1 ဒူအီ ဝီ တွိုန် ပီ ဝီ ယဲတ့် ဟာဝ် အုဝ် ဒီ မာလုဝ်း ဘ့လာက် နာ ရေတ့် အီ ကွယ် နာ လေး ဆီငဲ ဟုဝ် ဇဝ်ဖြာ။ မာလုဝ်း တီ ယီ ဟဲ့ ဟွတ့် ကာဘိတ် အုန်။ 2 ဇဝ်ဖြာ ပီ ဝီ တဝ်း ဒီ အုဝ်၊ “မာလုဝ်း နီ လုဝ် ကာဘိတ် ဆေဆေ၊ အာဝ် ပွိုန် ဝိုဝ်း ဒေါ မှဝ်။ ဒူအီ အာဝ် မိုဝ်း ခေါ အူ ဝီ အီ ပွိုန် လိုပ် ဒီ မာလုဝ်း နီ။ ခုဝ်၊ ဇဝ်ဖြာ အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ အန် ဟဲ့ ဒွိုမ် လိုပ် ဒီ မာလုဝ်း တီ။ 3 န့ မိုဝ်း မီ ဒါ တာင် အူ ကာဒင် အီ ပွိုန် ဒီ လိုပ် တုတ့် နာ ခဲင် ဘော ဟူမ် ဒီ အာတ့် ဇဝ်ဖြာ။ ဂွန် ခုန်ဒီခမ် တီ အန် လုဝ် ကာလုဝ်း ဟူင် တာင် တွိုန်၊ ပီ ဝီ လေး ဒီ ဂြး ခဲင် ဒီ မာလုဝ်း တီ၊ ဝီ ဟာဝ် ဒူပ် န့တေန့် ဘြိမ် အန်။”

4 ဝါယ် အန် တီ အန် ပီ ဝီ ယဲတ့် ဟာဝ် အုဝ် ဒီ မာလုဝ်း အီ ကွယ် ဘ့လာက် နာ ကွာ ဘော ဝီ ဟာဝ် လိုပ်၊ ဇမ် နာ အာတ့် ဟုဝ် ဇဝ်ဖြာ။ အုဝ် ဝီ ယိုဝ် အာဖုင် ဒင်ခုဝ် ဇဝ်ဖြာ ဟဲ့ နုဝ့် ခဲင် ဟုဝ် ဇဝ်ဖြာ တီ။ အုဝ် ဘော ဝီ မုတ် ဂိုပ်၊ တဲး နာ အုဝ် ကော ဒိုက် ဒီ ကာဒါယ်။

