ဒူအီ ဝီ တွိုန် ပီ ဝီ ဒဲ့ အုဝ် ဟာဝ် လိုပ် ခဲင် ဝဲင် ဟုဝ် ဇဝ်ဖြာ။ ဟဲ့ ဟွတ့်၊ အန် ပီ ဝီ ယဲတ့် ဟာဝ် အုဝ် ဒူင် ကွယ် ဟူင် အီ ကွယ် ဘ့လာက် နာ ကွာ ဟုဝ် ဇဝ်ဖြာ။ ဟူင် တီ အန် တူ ဘော နာယ် ဒီ လာယ် ကာတူင့် ဒီ ဟူင် အီ ကွယ် ဒီ ကာတုဝ့် နာ ကွာ ဟုဝ် ဇဝ်ဖြာ။ 2 ဟူင် တီ ဘော မိုဝ်း မာလုဝ်း အီ ကွယ် နာ ကွာ၊ နာ တူင့် အန် အူ မာယဝ်း ကာနိး။ နာ ကာဝဝ်း အန် ဖန် ဂိုဝ် ကာနိး။ 3 ဟူင် တီ အူ ဘ့လာက် ဘော မာငး ဟာဝ် ဒူင် တူ မိုဝ်း မာဆေ၊ အီ တူင့် အာ ဂိုဝ် ကာနိး။ အီ မာငး ဒီ ဝဲင် ဟုဝ် ဇဝ်ဖြာ အီ ကွယ် နာ ဒဲင် ဟူင် တီ ပေါ အူ ဘ့လာက်၊ ဝီ မာငး ဟာဝ် ဒီ ဝဲင် ဟုဝ် ဇဝ်ဖြာ အီ ကွယ် ဘ့လာက် နာ ရေတ့်။ ဘော အာ ဘ့လာက် ဟဲ့ မိုဝ်း ဟူင် အူယ် ခြွင့်။ 4 ဒီ ကာတဲ ဟူင် အူယ် ခြွင့် တီ၊ မိုဝ်း န့တေန့် အီ ပွိုန် ဟာဝ် ဝိဝ် ဟာဝ် ဝေန့်။ နာ ကာဝဝ်း အန် ဂိုဝ် ကာနိး။ နာ တူင့် အန် အူ မာယဝ်း ကာနိး ကော ဇမ် ဒီ မာလုဝ်း အီ ကွယ် ဘ့လာက် နာ ကွာ။ 5 ဟူင် ဒီတဲတ် အီ ကွယ် ခြွင့် နာ ဒဲင် ဟဲ့ ရာမ် ကာချီ့ လွှိုမ် ခြွင့် အီ ကွယ် နာ ခြိုမ် ဘော ဒီ ကာတဲ တွိုန်။ ခုဝ်၊ ခြွင့် နာ ဒဲင် တီ ဟဲ့ ဝီ ပီလိုပ် အီ စဲက်။ 6 ပီ ဘော ဟဲ့ မုး အူယ် ခြွင့် မိူဝ်၊ ခြွင့် နာ ဒဲင် ယီ တူ မိုဝ်း ရွင့် ပီ ခြွင့် နာ ခြိုမ်။ ခုဝ် အန် တီ၊ ဟူင် အန် ဘော ရာမ် ကာချီ့ လွှိုမ် ခြွင့် နာ ခြိုမ် ဂေ ခြွင့် ဒီ ကာတဲ တွိုန်။ 7 ရဲင် အန် ဘ့လာက် နာ ရေတ့် အီ ကွယ် ခူပ် ဟူင် ဂေ တွိုန်၊ န့ ဘော ဝီ လာယ် ကာဆိူဝ် ဒီ ဝဲင် ဟုဝ် ဘ့လာက် နာ ရေတ့် အီ ကွယ် ဒီ အာတ့် ဟူင် ဒီတဲတ် ဂေ တွိုန်။ နာ တူင့် အန် ဖန် ဂိုဝ် ကာနိး။ 8 ဟူင် အီ လာယ် ကာဇာပ် ဒီ ရဲင် ဟုဝ် ဘ့လာက် နာ ရေတ့်၊ နာ တူင့် အန် ဖန် ဂိုဝ် ကာနိး။ ဟူင် ဒီတဲတ် အီ မုး နာ အာတ့် ဟုဝ် ဇဝ်ဖြာ တွိုန်၊ န့ ဘော တူင့် အူ မာယဝ်း ကာနိး။ 9 ဟူင် ဒီတဲတ် အီ ကွယ် နာ ခြိုမ် ဘ့လာက် နာ လေး ဆီငဲ ဘော ပွိုန် လိုပ် တး ဒီ ရဲင် အီ ကွယ် နာ ရေတ့်။

10 ဘ့လာက် နာ တေတ့်၊ န့ ဝီ မိုဝ်း ဟူင် ဘဲန် ဟူင် အီ ဒိုက် ဒီ ရဲင် အီ ကွယ် ရူပ် ဟုဝ် ဇဝ်ဖြာ။ 11 နာ အာတ့် ဟူင် ဂေ တီ၊ န့ ဘော မိုဝ်း န့တေန့် အီ ပွိုန် ဟာဝ် ဝိဝ် ဟာဝ် ဝေန့် အီ ပီ န့တေန့် ပွိုန် ဟာဝ် ဝိဝ် ဟာဝ် ဝေန့် ဘ့လာက် နာ ကွာ။ နာ ကာဝဝ်း၊ နာ တာင် အန် ဘော ပီ ပါယ် မာလုဝ်း အန်၊ န့ ဘော ပီ တူတ့် ဘ့လာက် နာ ကွာ။ 12 ဟူင် ဒီတဲတ် အီ ကွယ် ဘ့လာက် နာ တေတ့် ဘော ပွိုန် လိုပ် တး ဘ့လာက် နာ လေး ဆီငဲ အီ မိုဝ်း ရဲင် အီ ပီ ရဲင် အီ လာယ် ကာဆိူဝ် တွိုန်။

