1 ဝါယ် အန် တီ ဒူအီ ဝီ တွိုန် ပီ ဝီ ဒဲ့ အုဝ် ဟာဝ် ဒီ ဘာင် မာလုဝ်း အီ ကွယ် ဘ့လာက် နာ လေး ဆီငဲ။ 2 အုဝ် ဘော ယိုဝ် အာဖုင် ဒင်ခုဝ် ဇဝ်ဖြာ ပီ ကြိုပ် ဂေ ဒူအီ အီဆာရေလ ဟဲ့ တး နာ လေး ဆီငဲ။ ဂြုဝ်း အန် ဘော ပီ ဟမ် အိုမ် နမ်မုက်ဆာရာ။ ကူပ် အာရူင် အန်၊ န့ ဘော ဘ့လာင် တူတ့် ဒဲင် ကာဒါယ်။ 3 ပီ ဘျ အန် တဲး အုဝ် ယိုဝ်၊ န့ ဘော ပီ ပီ ဘျ ဇဝ်ဖြာ ဒီ အုဝ် ဒေါ တး ပျာတ့် အန် ဇဝ် မိူင် ယေရူဆာလဲမ်။ န့ ဘော ပီ ပီ ဘျ အန် ဇဝ် ဒီ အုဝ် ဒေါ ကွယ် အုဝ် ဒီ ခူပ် အိုမ် ခေဘာ တွိုန်။ ပါယ် တီ အုဝ် မိူဝ် ဝီ ဂိုပ်၊ တဲး နာ အုဝ် ကော ဒိုက် ဒီ ကာဒါယ်။ 4 အာရူင် အာဖုင် ဒင်ခုဝ် ဇဝ်ဖြာ တီ၊ န့ ဘော ဟာဝ် လိုပ် ခဲင် ဟုဝ် ဇဝ်ဖြာ ဒီ မာလုဝ်း အီ ကွယ် ဘ့လာက် နာ လေး ဆီငဲ။ 5 ဒေါ အန် တီ နဝ်း ဖွိုမ် ဇဝ်ဖြာ ဘော ဒိုဝ်း ဟာဝ် အုဝ် ခဲင် ဝဲင် ဟုဝ် ဇဝ်ဖြာ အီ ကွယ် နာ ခဲင် ဘော အာဖုင် ဒင်ခုဝ် ဇဝ်ဖြာ ဟဲ့ ကွယ် နုဝ့် ခဲင် ဟုဝ် ဇဝ်ဖြာ။

6 ဒူအီ တွိုန် မိူဝ် စွင့် ခူပ် အုဝ်။ အုဝ် ဘော ယိုဝ် ဂြုဝ်း အူ မျုဝ် အီ လေး ခဲင် ဟုဝ် ဇဝ်ဖြာ တွိုန်။ အန် တဝ်း ဒီ အုဝ်၊ 7 “အိုယ် ဂွန် ဒူအီ၊ မာလာင် ဒူင် တုတ့် အုဝ် ဟဲ့ ကွယ် ဒီ နီ။ အုဝ် မိူဝ် ဟဲ့ ဘ့လေး ပ့လဝ် အုဝ် ဒီ နီ။ အုဝ် ဒီ ဘော ကွယ် ဒီ နီ ဒူပ် ဂေ ဒူအီ အီဆာရေလ ဘော အိုပ် ဂေ ဆေဆေ။ ဂေ ဒူအီ အာမျုဝ် အီဆာရေလ ဘော ခုန်ဒီခမ် ဂေ အာဝ် ဟူ ဘူင် တဲး ဆာရေ အုဝ် စှိုမ် ကူပ် ကြိုပ် ဂေ ဇဝ် ဘဲန် ကာဒင် ဘဲန် ကာဒင် ပီ ကြိုပ် ဂေ ဒူအီ ဟဝ် ဘော ကူပ် ကြိုပ် ဂေ အာရိုပ် ရာင် အီ တူ မိုဝ်း အာဆာက် ပီ ကြိုပ် ဂေ ခုန်ဒီခမ် ဒဲင် နွန် စာ ဒွန် ပ့လုဝ့်။ 8 ဂေ ဟဲ့ ဘ့လေး မာလုဝ်း ဂေ ဘော ရွင့် ဟုဝ် ဂေ ခူပ် မာလုဝ်း ဘော ရွင့် မာလုဝ်း ဟုဝ် အုဝ်၊ တဲး