ဇဝ်ဖြာ ပီ ဝီ တဝ်း၊ “ဒွန် ဇေန့် ဒေါ ဟဲ့ ခြာမ် အုဝ် ဒီ ဝီ ဆီနမ် ဂေ ဒူအီ အီဆာရေလ ပီ အိုပ် အုဝ် တဲး ဂေ ဝီ ဆီကဲန်၊ မှာပ် ဂေ အီ ဟဲ့ ကိူန် ကာဆဝ် ဝီ လိုဝ်း ဆီချာ။ ဂေ ဘော ဝီ လာယ် ကာလုဝ်၊ ဝိန် ဒီ ပျာတ့် ကာင် အီ ဟဝ်၊ ပြာ ကြုဝ်ကြာမ် အီ ဘော ဘ်ု ဒီ ဇူန် အီ ဒူပ် န့တေန့်။

2 ဂေ ယီ တူ လှုဝ်း နာ ဟာယ် နာ မိူက် ပဲ့ ဟဲ့ ဘူင် ဂေ။ ပီ ဘူင် ဂေ အီ တူ မွှိုမ် ဒွန် မျုဝ် ဟဲ့ ကာဒိုက် ကာဒဝ့် ဒီ ဂေ။ အုဝ် မိူဝ် လှုဝ်း လွင် အန် တီ ဒွန် မျုဝ်၊ တူ နပ် ဒီ ပိဝ်။

3 ဆေ ဒူအီ ကိူန် ဟဲ့ ဘူင် နာ ဟာယ် နာ မိူက်၊ န့ တဲး လဝ့် နဝ်း ခုန်ဒီခမ်။ ဆေ ဂေ ဘော ကာလုဝ်၊ န့ တဲး အာမူ အာမာတ် အန် ဒါခိုယ်။

4 ဂေ ဘောကာဂ့လျီတ် မုး တူတ့် ဒူအီ လုတ့် ရဝ်။ ဂေ ဘော ပီ ငဝ် ကာဝှါင် အီ ပွိုန် ဂိုမ် ခါမုန်။ ဂေ ဟဲ့ ဟွတ့် ဘုတ် အုန် ငဝ်၊ အာဝ် ဟူ လုဝ် ဝီ ကာဆုး မာဆီဘ့လာဝ်။ ဂေ ဘော ကွယ် နှိမ် နှိမ် စုး ဆိန့် ဒေါ ကြိတ် ဂေ ခါမုန် ကော ဝီ ဇမ် ပန် ဒီ ဘြး ခါမုန် အိမ် ပီ ဂိုမ် ဂေ တွိုန်။

5 ဆီငဲ ဘူင် ခုန်ဒီခမ် ဘ့လွယ်၊ ဂေ ဒါ ကာညာ မိူဝ် ဟဲ့ ယိုတ့် ပဝ်း။ ခုန်ဒီခမ် မိူဝ် ဘူင် တဲး ဒူအီ အန် လုက်တာယ် ဘော ကာဖြူမ် ဒီ နဲန ကာညး အီ ဟဝ်။

6 ဒူအီ ဂေ တီ၊ ဂေ ဘော ကာဟွာ့ ခဲင် နဝ်း ကော ပီ ငဝ် ကာဝှါင် ကူပ် ပီ ဆီ ဘူင် ပီ ခြာမ် ဂေ။ နဝ်း စာဝ် ဂေ ဟဲ့ ကွယ် ဒွင် ခိူန်။ ဇမ် ဆိန့်ဝး၊ န့ ဘော ကုး တာင် ကာဆဝ်၊ ကော ပီ ပ့လဲ့ ငဝ် ဒီ ကုး။

7 ဂေ ဘောကာဂ့လျီတ် ဟဲ့ မှဲ ဘော မိုဝ်း နဝ်း ရူ ဘော ငဝ်း ယမ် ဒါ ကာညာ အီ အိုပ် ဂေ။ ခုန်ဒီခမ် ဂေ မိူဝ် ဟဲ့ ကေး။ ကာတဲ ဂေ တီ အာဝ် မိုဝ်း ခေါ အူ ဝီ အီ ဟဲ့ ဒတ် ဒဲ့ အုဝ်။

8 ဂေ ဒူအီ အီဆာရေလ ပီ ခါမုန် အီ ဟဲ့ ဒွင့် အာဒါ အူ ဘ့လာက်။ ခုဝ်၊ ဂေ ဟဲ့ ကာဆူ ကာဝ်ု ဒူပ် ဒူအီ အာမျုဝ် ဟဝ်။

9 န့ ပီ ဂေ ဒူအီ အာမျုဝ် ဟဝ် ဟဲ့ ဟူမ် ပ့လူမ် ဂေ၊ ဂေ ယီ တူ နပ် ဒုဝ် ဂေ။ ဟိုက် ဂိန့် ဂေ မိူဝ် ဟဲ့ လုယ် ဘော ဂိန့်၊ ဂေ ယီ တူ လှုဝ်း ဒုဝ် ဂေ။