5 ဇဝ်ဖြာ ဝီ ကာလာင် ဒီ အုဝ် တဝ်း၊ “အိုယ် ဂွန် ဒူအီ၊ တဲး မဲ နုဝ်၊ တဲး မဲ နပ် ခဲ့ ပီ ယိုဝ် ပီ ထူမ် မဲ ဒွန် မျုဝ်။ အုဝ် ဒီ ဘော ပွိုန် ဒီ ကာလာင် ဒွန် မျုဝ် လွင် ဟုဝ် ဇဝ်ဖြာ နီ ဒီ မဲ။ တဲး မဲ နုဝ် ဘော အာဆေ ဒီ ပွိုန် ဒီ လိုပ် လိုပ် လေး လေး ခဲင် ဟုဝ် ဇဝ်ဖြာ ဘော အာဆေ အီ တူ ပွိုန်။ တဲး မဲ နုဝ် ဆီချာ လွင် အန် တီ။ 6 တဲး မဲ ကာလာင် ဒီ ဂေ ဒူအီ အီဆာရေလ အီ အွန် ဒီ ကာဘး ဒီ အုဝ် ဆေဆေ။ တဲး မဲ တဝ်း၊ ‘ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် အုန် ပါယ် နီ။ အိုယ် ဘေ ဒူအီ အီဆာရေလ၊ တဲး ဘေ ဝဲန် အီ မွှိုမ် ကာအိး မွှိုမ် ကာဒါတ့် ပီ ဘူင် ဘေ၊ တဲး န့ ဟြာယ် တူတ့်။ 7 ဘေ ဟဲ့ ဘူင် အီ တူ မွှိုမ် ဘဲန် မျုဝ် ဘဲန် မျုဝ်။ ဒဲင် တီ န့ မိုဝ်း ဘော ဒူအီ အာမျုဝ် ဟဝ် အီ တူ ဒွိုမ် ဆွာ့ ဝဲန် ဟုန် လခါနာ အီမာယ်၊ အီ တူ မိုဝ်း နဝ်း ဆီ ထူမ် ဂြုဝ်း အုဝ်၊ ဘေ ဟဲ့ တဲး ဂေ တး လိုပ် ခဲင် ဟုဝ် ဇဝ်ဖြာ ဒူင် ဆီငါ ဘွတ်။ ပါယ် တီ ဘေ ဟဲ့ ဘူင် တဲး ဟုဝ် ဇဝ်ဖြာ ဝီ ကာဒါတ့်။ ဘေ ယီ လှူ ပီ ဒီ လှူ ဘေ ဒီ အုဝ် ဘော ဘျြီင် ဂေ နှာမ်။ ပါယ် တီ ဘေ ဟဲ့ ပျာတ့် ဝဲန် ဘော ပီ ဒွိုမ် ကာဆဲန့် ဘေ ဒီ အုဝ်။ 8 ဘေ မိူဝ် တူ ယွတ် လိုမ်လာ အီ ဆီငါ ဘွတ် ခဲင် ဟုဝ် အုဝ်။ ဘေ ယီ ဝီ တဲး ဒူအီ ဟဝ် ဝီ ဘ်ု ယွတ် လိုမ်လာ ဒူင် ဆီငါ ဘွတ် အုဝ် တီ။ 9 ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ဟွတ့် ကာလာင်၊ ဒူအီ အာမျုဝ် ဟဝ် အီ တူ ဒွိုမ် ဆွာ့ ဝဲန် ဟုန် လခါနာ အီမာယ် ဘော တူ ထူမ် ဂြုဝ်း အုဝ်၊ အီ ကွယ် ကာတဲ ဂေ ဒူအီ အီဆာရေလ၊ အုဝ် တူ ခ့ဝါင် တဲး ဂေ လိုပ် ခဲင် ဟုဝ် အုဝ် အီ မုး ဒူင် ဆီငါ ဘွတ်။’” ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။

10 ဇဝ်ဖြာ ပီ ဝီ ကာလာင် ဒီ အုဝ် ပေါ န့ ပွါ တဝ်း၊ “အုဝ် ဒီ ဒမ် မှာပ် ဘော ဒီ ဂေ ဒူအီ အာမျုဝ် အာလေဝီ ဒူပ် ဂေ ဒူအီ အီဆာရေလ အီ ဟဲ့ လေး ဒူင် ကွယ် အုဝ် ဘော ဝီ ဟာဝ် ကြိုပ် အာရိုပ် ရာင် ဂေ ဒူအီ အာမျုဝ် ဟဝ်။ 11 ဂေ ဝီ လုဝ် ဘူင် ဂါန် ခဲင် ဟုဝ် ဇဝ်ဖြာ၊ ဘ်ု မာလုဝ်း၊ ယွတ် လိုမ်လာ မင်ဆ အီ ကွယ် ခဲင် ဟုဝ် ဇဝ်ဖြာ ဘော ငဝ်း ဒုဝ် ဆတ်ဒါဝါ ပီ တး လှူ ဂေ ဒူအီ ကိူန် အီ တဲး န့ ဘဲန် ပီ ဒီ လှူ အီ ဒုဝ့် ဒီ ငဝ် ဘော ပီ ဒီ လှူ အာမျုဝ် ဟဝ်။ ဂေ ဘော လုဝ် ယွတ် မဲန် ဂေ ဒူအီ ကိူန် ဘော လုဝ် လိုမ်လာ ဂေ။ 12 ခုဝ်၊ န့ မုး ဂေ အီ ဟဲ့ ယဲတ့် ဒူအီ အီဆာရေလ ကြိုပ် အာရိုပ် ရာင်၊ တဲး ဂေ ကာလိုပ် ဘူင် အီ တူ မွှိုမ်။ ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ဟွတ့် တဝ်း၊ အန် ဒီ ဒမ် မှာပ် ဒီ ဂေ။ 13 ဂေ အာဝ် ဟူ ပွိုန် ဘူင် ဂါန် နာ အာတ့် ဇဝ်ဖြာ၊ ဘဲန် ဒါ အီ လှူ ဒီ ဇဝ်ဖြာ။ ဂေ အာဝ် ဟူ ပွိုန် တး ကာတတ် ဒူင် ဆီငါ ဘွတ်။ အာဝ် ဟူ ပွိုန် လိုပ် တး ခဲင် ဒူင် ဆီငါ ဘွတ် လွှိုမ် တူတ့်။ အာတီ မုး မှာပ် ပီ ဒမ် ဇဝ်ဖြာ ဒီ ဂေ ကူပ် ဘူင် ဂေ အီ မွှိုမ် ကာအိး ကာဆဝ်။ 14 ဇဝ်ဖြာ ယီ ဝီ စ်ု ဂေ ဘူင် မီ ဂါန် ပီ လုဝ် ဘူင် လုဝ် ရန့် ဂေ ခဲင် ဟုဝ် ဇဝ်ဖြာ။” ဇဝ်ဖြာ ဟဲ့ ကာလာင် အုန် ပါယ် တီ။

