1 ဇဝ်ဖြာ တဝ်း၊ “ဒေါ ဆီ ဒီရွယ် ဆီ ဒီတဲတ် ဂေ ဒူအီ အီဆာရေလ၊ အုဝ် ရွက့် ဂေ ပီ ဂွန် အုဝ်။ အုဝ် မိူဝ် ဒဲ့ လေး ဂွန် အီမာယ် အုဝ် တီ ခဲင် မိူင် အဲဂိုပ်။

2 မာလဲ၊ အုဝ် ဒဲ့ ဂေ ခဲ့ မှဝ်၊ ဂေ ဘော ဝဲ ကာဘး ဒီ အုဝ် ခဲ့ တီ။ ဒူအီ ပီ အိုပ် အုဝ် ဂေ တီ၊ ဂေ ဘော ဒိုဝ်း ပီ ဒီ လှူ ဂေ၊ ဝီ လှူ ဒီ ဇဝ် ဘာလ။ ဂေ ဒိုဝ်း ဘော ဆီနမ် အုး ငှုန် ဒုဝ့် လှူ ဒီ အာရိုပ် ရာင်။

3 ပီ ဘူင် အုဝ် န့ ပီ အုဝ် မာနုဝ် ဂေ ဒူအီ အီဆာရေလ တဲး ဂေ နပ် ဒီ ဟာဝ်။ အုဝ် ဟဲ့ ပါ ဒဲ ဂေ၊ ကွဲ့ တဲး ဂေ ကေး။ မာလဲ၊ ဂေ ယီ တူ ဝီ နပ် ဂုင် ဂေဇူ ပဲ့ ဟဲ့ လိုမ်လာ အုဝ် ဒီ ဂေ။

4 နဝ်း ရွက့် အုဝ် ဒီ ဂေ၊ န့ ပီ အုဝ် ဟဲ့ တာ ဝန်၊ ဒိူတ် ဂေ။ န့ ပီ အုဝ် ဟဲ့ စုဝ့်၊ ဟဲ့ ငျီ့ ဂေ၊ ဒိုက် ဒီ ကာလာ အုဝ်။ န့ ပီ အုဝ် မိူဝ် ဟဲ့ မုတ် လူင် ညိူဝ် ဂေ ဘော ဟပ် ဂေ ဟူမ် ဘူမ်။

5 ကူပ် ဟဲ့ ဝဲန် ဂေ နဝ်း ဆီ ဝီ တး ဒူင် ကွယ် အုဝ်၊ ဂေ ဘော ကာဒုး ဒီ ဝီ ဝေန့် ခဲင် မိူင် အဲဂိုပ်။ ခုန်ဒီခမ် အီ အိုပ် မိူင် အာဆူရီယာ မိူဝ် ဒီ အိုပ် ဂေ။

6 န့ ဒီ မိုဝ်း အီ တး လာယ် ကာငဝ်း ခဲင် မိူင် ဂေ။ မာလုဝ်း မိူင် ဂေ ဒီ ဘော လိုဝ် ကာပျာတ့် တူတ့်။ ခုဝ်၊ ဂေ ဒူအီ ပီ အိုပ် အုဝ် ဘူင် အီ တူ မွှိုမ် ဒူပ် ပီ ခြာမ် ဂေ။

7 ဂေ မိုဝ်း မီ နဝ်း ဆီ ဝဲန် အုဝ်၊ ကာယဝ်း ဒီ အုဝ်။ ဂေ ပီ ဘော ဒဲ့ အုဝ် တဝ်း အုဝ် မုး ဇဝ်ဖြာ အီ တာင် လွှိုမ် တူတ့်၊ ဂေ ယီ တူ တဲး အုဝ် မိုဝ်း ဆာရေ။

8 အိုယ် ဘေ ဒူအီ အီဆာရေလ၊ နဝ်း အုဝ် တူ ကူပ် ခမ် ဒီ ဝဲန် ဘေ။ အုဝ် တူ ပွိုန် ဘ့လေး ဝဲန် ဘေ။ အုဝ် တူ ပွိုန် ဘူင် တဲး န့ ပီ အုဝ် ပျာတ့် ဝဲန် မိူင် ဒါမာ။ အုဝ် မိူဝ် တူ ပွိုန် ဘူင် နာ တူ မွှိုမ် ဒီ ဘေ၊ တဲး န့ ပီ ဒေါ ဟဲ့ ဘူင် အုဝ် နာ တူ မွှိုမ် ဒီ ဂေ ဒူအီ ခဲင် မိူင် ဇေဘုဝ်ယိမ်။ နဝ်း အုဝ် ဒိူန် တူ ခမ် ဒီ ဘူင် ပါယ် တီ ဒီ ဘေ ဒေါ မှဝ်။ ခုဝ်၊ အုဝ် ရွက့် ကာဆဝ် ဘေ။

9 အုဝ် တူ ဒမ် မှာပ် ကာဆဝ် ဒီ ဘေ ဒူပ် နဝ်း ရူ အုဝ်။ အုဝ် မိူဝ် အာဝ် ဟူ ပျာတ့် ဘေ ဒူအီ အီဆာရေလ ပေါ အူ ဇေန့်။ ခုဝ်၊ အုဝ် တူ မုး ဒူအီ။ အုဝ် မုး ဇဝ်ဖြာ။ အုဝ် ဇဝ်ဖြာ အီ ဆီငါ ဘွတ်၊ အုဝ် ကွယ် ရိုမ် ဒူပ် ဘေ။ အုဝ် မိူဝ် တူ ပီရူ အုဝ် ဒေါ ဟာဝ် အုဝ် ဒူင် ကွယ် ဘေ။

10 ခုဝ်၊ ဂေ ဒူအီ ပီ အိုပ် အုဝ်၊ ဂေ ဒီ ဝီ ဒူပ် ဒီ ပန် အုဝ်။ ဆေ အုဝ် ဒဲ့ ဂေ၊ ဒတ် တာင် ပီ မာခြင်ဆီ၊ ဂေ ဒီ ဘော ပီခြန် ဂေ ဘော တး နာ ဂေတ့် ဆီငဲ၊ ဇမ် ဒူင် ကွယ် အုဝ်။

11 ဂေ ဒီ ဘော တဝ် လေး ခဲင် မိူင် အဲဂိုပ် ပီ မာဆိမ်။ ဂေ ပီခြန် ကာဆဝ် ဂေ ပီ မာဘ့လူယ် အီ ဟဲ့ လေး ခဲင် မိူင် အာဆူရီယာ။ အုဝ် မိူဝ် ဒီ ဝီ တိုယ် ဝေန့် ဂေ ဒီ ကာင် ဒူင် ကွယ် ဘြိမ် ဂေ။” အုဝ် အီ မုး ဇဝ်ဖြာ ဟဲ့ ကာလာင် ပါယ် တီ။

12 ဇဝ်ဖြာ ပီ ဝီ တဝ်း၊ “ဂေ ဒူအီ အီဆာရေလ ဟဲ့ ကာလုဝ် အုဝ် ဆေဆေ။ ဂေ ဒူအီ အာယူဒါ မိူဝ် ဆီ ကာဘး ဒီ အုဝ် အီ မုး ဇဝ်ဖြာ အီ ဆီငါ ဘွတ်။”