န့ မိုဝ်း မီ ရဲင် အီ ကာခန် ဒီ ကာတဲ ဂေ ဂါယ် အုဝ်။ ဒေါ ဘူင် ဂေ ပါယ် တီ ဂေ ဟဲ့ ဘူင် အီ မွှိုမ် ကာအိး။ အုဝ် မိူဝ် ဟဲ့ ရူ ကာဆဝ် ဒီ ဂေ ဘော ပျာတ့် ဂေ၊ တဲး ဂေ လိုဝ် စှိုမ်။ 9 ဒေါ တီ နီ တဲး ဂေ စူ ကြိုပ် ဇဝ် ဘဲန် ကာဒင် ဘဲန် ကာဒင်။ တဲး ဂေ ဝဲန် ဘော ဒုဝ် ယမ် ခုန်ဒီခမ် ဂေ။ ဆေ ဂေ ဘူင် ပါယ် တီ အုဝ် ဒီ ဘော ကွယ် ကာတဲ ဂေ ဆေဆေ။”

10 ဇဝ်ဖြာ ပီ ဝီ ကာလာင် ဟာဝ် ဒီ အုဝ် တဝ်း၊ “အိုယ် ဂွန် ဒူအီ၊ တဲး မဲ ကာလာင် လွင် ဟုဝ် ဇဝ်ဖြာ ဒီ ဂေ ဒူအီ အီဆာရေလ၊ တဲး ဂေ ဂဝ် ဒီ ယွတ် ပီ ပါယ် အာရိုပ် အန် တဲး ဂေ ဆာယ် ကူပ် မှာပ် ဂေ။ 11 ဆေ ဂေ ကော ဝီ ဆာယ် အီ ကူပ် မှာပ် ပဲ့ ဟဲ့ ဘူင် ဂေ၊ မဲ လုဝ် ဝီ ကာလာင် ဒီ ဂေ လွင် ဟုဝ် ဇဝ်ဖြာ၊ ကာလာင် ပီ ပါယ် အာရိုပ် အန်၊ ကာလာင် ပီ ပါယ် မာလုဝ်း ဒူင် လိုပ် ဒူင် လေး အန်၊ ပီ ပါယ် အာရိုပ် အန် ဘ့လာက် နာ ရေတ့် ဘော ပီ ပါယ် ဒီ ဘ့လေး ခြိုင် တာ အန် ဒွန် ဇိုဝ် ဒွန် မျုဝ် ဘော ပီ ပါယ် ဒါရာ အန်။ တဲး မဲ ဒဲမ် အုန် လွင် အန် တီ ဘောကာဂ့လျီတ်၊ တဲး ဂေ နပ် ပီ ပါယ် အီ ဒီ ဘူင် ဒီ ခြိုင် အုန်၊ တဲး ဂေ ဘော ပွိုန် ဒီ ဘူင် ဒူပ် ဒါရာ ဇဝ်ဖြာ။ 12 ဒါရာ လွင် ဟုဝ် ဇဝ်ဖြာ တီ၊ န့ ပါယ် နီ။ ကာဒါယ် အီ ကွယ် ရူပ် ဟုဝ် ဇဝ်ဖြာ ဒဲင် နွန် တွိုန် ဟဲ့ ဘဲန် တူတ့် ဒူင် ဆီငါ ဘွတ် ကာဆဝ်။

13 ဂေ ဒိုဝ်း မင် ဂဝ် ပီ ဂဝ် ဂေ ကာစှူင့် လှူ ဒီ ဟုဝ် ဇဝ်ဖြာ အီ မုး ကာနိး အီ တူင့် အူ ကာနိး ဒီ အူ ကာဘာ ဒဲ။ ခဲ့ တာင် ခဲ့ ကာဝဝ်း ကာစှူင့် လှူ ဒီ ဇဝ်ဖြာ တီ၊ န့ ပါယ် နီ။ ဘာင် ခူပ် ဒီ စေန့် အန်၊ န့ ဘော တူင့် အူ ကာနိး။ နာ ကာဝဝ်း အန် အူ ကာနိး။ နာ တာင် ဒီ ခူပ် ဘာင် အန် ဘ့လာက် နာ ရေတ့် အူ ကာဆာန်။ 14 စုး ဒီ ကာဒါယ် ဟုဝ့် ဇမ် ဒီ ဘာင် ဒီတဲတ်၊ န့ စာ အာ ကာနိး။ ဘော ကာဝဝ်း အူ ကာနိး ကာလင်။ စုး ဒီ ဘာင် နာ တေတ့် ဇမ် ဒီ ဘာင် နာ တာင် နာ စာ၊ န့ ကွယ် ဖွုန် ကာနိး၊ ကာဝဝ်း အန် အူ ကာနိး ကာလင်။ 15 အီ မုး ခြွင့် ဒဲင် အီ မုး ဒူင် ဒုဝ့် ဂေ ပီ ဒီ လှူ အီ ဒုဝ့် ဒီ ငဝ်။ န့ စာ ဖွုန် ကာနိး။ ဒီ ကာတုဝ့် အန် ဖွုန် ကာတုဝ့် တွိုန် ဘော ကာတူတ့် ဘတ့်။ 16 ကာစှူင့် လှူ တီ၊ န့ ဘော ကွယ် ဖွုန် ဘ့လာက် ဖွုန် ကာတုဝ့် ကာရမ် ဒွန် ဘ့လာက်။ အူ ဘ့လာက် ဂိုဝ် ဒီ အာ ကာနိး။ 17 ခြွင့် အီ ကွယ် နာ ဒဲင် မိူဝ် ကွယ် ဖွုန် ဘ့လာက် ဖွုန် ကာတုဝ့် ကာရမ် ဒွန် ဘ့လာက်။ အူ ဘ့လာက် ဂိုဝ် ဒီ ဖွုန် ကာနိး။ ဘာင် အီ ကွယ် ဒီ ခူပ် အန် ကာဝဝ်း အူ ကာဆာန်။ ဘော ဒင် အန် ကာဝဝ်း အူ ကာနိး ဘော ရူပ် ဒွန် ဘ့လာက်။ န့တဲင် အီ ဟုဝ့် ဒီ ကာစှူင့် လှူ တီ၊ န့ ဘော ဟုဝ့် ဘ့လာက် နာ လေး ဆီငဲ။

18 ဒူအီ တွိုန် ပီ ဝီ တဝ်း ဒီ အုဝ်၊ “အိုယ် ဂွန် ဒူအီ၊ ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် နီ။ တဲး မဲ ထူမ် ဆီချာ ဒါရာ လွင် ပီ ဒီ လှူ အီ ဒုဝ့် ဒီ ငဝ် ဘော လွင် ခြဝ်း နှာမ် ဒီ ကာစှူင့် လှူ တီ။ 19 ဆေ ဟဲ့ ဟွတ့် ဘူင် ကာစှူင့် တီ လုဝ် လှူ မက် အာလူင့် အူ ဒုဝ် အာဒါ ဘ့လွာ့ ဝဲန် မှာပ် ဒါ အီ လှူ ဒီ ဇဝ်ဖြာ။ န့ မိုဝ်း မီ ခြိုဝ် အာလေဝီ၊ လှုက်လှာန် အာဇာဒူက် အီ ပွိုန် တး ဇမ် ဒီ အာတ့် အုဝ်၊ ဘူင် ဂါန် အုဝ်။” ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် အုန် ပါယ် တီ။ 20 ဇဝ်ဖြာ ပီ ဝီ တဝ်း၊ “ဂေ ဒူအီ ခြိုဝ် အာလေဝီ တီ လုဝ် ဒိုဝ်း နှာမ် မက် အာလူင့် မင် ကာလဝ့်၊ ဝီ ဖဝ်း ဒီ ကာစှူင့် လှူ တွိုန် ဖွုန် ကာတုဝ့်၊ ခြဝ်း ဘော ဒီ ဘာင် အန် အီ ကွယ် နာ ဒဲင် ဘော ဖွုန် ဘ့လာက်၊ တဲး န့ ကော ရူပ်။ ဆေ မဲ ဘူင် ပါယ် တီ၊ မဲ ဘူင် တဲး ကာစှူင့် လှူ တီ ဆီငါ ဘွတ်၊ တဲး န့ ကာလဝ့် ဒီ ဇဝ်ဖြာ။ 21 မဲ လုဝ် ဒိုဝ်း မက် အာလူင့် အာဒါ ပီ ဒီ လှူ အီ ဂဝ်း ဝဲန် မှာပ်၊ ဒုဝ့် ကာဆိုမ် ဒူင် ဒွိုမ် ကာလာင် အုန် အုဝ် နာ ရေတ့် ဝဲင် ဟုဝ် ဇဝ်ဖြာ။

