ပါယ် တီ တဲး မဲ ဒဲ့ ဂေ အီကတ် ဝါ မဲ အီ မုး ဒူအီ အီဆာရေလ၊ အီ မုး အီမာယ် တဝ်း၊ “ဘေ မုး ဒူအီ ပီ အိုပ် ဇဝ်ဖြာ။” တဲး မဲ ပီ ဝီ ဒဲ့ အီကတ် ဝါ မဲ အီ မုး ဂွန် အီဘိုန့် တဝ်း၊ “ဂွန် အီဘိုန့် ပီ ရွက့် အုဝ်။”

2 အာဟုဝ်ဆီယာ ဝီ တဝ်း၊ “အိုယ် ဘေ ဂွန် အုဝ်၊ တဲး ဘေ အေး မာ ဘေ။ အန် အာဝ် ဟူ မုး အီဘိုန့် အုဝ်။ အုဝ် မိူဝ် ဟူ မုး အီမာယ် အန်။ တဲး ဘေ ဝီ မှာန့်၊ တဲး အန် ဝဲန် နဝ်း ကိူန် အန် ဘော နဝ်း ယာ မာလမ်။

3 ဆေ အန် ယီ တူ ဝဲန် အာဂျာင် အန် တီ၊ အုဝ် ဒီ ဘုတ့် ဝဲန် ခြိုင် ပီ တာ အန်၊ တဲး အန် ကွယ် ဒုဝ် ဂ့လ၊ တဲး န့ ပီ ဒေါ ဂွိုတ် တး အန်။ အုဝ် ဒီ ဘူင် တဲး အန် ပီ ကာဒါယ် အီ ဟဲ့ ကာဟဝ်း တွင့်၊ ဟဲ့ ဝီ ဒး မာအ မာအ၊ တဲး အန် ယမ် ပီ ကာဒါယ် အီ ဆီ ဒျီင် ကာဆဝ် အိုမ်။

4 ဆေ အီဘိုန့် တီ မိုဝ်း ဂွန်၊ အုဝ် မိူဝ် တူ ရွက့် ဂေ ကူပ် မုး ဂေ ဂွန် ယာ မာလမ်။

5 မာ ဂေ ဟဲ့ ဘဲန် ယာ မာလမ် ဘော မိုဝ်း ဂွန် ဂေ တီ။ အန် ဟဲ့ ဘူင် အီ မွှိုမ် ကာအိး အီ မွှိုမ် ဆာယ်။ အန် ဘော ဝီ တဝ်း၊ ‘အုဝ် ဒီ ဒူပ် ဂေ အီမာယ် အီ ဟဝ်။ ဂေ ဒီ ဒွါ ပီ ဒီ ဟူမ် ပီ ဒီ တာ ဒီ အုဝ်၊ ဒွါ ခြိုင် အီ ဒဝ့် တာ ဟိုက် မာဘူ ဘော ခြိုင် အီ မုး ဘိက် ကာတမ် လုယ်၊ ဒွါ ဘော နာမန် ဘော အိုမ် မာငုန်။’

6 ကူပ် န့ ပါယ် တီ အုဝ် ဒီ ဒိုဝ်း ယွုန် မာအာတ့် လူင့် ရူပ် အန်။ အုဝ် ဒီ ဒိုဝ်း ဘော မာဝ် မာအုတ်၊ ဂုဝ် တဲး န့ ကာဘိတ် အန်။

7 အန် ပီ ဘော ဝီ ကာဘ့လဲပ် ဒူပ် ဒီ ပန် ဂေ ပါဝ် အန်၊ အန် အာဝ် ဟူ ခြပ်။ အန် ပီ ဘော ဝီ ဟြေတ့် ဂေ မိူဝ်၊ အာဝ် ဟူ ယိုဝ်။ ဒေါ အန် တီ အန် ဝီ တဝ်း၊ ‘အုဝ် ဒီ ဝီ ဝေန့် ဒူင် ကွယ် အီမာယ် ဘြိမ် အုဝ်၊ ဒူင် ကွယ် အုဝ် အာတ့် နီ။ န့ ဆီ မွှိုမ် လွှိုမ် ဒူင် ကွယ် အုဝ် ဒေါ တီ နီ။’

8 အန် ယီ တူ နပ်၊ န့ မုး အုဝ် အီ ဒွါ ငှုဝ် ဂေ ဒီဂါဝ် ဘော နာမန် ဘော အိုမ် မာငုန်။ အန် မိူဝ် တူ နပ်၊ ရွိုန် ဂေ ခြိဝ် န့ မုး အုဝ် အီ ဒွါ။ အန် ယီ စ်ု ရွိုန် တီ တဲး အန် ကြိုပ် ဇဝ် ဘာလ။

