1 ဂေ ဒူအီ ကိူန် ဝီ တဝ်း၊ “တး တး အိုယ်၊ တဲး အေ ဝီ ဒူပ် ဇဝ်ဖြာ ပီ ကြိုပ် အေ။ န့ ပီ ဇဝ်ဖြာ ဟဲ့ ကာယာတ့် ကာဒတ် အေ၊ အန် ပီ ဒီ ဝီ ဘူင် တဲး အေ ဝီ ပီ ဘြိမ် ပီ အာတ့် နီ။ အန် ဇဝ် ပီ ဘော ဟဲ့ ဘူင် တဲး အေ မိုဝ်း ဒူင် ဒိမ် ဒူင် ဆဝ် မိူဝ်၊ အန် ယီ ဒီ ဝီ ကာဘန် ဝီ ဆီနမ် ဒူင် ဒိမ် အေ။

2 အာဝ် ဘော လှေန့် အန် ဇဝ် ဒီ ဝီ တဲး အေ မိုဝ်း ပ့လူမ် မိုဝ်း ဟဲန့်၊ တဲး အေ ပွိုန် ဒီ ကွယ် ကာဒိုက် ကာဒဝ့် ဒီ အန်။

3 တဲး အေ နပ် လွင် ဇဝ်ဖြာ၊ တဲး အေ ဂျုဝ်ဂျာ ဒီ နပ် ဆီချာ အန်။ ပါယ် တီ အန် ဒီ ဘော ဝီ တး ဒူင် ကွယ် အေ၊ တဲး န့ ပီ ဘ့လာင် ဆီငဲ အီ လေး ဟုဝ့် စေဝ် ညှာ။ န့ ဒီ ဘော ပီ ဘော ဂ့လာယ် အီ စုဝ်း ဒေါ မုး ဂိန့် ဆီနမ် ဘော ဒေါ ဒီ တူတ့် ဆီနမ်၊ ကာဒါယ် ကော အမ် ည အာခ်ု မှာန်။”

4 ဇဝ်ဖြာ ယီ ဝီ တဝ်း၊ “အိုယ် ဘေ ဒူအီ အီဆာရေလ ဘော ဘေ ဒူအီ အာယူဒါ၊ အုဝ် တူ နပ် ပီ ဒီ ဘူင် အုဝ် ဒီ ဘေ။ နဝ်း ရွက့် ဘေ ဒီ အုဝ် န့ ဘော ပီ န့အု အီ မိုဝ်း ဒေါ ဆိန့်ဝး ဘော အိုမ် ဒီငါန် အီ စုဝ်း ဆိန့်ဝး စေဝ်၊ အာဝ် လှေန့် ဟဲ့ ဝီ ဟြာယ်။

5 ပါယ် တီ အုဝ် ဟဲ့ တဲး ဂေ ဒါ အီ ဘျာန် ဂြုဝ်း ဇဝ်ဖြာ ကာလာင် ဂြုဝ်း အုဝ်။ န့ တဝ်း၊ ဘေ လုဝ် ခမ် ပီ ဆုင်ဖျာတ် အုဝ် အာမူ ဘေ၊ တဲး ဘေ ကာပျာတ့် လိုဝ် တူတ့်။ အုဝ် မိူဝ် ဟဲ့ တဝ်း၊ ဘေ ဒီ လုဝ် ယမ်။ ပီ ဆုင်ဖျာတ် အုဝ် ဒီ ဘေ တီ၊ န့ ဒီ ပီ ဘ့လာင် ပ့လ မ့ပ့လေတ့်။

6 အုဝ် ဆီ တဲး ဘေ မိုဝ်း နဝ်း ရွက့် အုဝ် လွှိုမ် တဲး ဘေ လှူ ဒုဝ် ဆတ်ဒါဝါ ဒီ အုဝ်။ ဘော ဆေ ဘေ ဝီ ကာလဝ့် ဒီ ဇဝ်ဖြာ၊ န့ ဘော မွှိုမ် လွှိုမ် ဘေ လှူ ဒုဝ် အီ ဒုဝ့် ဒီ ငဝ်။

7 မာလဲ၊ ဂေ ယီ ဝီ လှိုဝ် ကာဒိက် ဆတ်ဇာ ပီ ဒွါ အုဝ် ဒီ ဂေ ဒေါ ကွယ် ဂေ ဒီ ဒူင် စိူဝ် အာဒါမ်။ ဂေ ဘော ကာဘး ဒီ အုဝ်။

8 ခဲင် မိူင် ဂီလေအာတ် ဘော မိုဝ်း တူတ့် ဒူအီ အီ ဘူင် နာ ဟာယ် နာ မိူက်။ နှာမ် ဒူအီ အီ ဟဲ့ ကာဒုး ဒီ ငဝ်း ယမ် ဟဲ့ ဘုင်ဘြတ် ဒွန် ပ့လုဝ့်။

9 ဒါ အီ လှူ ဒီ ဇဝ်ဖြာ ဘော ပီ ဖိုင် ဒါ ဇူန် အီ ဘ်ု ဒီ ဇူန် အီ ဟဝ်။ ဂေ ဟဲ့ ငဝ်း ယမ် ဒူအီ ဒူပ် န့တေန့် အီ ဟာဝ် ဒီ မိူင် ဆေခေမ်။ နဝ်း ဂေ ဟဲ့ ဟာယ် ဟဲ့ မိူက် အာခါခ်ု။

10 အုဝ် ဟဲ့ ယိုဝ် အီ မွှိုမ် ကာအိး ကာဆဝ် ကာတဲ ဂေ ဒူအီ အီဆာရေလ။ ဂေ ဒူအီ ပီ အိုပ် အုဝ်၊ ဂေ ဟဲ့ ဘူင် တဲး ဒုဝ် ဂေ ကာဒါတ့် ကူပ် ကြိုပ် ဂေ ဇဝ် ပီ ကြိုပ် အီ ဟဝ်။

11 အိုယ် ဘေ ဒူအီ အာယူဒါ၊ အုဝ် ပီ ဘော မိုဝ်း နဝ်း ဆီ မွင့်ကာရာ ဒွါ အီ မွှိုမ် ဒီ ဘေ မိူဝ်၊ ဘော ဘေ ယီ လုဝ် ခမ် မှာပ် ကူပ် ပီ ဘူင် ဘေ။”