15 ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ “ဘေ ဒါ အီ လှူ ဒီ ဇဝ်ဖြာ အီ မုး ခြိုဝ် အာလေဝီ ဘော လှုက်လှာန် အာဇာဒူက်၊ ဘေ ဟဲ့ မိုဝ်း နဝ်း ဆိူဝ် နဝ်း မှာန် ဒီ ဘူင် ဂါန် ခဲင် ဟုဝ် ဇဝ်ဖြာ။ ဒေါ ဟဲ့ ဝဲန် ဂေ ဒူအီ အီဆာရေလ ဒီ အုဝ်၊ ဘေ ပွိုန် ဘူင် ဂါန် အုဝ် ဘော ပွိုန် တး ကာတတ် ဒူင် ကွယ် အုဝ် ဘော ပွိုန် ဒီ လှူ ပီ ဒီ လှူ ဒီ အုဝ် အီ မုး ဘျြီင် ဂေ နှာမ်။ 16 န့ မုး မီ ဒူအီ ဂေ တီ အီ ပွိုန် ဒီ လိုပ် ခဲင် ဟုဝ် ဇဝ်ဖြာ ဘော ဘူင် ဂါန် ဒီ ကာစှူင့် လှူ အီ ဒီ အုဝ် ဘော ယဲတ့် အီ ကြိုပ် အုဝ် ခဲင် ဟုဝ် ဇဝ်ဖြာ။

17 ဒေါ တး လိုပ် ဂေ ဒီ ဘာင် မာလုဝ်း ဝဲင် ဟုဝ် ဇဝ်ဖြာ နာ ခဲင် ဂေ လုဝ် တာ ခြိုင် အီ မုး ကာတမ် လုယ်။ ဒေါ ဘူင် ဂေ ဂါန် အုဝ်၊ ဘော မုး ခဲင် ဝဲင် ဟုဝ် ဇဝ်ဖြာ တီ၊ ဘော မုး ခဲင် ဟုဝ် ဇဝ်ဖြာ အာဝ် တဝ်း၊ ဂေ တူ ပွိုန် တာ ခြိုင် အီ မုး ဟိုက် မာဘူ။ 18 ဂေ ဘော လုဝ် စှိုပ် မာဂိန့် ဘိက် ကာတမ် လုယ်၊ စှိုပ် ဆီလာ ဘိက် ကာတမ် လုယ်၊ ကွဲ့ တဲး အိုမ် ဒီမှုး ဂေ ဒိုက်။ 19 အာတ့် လေး ဂေ ခဲင် ဝဲင် ဟုဝ် ဇဝ်ဖြာ၊ ဇမ် ဒူင် ကွယ် ဂေ ဒူအီ ကိူန်၊ ဂေ လုဝ် ဘုတ့် အုန် ခြိုင် ပီ တာ ဂေ ဒေါ ဘူင် ဂေ ဂါန် ခဲင် ဟုဝ် ဇဝ်ဖြာ။ ဂေ လုဝ် ဘုတ့် အုန် ခဲင် ဟူင် ဒီတဲတ် အီ ဆီငါ ဘွတ် တွိုန်။ ဟဲ့ ဟွတ့်၊ ဂေ လုဝ် ဝီ စှိုပ် ခြိုင် ဂေ၊ ကွဲ့ တဲး ဒူအီ ကိူန် ဇမ် ဒုက် ကူပ် ဆီ စှိုပ် ဂေ ခြိုင် ဘွတ် တီ။