10 နဝ်း ဒိူဝ် ဂေ ဒူအီ အီဆာရေလ ဟဲ့ ဘဲန် ဆက်ဆေ အီ ဖျာက် ဂေ။ ပီ ဘော ဟဲ့ ဘဲန် ဒုက် တာင် ကာဆဝ် မိူဝ်၊ ဂေ ယီ တူ ဝီ တး ဒီ အုဝ် ဘော တူ ဟြေတ့် အုဝ် အီ မုး ဇဝ်ဖြာ ပီ ကြိုပ် ဂေ။

11 ဂေ ဒူအီ အီဆာရေလ ဘော ပီ မာဘ့လူယ် အီ ဟဲ့ ရိုဝ် ဘော ဘိုန့် ဝိဝ် ဘိုန့် ဝေန့်။ ဂေ ဘော ဟာဝ် မှာန့် ဒီ ဘိုင် ဒူအီ ခဲင် မိူင် အဲဂိုပ်။ ဝါယ် အန် တီ ဂေ ပီ ဝီ ကာဘ့လဲပ် ဟာဝ် ဘိုင် မိူင် အာဆူရီယာ။

12 ဒေါ ဆီငျာ ဟာဝ် ဂေ တီ၊ အုဝ် မိူဝ် ဘ့လး န့ရပ် အုဝ်၊ ပ ဒီ ဂေ၊ တဲး န့ ဆီဘ့လိုက် တူတ့် ဂေ။ အုဝ် ဘော ဝီ ဒိူတ် လူင် ဂေ ပီ အီ မှေတ့် မာဆိမ်။ အုဝ် မိူဝ် ဒမ် မှာပ် ဒီ ဂေ ကူပ် နာ ဟာယ် နာ မိူက် ပဲ့ ဟဲ့ ဘူင် ဂေ။

13 ဂေ ဒီ ကာဒုး အာဖေ အာရေ။ ခုဝ်၊ ဂေ ဟဲ့ ဝဲန် အုဝ် ဘော ဝီ ဘူင် ကာဘး ဒီ အုဝ်။ ပါယ် တီ ဂေ လုဝ် ခမ် အုဝ် ပျာတ့် ဝဲန် ဂေ။ အုဝ် ဟဲ့ မိုဝ်း နဝ်း ဆီ ချွတ် ဂေ။ မာလဲ၊ ဂေ ကာလာင် မီ ဂြုဝ်း ကာလုဝ် လွင် အုဝ်။

14 ဂေ ဆာခိုဝ် ဒီ အုဝ်။ န့ ယီ တူ လေး ခဲင် နဝ်း ဖွိုမ် ဂေ ပါယ် ခါခ်ု။ ဂေ ဘော ကွယ် ဒဲင် ဒူင် အိတ် ဂေ ဘော ငှုန်၊ တဲး န့ ပီ ပီ ဘူင် ဒူအီ အီ ကြိုပ် အာရိုပ် ရာင် ဇဝ် ပေါ ကာဒင်။ ဒေါ မှာန့် ဂေ ပီ ဒီ ဟူမ်၊ ဂေ ဘော ကြိး ဘော ဆွာ့ ဟုန် ဂေ၊ တဲး န့ ပီ ပီ ဘူင် ဂေ ဒူအီ အီ ကြိုပ် ဇဝ် ပေါ ကာဒင်။ ပါယ် တီ ဂေ မုး ဒူအီ အီ ကာဘး ဒီ အုဝ် ဆေဆေ။

15 အုဝ် ပီ ဘော ဟဲ့ မုး ဒါ အီ ဟျီင် ဂေ အီ တဲး ပ့လူမ် တဲး ဟဲန့် ဒီ ဂေ မိူဝ်၊ ဂေ ယီ ဝီ ခြာမ် ဒီ ဘူင် နာ တူ မွှိုမ် ဒီ အုဝ်။

16 ဂေ ဘော အွန် ဒီ ဟြေတ့် ဒွန် နာ ဒွန် ပ့လုဝ့်၊ တဲး န့ မိုဝ်း ဒူအီ အီ ဒီ စွယ် ဂေ။ ဂေ ယီ တူ ဟြေတ့် အုဝ်။ ဂေ ဘော ပီ ဘ့လာ အ အီ ဟဲ့ ဂုဝ့် ဂဲ့။ ဒါ ကာညာ အီ အိုပ် ဂေ ဘော ကာဒုး ဒီ ယမ် ဒီ မာပွါ့ လာင် ကူပ် ဂြုဝ်း ဟာယ် ပဲ့ ဟဲ့ ကာလာင် ဂေ။ ဂေ ဒူအီ ခဲင် မိူင် အဲဂိုပ် ဒီ ဘော ကာညး ဂေ။”