1 အိုယ် ဘေ ဒူအီ အီဆာရေလ၊ တဲး ဘေ ထူမ် ဂြုဝ်း ဇဝ်ဖြာ။ ခုဝ်၊ ဇဝ်ဖြာ ဟဲ့ မိုဝ်း အာမူ ဒီ ဖျာက် ဒူအီ ဘော ရဝ် ဘော မိူင်။ အန် တဝ်း၊ “ဒူအီ ခဲင် ကာဒါယ် မိူင် တီ၊ ဂေ တူ မိုဝ်း နဝ်း ဆိူဝ် နဝ်း မှာန်၊ တူ မိုဝ်း နဝ်း ရွက့်၊ တူ မိုဝ်း အီ တဝ်း၊ ‘အုဝ် မုး ဇဝ်ဖြာ ပီ ကြိုပ် ဂေ။’

2 ခဲင် မိူင် တီ န့ မိုဝ်း မီ လာယ် ဒိူင်၊ လာယ် ကာလုဝ် ကာလန့် ဘော လာယ် ကာငဝ်း ယမ်။ န့ ဘော မိုဝ်း မီ လာယ် ပြေ လာယ် ပြာ ဘော လာယ် လုတ့် လာယ် လာယ်။ အူ ဝီ ဟဲ့ ဟွတ့် ငဝ်း ယမ် အူ ဝီ၊ ပေါ အူ ဝီ ပီ ဝီ ငဝ်း ယမ် ပေါ အူ ဝီ။ ဂေ ဘူင် တဲး မှာပ် ဂေ ကိူန် ကာပွါ။

3 ကူပ် န့ ပါယ် တီ ခဲင် မိူင် တီ၊ န့ ဒီ ဘော ကာဟဝ်း တူတ့်။ ခဲ့ ကွယ် ဒူအီ ခဲင် မိူင် တီ၊ ဂေ ဒီ ဘော ယမ် တူတ့်။ န့ ဘော မုး မာဒုဝ် ပြဲ၊ မာဆိမ် ဘော မာဂါ၊ ဂေ ဒီ ဘော ယမ် တူတ့် ဒွန် မျုဝ်။

4 ကွဲ့ တဲး န့ မိုဝ်း အာဆေ အီ ကာလာင် စာဝ် ဒီ အီ ဟဝ်။ ကွဲ့ တဲး န့ မိုဝ်း အာဆေ အီ ဖျာက် အီ ဟဝ်။ ခုဝ်၊ ဒူအီ အာမျုဝ် မဲ ပီ ဒူအီ ဟာယ် အီ ဖျာက် ဒါ အီ လှူ ဒီ ဇဝ်ဖြာ။

5 ဘေ ဟဲ့ ဒီပ့လာတ် ကေး ဒွင် ခိူန် ဒွင် ဝန်။ ဂေ ဒါ အီ ဘျာန် ဂြုဝ်း ဇဝ်ဖြာ မိူဝ်၊ ဟဲ့ ဒီပ့လာတ် ကေး ပီ ဘေ။ အုဝ် ဒီ ဘော ပျာတ့် ဝဲန် ဘေ။

6 ဂေ ဒူအီ ပီ အိုပ် အုဝ် ဒီ လိုဝ် စှိုမ် ကူပ် တူ နပ် ဂေ ဒီ အုဝ်။ ဘေ အီ မုး ဒါ အီ လှူ ဒီ ဇဝ်ဖြာ၊ ဘေ ဟဲ့ ဝဲန် အုဝ်။ ဘေ ဟဲ့ ပိဝ် ဘော ဂြုဝ်း ဒါရာ အုဝ်။ ပါယ် တီ အုဝ် မိူဝ် ဒီ ဝီ ဝဲန် ဘေ။ ဟဲ့ ဟွတ့်၊ အုဝ် မိူဝ် တူ ယွတ် မဲန် ဂွန် ဘေ။

7 ဂေ ဒါ အီ လှူ ဒီ ဇဝ်ဖြာ ဝဲ ကိူန် ခဲ့ မှဝ်၊ ဂေ ဘော ဘူင် မှာပ် ဝဲ ကိူန် ခဲ့ တီ။ ပါယ် တီ ဂေ ဟဲ့ ဝီ ဘူင် တဲး အာဖုင် ဒင်ခုဝ် ဂေ ဝီ ဘဲန် အီ မွှိုမ် ဆာယ် ဒီ ဂေ။

8 ဂေ မိူဝ် ဟဲ့ မိုဝ်း ဟဲ့ ခြမ် ကူပ် မှာပ် ပီ ဘူင် ဂေ ဒူအီ ပီ အိုပ် အုဝ်။ ပါယ် တီ ဂေ ဘော ဝဲ ဆီ ဘူင် မှာပ်၊ ဘူင် နာ တူ မွှိုမ် ဆေဆေ။

9 ပီ ဘူင် ဂေ ဒူအီ အီ လှူ ဒီ ဇဝ်ဖြာ၊ န့ ပီ ပီ ဘူင် ဂေ ဒူအီ ရဝ် ဒူအီ ကာင်။ ခုဝ်၊ အုဝ် ဒီ ဒမ် မှာပ် ဒီ ဂေ ဘောကာဂ့လျီတ်၊ တဲး န့ ဘဲန် ရုး ပီ ဘူင် ဂေ။

