ဇဝ်ဖြာ ပီ ဝီ တဝ်း၊ “ဂေ ဒူအီ ခဲင် မိူင် မုဝ်အာပ် ဟဲ့ ဘူင် မှာပ် ဆေဆေ။ အုဝ် မိူဝ် တူ ပိဝ် လွင် အန် တီ။ အုဝ် ဒီ ဒမ် မှာပ် ဒီ ဂေ အာခ်ု မှာန်၊ တူ တဲး ဂေ လွတ်။ ခုဝ်၊ ဂေ ဟဲ့ ဘူင် ကာဒါတ့် ဘာရေဝ် ခုန်ဒီခမ် မိူင် အေဒူမ် ဘော ကာအာင် အန်၊ တဲး န့ ဘဲန် ကာဝှါင်။

2 အုဝ် ဒီ တဲး ငဝ် တး စုဝ်း ခဲင် မိူင် မုဝ်အာပ် ဘော တဲး န့ ကာဆိုမ် ဒူင် ချြီင် ဂေ ဒါ ဆိုက် ခဲင် မိူင် ကီရအုတ် ဘောကာဂ့လျီတ်။ ဂေ ဒူအီ ခဲင် မိူင် မုဝ်အာပ် ဂေ ဒီ ဘော ကေး ယမ် ဒေါ ကာဂုဝ်း ဂေ ဘော ဒေါ ဆီနန် ဆီနိူင် ဘော ဘုတ် ဝဝ် ဂေ။

3 အုဝ် ဒီ တဲး ခုန်ဒီခမ် ဂေ စှိုမ် အာဆာက် အန် ဘော တဲး အာမူ အာမာတ် အန် ဘောကာဂ့လျီတ် ယမ်။” အုဝ် အီ မုး ဇဝ်ဖြာ ဟဲ့ ကာလာင် ပါယ် တီ။

4 ဇဝ်ဖြာ ပီ ဝီ တဝ်း၊ “ဂေ ဒူအီ ခဲင် မိူင် ယူဒါ ဟဲ့ ဘူင် မှာပ် ဆေဆေ။ အုဝ် မိူဝ် တူ ပိဝ် လွင် အန် တီ။ အုဝ် ဒီ ဒမ် မှာပ် ဒီ ဂေ အာခ်ု မှာန်၊ တူ တဲး ဂေ လွတ်။ ခုဝ်၊ ဂေ ဟဲ့ ဝဲန် ဒါရာ ဇဝ်ဖြာ။ ဂေ မိူဝ် တူ ဘူင် ဒူပ် ပီ ကာလာင် အုန် အန် ဇဝ်။ ဂေ ဘူင် ဒူပ် အီ တူ မှာန်၊ အီ ကာလုဝ် ပီ ပီ ဒွိုမ် ဘူင် ဂုန့် ဒင် ဂေ။

5 ကူပ် န့ ပါယ် တီ အုဝ် ဒီ တဲး ငဝ် တး စုဝ်း ခဲင် မိူင် ယူဒါ၊ တဲး န့ ကာဆိုမ် ဒူင် ချြီင် ဂေ ဒါ ဆိုက် ခဲင် မိူင် ယေရူဆာလဲမ် ဘောကာဂ့လျီတ်။”

6 ဇဝ်ဖြာ ပီ ဝီ တဝ်း ပါယ် နီ၊ “ဂေ ဒူအီ အီဆာရေလ ဟဲ့ ဘူင် မှာပ် ဆေဆေ။ အုဝ် မိူဝ် တူ ပိဝ် လွင် အန် တီ။ အုဝ် ဒီ ဒမ် မှာပ် ဒီ ဂေ အာခ်ု မှာန်၊ တူ တဲး ဂေ လွတ်။ ခုဝ်၊ ဂေ ဟဲ့ ဒိုဝ်း ဒူအီ အီ မိုဝ်း နဝ်း ဆိူဝ် နဝ်း မှာန် ဘော ယွင့် ဂေ၊ တဲး ဂေ ပွိုန် ရွိုန်။ ဂေ ဘော ဒိုဝ်း ဒူအီ အီ တူ မိုဝ်း မာဆေ ဘော ယွင့် ဂေ၊ တဲး ဂေ ပွိုန် ခ့လဲပ် အူ ဂူ။

7 ဂေ ဘော ခါနှာပ် ဒူအီ အီ တူ မိုဝ်း ပ့လူမ် ဂေ ဟဲန့်၊ အီ တူ မိုဝ်း ဒူင် ဒီ ဘိုင်။ ဂေ မိူဝ် တူ ဆုင်ဖျာတ် အာမူ ဂေ ဒူအီ ဂိန်၊ တဲး န့ ဒူပ် ဒါရာ။ ဘော ဂုန့် ဘော ဂွန် အီမာယ် အန် ကာဖြူမ် ဒီ လာယ် လာယ် ဒီ အီဘိုန့် အူ ဝီ။ ပါယ် တီ ဂေ လုက်တာယ် အုဝ် အီ မုး ဇဝ်ဖြာ အီ ဘွတ် ကာဆဝ်၊ တဲး အုဝ် ဝီ ကာဒါတ့် မွှိုမ် ကာအိး။

