1 အိုယ် ဘေ ဒူအီ အီဆာရေလ၊ တဲး ဘေ ဝီ တး ဒူပ် ဇဝ်ဖြာ အီ မုး ဇဝ်ဖြာ ပီ ကြိုပ် ဘေ။ နာ တူ မွှိုမ် ပီ ဘူင် ဘေ၊ န့ ဟဲ့ ဝီ တဲး ဘေ ဒီပ့လာတ် ကေး။

2 တဲး ဘေ တး ဒူင် ကွယ် ဇဝ်ဖြာ၊ တဲး ဘေ တဝ်း၊ “မဲ ဇဝ်၊ ယေ မှာန့်၊ တဲး မဲ ဂဝ်း ဝဲန် မှာပ် ယေ။ တဲး မဲ ဇဝ် ထူမ် ဂြုဝ်း ပီ ဆာခိုဝ် ယေ။ ဆေ ဟီ ပါယ် တီ ယေ မိူဝ် ဒီ ဝီ အိူပ် မျုက် မဲ ဇဝ် ဘော ဒါင် ဂုင် ဂေဇူ ဒီ မဲ။

3 ခုန်ဒီခမ် မိူင် အာဆူရီယာ တူ ပွိုန် ချွတ် ယေ။ ဂေ ဒါ ဆိုက် ယေ မိူဝ် တူ ပွိုန် ဂွင့် ရဲ ယေ။ ခါ နီ ဟာဝ် ယေ မိူဝ် ဟူ ဒဲ့ အာရိုပ် ရာင် ပေါ မ့ပွါ တဝ်း၊ ‘ဂေ မုး ဇဝ်ဖြာ ပီ ကြိုပ် ယေ။’ အိုယ် မဲ ဇဝ်ဖြာ၊ မဲ ဇဝ် ဘော နပ် ဒီ ရွက့် ကာဝေ ဒူအီ အီ တူ မိုဝ်း ဒူင် ဒီ ဘိုင်။”

4 ဇဝ်ဖြာ ပီ ဝီ တဝ်း၊ “အုဝ် ဒီ ဝီ တဲး ဂေ ဘဲန် ဒူအီ ဒီ ဒူပ် ဆီချာ အုဝ်။ အုဝ် ဒီ ရွက့် ဂေ ဆေဆေ။ ခုဝ်၊ နဝ်း ရူ အုဝ် ဒီ ဂေ ဟဲ့ ဟွတ့် ဘြေ့။

5 အုဝ် ဒီ ဘူင် ဒီ ဂေ ဒူအီ အီဆာရေလ၊ တဲး န့ ပီ အိုမ် ဒီငါန်။ ဂေ ဒီ ဘော ဘြး ပီ ပုဝ်း ခမ်ဆွန်။ ဂေ ဒီ ဘော ပီ ရျီး ဟေ အီ လူင် လိုက် ခဲင် ကာဒါယ် ပီ ဟေ အာရိတ် အီ ကွယ် ဒီ နွန် လေဘာနုန်။

6 ရာ ဟေ တီ ဒီ ဘော ကြဲ ဒီ မိုဝ်း ကိူန်။ ဂေ ဒီ ဘော မိုဝ်း ဆာရေ ဘော စှိတ် ဘော မွှိုမ် ယွတ် ပီ ဟေ နာမန်။ ဂေ ဒီ ဘော အုး ငှုန် ပီ ဟေ အာရိတ် အီ ကွယ် ဒီ နွန် လေဘာနုန်။

7 ဒူအီ ပီ အိုပ် အုဝ် ဒီ ဘော ဝေန့် ကွယ် ဆီချာ ခဲင် မိူင် ဘြိမ် ဂေ။ ဂေ ဒီ ဘော ဝီ ဘြဲ ကိူန် ပီ ငှုဝ် ဘော မိုဝ်း ဘ့လေ မာငုန် အီ မိုက် ကာဆဝ်။ အီ ဟဝ် ဒီ ဘော အိူပ် ဂေ၊ တဲး န့ ပီ ဂေ အိူပ် အိုမ် မာငုန် အီ လေး ခဲင် နွန် လေဘာနုန်။

8 အိုယ် ဘေ ဒူအီ အီဆာရေလ၊ ဝါယ် အန် တီ ကွဲ့ တဲး ဘေ ကြိုပ် အာရိုပ် ရာင် ဒေါ မှဝ်။ ပါယ် တီ အုဝ် ဒီ ဝီ ယွတ် မဲန် လိုမ်လာ ဘေ။ အုဝ် ပီ ဟေ အီ ငျီန် ဆေဆေ။ အုဝ် မိူဝ် တဲး ဘ့လေ လေး ခဲင် ဟေ တီ၊ တဲး ဘေ ဘော ပွိုန် ဒီ ဟူမ် ဆေဆေ။”

9 တဲး ဝီ အီ မိုဝ်း အာငျာန် နပ် လွင် ဒါင် ပီ ဒဲမ် အုန် တီ။ တဲး ဝီ အီ လွှက့် လှဲမ် ကာလှုး ဒီ နဝ်း လွင် အန် တီ။ ဒူအီ အီ မိုဝ်း နဝ်း ဆိူဝ် နဝ်း မှာန်၊ ဂေ ဒီ ဘော ဒူပ် ဇဝ်ဖြာ အီ မိုဝ်း နဝ်း ဆိူဝ် နဝ်း မှာန်။ ဂေ အီ ဘူင် နာ ဟာယ် နာ မိူက်၊ ဂေ ဒီ ဘော တး ဒုး ဘော ကာဝှး ကေး ဒူပ် န့တေန့် ပီ အိုင် ဂေ။