒါယ် ဂေ ဒူအီ ခြိုဝ် အာလေဝီ အီ ဘူင် ဂါန် ဇဝ်ဖြာ ခဲင် ဟုဝ် ဇဝ်ဖြာ၊ တဲး ဂေ ပွိုန် ဒီ ဂုဝ် မိူင် အီ ပွိုန် ကွယ် နာ ခဲင်။ 6 ကာဒါယ် အီ လာယ် ကာဇာပ် နာ ဘြေတ့် ဒူင် ဘွတ် တွိုန်၊ တဲး န့ ဝီ ဘဲန် ကာအုန် ကာဒါယ် မိူင် ဒူင် ဒီ ကွယ် ဂေ ဒူအီ အီဆာရေလ။ ကာဒါယ် ဒူင် တီ၊ န့ ဘော တူင့် အာ မှိုန့် ဒီ ဖန် ဟြဲန့် ကာနိး ဘော ကာဝဝ်း ဖန် ဟြဲန့် ကာနိး။

7 ခုန်ဒီခမ် မိူဝ် ဒီ ပွိုန် ကာဒါယ် အီ ကာဇာပ် ဒီ ဒူင် ဘွတ် ဘော အာ ဘ့လာက် မိူင် တွိုန်။ န့ ဒီ ကွယ် ဘ့လာက် နာ ဂေတ့် ဆီငဲ ကော ဇမ် နမ်မုက်ဆာရာ။ အီ ကွယ် ဘ့လာက် နာ လေး ဆီငဲ ဝီ ဟာဝ် ဇမ် နာ လေး ဆီငဲ ပေါ န့ ပွါ။ န့ ကွယ် ခူပ် ဒူင် မုး ကာဒါယ် အီ မုး ခါဂုန် ဂေ ခြိုဝ် ဒူအီ အီဆာရေလ။ 8 ကာဒါယ် တီ ဒီ ဘဲန် ခါဂုန် ခုန်ဒီခမ်။ ဂေ မုး ဒါ ကာညာ အီ အိုပ် မိူင် ဒူအီ အီဆာရေလ။ ဂေ ဒါ တာင် ဟူ ခါနှာပ် ဒူအီ ပီ အိုပ် အုဝ်။ ဂေ ယီ ခ့ဝါင် ဒူအီ အီဆာရေလ မိုဝ်း ကာဒါယ် ဒူပ် ခြိုဝ် ဂေ။

9 ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ “အိုယ် ဘေ အီ မုး ဒါ ကာညာ အီ အိုပ် မိူင် ဒူအီ အီဆာရေလ၊ အီ တူ မွှိုမ် ပဲ့ ဟဲ့ ဘူင် ဘေ ဟဲ့ ကိူန် ကာဆဝ်။ စူ ခဲ့ တီ။ တဲး ဘေ ဝဲန် ပီ ဘူင် ဘေ အီ တူ မွှိုမ် ဘော ပီ ခါနှာပ် ဘေ ဒီ အီ ဟဝ်။ ကွဲ့ တဲး ဘေ ဟုဝ် တဝ် ဂေ ဒူအီ ပီ အိုပ် အုဝ် ခဲင် မိူင် ဂေ ပေါ အူ ဇေန့်။ ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် တဲး ဘေ ဘူင် ပါယ် တီ။ 10 ဘေ လုဝ် စ်ု လစူ အီ မှာန် အီ ကာဇီ၊ ဘော အေဖာ ဂါယ် ပါ့ အီ မှာန် အီ ကာဇီ။ 11 အေဖာ ပီ ဂဝ် ဘေ မျုဝ် အီ ကာဟဝ်း၊ န့ ဘော လုဝ် ကာရမ် ဂါယ် ပါ့ ပီ ဂဝ် ဘေ မျုဝ် အီ မုး အိုမ်။ ဂိုဝ် ပါ့ ဟပ် ခဲင် အူ အုဝ်မာ။ ဘော ဂိုဝ် အေဖာ ဟပ် ခဲင် အူ အုဝ်မာ။ လုဝ် ဂဝ် မျုဝ် အီ မုး အိုမ် ဘော အီ ကာဟဝ်း တာ အုဝ်မာ တီ။ 12 ဆေ န့ မုး မျုဝ် ပီ ဆ ဒီ လစူ၊ အာ ဂိုဝ် ဂီရာ ဘော မုး အူ ဆေခေန်။ ဒဝ် ဂိုဝ် ဆေခေန် ပီ ဝီ မုး အူ မီနာ။

