1 ဒေါ မွိုန် ဒေါ ကာလာင် ဒူအီ ခဲင် ခြိုဝ် အာအေဖာရိမ် ဂြုဝ်း ဒူအီ အီဆာရေလ ဒွန် ခြိုဝ် ဘော ကာဖြူမ် ဒီ ယုဝ် ဘော အိူပ် မျုက် ခြိုဝ် တီ။ ဝါယ် အန် တီ ဂေ ဒူအီ အာအေဖာရိမ် ဝီ ဘူင် ကာလိုပ်၊ ဝီ ကြိုပ် ဇဝ် ဘာလ၊ တဲး ဂေ စှိုမ်။

2 ဒေါ တီ နီ ဂေ ဝီ အွန် ဒီ ဘူင် ကာလိုပ် ဆေဆေ။ ဂေ ဘော ဝီ ဒိုဝ်း ရွိုန်၊ ဝီ ဘူင် အာရိုပ် ရာင် ဘော တဝ်း န့ မုး ဇဝ်ဖြာ။ ဂေ မုး ခဲ့ အာရိုပ် ရာင် ပီ ဘူင် ဒူအီ။ ဟဲ့ ဟွတ့်၊ ဂေ ဘော ဝီ တဝ်း၊ “တး၊ တဲး အေ လှူ ဒီ အာရိုပ် ရာင် နီ။ တဲး အေ ဘော အုး ဘော ပုတ့် အာရိုပ် ရာင် အီ မုး ရာင် မာမက်။”

3 ကူပ် န့ ပါယ် တီ ဒူအီ ဂေ တီ ဂေ ဒီ ဘော ဟြာယ် ပီ န့အု ဒေါ ဆိန့်ဝး စေဝ်။ ဂေ ပီ အိုမ် ဒီငါန် အီ စုဝ်း ဟြာယ် ဒေါ မုး ဆိန့်ဝး စေဝ်။ ဂေ ဒီ ပီ ဘော ဒျီပ် ငှုဝ် အီ ဟဲ့ ဘိုန့် ကာဟိုင် ဒေါ တး ဘုတ် ခုန်။ ဂေ ပီ ဘော ဒက် ငဝ် အီ ဟဲ့ လေး တး ခဲင် ကာနူမ် ငဝ် တွိုန်။

4 အုဝ် အီ မုး ဇဝ်ဖြာ ဝီ တဝ်း၊ “အုဝ် အီ မုး ဇဝ်ဖြာ ပီ ကြိုပ် ဘေ၊ အုဝ် ဟဲ့ ချွတ် လေး ဘေ ခဲင် မိူင် အဲဂိုပ်။ ဒဲင် အုဝ် နီ ဘေ မိူဝ် တူ မိုဝ်း ဇဝ်ဖြာ ပေါ အူ ကာဒင်။ န့ မိုဝ်း မီ အုဝ် အူ ကာဒင် အီ မုး ဇဝ်ဖြာ အီ ဒီ ချွတ် ဘေ။

5 အုဝ် ဟဲ့ ဟွတ့် ယွတ် မဲန် လိုမ်လာ ဘေ ဒေါ ကွယ် ဘေ ခဲင် ပြဲ ကာဟဝ်း ဒေါ ဟဲ့ ဆောဒါတ် ကာဆဝ်၊ တူ မိုဝ်း အိုမ်။

6 မာလဲ၊ ဒေါ ဟဲ့ ဟွတ့် ဘေ ပွိုန် ဒီ ဟူမ် ဖဲ ဟူမ် လိုင်၊ ဘေ ဝီ ဘဲန် နဝ်း ပီခိုက် ဘော ပိဝ် အုဝ်။

7 ခုဝ်၊ အုဝ် ဒီ ဝီ ဘူင် ပီ မာခြင်ဆီ ဒီ ဘေ။ န့ ပီ ဘော မာဒီဝါယ် အီ ဘ်ု ဒီ ကဝ့် အီ ဒူပ် န့တေန့်။

8 အုဝ် ဒီ ကဝ့် ကာယာတ့် ဘေ ပီ မာဂြေး ဒုဝ် မာ ဒေါ ဟဲ့ ဘျုဝ်း ဂွန် အန်။ အုဝ် ဒီ ကာဘက် ကာယာတ့် ဘေ ဘော ကဝ့် ဟူမ် ဘေ ပီ မာခြင်ဆီ အီ ဟဲ့ ကာပြာန့် ကာဆဝ်။

