ပီ ဘူင် ဂေ ဒူအီ အီဆာရေလ အာဝ် မိုဝ်း ဒီခုဝ်။ န့ ပီ ခုန် ဟဲ့ ဘဲန် ပီ ဒီ ဟူမ် ဂေ။ ဆိန့် ဆိန့်ဝး ကော ဇမ် ဘာ ဒီ အပ် န့ ပီ ဂေ ခြုင်ခြး ခုန်။ ဂေ ပီလွှက့် ဒီ အီ ဘော ကာလုဝ် ဆေဆေ၊ တဲး န့ ဘဲန် လာယ် ကာမး လာယ် ကာဂုဝ်း။ ဂေ ဟဲ့ ကာဆဲန့် ဒီ လာယ် ဘဲန် အူ ဂိုက် ဒီ ဒူအီ မိူင် အာဆူရီယာ ဘော ဒိုဝ်း နာမန်၊ ဟာဝ် တိုယ် ဒီ မိူင် အဲဂိုပ်။

2 ဇဝ်ဖြာ ဒီ ဖျာက် ဂေ ဒူအီ အာယူဒါ။ အန် ဘော ဒမ် မှာပ် ဒီ ဂေ လှုက်လှာန် အာကူပ်။ အန် ဇဝ် ဒီ ဝီ ဘူင် ဝျီ့ ဒီ ဂေ အီ တူ မုး နာ မွှိုမ် နာ မှာန် ခဲ့ ပီ ဘူင် ဂေ။

3 အာကူပ် တွိုန် ဟဲ့ လာယ် ကာခဲန့် ဒီ အီကတ် အန် အီ မုး အာဆုဝ် ဒေါ ကွယ် ဂါယ် ခဲင် ဝတ့် မာ ဂါယ်။ အန် ဟဲ့ တာင်၊ အန် ဘော ဝီ ကာခဲန့် ဒီ ဇဝ်ဖြာ။

4 အန် ဘော ကာခဲန့် ဘော ဒီ အာမူ အာမာတ် ဇဝ်ဖြာ၊ တဲး အန် ကော ပဲ။ အန် ဘော ယာမ် ဘော မှာန့်၊ တဲး အာမူ အာမာတ် ဇဝ်ဖြာ မွင့်ကာရာ ဒွါ ဒီ အန်။ ပါယ် တီ ဇဝ်ဖြာ ဘော ကာပ့လုး တး ဒီ အန် အီ မုး ဂုန့် ဒင် အေ ဒေါ ကွယ် အန် ဒူင် စိူဝ် ဘေဒါအေန်။ ဇဝ်ဖြာ မိူဝ် ဟဲ့ ကာလာင် ဂြုဝ်း ဒီ အန် ဒေါ ကွယ် အန် ဒီ တီ။

5 ဇဝ်ဖြာ ပီ ဝီ တဝ်း၊ “အုဝ် အီ မုး ဇဝ်ဖြာ အီ တာင် လွှိုမ် တူတ့်၊ အုဝ် မုး အန် ဇဝ်။”

6 ပါယ် တီ ဘေ အီ မုး လှုက်လှာန် အာကူပ်၊ တဲး ဘေ ဝီ ညှိုမ် ဘိုင် ဇဝ်ဖြာ ပီ ကြိုပ် ဘေ။ တဲး ဘေ ဝီ တး ဒူပ် အန် ဇဝ် ဘော ဘူင် ဒူပ် အီ မွှိုမ် ရွက့် ဘော နာ ဆိူဝ် နာ မှာန်။ တဲး ဘေ နှဝ့် န့ဒဝ့် ဇဝ်ဖြာ ဆေဆေ။

7 ဂေ ဒူအီ အီဆာရေလ ပီ ဒူအီ အီ ယွင့် ကြုဝ်ကြာမ် တာ လစူ အီ တူ မှာန်။ ဂေ အွန် ဒီ ပီလွှက့် ဒီ အီ။