13 “ဆေ န့ မုး ခဝ်ချုင် အီ လေး ခဲင် မာန် ဘေ၊ ဒဝ် ဂိုဝ် ဘုန် အူ ဘုန် ဘေ လုဝ် လှူ။ ဆေ န့ မုး ဆီဂူင့်ရာ အီ ဟဲ့ လေး ခဲင် မာန် ဘေ၊ ဒဝ် ဂိုဝ် ဘုန် အူ ဘုန် ဘေ လုဝ် လှူ။ 14 နာမန် ပဲ့ ဟဲ့ ကြိတ် လေး ဘေ၊ ဆေ န့ မုး အူ ကောရ ဘေ လုဝ် ဒိုဝ်း လှူ အူ မာယဝ်း ဘုန် အူ ဘုန်။ ဘေ လုဝ် ဂဝ် တာ ပါ့ အီ မုး ဂိုဝ် ပါ့ အူ အုဝ်မာ။ ဂိုဝ် အုဝ်မာ ဘော မုး အူ ကောရ။ 15 မာဘူ မိူဝ် ပါယ် တီ။ ခဲင် ဖိုင် ဒွန် ဖိုင် အီ မုး အာ မာယဝ်း ဒုဝ် အီ ပွိုန် ဟူမ် ပေတ့် န့စမ် ခဲင် ဒူင် နာ ခဲင် မိူင် အီဆာရေလ လုဝ် လှူ အူ ဒုဝ်။ ဘေ လုဝ် ဒိုဝ်း တး ဒုဝ် တီ၊ တဲး န့ ဘဲန် ပီ လှူ ဒီဂါဝ်၊ ပီ လှူ အီ ဒုဝ့် ဒီ ငဝ် ဘော ပီ လှူ အီ ကွယ် ကာဇု ဟူမ် ရိုမ်၊ တဲး ဒူအီ ဝီ ကာလဝ့် ဒီ ဇဝ်ဖြာ။” ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။ 16 တဲး ဂေ ဒူအီ ဘော မိူင် ဘောကာဂ့လျီတ် အာပ် ဒုဝ် တီ ဒီ ဂွန် ခုန်ဒီခမ် ခဲင် မိူင် အီဆာရေလ။ 17 ဒါ ကာညာ အီ အိုပ် မိူင် လုဝ် လှူ ဇိုဝ် တီ၊ တဲး န့ ဘဲန် ပီ လှူ အီ ဒုဝ့် ဒီ ငဝ်၊ ပီ လှူ ဒီဂါဝ် ဘော ပီ လှူ ပီ ဒီ ဒျီင်။ အန် လုဝ် လှူ ပီ လှူ တီ ဆေ ဒူအီ အီဆာရေလ ဘူင် ဘ့လွယ် အီ မုး မာဂျီန် ကာမာယ်၊ ဆီငဲ ဒီလှဝ် ဘော ဘ့လွယ် ဘဲန် မျုဝ် ဘဲန် မျုဝ်။ အန် ဒီ လှူ ဘော ပီ ဒီ လှူ အီ ဂဝ်း ဝဲန် မှာပ်၊ ပီ ဒီ လှူ ဒီဂါဝ်၊ ပီ ဒီ လှူ အီ ဒုဝ့် ဒီ ငဝ် ဘော ပီ ဒီ လှူ အီ ကွယ် ကာဇု ဟူမ် ရိုမ်၊ တဲး ဒူအီ အီဆာရေလ ဝီ ကာလဝ့် ဒီ ဇဝ်ဖြာ။”

