ဂေ ဒူအီ အီဆာရေလ ဟဲ့ ပီ ဟေ မာငုန် အီ ဟဲ့ မိုက် ဟဲ့ ဂ့လမ် ကာဆဝ်။ ကြုဝ်ကြာမ် ဂေ ဝဲ ကိူန် ခဲ့ မှဝ်၊ ဂေ ဘော ဝဲ ဘူင် ကာစှူင့် လှူ ဒီ အာရိုပ် ရာင် ကိူန်။ ပီ ဆမ် ပီ ပိတ် ဂေ အွင် ခဲ့ မှဝ်၊ ဂေ ဘော ဝဲ ဆမ် ကိူန် အာရိုပ် ရာင် အာဒါ ပီ ဒီ ကြိုပ် ဂေ အီ ဟဲ့ စှိတ် ကာဆဝ်။

2 ဂေ မိုဝ်း နဝ်း ကာလိင် ကာလဲ၊ ဂေ လုဝ် ခမ် မှာပ် ဂေ။ ဇဝ်ဖြာ ဒီ ဘော ပျာတ့် ဝဲန် ကာစှူင့် လှူ ဂေ ဘော ရွင့် ပီ ကြိုပ် ဂေ အီ ဟဲ့ ကိူန် ကာဆဝ်။

3 ဂေ ဒီ ဘော တဝ်း၊ “ကူပ် တူ ရုဝ်ဆေ အေ ဇဝ်ဖြာ၊ အေ တူ မိုဝ်း ခုန်ဒီခမ်။ န့ ယီ တူ အာရေ တာင်။ ခုန်ဒီခမ် တီ တူ နပ် ဒီ ဘူင် မာဆေ တဲး န့ ဘဲန် အာဂျိုဝ် ဒီ အေ။”

4 ဒူအီ ဂေ တီ ဘော အိုင် ဒီ ကာလာင် ဂြုဝ်း ပီယေန့်၊ ဂြုဝ်း ဒီလူယ် ဒီလာယ်။ ဂေ မိူဝ် ဒွါ ကာဒိက် ဆတ်ဇာ၊ ယီ တူ ဘူင် ဒူပ် ပီ လာယ် ကာဆဲန့် ဂေ။ ပါယ် တီ ဂေ ဆုင်ဖျာတ် အာမူ အီ၊ တူ ဒူပ် နာ မုး နာ မှာန်။ န့ ဝီ ဘဲန် ဒါရာ အီ တူ ဆိူဝ် တူ မှာန်၊ န့ ဘော ကိူန် ပီ ဒဝ် ဆွင့် အီ ကွယ် ခဲင် မာန် ဘော ခဲင် ဒူင် နာ။

5 ဂေ ဒူအီ ခဲင် မိူင် ဆာမာရီ၊ ဂေ ဒီ ဘော ယုဝ် ဘော ငှုန် ကူပ် ဟဲ့ စှိုမ် ဂေ အာရိုပ် ရာင် မာမက် အီ ကွယ် ခဲင် မိူင် ဘေတ်အာဝေန်။ ဘော ဒါ အီ လှူ ဒီ ဇဝ်ဖြာ အီ ကြိုပ် အာရိုပ် ရာင် ဂေ၊ ဂေ ဘော ယာမ် ခုဝ်၊ အာဖုင် ဒင်ခုဝ် အာရိုပ် ရာင် တီ ဒီ ဟြာယ်။

6 အာရိုပ် ရာင် တီ ဂေ ဒီ ဘော ဒိုဝ်း ဟာဝ် ဒီ မိူင် အာဆူရီယာ၊ တဲး န့ ဘဲန် လက်ဆွင် ဒီ ခုန်ဒီခမ် တာင် ခဲင် မိူင် တီ။ ဂေ ဒူအီ အီဆာရေလ ဒီ မွှိုမ် ဆာယ် ကူပ် ညှိုမ် ဂေ အာရိုပ် ရာင် တီ။

7 အာရိုပ် ရာင် တီ ခုန်ဒီခမ် အီ ကွယ် ခဲင် မိူင် ဆာမာရီ တီ၊ အန် လုဝ် ခမ် အီ ဒိုဝ်း ဟာဝ် အန် ပီ ကာပ့လျီ့ ဟေ အီ လှဲ ဒဲင် ကာငိဝ် အိုမ်။

8 ဒူင် စာ အီ ကွယ် ဒီ မိူင် အာဝေန်၊ အီ မုး ဒူင် ကြိုပ် ဂေ ဒူအီ အီဆာရေလ ဒီ အာရိုပ် ရာင်၊ န့ ဒီ ကာပျာတ့် လိုဝ် တူတ့်။ ဒဝ် မာအာတ့် ဂေ ယွုန် မာအာတ့် ဒီ ယာပ် ကာစှူင့် လှူ ဂေ တွိုန်။ ဂေ ဒီ ဘော ဒဲ့ နွန် တီ တဝ်း၊ “တး ထိပ် ယမ် ယေ။” ဂေ ဒီ ဘော တဝ်း ဒီ နွန်၊ “တဲး ဘေ ဒီဂြပ် မ့ပုန် ယမ် ယေ။”

