1 အိုယ် ဘေ ဒူအီ အီဆာရေလ၊ ကွဲ့ တဲး ဘေ ခူယ် ဒါခိုယ် ပီ ဂေ ဒူအီ အာမျုဝ် ဟဝ် ဟဲ့ ခူယ် ဒါခိုယ်။ ဘေ ဟဲ့ ဝဲန် ဇဝ်ဖြာ ပီ ကြိုပ် ဘေ ဘော အာဝ် ဟူ မိုဝ်း နဝ်း ဆိူဝ် နဝ်း မှာန် ဒီ အန်။ ဘေ ဘော ဘူင် ပီ ယာ မာလမ် ဒေါ ဆီ လှူ ဘေ ဒီ ကာင်နဝ်း ဒွန် နာ ဒွန် ပ့လုဝ့်။

2 မာလဲ၊ အာဝ် ဘော လှေန့် ဒီဂါဝ် တူ တဲး ဘေ ပွိုန် ဒီ ဟူမ် ဖဲ။ အိုမ် မာငုန် မိူဝ် အာဝ် ဟူ ဂ့လိုမ်။

3 ဂေ ဒူအီ အီဆာရေလ အာဝ် ဟူ ကွယ် ခဲင် မိူင် ပီ အိုပ် ဇဝ်ဖြာ။ ဂေ ဒီ ဘော ကာဒုး ဒီ ဝီ ဝေန့် ခဲင် မိူင် အဲဂိုပ် ဘော ကာဒုး ဒီ ဟူမ် ပီ ဒီ ဟူမ် အီ တူ ဆီငါ ဘွတ် ခဲင် မိူင် အာဆူရီယာ။

4 ခဲင် မာန် မိူင် အီ ဟဝ် တီ ဂေ အာဝ် ဟူ ပွိုန် လှူ အိုမ် မာငုန် ဒီ ဇဝ်ဖြာ။ ဇဝ်ဖြာ မိူဝ် တူ အိုင် ပီ ဒီ လှူ ဂေ။ ပီ ဒီ လှူ ဂေ တီ၊ န့ ဟဲ့ ကာဒါတ့် ပီ ပီ ဒီ ဟူမ် ဒူအီ အီ ဟဲ့ ပါ ဒူအီ ယမ်။ ဒွန် အီ အီ လှူ ပီ ဒီ လှူ ဇိုဝ် တီ ဟဲ့ ကာဒါတ့်။ ဂေ တူ ပွိုန် လှူ ပီ ဒီ လှူ တီ ဒီ ဇဝ်ဖြာ။

5 ဆေ ဟီ ပါယ် တီ ဆေ ဟီ ဇမ် အာခြာဝ် ဘူင် ဘ့လွယ် ပဲ့ ဟဲ့ စ်ု အုဝ် ဘေ ဘူင်၊ ဆေ ဟီ ဇမ် ဆီငဲ အိူပ် မျုက် ဂေ ဇဝ်ဖြာ၊ ပီ ဒီ ဘူင် ဂေ အာဝ် မိုဝ်း ဒီခုဝ် မာဆေ။

6 ပန် ဒီ တး အာဖေ အာရေ ဒဲင် ကာဒါယ် နီ၊ ဂေ ဒီ ဘော တဝ် ကာယဝ်း ဟာဝ် ဒွန် နာ ဒွန် ပ့လုဝ့်။ ဂေ ဒူအီ ခဲင် မိူင် အဲဂိုပ် ဒီ ဘော ဝီ ဂဲပ် ကာဇု ဂေ။ ဂေ ဒူအီ ခဲင် မိူင် မဲမ်ဖီ ဒီ ဘော ဒိပ် ဒူအီ ယမ် ဂေ။ မာအာတ့် ဒီ ပ့လိုက် ကြုဝ်ကြာမ် ဂေ အီ မုး ရွိုန် ဘော ယွုန် မာအာတ့် ဒီ ဝီ ပ့လိုက် တူတ့် ဒွန် နာ ဒွန် ပ့လုဝ့်။