20 ဂေ ဒါ အီ လှူ ဒီ ဇဝ်ဖြာ ယီ တူ ပွိုန် ဂါ့ ဂိန့် ဂေ။ ယီ တူ ပွိုန် တဲး ဟိုက် ဂိန့် ဂေ ဒီ တူင့်။ ဂေ လုဝ် ကပ် ခဲ့ ဒီ စှိတ်၊ ခဲ့ ဒီ ဆီချာ။ 21 ဂေ ဒါ အီ လှူ ဒီ ဇဝ်ဖြာ အာဝ် ပွိုန် ဒျီင် အိုမ် မာငုန် ဆေ ဂေ လိုပ် ခဲင် ဝဲင် ဟုဝ် ဇဝ်ဖြာ။ 22 ဂေ မိူဝ် တူ ပွိုန် ခတ် ဒိုဝ်း ယာ ဆီပြး ဘဲန် အီဘိုန့် ဂေ။ ဂေ လုဝ် ဒိုဝ်း အီ မုး ဒီဘျာ ဇဲတ် ဒူအီ အာမျုဝ် အီဆာရေလ။ ဆေ အာဝ် မုး ပါယ် တီ မိူဝ်၊ တဲး ဂေ ဒိုဝ်း မီ ယာ ဆီပြး အီ ဟဲ့ ဒွိုမ် မုး အီဘိုန့် ဒါ အီ လှူ ဒီ ဇဝ်ဖြာ ဝီ ဟဝ်။ 23 ဒါ အီ လှူ ဒီ ဇဝ်ဖြာ လုဝ် မာနုဝ် ဂေ ဒူအီ ပီ အိုပ် အုဝ်၊ တဲး ဂေ နပ် ဒီ ကာယဝ်း အီ မွှိုမ် ဂါယ် အီ တူ မွှိုမ် ဘော တဲး ဂေ နပ် အီ ဆီငါ ဘွတ် ဘော အီ တူ ဆီငါ ဘွတ် မျုဝ် အီ ဒူပ် ပီ ဒမ် ဒါရာ။

24 ဆေ န့ ဘော လုဝ် ဆုင်ဖျာတ် အာမူ အီ၊ ဂေ ဒါ အီ လှူ ဒီ ဇဝ်ဖြာ လုဝ် ဆုင်ဖျာတ်၊ တဲး န့ ဒူပ် ဒါရာ ပီ ဒမ် အုန် အုဝ်။ ဘ့လွယ် ပီ လုဝ် ဘူင် ဂေ၊ ဂေ လုဝ် ဘူင် ဒူပ် ခဲ့ ပီ ကာလာင် အုဝ်၊ ခဲ့ ပီ ဒမ် အုန် အုဝ်။ ဆီငဲ ဒီလှဝ် ဂေ လုဝ် တဲး န့ ဘဲန် ဆီငဲ ဘွတ်။