9 ဇဝ်ဖြာ ပီ ဝီ တဝ်း၊ “ဒူအီ အီဆာရေလ ဟဲ့ ဘူင် မှာပ်၊ ဘူင် အီ တူ မွှိုမ် ဆိန့် ဆီငဲ ဒေါ ကွယ် ဂေ ခဲင် မိူင် ဂီဘီယာ တွိုန်။ မှာပ် ပီ ဘူင် ဂေ ကြဲ ဒီ ကိူန် ကာဆဝ်၊ အာဝ် ဟြာယ် အာဝ် တူတ့် ဒေါ မှဝ်။ ပါယ် တီ ဒါ ဆိုက် ရန်ဆူ ဂေ ဒီ တး ကာဂုဝ်း ဒီ ဂေ၊ တဲး ဂေ ခမ် မှာပ် ဂေ။

10 အုဝ် ဒီ ဘော ကာဂုဝ်း ဒီ ဂေ ကူပ် တူ ထူမ် ဂေ ဂြုဝ်း အုဝ် ဘော ကာဘး ဒီ အုဝ်။ အုဝ် ဒီ ဒဲ့ ဒါ ဆိုက် ဒူအီ ဘဲန် မျုဝ် ဘဲန် မျုဝ်၊ တဲး ဂေ ဒမ် မှာပ် ဒီ ဒူအီ အီဆာရေလ ကူပ် မှာပ် ပီ ဘူင် ဂေ အီ ဟဲ့ ကိူန် ကာဆဝ်။

11 ဂေ ဒူအီ အီဆာရေလ ဟဲ့ ပီ မာမက် ဆိူဝ် အီ ဟဲ့ ဟေန် ဆီချာ တဲး အန် နပ် ဒီ ညဲတ့် ငှုဝ်။ ခုဝ်၊ အုဝ် ဟဲ့ တဲး ဂေ စှိုပ် အဲ့မဝ်။ အုဝ် ဒီ တဲး ဂေ ဒူအီ အာယူဒါ ထဲ ဒူင် နာ ဘော လှုက်လှာန် အာကူပ် စှဝ် မာန်၊ တဲး ဂေ ကော နုန် ကာဆဝ်။

12 တဲး ဘေ ဘူင် နာ ဆိူဝ် နာ မှာန်၊ တဲး န့ ပီ ဘေ ဘြတ် ဆီမာ ငှုဝ်။ ဆေ ဘေ ဘူင် ပါယ် တီ ဂေ အီ ဟဝ် ဒီ ရွက့် ဘေ၊ တဲး န့ ပီ ဘေ ဆုဝ့် ငှုဝ်။ တဲး ဘေ မိုဝ်း နဝ်း န့စု န့စမ်၊ တဲး န့ ပီ ဘေ ထဲ မာန်။ ခုဝ်၊ ဒေါ တီ နီ ဘေ လုဝ် ဟြေတ့် ဇဝ်ဖြာ တဲး အန် တး ဒွါ ဒီ ဘေ နဝ်း ဆိူဝ် နဝ်း မှာန်။

13 မာလဲ၊ ဘေ ယီ ဟဲ့ ဟွတ့် ဆမ် အီ တူ မွှိုမ် ဘော ဆုဝ့် အီ မုး မှာပ်။ န့ ပီ ဘေ ဟဲ့ ဟူမ် ဘ့လေ ဂေ ကာယူင့် အီ တူ မှာန်။ ခုဝ်၊ ဘေ မိူဝ် ဟဲ့ နဝ်း တာင် ဒီ လက်လဝ် ဘော မ့ပြွင့် ပီ ပဝ့် ဂေ ဒါ ဆိုက်။ ဘေ ဘော နဝ်း တာင် ဒီ ဂေ ဒါ ဆိုက် အီ ဟဲ့ ကိူန် ကာဆဝ်။ ဂေ ယီ တူ ပဲ ဒီ ဂွင့် ရဲ ဘေ။

14 ပါယ် တီ ဒါ ဆိုက် ဒီ ဘော တး ကာဂုဝ်း ဒီ ဘေ။ ဒူင် ဒီ ချြီင် ဘေ၊ န့ ဒီ ဘော လိုဝ် ကာပျာတ့် တူတ့်။ န့ ဒီ ဘော ပီ ဒေါ မုး စုဝ် ဘာန် ခုန်ဒီခမ် အာဆာလာမန် အီ ဟဲ့ တး ကာဂုဝ်း၊ တး ပျာတ့် မိူင် ဘေဆာဘ့လဝ် တွိုန်။ ဒေါ အန် တီ မာ ဂေ ဘော ဂွန် ဂေ ဘောကာဂ့လျီတ် ကာဒုး ဒီ ယမ်။

15 လွင် အန် တီ န့ ဒီ ဘော ဝီ ဘဲန် ဘော ဒီ ဘေ ဒူအီ အီ ကွယ် ခဲင် မိူင် ဘေဒါအေန် ကူပ် မှာပ် ပဲ့ ဟဲ့ ဘူင် ဘေ အီ ဟဲ့ ကိူန် ကာဆဝ်။ ပန် ဒီ ဇမ် ဆီငဲ ဒီ ဒမ် ဇဝ်ဖြာ မှာပ် ဒူအီ အီဆာရေလ ဘော ခုန်ဒီခမ် အီ အိုပ် မိူင် အီဆာရေလ ဒီ ဘော ယမ်။”