7 ဆီငဲ ဒီ ခမ် ဂေ ဒူအီ အီဆာရေလ မှာပ် ဂေ ဟဲ့ ဟွတ့် ဇမ်။ အာခြာဝ် ဒီ ပွိုန် ဂေ ဘော ရုး ပီ ဘူင် ဂေ ဟဲ့ ဟွတ့် ဇမ်။ ဆေ ဟီ ဘဲန် လွင် အန် တီ၊ ဂေ ဒူအီ အီဆာရေလ ဒီ ဘော တဝ်း၊ “ဒူအီ အီ ဘျာန် ဂြုဝ်း ဇဝ်ဖြာ ဟဲ့ ဘဲန် ဒူအီ ရိုဝ်။ ဒူအီ အီ ဟဲ့ ပွိုန် ပီ ဂေဇူ နဝ်း ဖွိုမ် ဇဝ်ဖြာ ဟဲ့ ဝီ ဘဲန် ဒူအီ ယွင် ဒူအီ ဝှိုန့်။” ဂေ မိူဝ် ဟဲ့ ဇွင့် ကာဆဝ် ဒူအီ အီ ရွက့် ဇဝ်ဖြာ ကူပ် ဟဲ့ ကိူန် မှာပ် ပီ ဘူင် ဂေ။

8 ဇဝ်ဖြာ ဟဲ့ စ်ု ဒူအီ အီ ဘျာန် ဂြုဝ်း ဇဝ်ဖြာ တဲး အန် ဘ်ု ဒူအီ ပီ အိုပ် အန်။ မာလဲ၊ ဒူင် ဟာဝ် အန် ဒွန် ပ့လုဝ့် မိုဝ်း ယွတ့် ဂေ ခိူမ် ဒိန့် ဒီ အန် ဘော ခဲင် ဟုဝ် ဇဝ်ဖြာ ဂေ ဒူအီ ဟဲ့ ဘဲန် ရန်ဆူ ဒီ ဒါ အီ ဘျာန် ဂြုဝ်း ဇဝ်ဖြာ။

9 ဂေ ဟဲ့ ဘူင် အီ ဟာယ် အီ မိူက် ကာဆဝ် တဲး န့ ပီ ပီ ဒွိုမ် ဘူင် ဂေ စုဝ် ဘာန် ဒူအီ ခဲင် မိူင် ဂီဘီယာ တွိုန်။ ဇဝ်ဖြာ မိူဝ် တူ ပိဝ် မှာပ် ပီ ဘူင် ဂေ။ အန် ဘော ဒမ် မှာပ် ဒီ ဂေ။

10 ဇဝ်ဖြာ ပီ ဝီ တဝ်း၊ “ဒေါ ကာစုး အုဝ် ဒီ ကာတုန့် ဒူအီ အီဆာရေလ၊ န့ ဘော ပီ အုဝ် ကာတုန့် ဘ့လေ မာငုန် ခဲင် ပြဲ ကာဟဝ်း။ ဒေါ ကာတုန့် အုဝ် ဂေ ဂုန့် ဒင် ဘေ၊ န့ ဘော ပီ အုဝ် ကာတုန့် ဘ့လေ ဒီပူ အီ ဟဲ့ ဆိန် ဒီ အာတ့် အာခြာဝ် ဒီ ဘ့လေ အန်။ မာလဲ၊ ဒေါ ဝီ တး ဇမ် ဂေ ဒီ နွန် ဘာလဘေအူရာ တွိုန်၊ ဘေ ဘော ဝီ ကြိုပ် ဇဝ် ဘာလ။ ပါယ် တီ ဂေ ဘော မွှိုမ် ကာအိး ပီ ဇဝ် ပီ အိုင် ပီ ဝုဝ် ဂေ ဟဲ့ မွှိုမ် ကာအိး။