18 ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း “မာဂျီန် ဒေါ ဂုဝ်၊ ဆီငဲ ဒေါ ဂုဝ် ဘေ လုဝ် ဒိုဝ်း ဂွန် မက် အာလူင့် အူ ဒုဝ် အီ တူ မိုဝ်း ဒူင် စှေ ဒူင် နဲ၊ ဝီ လှူ တဲး န့ ဘဲန် ပီ ဒီ လှူ အီ တဲး ဟုဝ် ဇဝ်ဖြာ ဆီငါ ဘွတ်။ 19 ဒါ အီ လှူ ဒီ ဇဝ်ဖြာ ဘော လုဝ် ဒိုဝ်း နှာမ် ဒုဝ် ပီ လှူ ဂေ အီ ဂဝ်း ဝဲန် မှာပ် တီ မင် ကာလဝ့်၊ ဝီ ဖဝ်း ဒီ ရွင့် ဟုဝ် ဇဝ်ဖြာ၊ ဒီ ကာစှူင့် လှူ ဘော ဖွုန် ကာတုဝ့် ဘော ဒီ မာလုဝ်း ဟုဝ် ဇဝ်ဖြာ အီ ကွယ် ဒီ ဝဲင် ဟုဝ် ဇဝ်ဖြာ အီ ကွယ် နာ ခဲင်။ 20 မာဂျီန် တီ၊ ဆေ ဟီ ဇမ် ဘူ ဆီငဲ၊ ဘေ လုဝ် ဘူင် ပါယ် တီ အာဒါ ဂေ အီ ဟဲ့ ကာလိုပ် ယီ တူ ဇေန့်ဇာ လွင် အန် တီ ဒီ အာတ့် ဘော အာဒါ ဂေ အီ တူ နပ် လွင် ပဲ့ ဟဲ့ ဘူင် ဂေ ဟဲ့ ကာလိုပ်။ ဆေ ဘေ ဘူင် ပါယ် တီ၊ န့ တဲး ဟုဝ် ဇဝ်ဖြာ ဝီ ဆီငါ။

21 မာဂျီန် ဒေါ ဂုဝ် တီ ဒေါ ဟဲ့ ဇမ် ဂိုဝ် ဒီ ဖွုန် ဆီငဲ၊ ဘေ ဘော လုဝ် ဘူင် ဘ့လွယ်။ ဘ့လွယ် တီ ဘေ လုဝ် လှုဝ်း ဇဝ်ဖြာ ဒေါ ကာလုဝ်း အန် ကာင် ဘေ။ အာဒါ ဘူ ဆီငဲ ဘေ လုဝ် ဟူမ် မီ ခါမုန် အီ တူ ဟပ် ဆီနမ် ဘြး။ 22 ဆီငဲ ကာစုး ဘ့လွယ် တီ၊ ဒါ ကာညာ အီ အိုပ် မိူင် လုဝ် လှူ မက် အာလူင့် အူ ဒုဝ်၊ တဲး န့ ဂဝ်း ဝဲန် မှာပ် အန် ဘော မှာပ် ဂေ ဒူအီ ဘောကာဂ့လျီတ်။ 23 ဒေါ ဘူင် ဂေ ဘ့လွယ် တီ အာဒါ ဘူ ဆီငဲ၊ ဒွန် ဆီငဲ အန် လုဝ် လှူ မက် အာလူင့် ဘူ ဒုဝ် ဘော မာဘူ အာလူင့် ဘူ ဒုဝ် အီ တူ မိုဝ်း ဒူင် စှေ ဒူင် နဲ၊ တဲး န့ ဘဲန် ပီ ဒီ လှူ အီ ဒုဝ့် ဒီ ငဝ်။ အန် ဘော လုဝ် လှူ ဘော မာပဲ အာလူင့်၊ တဲး န့ ဘဲန် ပီ ဒီ လှူ အီ ဂဝ်း ဝဲန် မှာပ် ဘောကာဂ့လျီတ်။ 24 လွင် ပီ ဒီ လှူ အီ မုး မက် အာလူင့် အူ ဒုဝ်၊ အန် လုဝ် လှူ ဘော ကာပဲ့ အူ အေဖာ ဒူပ် ဒွန် ဒုဝ်။ မာဘူ အာလူင့် ဒွန် ဒုဝ် အန် လုဝ် လှူ ကာပဲ့ အူ အေဖာ။ ကာပဲ့ ဒွန် အေဖာ အန် လုဝ် လှူ ဘော နာမန် အူ ကာပဝ်။

25 န့ မိုဝ်း ဘ့လွယ် အူ မျုဝ် အာဒါ ဘူ ဆီငဲ၊ စုး မာဂျီန် မ့ဘူ၊ ဆီငဲ ဂိုဝ် ဒီ မ့ဖန်။ ခုန်ဒီခမ် လုဝ် လှူ ပီ ဒီ လှူ အီ လှုဝ်း ဒေါ ကွယ် ဂေ ခဲင် ထိုပ် ဂေ။ န့ မုး ပီ ဒီ လှူ အီ ဂဝ်း ဝဲန် မှာပ်၊ ပီ ဒီ လှူ အီ ဒုဝ့် ဒီ ငဝ် ဘော ပီ ဒီ လှူ ကာပဲ့ ဂါယ် နာမန်။”