1 ဇဝ်ဖြာ ပီ ဝီ တဝ်း၊ “တဲး ဘေ ဘုတ် ဝဝ် ကူပ် ရန်ဆူ ဟဲ့ ခြိုင် ဒီ တး ကာဂုဝ်း ဒီ မိူင် ပီ အိုပ် အုဝ်။ ဂေ ဘော တး ပီ မာလင်ဒါ အီ ဟြေတ့် ပီ ဒီ ဟူမ်။ ခုဝ်၊ ဂေ ဒူအီ ပီ အိုပ် အုဝ်၊ ဂေ ဟဲ့ ဝဲန် ကာဒိက် ဆတ်ဇာ ပီ ဒွါ အုဝ် ဒီ ဂေ။ ဂေ ဟဲ့ လှိုဝ် ဒါရာ ပီ ကာလာင် အုဝ် ဒီ ဂေ။

2 ဂေ ဒူအီ အီဆာရေလ ဟဲ့ ဆာခိုဝ် မှာန့် ဒီ အုဝ် တဝ်း၊ ‘အိုယ် မဲ ဇဝ်ဖြာ ပီ ကြိုပ် ယေ၊ ယေ မိူဝ် မုး ဒူအီ ပီ အိုပ် မဲ။ တဲး မဲ စွယ် ယေ။’

3 ဂေ ပီ ဘော ဟဲ့ တဝ်း ပါယ် တီ မိူဝ်၊ ဂေ ယီ ဟဲ့ ဟွတ့် ဝဲန် နာ ဘွတ် နာ မွှိုမ်။ ခုဝ် အန် တီ၊ ရန်ဆူ ဂေ ဒီ ခုင်ခြး ဒူပ် ဒီ ပန် ဂေ။

4 ဂေ ဒူအီ ပီ အိုပ် အုဝ်၊ ဂေ ရဝ်း ခုန်ဒီခမ် ဘော ဒါ ကာညာ အီ အိုပ် ဂေ၊ အီ တူ မုး ဒူအီ ပီ ရဝ်း အုဝ်။ ဂေ လိုဝ် စှိုမ် ကူပ် ဒိုဝ်း ဂေ ရွိုန် ဂေ ခြိဝ် ဘော ဘူင် အာရိုပ် ရာင်။

5 အုဝ် ဇွင့် ကာဆဝ် မာမက် ခြိဝ် ပီ ကြိုပ် ဘေ ဒူအီ ခဲင် မိူင် ဆာမာရီ။ အုဝ် မိူဝ် ဟဲ့ ရူ ကာဆဝ် ဒီ ဘေ အီ ဘူင် အာရိုပ် ရာင် တီ။ န့ ဒီ ဘော လှေန့် ခဲ့ မှဝ်၊ ဘေ ဒီ ဝဲန် အာရိုပ် ရာင် ဘော ဝဲန် ဒွန် မျုဝ် အီ မွှိုမ် ကာအိး တီ။း

6 အာရိုပ် ရာင် အီ မုး မာဝ်ထာတ် ပီ ကြိုပ် ဘေ တီ တူ မုး ဇဝ်ဖြာ။ ဒူအီ ဟဲ့ ဘူင် တာ ဒဲ ဂေ။ ကူပ် န့ ပါယ် တီ န့ ဟဲ့ ကာအာပ် အီ ကာဘက် အန် ဘဲန် ဒီဂ်ု ဘဲန် ဒီဂ်ု။

7 ဂေ ဟဲ့ ဘြတ် ဆီမာ အီ ပီ ခုန်။ ဂေ ဒီ ဝီ ဆုဝ့် အီ ပီ ခုန် လာင်။ ငှုဝ် ဂေ အာဝ် မိုဝ်း ကာယူင့် အန်။ အာဝ် ပွိုန် ကြိတ် ကာပဲ့ တဲး န့ ပွိုန် ဘူင် ခါမုန်။ ဆေ န့ ဘော မိုဝ်း ကာယူင့် အန်၊ ဒူအီ ပေါ မျုဝ် ပေါ မိူင် ဒီ ဘော ဝီ တး ဒိုဝ်း ဟူမ် တူတ့်။