11 အာဖုင် ဒင်ခုဝ် ဂေ ဒူအီ အီဆာရေလ၊ န့ ဒီ ဘိုန့် တဝ် ပီ မာဆိမ်။ ဂေ တူ ပွိုန် ဒီ ဟျီင် ဂွန်၊ အာဝ် နပ် ဒီ တူ အး ဘော အာဝ် နပ် ဒီ ဒဲ ဘာဒိက် ဆန်ထေ ဒေါ မှဝ်။

12 ဂေ ပီ ဘော ဟဲ့ ဟျီင် ဂွန် တဲး ဂေ ကော ဟြေး ကော တာင် မိူဝ်၊ အုဝ် ယီ ဒီ ဝီ ဒိုဝ်း ဟာဝ် ဒွန် ဝီ၊ ကွဲ့ တဲး န့ ဆီ ဂိူတ် ခေါ အူ ဝီ။ ပန် ဒီ ဘ့လေး ဝဲန် အုဝ် ဒူအီ ဂေ တီ၊ ဂေ ဒီ ဘော ခမ် ဒုက် တာင်။

13 အုဝ် ဟဲ့ ယိုဝ် လှုက်လှာန် ဂေ ဒူအီ အီဆာရေလ အီ ဟဲ့ စှိတ် ပီ မိူင် ထူရုဝ်။ ဒေါ တီ နီ ဂေ ယီ တဲး အီ ငဝ်း ယမ် ဂွန် ဂေ။”

14 အိုယ် မဲ ဇဝ်ဖြာ၊ မာဆေ ပီ လုဝ် မှာန့် အုဝ် အာဒါ ဒူအီ ဂေ တီ။း အုဝ် ဒီ မှာန့်၊ တဲး အီဘိုန့် ဂေ ဘဲန် မှန်။ ကွဲ့ တဲး ပူ ဂေ မိုဝ်း အိုမ် ပူ။

15 ဇဝ်ဖြာ ပီ ဝီ တဝ်း၊ “နာ တူ မွှိုမ် ဒွန် မျုဝ် ပီ ဘူင် ဂေ၊ ဂေ ဟဲ့ ကာစုး ဒီ ဘူင် ခဲင် မိူင် ဂီလဂါ။ အုဝ် မိူဝ် ဟဲ့ ကာစုး ဒီ ဇွင့် ဂေ ဆိန့် ဒေါ အန် တီ။ ကူပ် မှာပ် ပီ ဘူင် ဂေ တီ၊ အုဝ် ဒီ ဟုဝ် လေး ဂေ ခဲင် မိူင် ပီ အိုပ် အုဝ်။ ဝါယ် အန် တီ အုဝ် မိူဝ် တူ ရွက့် ဂေ။ ခုဝ်၊ ဒါ ကာညာ အီ အိုပ် ဂေ မုး တူတ့် အီ ကာဘး ဒီ အုဝ်။

16 ဂေ ဒူအီ အီဆာရေလ ဟဲ့ ပီ ဟေ ဘ့လေ။ ရျီး အန် အီ ဟဲ့ ဟွတ့် ကာဟဝ်း အာဝ် ဟူ နပ် ဒီ မိုဝ်း ဘ့လေ။ ပါယ် တီ ဂေ ဒူအီ အီဆာရေလ မိူဝ် အာဝ် ဟူ နပ် ဒီ မိုဝ်း ဂွန်။ ဂေ ပီ ဘော မိုဝ်း ဂွန် မိူဝ်၊ အုဝ် ဒီ ဒိုဝ်း ဂွန် ဂေ တီ၊ တဲး ဂေ ယမ်။”

17 ဇဝ်ဖြာ ပီ ကြိုပ် အုဝ် ဒီ ဝဲန် ဂေ ဒူအီ ပီ အိုပ် အန် ကူပ် တူ ထူမ် ဂေ ဂြုဝ်း အန်။ ပါယ် တီ ဂေ ဒီ ဘော ကာဒုး ဒီ ဟာဝ် ဟာဝ် တး တး ကာတဲ ဂေ ဒူအီ အာမျုဝ် ဟဝ်။