10 ဂေ ပီ ဘော ဟူမ်၊ န့ ယီ တူ တဲး ဂေ ဖဲ။ ဂေ ပီ ဘော လာယ် လုတ့် လာယ် လာယ် မိူဝ်၊ န့ ယီ တူ တဲး ဂေ ဘြဲ ကိူန်၊ တူ တဲး ဂေ မိုဝ်း လှုက်လှာန်။ ခုဝ်၊ ဂေ ဟဲ့ ဝဲန် အုဝ် ဘော ဝီ ဟာဝ် ဒူပ် ဇဝ် ပေါ ကာဒင်။ 11 အိုမ် မာငုန် ဟဲ့ ဘူင် တဲး ဂေ ဒူအီ ပီ အိုပ် အုဝ် ယိုတ့် ကော ပိဝ် ဒုဝ် ဂေ။ 12 ဂေ ဒူအီ ပီ အိုပ် အုဝ် ဂေ ဘော နပ် ဒီ ဝီ ဟာဝ် ဒီမွှတ် ဒီ ဟေ။ န့ကြွုန် ဘော ဝီ နပ် ဒီ ဒွါ အာကျာမ် အာငျာန် ဒီ ဂေ ဘော ဝီ ကာလာင် ပီ ဆီ နပ် ဂေ။ ခုဝ်၊ ဂေ ဟဲ့ ဝဲန် အုဝ်၊ ဘူင် ပီ ပီ ဘူင် ယာ မာလမ်။ ဂေ မိူဝ် ဟဲ့ အာပ် ဒုဝ် ဂေ ဒီ ဇဝ် ပီ ကြိုပ် ဒူအီ ဟဝ်။

13 ဂေ ဘော ဟုဝ့် ကာဒဲ့ နွန်၊ ဝီ လှူ ဒီ တီ။ ဂေ ဘော ဝိန် ဒီ ဒုဝ့် ဆီနမ် အုး ငှုန် ခြိုမ် ဟေ တာင်၊ ဟေ အာရာပ် ဘော ဟေ ထေရေပ် အီ မိုဝ်း ယာပ် တဲး ဂေ ကွယ် ဒါခိုယ်။ ခုဝ်၊ ဂွန် ဒီဘျာ ဂေ ဒီ ဘဲန် ယာ မာလမ်။ အဝ် ဂေ ဒီ ဘော ဒိုဝ်း အီမာယ် တျီ့။

14 ပီ ဘော ဟဲ့ ပါယ် တီ မိူဝ်၊ အုဝ် ယီ တူ ဒမ် မှာပ် ဒီ ဂွန် ဒီဘျာ ဘေ ဘော ဒီ အဝ် ဘေ ဂေ တီ။ ခုဝ်၊ ဂေ အီမာယ် ယီ ဝဲန် အီဘိုန့် ဂေ၊ ဝီ ဟာဝ် လာယ် လုတ့် လာယ် လာယ် ဒူပ် ဂေ ယာ မာလမ်။ ဂေ ဘော ဝီ ဒီ လှူ ဒီ ဇဝ် ပီ ကြိုပ် အီ ဟဝ်။ ပါယ် တီ ဒူအီ အီ တူ မိုဝ်း အာငျာန် ဒီ ဘော စှိုမ် ဒူပ်။

15 အိုယ် ဘေ ဒူအီ အီဆာရေလ၊ ဘေ ပီ ဆ မိုဝ်း နဝ်း ဆိူဝ် နဝ်း မှာန် ဒီ အုဝ် မိူဝ်၊ ကွဲ့ ဘူင် တဲး ဘော ဂေ ဒူအီ အာယူဒါ ကာလိုပ်။ ကွဲ့ တဲး ဘေ လိုပ် ဟာဝ် ခဲင် မိူင် ဂီလဂါ ဘော ခဲင် မိူင် ဘေတ်အာဝေန်။ ကွဲ့ ဒိူင် တဝ်း န့ မုး ပီ အိုင် ဇဝ်ဖြာ။

16 ဒူအီ အာမျုဝ် အီဆာရေလ ဘော မိုဝ်း နဝ်း ဒိူဝ် ကာဆဝ် ပီ မာလာ ဒုဝ် မာ။ ဆေ န့ ပါယ် တီ အုဝ် တူ ပဲ ဒီ ဟျီင် ဂေ၊ တဲး န့ ပီ အီ ဟျီင် မာဘူ ဒီ ဒူင် မိုဝ်း ပေတ့် ငျီန် န့စမ်။

17 ဂေ ဒူအီ အီဆာရေလ ဟဲ့ ဟွတ့် ကြိုပ် အာရိုပ် ရာင်။ ခုဝ်၊ အာဝ် ပွိုန် စွယ် ဂေ။

18 ဆေ အီမာယ် ဂေ ဟဲ့ ဟွတ့် ဒျီင် ပဝ်း၊ ဂေ ဘော ဝီ ဟာဝ် ဘျုဝ် ဘျုဝ် ကျဝ် ကျဝ် ဒူပ် ယာ မာလမ်။ ဂေ ဘော အိုင် ဘော ဝုဝ် အီ မွှိုမ် ဆာယ် တီ လွှိုမ် မိုဝ်း ဆာရေ။

19 ခုန် ဒီ ဘော တး ဘုတ် ဝဲန် တူတ့် ဂေ။ ဂေ ဒီ ဘော ဝီ မွှိုမ် ဆာယ် ကူပ် ဟဲ့ လှူ ဂေ ဒီ ဇဝ် ပီ ကြိုပ် အီ ဟဝ်။”