8 ဂေ ဒူအီ အာမျုဝ် ဟဝ် ဟဲ့ ဟွတ့် ပျာတ့် ဒူအီ အီဆာရေလ။ ဒူအီ အီဆာရေလ ဟဲ့ ကွယ် ကာတဲ ဒူအီ အာမျုဝ် ဟဝ်၊ ယီ တူ မိုဝ်း ဆာရေ။ ဂေ ဟဲ့ ပီ ကာလုဝ့် အီ ဟဲ့ ဒး။

9 ဂေ ဒူအီ အီဆာရေလ ဟဲ့ ပီ မာလာ ပြဲ အီ ဒူပ် ပီ အိုင် အန်။ ဂေ ဟဲ့ ဟာဝ် ယွင့် ဒုဝ် ဂေ ဒီ ဒူအီ ခဲင် မိူင် အာဆူရီယာ၊ တဲး ဂေ မိုဝ်း အီ ရဲ အီ ဂွင့် ဂေ။

10 ဂေ ပီ ဘော ဟဲ့ ယွင့် ဒုဝ် ဂေ ဒီ ဒူအီ အာမျုဝ် ဟဝ်၊ ဒေါ တီ နီ အုဝ် ယီ ဝီ ဒဲ့ ကာဇု ဂေ။ ဂေ ဒီ ခမ် ဒုက် တာင် ကူပ် ခါနှာပ် ကာဆဝ် ခုန်ဒီခမ် အီ အိုပ် မိူင် အာဆူရီယာ ဒီ ဂေ။

11 ဂေ ဒူအီ အီဆာရေလ ပီ ဘော ဟဲ့ ဝဲ ဘူင် ကိူန် ကာစှူင့် လှူ၊ တဲး န့ ဂဝ်း ဝဲန် မှာပ် ဂေ၊ ကာစှူင့် လှူ ဂေ တီ ယီ တဲး ဂေ ဝဲ ဘူင် မှာပ်။

12 အုဝ် ဟဲ့ ဒဲမ် ဒါရာ အုဝ် ဘဲန် မျုဝ် ဘဲန် မျုဝ် အာဒါ ဂေ။ မာလဲ၊ ဂေ ယီ တူ မာတ် န့ မုး ဒါရာ အာဒါ ဂေ။ ဂေ မာတ် န့ ဝီ မုး ဒါရာ အာဒါ ဂေ အာမျုဝ် ဒူအီ ဟဝ်။

13 ဂေ လှူ ပီ ဒီ လှူ ဒီ အုဝ်၊ ဝီ ဒိုဝ်း ယင် ဒဲင် ကာစှူင့် လှူ တီ၊ ဝီ ဟူမ်။ မာလဲ၊ န့ တူ လဝ့် နဝ်း အုဝ် အီ မုး ဇဝ်ဖြာ။ အုဝ် ဟဲ့ နုဝ် မှာပ် ပီ ဘူင် ဂေ ဘော ဒမ် မှာပ် ဒီ ဂေ။ ခုဝ်၊ အုဝ် ဒီ တိုယ် ဝေန့် ဂေ ခဲင် မိူင် အဲဂိုပ်။

14 ဂေ ဒူအီ အီဆာရေလ ပီ ဘော ဆမ် ဟုဝ် မိူဝ်၊ ဂေ ယီ ဝီ ပိဝ် ဒါ ကာညာ အီ ဖာန် ဘ့လေး ဂေ။ ဂေ ဒူအီ အာယူဒါ ဟဲ့ ဒဲ မာန် မိူင် အီ ဟဲ့ မန် ဆီချာ ဒီ ဂေ။ မာလဲ၊ အုဝ် ယီ ဒီ ဝီ ဒိုဝ်း ငဝ်၊ ဒုဝ့် ဝဲန် မာန် မိူင် ဂေ တီ ဘော ဟုဝ် ခုန်ဒီခမ် ဂေ။”