25 ဒါ အီ လှူ ဒီ ဇဝ်ဖြာ အာဝ် ပွိုန် ဘူင် တဲး ဒုဝ် ဂေ ကာဒါတ့် ကူပ် တာ ဒိုဝ် တာ ပါ ဒူအီ ယမ်။ မာလဲ၊ ဆေ န့ ဘော မုး ဂုန့် မာ အန်၊ ဂွန် အန်၊ အီကတ် ဝါ အန် အီ မုး ဂွန် အီမာယ် ဘော အီကတ် ဝါ အန် အီ မုး ဂွန် အီဘိုန့်၊ ဂေ အီ ဆီ မုး ကာညူမ် ဒီဘျာ၊ ဂေ ဟဲ့ ပွိုန် တာ ဒိုဝ် တာ ပါ ဒုဝ် ယမ် ဂေ။ 26 အန် ယီ ဝီ လုဝ် ဘူင် တဲး ဒုဝ် အန် ဝီ ဆီငါ ဘွတ်၊ လုဝ် ဘ်ု တဲး န့ ကော နုဝ့် ဘူ ဆီငဲ။ 27 ဟဲ့ ဟွတ့်၊ ဆေ အန် ဝီ ဟာဝ် လိုပ် ခဲင် ဝဲင် ဟုဝ် ဇဝ်ဖြာ အီ ကွယ် နာ ခဲင် ဘော လုဝ် ဘူင် ဂါန် အုဝ် ခဲင် ဟုဝ် ဇဝ်ဖြာ၊ အန် လုဝ် လှူ ပီ ဒီ လှူ အီ ဂဝ်း ဝဲန် မှာပ် အာဒါ ဒုဝ် ဘြိမ် အန်။ ဝါယ် အန် တီ၊ အန် ဟဲ့ ဝီ ပွိုန် ဘူင် ဂါန် ခဲင် ဟုဝ် ဇဝ်ဖြာ။” ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။

28 ဇဝ်ဖြာ ဝီ တဝ်း၊ “အုဝ် တဲး ဂေ ဘဲန် ဒါ အီ လှူ ဒီ ဇဝ်ဖြာ၊ ဟဲ့ ပီ အုဝ် ဒွါ ခါဂုန် ဒီ ဂေ၊ တဲး ဂေ ဘော လာယ် ကာဒု ဟာဝ်၊ တဲး န့ ကော ဇမ် စုဝ် လှုက်လှာန် ဂေ ဒွန် စုဝ် ဒွန် ဘာန်။ ဂေ မိူဝ် တူ ပွိုန် ခါဂုန် ဒီ ဂေ ဒူအီ အီဆာရေလ။ ခုဝ်၊ အုဝ် ဟဲ့ ဘဲန် ပီ ခါဂုန် ခဲ့ ပီ လုဝ် ဂေ။ 29 ဂေ ယီ ပွိုန် ဒီ ဟူမ် ခဲ့ ကွယ် ပီ လှူ အီ ဘော မုး ပီ လှူ ဒီဂါဝ်၊ ပီ လှူ အီ ဂဝ်း ဝဲန် မှာပ် ဘော ပီ လှူ အီ တဲး ဒူအီ ဝီ ကာလဝ့် ဒီ ဇဝ်ဖြာ ဘော ဒွန် မျုဝ် ပဲ့ ဟဲ့ လှူ ဂေ ဒူအီ အီဆာရေလ ဟဲ့ ဘဲန် တူတ့် ကြုဝ် ဂေ။ 30 ဂေ ဒါ အီ လှူ ဒီ ဇဝ်ဖြာ ဂေ ဘော ပွိုန် ဟူမ် ဘ့လေ ဒင် ပီ ဂဲပ် အုန် အီ ဒီ အာတ့် ဘော ပီ ဒီ လှူ အီ ဒီ အုဝ် အီ မုး ကြုဝ် အီ မွှိုမ် လွှိုမ် ဒွန် မျုဝ်။ ဆေ ဂေ ဒူအီ အီဆာရေလ လုဝ် လှူ ကာပဲ့ ပီ ကြိတ် ဂေ ဒီ အာတ့်၊ ဂေ လုဝ် ဒွါ ဒီ ဒါ အီ လှူ ဒီ ဇဝ်ဖြာ၊ တဲး န့ ဘဲန် ပီ ဒီ လှူ ဒီ အုဝ်။ ဆေ ဂေ ဘူင် ပါယ် တီ၊ အုဝ် ဒီ ဘော မွင့်ကာရာ ဒွါ နာ ဘွတ် နာ မွှိုမ် ဒီ ဂေ။ 31 ဂေ ဒါ အီ လှူ ဒီ ဇဝ်ဖြာ၊ ဂေ မိူဝ် တူ ပွိုန် ဟူမ် ယင် မာဆိမ် ဘော ယင် ဒုဝ် ဆတ် အီ ယမ် ရာင် အန် ဘော ပဲ့ ဟဲ့ ကဝ့် ယမ် မာဒုဝ် ပြဲ။” ဇဝ်ဖြာ ဟဲ့ ဟွတ့် ကာလာင် အုန် ပါယ် တီ။