1 ဇဝ်ဖြာ ပီ ဝီ တဝ်း၊ “အိုယ် ဘေ ဒူအီ အီဆာရေလ ဘော ဒူအီ အာယူဒါ၊ တဲး ဘေ ထူမ် ဂြုဝ်း ပီ ကာလာင် ဇဝ်ဖြာ လွင် ဘေ။ ဘေ ဘောကာဂ့လျီတ် မုး အာမျုဝ် ဒူအီ ပီ ဒိုဝ်း လေး အုဝ် ခဲင် မိူင် အဲဂိုပ်။

2 ခဲ့ ကွယ် ဂေ ဒူအီ ဒဲင် ကာဒါယ် နီ အုဝ် ဟဲ့ ရဝ်း မီ ဘေ ဒူအီ အူ မျုဝ် နီ၊ တဲး ဘေ ဘဲန် ဒူအီ ပီ အိုပ် အုဝ်။ ကူပ် န့ ပါယ် တီ အုဝ် လုဝ် ဒမ် မှာပ် ပဲ့ ဟဲ့ ဘူင် ဘေ။ 3 ဆေ န့ မိုဝ်း ဒူအီ အာ ဝီ၊ ဆေ နဝ်း ဂါယ် တူ မုး နဝ်း အူ မျုဝ်၊ ဂါယ် တူ ပွိုန် ဖြူမ် ရိုမ် ဘော ဟာဝ် ဒူပ် န့တေန့် အူ ညွင့်။ 4 ဘော မာခြင်ဆီ၊ အန် တူ ရျီင် အာတ့် ကဝ့် မှေတ့် အန် ပီ ဒီ ဟူမ် အန်။ မာခြင်ဆီ နှိုမ် မိူဝ် တူ ကာအိူန် ခဲင် ကာဒဝ် ဒူင် ကွယ် အန် အာတ့် မှေတ့် ဟူမ် အန် မာဒုဝ် ပြဲ။ 5 ဆေ တူ ဒိန့် ယွတ့် ဘော ခိူမ်၊ မာဆိမ် တူ ပွိုန် လိုပ်။ အာတ့် ယိုဝ် ဒုဝ် ဆတ် ပီ ဒီ ဟူမ်၊ အန် တူ လိုပ် ခဲင် ယွတ့် တီ။ 6 ဆေ တူ ဘုတ် ဝဝ် ကာတဲ မိူင်၊ ဒူအီ တူ ဝီ ကာစွာ တူ ဝီ ယုဝ် ရန်ဆူ။ ဆေ န့ မိုဝ်း အာဖေ အာရေ ခဲင် ရဝ် ဘော ခဲင် မိူင်၊ န့ မုး ဇဝ်ဖြာ အီ ဘူင်။ 7 အာတ့် ဘူင် အုဝ် ပါယ် တီ အုဝ် ယီ ဒမ် ဆာဒိက် ဒီ ဘေ၊ တဲး ဒဲစေန့် အုဝ် အီ မုး ဒါ အီ ဘျာန် ဂြုဝ်း ဇဝ်ဖြာ ကာလာင် ဂြုဝ်း ဒီ ဘေ။ ဒေါ တီ နီ အုဝ် အီ မုး ဇဝ်ဖြာ အီ အိုပ် တူတ့် ဒွန် မျုဝ်၊ အုဝ် မိူဝ် ဟဲ့ ဘူင် ပါယ် တီ ဒီ ဘေ။

8 န့ ပီ မာခြင်ဆီ ဟဲ့ ဟွတ့် ကာအိူန်၊ တဲး ဘေ ယုဝ် ဒီယုး ဒီယေန့်။ ဇဝ်ဖြာ ဟဲ့ ဟွတ့် ကာလာင် ဂြုဝ်း။ ခုဝ်၊ အုဝ် အီ မုး ဒါ အီ ဘျာန် ဂြုဝ်း ဇဝ်ဖြာ၊ အုဝ် တူ ယ ကွယ် ပီယေန့် ပါယ် တီ။ အုဝ် လုဝ် ကာလာင်။”

