ဇဝ်ဖြာ ပီ ဝီ တဝ်း၊ “အိုယ် ဘေ ဒါ အီ လှူ ဒီ ဇဝ်ဖြာ၊ တဲး ဘေ ထူမ်။ ဘေ ဒူအီ အီဆာရေလ ဘော ဘေ အီ မုး ခြိုဝ် ခုန်ဒီခမ်၊ တဲး ဘေ ထူမ်။ ဘေ ဒီ ခမ် အုဝ် ဒမ် မှာပ် ဒီ ဘေ။ ခုဝ်၊ ဒေါ လှူ ဘေ ဒီ မိူင် မီဇာဖာ ဘော ဒီ နွန် ထာဘောရာ ဘေ ဟဲ့ ပီ ယွတ့် ဂေ ခိူမ် ပဲ့ ဟဲ့ ဒိန့် ဘေ။

2 န့ ဟဲ့ ပီ ဘေ ဟဲ့ ဂိုဝ်း ကာဒဝ် အီ လိုက် ကာဆဝ် အာဒါ အာမျုဝ် ဘေ ဒီ မိူင် အာကာဆီ။ အုဝ် ယီ ဒီ ဒမ် မှာပ် ဒီ ဘေ ဘောကာဂ့လျီတ်။

3 အုဝ် ဟဲ့ ဟွတ့် နပ် တူတ့် လွင် ဘေ ဒူအီ အာအေဖာရိမ် ဘော ဒူအီ အီဆာရေလ။ ဘေ ဟဲ့ ဝဲန် အုဝ် ပီ ယာ မာလမ် ဟဲ့ ဝဲန် အီမာယ် အန်။ ဘေ ဘောကာဂ့လျီတ် ဟဲ့ မွှိုမ် ကာအိး ကာဆဝ်။

4 နာ ဟာယ် နာ မိူက် ပီ ဘူင် ဘေ၊ န့ ဘော ဘဲန် အီ ခြဲ ဘေ တူ တဲး ဘေ ဝီ ဘိုင် ဇဝ်ဖြာ ပီ ကြိုပ် ဘေ။ နဝ်း ဆီ ကြိုပ် ဘေ အာရိုပ် ရာင် တွိုန် ဟဲ့ ဟဲန့် ကာဆဝ်၊ တူ တဲး ဘေ ဝီ ဘျွင် နဝ်း၊ ဝီ ဒူပ် ဇဝ်ဖြာ။

5 နဝ်း ပီခိုက် ဂေ ဒူအီ အီဆာရေလ ဟဲ့ ဟွတ့် လိုဝ်း ဆီချာ။ ပါယ် တီ ကူပ် မှာပ် ပီ ဘူင် ဂေ တီ၊ န့ ဘော ဝီ တဲး ဂေ ဒီပ့လာတ် ကေး။ ဂေ ဒူအီ အာယူဒါ မိူဝ် ဒီ ဘော ကေး ဒူပ် ဂေ။

6 ဟဲ့ ဟွတ့်၊ ဂေ ပီ ဝီ ဒိုဝ်း မာဘူ ဘော မာမက်၊ ဝီ တဝ်း ဒီ လှူ ဒီ ဇဝ်ဖြာ။ ဂေ ပီ ဘော ဝီ ဟြေတ့် ဇဝ်ဖြာ၊ ဂေ ယီ တူ ယိုဝ် အန်။ ခုဝ်၊ ဇဝ်ဖြာ ဟဲ့ ဟွတ့် ကာဂဝ်း ဒီ ဂေ။

7 ဂေ တူ မိုဝ်း နဝ်း ဆိူဝ် နဝ်း မှာန် ဒီ ဇဝ်ဖြာ။ ဂေ ဘော မိုဝ်း ဂွန် ကာတဲ ဂ့လ။ ဘ့လွယ် လိူန်မူန် ပီ ဘူင် ဂေ၊ န့ ဒီ တဲး ဘော ဂေ ဘော မာန် စ ဂေ စှိုမ်။

8 တဲး ဘေ ဘုတ် ဝဝ် ခဲင် မိူင် ဂီဘီယာ ဘော ခဲင် မိူင် ရာမာ။ တဲး ဘေ ရျီင် ဒဲ့ ဒါ ဆိုက် ခဲင် မိူင် ဘေတ်အာဝေန်။ တဲး ဘေ ဒူပ် အာဘေန်ယာမ်။