9 ကူပ် န့ ပါယ် တီ အုဝ် ဒီ ဝီ ဒိုဝ်း ဝိဝ် ငှုဝ် အုဝ် တီ ဒေါ မုး အာခြာဝ် ဒီ ဆုဝ့် ငှုဝ်။ အုဝ် ဒီ ဘော ဒိုဝ်း ဝိဝ် ဘော နာမန် ဘော အိုမ် မာငုန် ကာမာယ် ဒေါ မုး အာခြာဝ် လေး အန်။ အုဝ် ဒီ ဝီ ဒိုဝ်း ဝိဝ် ဘော ဟိုက် မာဘူ ဘော ကာတမ် လုယ် ပဲ့ ဟဲ့ ဒဝ့် အန် ဘော စိန့် ဘဲန် ခြိုင် တာ အန်။

10 အုဝ် ဒီ ဘော ဘုတ့် ဝဲန် ခြိုင် တာ အန်၊ ဝီ တဲး အန် ကွယ် ဒုဝ် ဂ့လ နာ အာတ့် ပါဝ် အန်။ န့ မိူဝ် တူ မိုဝ်း အာဆေ အီ ပွိုန် စွယ် အန်၊ တဲး အန် လေး ခဲင် ဒဲ အုဝ်။

11 အုဝ် တူ တဲး အန် ဘူင် ဘ့လွယ် ပီ ဒွိုမ် ဘူင် အန် အီ မုး ဘ့လွယ် ပီ ဘူင် အန် ဒွန် ဆီနမ်၊ ဘ့လွယ် ဆီငဲ လိူန်လပ် ဘော လိူန်မူန် ဘော ဘ့လွယ် ဆီငဲ ဒီလှဝ် ဘော ဘ့လွယ် ဘဲန် မျုဝ် ဘဲန် မျုဝ်။

12 အုဝ် ဒီ ပျာတ့် ဝဲန် မာန် မာငုန် အန် ဘော မာန် ဘ့လေ ဒီပူ အန် ပဲ့ ဟဲ့ တဝ်း အန်၊ ပါဝ် ပီ ရွက့် အန် ဟဲ့ ဒွါ ဒီ အန် တဲး န့ ဘဲန် ရုး ဒီ အန်။ အုဝ် ဒီ ဘူင် တဲး န့ ရာမ်၊ တဲး န့ ဝီ ဘဲန် ပြဲ တာင်၊ ပြဲ ကာလှိုပ်၊ တဲး ဂေ မာဒုဝ် ပြဲ ဝီ တး ကဝ့် ဟူမ် ဘ့လေ ဂေ တီ။

13 အုဝ် ဒီ ဘော ဒမ် မှာပ် ဒီ အန် ကူပ် ဟဲ့ ပိဝ် အန် ဒီ အုဝ် ဘော ကူပ် ဟဲ့ ဒိုဝ်း အန် န့ကြိုဝ်း အုး ငှုန်၊ ဒုဝ့် လှူ ဒီ ဇဝ် ဘာလ ဘော ကူပ် စှိုပ် အန် ဒီ တာ ခြိုင် ဆဲန့် ဂါယ် ခြိုင် ရွိုန် အန်၊ ဝီ ခုင်ခြး ဒူပ် ပါဝ် ပီ ရွက့် အန်။” ဇဝ်ဖြာ ဟဲ့ ကာလာင် ဂြုဝ်း ပါယ် တီ။

14 ဇဝ်ဖြာ ဝီ တဝ်း၊ “ပီ ဘော ဟဲ့ ပါယ် တီ မိူဝ်၊ အုဝ် ဒီ ဝီ ယဲတ့် ဟာဝ် အန် ခဲင် ပြဲ ကာဟဝ်း၊ ဝီ ကာလာင် ဂြုဝ်း အီ လဝ့် နဝ်း အန်။

15 အုဝ် ဒီ ဝီ အာပ် ဝိဝ် မာန် မာငုန် အန် ဒီ အန် ဘော ဘူင် တဲး ဒီလယ့် အာခေါ ဝီ ဘဲန် ပီ မာလုဝ်း၊ တဲး ဒူအီ ဝီ မိုဝ်း ပီ နှဝ့် န့ဒဝ့်။ ဒူင် တီ အန် ဒီ ဘော ဝီ ကာလဝ့် ဒီ အုဝ်၊ တဲး န့ ပီ ဒေါ ဆီ နှိုမ် အန် ဒေါ လေး အန် ခဲင် မိူင် အဲဂိုပ်။”