8 ဂေ ဘော ဒိုဝ်း ခြိုင် တာ ပီ တး ငါမ် တး ကမ် အီ ဟဝ် ဒီ ဂေ၊ ဝီ ဒ အိတ် နာ ဒဲင် ဆေ မိုဝ်း ဘ့လွယ် ဇဝ် ပီ ကြိုပ် ဂေ။ ဂေ ဘော ဒိုဝ်း ခြိုင် တာ ပီ တး ငါမ် အီ ဟဝ် ဒီ ဂေ၊ ဝီ ဒ အိတ် ခူပ် ကာစှူင့် လှူ ဒွန် ပ့လုဝ့်။ ဂေ ဘော ပြာ ရွိုန် အီ၊ ဝီ စိုဝ်း အိုမ် မာငုန်၊ ဝီ လှူ ဒီ ဇဝ် ပီ ကြိုပ် ဂေ။

9 တဲး ဘေ လှုဝ်း ခဲ့ ပီ ဘူင် အုဝ် အာဒါ ဒူအီ ပီ အိုပ် အုဝ်။ အုဝ် ဟဲ့ ပျာတ့် ဝဲန် ဒူအီ အာမုဝ်ရိတ် အီ ဟဲ့ စာ ပီ ဟေ အာရိတ် ဘော မိုဝ်း ပ့လူမ် ပီ ဟေ နေဝ်။ အုဝ် ယီ ပျာတ့် ဝဲန် ဘ့လေ ဂေ ဘော ဂိုဝ်း ရျီး ဂေ။

10 အုဝ် ဟဲ့ ဒိုဝ်း လေး ဘေ ခဲင် မိူင် အဲဂိုပ်၊ ဝီ တိုယ် ဟာဝ် ဘေ ခဲင် ပြဲ ကာဟဝ်း အာဒါ ဂိုဝ် ဆီနမ်။ ဟဲ့ ဟွတ့်၊ အုဝ် ဟဲ့ ဝီ တဲး ဘေ ပွိုန် ဒီ ဘိုင် မိူင် ဒူအီ အာမုဝ်ရိတ်။

11 အုဝ် ဟဲ့ ရဝ်း ဂွန် အီမာယ် ဘေ မင် အီ၊ တဲး ဂေ ဘဲန် ဒါ အီ ဘျာန် ဂြုဝ်း ဇဝ်ဖြာ။ ဘော ဂေ ဒူအီ အီ ဆီ နှိုမ် အုဝ် ဟဲ့ တဲး ဂေ ဘဲန် ဒူအီ နာစာရီ။ အိုယ် ဘေ ဒူအီ အီဆာရေလ အီ မုး ဒူအီ ပီ အိုပ် အုဝ်၊ အာဝ် မိုဝ်း အာဆေ ကာတဲ ဘေ အီ တဝ်း ဂြုဝ်း အုဝ် တီ တူ မှာန်။

12 ဘေ ယီ တဲး ဒူအီ နာစာရီ ဘူင် မှာပ်၊ တဲး ဂေ ဒျီင် အိုမ် မာငုန်။ ဒါ အီ ဘျာန် ဂြုဝ်း ဇဝ်ဖြာ မိူဝ်၊ ဘေ ဘော ခြဲ ဂေ တဝ်း၊ ‘ကွဲ့ ဂြုဝ်း။’

13 ပါယ် တီ အုဝ် ဒီ ခါနှာပ် ဘေ၊ တဲး ဘေ ငှုန်၊ တဲး န့ ပီ ဟမ် လက်လဝ် အီ ဟဲ့ ဒါင် ငှုဝ် ကိူန် ကာဆဝ်။

14 ဒူအီ အီ နပ် ဒီ ကာဘ့လဲပ် ဟဲ ဟဲ အန် မိူဝ် တူ လွတ် တူ ပွုန် ဒေါ မှဝ်။ ဝီ အီ မိုဝ်း ပ့လူမ် တာင်၊ အန် ဒီ ဘော စှိုမ် ဟဲန့် အန်။ ဂေ ဒါ ဆိုက် မိူဝ် တူ ပွိုန် စွယ် ဒုဝ် ဘြိမ် ဂေ၊ တဲး ဂေ လွတ်။

15 ဒါ အီ ဘန့် အ မိူဝ် တူ ပွိုန် ခမ်။ ဝီ အီ ဟဲ့ ဒဲ ခြန် ပ့လဝ် ခြန်၊ အန် မိူဝ် တူ ပွိုန် စွယ် တဲး အန် လွတ်။ ဒါ ဆိုက် အီ ပဝ့် မင်ပြွင့် မိူဝ် အန် တူ ပွိုန် စွယ် တဲး ဒုဝ် အန် လွတ်။

16 ဆီငဲ အန် တီ ဒါ ဆိုက် အီ ကျ ဒီ ကာဂုဝ်း မိူဝ် ဂေ ဒီ ဝဲန် ခြိုင် ကာဂုဝ်း ဂေ၊ ဝီ တဝ် လေး ဒူင် ကာဂုဝ်း ဂေ။” ဇဝ်ဖြာ ဟဲ့ ကာလာင် ပါယ် တီ။