9 ဇဝ်ဖြာ ဟဲ့ တဝ်း ဒီ အုဝ်၊ “တဲး မဲ ကာလာင် ပါယ် နီ ဒီ ဒါ တာင် အီ အိုပ် ခဲင် မိူင် ဖီလီထီ ဘော မိူင် အဲဂိုပ်။ တဲး မဲ တဝ်း၊ တဲး ဘေ ဟုဝ့် ကွယ် ဒဲင် နွန် ဆာမာရီ။ တဲး ဘေ ယွတ် မှာပ် ဒွန် မျုဝ် ပီ ဘူင် ဒူအီ အီဆာရေလ အီ မွှိုမ် ကာအိး ကာဆဝ်။

10 ဂေ မုး ဒူအီ ဟဲ့ ပိဝ် ဒါရာ၊ တူ နပ် ဒီ ဘူင် ဒူပ်။ ဂေ ဟဲ့ ပြာ ကြုဝ်ကြာမ် အီ ဟဝ် ဘော ဖာတ် ဒိုဝ်း အုန် ခဲင် ဒူင် ချြီင် ဂေ။” ဇဝ်ဖြာ ဟဲ့ ကာလာင် ပါယ် တီ။

11 ဟဲ့ ဟွတ့် ဇဝ်ဖြာ ပီ ဝီ တဝ်း၊ “ရန်ဆူ ဒီ တး ဝဲင် ရူပ် မိူင် ဘေ။ ဂေ ဒီ ဘော တး ပျာတ့် ဝဲန် ပီ ဂွင့် ပီ ရဲ ဘေ၊ ပျာတ့် ဘော ဒူင် ချြီင် ဘေ ဘော ဖာတ် ဒိုဝ်း ကြုဝ်ကြာမ် ပဲ့ ဟဲ့ အုန် ဘေ ဒီ တီ။”

12 ဇဝ်ဖြာ ပီ ဝီ တဝ်း၊ “ဆေ န့ မိုဝ်း ဒူအီ အီ ဟျီင် မာဘူ၊ အန် ဆီ ဖာတ် ဒိုဝ်း မာဘူ အူ ဒုဝ် ဒီ မူတ့် မာခြင်ဆီ၊ အန် ဒီ ပွိုန် မီ ပ့လဝ် အာ ကာတ ဘော ဟျုဝ့် အူ ဘ့လာက်။ ပါယ် တီ ဘော ဂေ ဒူအီ အီဆာရေလ အီ ကွယ် ခဲင် မိူင် ဆာမာရီ ပဲ့ ဟဲ့ မှေတ့် ရန်ဆူ ဂေ၊ ဆေ န့ မိုဝ်း ဒူအီ အီ ဆီ ချွတ် ဂေ၊ ဂေ ဒီ ပွိုန် မီ ကာစှူင့် အိတ် အီ ကာပျာတ့် လိုဝ် ဘော မွှန် အီ ဟဲ့ ကာယာတ့်။”

13 ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် နီ။ “တဲး ဘေ ထူမ် ဂြုဝ်း နီ ဘော ကာလာင် ခဲင် မိူင် အီဆာရေလ ဘော မိူင်။

14 ဆီငဲ ဒီ ဒမ် အုဝ် မှာပ် ဒီ ဂေ ဒူအီ အီဆာရေလ၊ အုဝ် ဒီ ပျာတ့် ဝဲန် ကာစှူင့် လှူ ဒီ ဇဝ် ပီ ကြိုပ် ဒူအီ ဟဝ် ဒီ မိူင် ဘေဒါအေန်။ နိုင် ဘတ့် အီ ကွယ် ဒီ ကာစှူင့် တီ၊ အုဝ် ဒီ ဒဲပ် ဝဲန်၊ တဲး ဂေ စုဝ်း ဒဲင် ကာဒါယ်။

15 အုဝ် ဒီ ဘော ပျာတ့် ဝဲန် ကာင် ဒူင် ကွယ် ဒူအီ ခြမ်။ န့ မုး ကာင် ဒေါ ကွယ် ဂေ အာခြာဝ် ဂတ် ဘော ကာင် ဒူင် ကွယ် ဂေ ဒေါ မုး အာခြာဝ် မှဲ။ ဟုဝ် အီ မိုဝ်း ပ့လဲ့ မာဆာင် တဲး န့ စှိတ်၊ န့ ဒီ ဘော လိုဝ် ကာပျာတ့် တူတ့်။” အုဝ် အီ မုး အန် ဇဝ် ဟဲ့ ကာလာင် ပါယ် တီ။