13 ဒူအီ ဝီ တွိုန် ဝီ တဝ်း ဒီ အုဝ်၊ “ဟူင် ဒီတဲတ် အီ ကွယ် ဘ့လာက် နာ ကွာ ဘော ဟူင် ဘ့လာက် နာ တေတ့် န့ မုး ဟူင် ဒူင် ကွယ် ဂေ ဒါ အီ လှူ ဒီ ဇဝ်ဖြာ၊ ဂေ အီ ပွိုန် လိုပ် ဒူင် ဘွတ် ဒူင် ကွယ် ဇဝ်ဖြာ၊ ဂေ ဘော ပွိုန် ဟူမ် ပီ လှူ အီ ဆီငါ ဘွတ် လွှိုမ် တူတ့်။ န့ ဘော မုး ပီ ဒီ လှူ ငှုဝ်၊ ပီ ဒီ လှူ အီ ဂဝ်း ဝဲန် မှာပ် ဘော ပီ ဒီ လှူ အီ ဝီ လာယ် ကာလဝ့် ဒီ ဇဝ်ဖြာ။ ခုဝ်၊ ဒူင် တီ ဟဲ့ မုး ဒူင် ဆီငါ ဘွတ်။ 14 ဆေ ဂေ ဒါ အီ လှူ ဒီ ဇဝ်ဖြာ ဟဲ့ ဟွတ့် လိုပ် ခဲင် ဟုဝ် ဇဝ်ဖြာ တွိုန်၊ ဆေ ဂေ ဆီ ဝီ လေး၊ လိုပ် ခဲင် ဝဲင် ဟုဝ် ဘ့လာက် နာ ရေတ့်၊ ဂေ လုဝ် ဘုတ့် အုန် ခြိုင် ပီ တာ ဂေ ဒေါ ဟဲ့ ဘူင် ဂေ ဂါန် ဇဝ်ဖြာ။ ခုဝ်၊ ခြိုင် တီ ဟဲ့ ဆီငါ ဘွတ်။ ဂေ လုဝ် ဘုတ့် အုန် ခြိုင် တီ ခဲင် ဟူင် ဂေ။ ဟဲ့ ဟွတ့်၊ ဂေ လုဝ် ဝီ စှိုပ် ခြိုင် ပေါ ဖိူန် အီ တူ ဆီငါ ဘွတ် ဘော ဝီ ပွိုန် လေး ဟာဝ် ဒူင် ကွယ် ဂေ ဒူအီ ကိူန်။”

15 ဒူအီ ဝီ တွိုန် ဟဲ့ ဟွတ့် ဂဝ် တူတ့် ဝဲင် ဟုဝ် ဇဝ်ဖြာ ဘ့လာက် နာ ခဲင်၊ အန် ဘော ဝီ ယဲတ့် အုဝ် လေး ခဲင် ဝဲင် ဟုဝ် ဇဝ်ဖြာ အီ ကွယ် နာ ခဲင်၊ လေး ဒီ ဘာင် မာလုဝ်း ဘ့လာက် နာ လေး ဆီငဲ။ အန် ဘော ဂဝ် ရူပ် ရဲင် ဘ့လာက် နာ ရေတ့် တွိုန်။ 16 အန် ဘော ဒိုဝ်း မင် ဂဝ် တွိုန်၊ ဂဝ် ဘ့လာက် နာ လေး ဆီငဲ အီ ကွယ် ဖန် မာယဝ်း ကာနိး။ 17 အန် ပီ ဝီ ဂဝ် ဘ့လာက် နာ ကွာ အီ မုး ဖန် မာယဝ်း ကာနိး အီ ဒူပ် မင် ဂဝ် တီ။ 18 အန် ပီ ဝီ ဂဝ် ဘ့လာက် နာ တေတ့် ဘော မုး ဖန် မာယဝ်း ကာနိး အီ ဒူပ် မင် ဂဝ် တီ။ 19 ဟဲ့ ဟွတ့်၊ အန် ပီ ဝီ ဂဝ် ဘ့လာက် နာ ဂေတ့် ဆီငဲ ဘော တူင့် ဖန် မာယဝ်း ကာနိး အီ ဒူပ် မင် ဂဝ် တီ။ 20 ပါယ် တီ ရဲင် အီ ကွယ် ရူပ် ဟုဝ် တီ၊ အူ ဘ့လာက် ကွယ် ဖန် မာယဝ်း ကာနိး။ ဘော ဖွုန် ဘ့လာက် ဟဲ့ ကာရမ်။ ရဲင် တီ ဟဲ့ မိုဝ်း ရဲင် ကော ရူပ်၊ တဲး န့ ကာယဝ်း ဘ့လာက် အီ ဆီငါ ဘွတ် ဘော ဘ့လာက် အီ တူ ဆီငါ ဘွတ်။