16 ဇဝ်ဖြာ ပီ ဝီ တဝ်း၊ “ဆီငဲ တီ အန် ဒီ ဝီ ဒဲ့ အုဝ် တဝ်း၊ ‘အီမာယ် အုဝ်။’ ဝါယ် အန် တီ၊ အန် မိူဝ် အာဝ် ဟူ ဒဲ့ အုဝ် တဝ်း၊ ‘ဇဝ် ဘာလ အုဝ်။’

17 အုဝ် မိူဝ် တူ တဲး အန် ကာလာင် စိူဝ် ဇဝ် ဘာလ ပေါ န့ ပွါ၊ တဲး အန် ပိဝ် ဇဝ် တီ။

18 ဒေါ အန် တီ အုဝ် ဒီ ဝီ ဒွါ ကာဒိက် ဆတ်ဇာ ဒီ မာဒုဝ် ပြဲ ဘော ဒီ ဂေ မာဆိမ် ဘော ဒုဝ် ဆတ်ဒါဝါ ဒွန် မျုဝ်၊ ကွဲ့ တဲး ဂေ ဝီ ဘူင် အာဖေ အာရေ ဒီ ဂေ ဒူအီ ပီ အိုပ် အုဝ်။ အုဝ် မိူဝ် ဒီ ဒိုဝ်း ဝဲန် ခြိုင် ကာဂုဝ်း ပီ တာ ဂေ ဒါ ဆိုက် ဒဲင် ကာဒါယ် နီ ဘော မုး မာပွါ့ လာင် ဘော မုး ဘ့လာ အ။ အုဝ် ဒီ ဝီ တဲး ဂေ ဒူအီ ပီ အိုပ် အုဝ် ပွိုန် ဒီ ကွယ် ဒါခိုယ် ဘော ကွယ် ဆီချာ။

19 အိုယ် ဘေ ဒူအီ အာမျုဝ် အီဆာရေလ၊ အုဝ် ဒီ ဝီ ဒိုဝ်း ဘေ ဘဲန် ပီ ပါဝ် ပီ ရွက့် အုဝ်။ အုဝ် မိူဝ် ဒီ ဘူင် ဒူပ် နာ ဆိူဝ် နာ မှာန် ဘော ဆုင်ဖျာတ် ဒူပ် ဒါရာ ဒီ ဘေ။ အုဝ် ဒီ မိုဝ်း နဝ်း ရွက့် ကာဝေ ဘေ ဘော နဝ်း ဆီ ဂေဇူ ဘေ ဆေဆေ။ အုဝ် ဒီ ဝီ ဒိုဝ်း ဘေ ဘဲန် ဒူအီ ပီ အိုပ် အုဝ်။

20 အုဝ် မိုဝ်း နဝ်း ဆိူဝ် နဝ်း မှာန်။ အုဝ် ဒီ တဲး ဘေ ဘဲန် ဒူအီ ပီ အိုပ် အုဝ်။ ဟဲ့ ဟွတ့်၊ ဘေ မိူဝ် ဒီ ဝီ နပ် အုဝ် မုး ဇဝ်ဖြာ။”

21 ဇဝ်ဖြာ ပီ ဝီ တဝ်း၊ “ဆီငဲ တီ အုဝ် မိူဝ် ဒီ ထူမ် ဂြုဝ်း ပီ ဆာခိုဝ် ဂေ ဒူအီ အီဆာရေလ အီ မုး ဒူအီ ပီ အိုပ် အုဝ်။

22 အုဝ် ဒီ ဝီ တဲး ဂ့လာယ် စုဝ်း ဒဲင် ကာဒါယ် နီ၊ တဲး န့ မိုဝ်း ငှုဝ်၊ မိုဝ်း ဘ့လေ မာငုန် ဘော ဘ့လေ နာမန်။

23 အုဝ် ဒီ ဝီ တဲး ဂေ ဒူအီ ပီ အိုပ် အုဝ် ကွယ် ခဲင် မိူင် ဂေ ဘော ဘြဲ ကိူန်။ အုဝ် ဒီ ဝီ ရွက့် ကာဝေ ဂေ အီ တူ မွှိုမ် ရွက့် ကာဝေ။ အုဝ် ဒီ ဘော တဝ်း ဒီ ဂေ အီ တူ မုး ဒူအီ ပီ အိုပ် အုဝ်၊ ‘ဘေ မုး ဒူအီ ပီ အိုပ် အုဝ်။’ ဂေ မိူဝ် ဒီ ဝီ တဝ်း၊ ‘မဲ ဇဝ်၊ မဲ မုး ဇဝ်ဖြာ ပီ ကြိုပ် ယေ။’”