22 ပါ ခဲညှာ၊ မဲ လုဝ် ဒိုဝ်း မာပဲ အာလူင့် အူ ဒုဝ် အီ တူ မိုဝ်း ဒူင် စှေ၊ လှူ တဲး န့ ဘဲန် ပီ ဒီ လှူ အီ ဂဝ်း ဝဲန် မှာပ်။ မဲ လုဝ် ဒိုဝ်း ဘော နှာမ် မာပဲ တီ၊ ဘူင် တဲး ကာစှူင့် လှူ တီ ဆီငါ ဘွတ်၊ တဲး န့ ပီ ဒေါ ဟဲ့ ဒိုဝ်း မဲ နှာမ် မာမက် တဲး ကာစှူင့် တီ ဆီငါ ဘွတ်။ 23 ဆေ မဲ ဟဲ့ ဟွတ့် ဘူင် ပါယ် တီ၊ မဲ လုဝ် ဝီ ဒိုဝ်း ဂွန် မက် အာလူင့် အူ ဒုဝ် အီ တူ မိုဝ်း ဒူင် စှေ ဒူင် နဲ ဘော ဂွန် မာဘူ အာလူင့် အူ ဒုဝ် အီ တူ မိုဝ်း ဒူင် စှေ ဒူင် နဲ၊ ဝီ လှူ ဒီ အုဝ်။ 24 ဂေ ဒါ အီ လှူ ဒီ ဇဝ်ဖြာ၊ ဂေ လုဝ် ဒိုဝ်း ဆယ့် ဖဝ်း။ ဟဲ့ ဟွတ့် ဂေ ဘော လုဝ် ဝီ ဒုဝ့် ဒုဝ် ဂေ တီ ခဲင် ငဝ်၊ တဲး န့ ဘဲန် ပီ ဒီ လှူ ဒီ အုဝ်။

25 မဲ လုဝ် ဒိုဝ်း မာပဲ အာလူင့် အူ ဒုဝ်၊ မာဘူ အာလူင့် အူ ဒုဝ် ဘော မာမက် အာလူင့် အူ ဒုဝ် အီ တူ မိုဝ်း ဒူင် စှေ၊ ဘူင် တဲး န့ ဘဲန် ပီ ဒီ လှူ အီ ဂဝ်း ဝဲန် မှာပ်။ မဲ လုဝ် ဘူင် ပါယ် တီ ဒွန် ဆီငဲ ဒွန် ဆီငဲ၊ တဲး န့ ကော နုဝ့် ဘူ ဆီငဲ။ 26 အာဒါ ဘူ ဆီငဲ၊ ဂေ ဒါ အီ လှူ ဒီ ဇဝ်ဖြာ လုဝ် ဘူင် တဲး ကာစှူင့် လှူ တီ ဆီငါ ဘွတ်၊ တဲး န့ ပွိုန် ဒီ လှူ ဘဲန် မျုဝ် ဘဲန် မျုဝ်။ 27 ဝါယ် ဟဲ့ ဟွတ့် နုဝ့် ဘူ ဆီငဲ၊ ဝီ စုး ဆီငဲ န့ဒါ ဟာဝ် နာ အာတ့်၊ ဂေ ဒါ အီ လှူ ဒီ ဇဝ်ဖြာ လုဝ် လှူ ပီ လှူ အီ ဒုဝ့် ဒီ ငဝ် ဘော ပီ လှူ အီ ကွယ် ကာဇု ဟူမ် ရိုမ်။ ပန် တီ ပီ ဘူင် ဘေ ကော ဒီ လဝ့် နဝ်း အုဝ်။” ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။