9 အိုယ် ဘေ ဒူအီ အီဆာရေလ၊ အုဝ် ပီ ဘော နပ် ဒီ စွယ် ဘေ၊ အုဝ် ယီ ဒီ ပျာတ့် ဝဲန် ဘေ။

10 ဒေါ အန် တီ ခုန်ဒီခမ် ဘေ ဘော ကွယ် ဒီ မှဝ်။း မှဝ် န့ ပါယ် ပီ တူ မှာန့် ဘေ၊ တဲး အန် စွယ် ဘေ။း ဘော ဂေ ဒါ ကာညာ အီ အိုပ် ဘေ၊ ဂေ ကွယ် နာ မှဝ်။း ဘေ ဟဲ့ ဟွတ့် ဒဲ့ ဂေ။ ဒေါ တီ နီ တဲး ဂေ တး စွယ် ဘေ။

11 ဒေါ ဟဲ့ ရူ အုဝ်၊ အုဝ် ဟဲ့ ဒွါ ဘေ မိုဝ်း ခုန်ဒီခမ် ဘဲန် ကာဒင် ဘဲန် ကာဒင်။ ဒေါ ဟဲ့ ဝဲ ဝီ ရူ အုဝ်၊ အုဝ် ဘ့လွာ့ ဝဲန် ဂေ။

12 အီ တူ မွှိုမ် ပီ ဘူင် ဂေ ဒူအီ အီဆာရေလ ဟဲ့ ဟွတ့် ဒဲမ် အုန်။ ဘပ် ဇာရာင် အီ ဟဲ့ ဒဲမ် အုန် လွင် အန် တီ ဟဲ့ ဟွတ့် အုန် ဆီချာ ဆီချာ။

13 အုဝ် ဟဲ့ ဆီ တဲး ဂေ ဒူအီ အီဆာရေလ မိုဝ်း အာဆာက် ကာမာယ်။ ဂေ ယီ ပီ ဂွန် င အီ ဟဲ့ ကာတတ် ဒီ ဂွိုတ်၊ ဂေ ယီ တူ ဆီ ဂွိုတ် လေး ခဲင် ဝတ့် မာ ဂေ။ ဂေ ဒိူဝ် ကာဆဝ် ဘော တူ မိုဝ်း အာငျာန်။

14 အုဝ် မိူဝ် ဒိူန် တူ ချွတ် ဒူအီ ဇိုဝ် တီ တဲး ဂေ လေး ခဲင် မိူင် မာရာန။ အုဝ် မိူဝ် ဒိူန် တူ ဒိုဝ်း လေး ဂေ ဒီ ဘုဝ် အီ တဲး အီ ယမ်။ အိုယ် မဲ ဘုဝ် အီ တဲး အီ ယမ်၊ တဲး မဲ ဘျ အာဖေ အာရေ မဲ ဘဲန် မျုဝ် ဘဲန် မျုဝ်။ အိုယ် မဲ ဇဝ် မာရာန၊ တဲး မဲ တဲး ဒူအီ လိုဝ် စှိုမ်။ ခုဝ်၊ အုဝ် တူ မိုဝ်း နဝ်း ဆီ ကာဝေ ဒူအီ ဂေ တီ။

15 ဂေ ဒူအီ ခဲင် ခြိုဝ် အာအေဖာရိမ် ဟဲ့ အွင် ပီ ဒီ ဘူင် ဂေ ဒွန် မျုဝ်၊ တဲး ဂေ ကိူန် လွှိုမ် ဘီနွင် ဂေ ခဲင် မိူင် အီဆာရေလ။ ဇဝ်ဖြာ ယီ ဒီ ဝီ စ်ု ခုန် ကာဟွာ့ အီ တး နာ ပြဲ ကာဟဝ်း၊ တး ဘုတ် ဒူင် ကွယ် ဂေ၊ တဲး န့ တဲး မိူင် ဂေ ကာဟဝ်း။ ဘော အိုမ် ခိုမ် ဂေ အိုမ် တုဝ်း ဒီ ဟိတ် တူတ့် ဒွန် ပ့လုဝ့်။ ကြုဝ်ကြာမ် အီ ငဝ်း တာင် အီ ဟဝ် ဒီ ဒိုဝ်း ဟာဝ် တူတ့် ဒွန် မျုဝ်။

16 ဂေ ဒူအီ ခဲင် မိူင် ဆာမာရီ လုဝ် ခမ် မှာပ် ဂေ ကူပ် ဟဲ့ ဘူင် ကာဘး ဂေ ဒီ အုဝ်။ ဂေ ဒူအီ ရဝ် ဒူအီ ကာင် ခဲင် မိူင် ဂေ တီ၊ ဂေ ဒီ ဘော ယမ် ဒေါ ကာဂုဝ်း ဒါ ဆိုက် ဒူအီ အာမျုဝ် ဟဝ် ဒီ ဂေ။ ဂွန် င ဂေ ဒီ ဘော ကာဒုး အီ မး အီ ဆတ့် ယမ်။ ဂေ ယာ တူ အး၊ ဂေ ဒီ ဘော ကာဒုး အီ ပ့လဝ်း ဝတ့် ဂေ။”