9 ဆေ ဆီငဲ ဒီ ဒမ် အုဝ် မှာပ် ဒီ ဘေ ဟဲ့ ဟွတ့် ဇမ်၊ ဂေ ဒူအီ အာမျုဝ် အာအေဖာရိမ် ဒီ လိုဝ် စှိုမ်။ အုဝ် ဒီ တဲး ဘော ဂေ ဒူအီ အီဆာရေလ နပ်၊ လွင် အန် တီ န့ ဒီ ဘော ဘဲန် အာခ်ု မှာန်။

10 ဂေ ဒါ ကာညာ အီ အိုပ် ဒူအီ အာယူဒါ၊ ဂေ ဒီ ဘော ပီ ဒူအီ အီ ဟဲ့ ကာထုဝ့် လွှက့် ကာအုန် ကာဒါယ်။ ပါယ် တီ အုဝ် မိူဝ် ဒီ ဘော ပီရူ ကာဆဝ် ဒီ ဂေ၊ တဲး န့ ကော ပီ အိုမ် ပြဲ့ ဟဲ့ တး။

11 ဂေ ဒူအီ အီဆာရေလ ခမ် ပီ ခါနှာပ် အီ ဟဝ် ဘော စှိုမ် ဆေ အုဝ် ဆုင်ဖျာတ် ဒါရာ။ ခုဝ်၊ ဂေ ဆီနဲ့ ဘိုင် အာရိုပ် ရာင်။

12 ပါယ် တီ အုဝ် ဒီ တဲး ဂေ ဒူအီ အီဆာရေလ လိုဝ် စှိုမ် ပီ မာဝ အီ ဟူမ် ခြိုင် တာ ဘော တဲး ဒူအီ အာယူဒါ ကာပျာတ့် လိုဝ် ပီ ဟေ အီ အမ် အီ ကွယ် ခဲင် အိုမ်။

13 ဒေါ ဝီ ယိုဝ် ဂေ ဒူအီ အီဆာရေလ ဒီ ဆဝ် ရောဂါ ဂေ ဘော ဒေါ ဝီ ယိုဝ် ဂေ ဒူအီ အာယူဒါ ဒိမ် ဒီ ဒုဝ် ဂေ၊ ဂေ ဒူအီ အီဆာရေလ ဘော ဝီ ဟာဝ် ဒီ မိူင် အာဆူရီယာ၊ တဲး ဂေ မှာန့် ခုန်ဒီခမ် ခဲင် မိူင် တီ စွယ် ဂေ။ မာလဲ၊ ခုန်ဒီခမ် တီ ယီ တူ ပွိုန် စွယ် ဂေ တဲး ဆဝ် ဘော ဒိမ် ဂေ ဟြာယ်။

14 ပါယ် တီ အုဝ် ဒီ ကာဂုဝ်း ကာဆဝ် ဒီ ဒူအီ အီဆာရေလ ဘော ဒီ ဒူအီ အာယူဒါ၊ တဲး န့ ပီ မာခြင်ဆီ နှိုမ်။ အုဝ် ဒီ ဝဲန် ဂေ၊ ကဝ့် ကာယာတ့် ဂေ ဘော ဘူင် တဲး ဂေ ကော ဘဲန် ဒီဂ်ု ဘဲန် ဒီဂ်ု။ အုဝ် ဒီ ဒိူတ် လာက် ဂေ၊ ကွဲ့ တဲး န့ မိုဝ်း အာဆေ အီ ပွိုန် ချွတ် ဂေ။

15 ဝါယ် အန် တီ အုဝ် ဒီ ဝေန့် ဒူင် ကွယ် အုဝ်၊ တဲး န့ ကော ဇမ် ပန် ဒီ လှုဝ်း ဂေ မှာပ် ဂေ ဘော မှာန့် တဲး အုဝ် စွယ် ဂေ။ ဒေါ အန် တီ ဂေ ဒီ ဘော ဝီ တး ဇိုဝ် အုဝ်။ ခုဝ်၊ ဒေါ မိုဝ်း ဂေ ဒုက် တာင် ဂေ ဒီ ဟြေတ့် အုဝ်။”