8 ဂေ ပီခိုက် နဝ်း ဂေ တဝ်း၊ “ယေ ဟဲ့ ဟွတ့် မိုဝ်း၊ ဟဲ့ ဟွတ့် ခြမ်။ ယေ ဟဲ့ နပ် ဒီ ဟြေတ့် တး ကြုဝ်ကြာမ် ဘော ရွိုန် ဂေ ခြိဝ် ရာင် ယေ။ န့ ယီ တူ မိုဝ်း အာဆေ ပွိုန် ကာလာင် နာ တူ မွှိုမ် လွင် ယေ တဝ်း၊ ယေ ဟဲ့ ခြမ် ဒီ ဘူင် အီ တူ ဒူပ် ဒါရာ။”

9 ဇဝ်ဖြာ ယီ တဝ်း၊ “မာလဲ၊ အုဝ် ဇဝ်ဖြာ အီ မုး ဇဝ်ဖြာ ပီ ကြိုပ် ဘေ၊ အီ ဟဲ့ ချွတ် လေး ဘေ ခဲင် မိူင် အဲဂိုပ် တွိုန်၊ အုဝ် ဒီ ဝီ တဲး ဘေ ဝီ ကွယ် ခဲင် ထိုပ် ဘိက် ပေါ န့ ပွါ။ အုဝ် ဒီ တဲး န့ ပီ ဒွန် ဆီနမ် ဒေါ ဘူင် ဘေ ဘ့လွယ် လုဝ် ကွယ် ခဲင် ထိုပ်။

10 အုဝ် ဟဲ့ ဒဲ့ ဒူအီ ဘျာန် ဂြုဝ်း ဇဝ်ဖြာ၊ တဲး ဂေ ဒမ် ဆာဒိက် ဒီ ဘေ ဘော ကာလာင် ပီ ဘျ အုဝ် ဘော အူဖာမာ ဘဲန် မျုဝ် ဘဲန် မျုဝ်၊ တဲး န့ ကာလှုး ဒီ နဝ်း ဘေ။”

11 ဂေ ဒူအီ အီ ကွယ် ခဲင် မိူင် ဂီလေအာတ် ယီ ဆီ ကြိုပ် အာရိုပ် ရာင် ဘဲန် မျုဝ် ဘဲန် မျုဝ်။ ဂေ ဘော ဒိုဝ်း မက် အာလူင့်၊ ဝီ ဟာဝ် လှူ ဒီ မိူင် ဂီလဂါ။ ကာစှူင့် လှူ ဂေ တီ ဟဲ့ ကိူန် ကာဆဝ်။ ဂေ ဘော ပီ မ့ပိုမ် မာဝ် အီ ကွယ် ခူပ် ဒူင် နာ အီ ဟဲ့ ဟွတ့် ထဲ။

12 ဂုန့် ဒင် အေ အီ စိူဝ် အာကူပ်၊ အန် ဟဲ့ တဝ် ဟာဝ် ကွယ် ခဲင် မိူင် အာရာမ်။ ကူပ် ဆီ ပွိုန် အန် အီဘိုန့်၊ အန် ဘော လုဝ် ခမ် ဒီ ဟျီင် မာဘူ။

13 ဝါယ် အန် တီ ဇဝ်ဖြာ ဟဲ့ စ်ု ဒူအီ ဘျာန် ဂြုဝ်း အန် အူ ဝီ၊ တဲး အန် ယဲတ့် ဂေ လှုက်လှာန် အာကူပ် အီ မုး ဒူအီ အီဆာရေလ၊ တဲး ဂေ လေး ခဲင် မိူင် အဲဂိုပ်။ န့ မုး ဒါ အီ ဘျာန် ဂြုဝ်း ဇဝ်ဖြာ တီ အီ ဟဲ့ ယွတ် မဲန် ဘော ဂွင့် ရဲ ဂေ။

14 ဂေ ဒူအီ အီဆာရေလ ယီ ကာဆုး ဇဝ်ဖြာ၊ တဲး အန် ရူ ကာဆဝ် ဒီ ဂေ။ ပါယ် တီ ဇဝ်ဖြာ ဒီ ဒမ် မှာပ် ဒီ ဂေ ကူပ် မှာပ် ဒွန် မျုဝ် ပဲ့ ဟဲ့ ဘူင် ဂေ။