အိုယ် ဘေ အီဘိုန့် အီ ကွယ် ဒီ နွန် ဆာမာရီ၊ ဘေ ဟဲ့ ဂ့လန့် ဆီချာ ပီ မာမက် အီ ကွယ် ခဲင် မိူင် ဘာဆန်။ ဘေ ဘော မုး ဒူအီ အီ နပ် ဒီ ခါနှာပ် ဒူအီ ဒုက် ဒူအီ ဂိန် ဘော ဒွါ ဒုက် ဒီ ဒူအီ အီ ဇုတ် လုတ်။ ဘေ ဘော တဝ်း ဒီ အီမာယ် ဘေ၊ “ဒိုဝ်း တး အိုမ် မာငုန်၊ တဲး ယေ ဒျီင်။” တဲး ဘေ ထူမ် ဂြုဝ်း နီ။

2 ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ဂါဝ် ပွုန် အန် အီ ဆီငါ ဘွတ် ဘော ဒိူင် တဝ်း၊ “အာခြာဝ် အန် ဒီ တး ပန် ဒီ ဒိုဝ်း ဂေ မ့ပဲတ် ဘော မှေတ့် ဟာဝ် ဘေ မိူင် တူင့်။ ဘေ ဒွန် အီ ဒီ ဘော ပီ မာဂါ အီ ဟဲ့ ဒိုက် ဒီ မ့ပဲတ်၊ ကွဲ့ တဲး န့ ဆီ ဂိူတ်။

3 ဘေ ဒီ ကာဒုး ဒီ တဝ် လေး ခဲင် ကာဒဝ် ဒီ ရဲင် မိူင်၊ ဒူင် ဟဲ့ လိုဝ် ဟဲ့ ကာပျာတ့်။ ဘေ ဒီ ဘော ကာဒုး အီ ဟဝ် ဒိုဝ်း လေး ဘေ ခဲင် ဒူင် ချြီင် ဘေ။” အုဝ် အီ မုး အန် ဇဝ် ဟဲ့ ကာလာင် ပါယ် တီ။

4 ဇဝ်ဖြာ ဝီ တဝ်း၊ “တဲး ဘေ ဟာဝ် ဒီ မိူင် ဘေဒါအေန် ဘော ဒီ မိူင် ဂီလဂါ၊ လှူ ပီ ဒီ လှူ ဘေ ဒီ အာရိုပ် ရာင်။ တဲး ဘေ ဘူင် ဟာဝ် အီ ကာလိုပ် ဆေဆေ။ တဲး ဘေ လှူ ဒွန် ညှာ ဘော လှူ ဂိုဝ် ဘုန် အူ ဘုန် အူယ် ဆီငဲ အူ ဇေန့်။

5 တဲး ဘေ လှူ ခါမုန် ဘေ အီ ဟဲ့ ဟွတ့် ဟပ် ဆီနမ် ဘြး၊ တဲး ဘေ လှူ တဲး န့ ဘဲန် အီ ဒါင် ဂုင် ဂေဇူ ဒီ ဇဝ်ဖြာ။ ဒဲင် တီ တဲး ဘေ လှူ ခဲ့ ပီ ဆီ လှူ ဘေ၊ တဲး ဘေ ပွိုန် ဒီ ပီခိုက် နဝ်း ဘေ။ ဘေ ဒူအီ အီဆာရေလ ဘော အိုင် ဘော ဝုဝ် ဒီ ဘူင် ဇိုဝ် တီ။

6 အုဝ် ပီ ဘော ဟဲ့ ဘူင် တဲး ဘေ ကာပြာန့် ပီ ဒီ ဟူမ် ခဲင် မိူင် ဘေ ဘော ဘူင် ကွဲ့ တဲး ဘေ ဆီ မိုဝ်း ဒူင် ဒီ ကာရဝ်း ခဲင် ရဝ် ဘေ၊ ဘေ ယီ တူ တး ဘိုင် အုဝ်။” ဇဝ်ဖြာ ဟဲ့ ကာလာင် ပါယ် တီ။

7 အန် ဇဝ် ဝီ တဝ်း၊ “အုဝ် ဟဲ့ ခြဲ ဂ့လာယ်၊ ကွဲ့ တဲး ဂ့လာယ် စုဝ်း ဒေါ မုး အာခြာဝ် အန်၊ တဲး ပီ ပိတ် ပီ ဆမ် ဘေ လိုဝ် စှိုမ် တူတ့်။ အုဝ် ဟဲ့ တဲး ဂ့လာယ် စုဝ်း ခဲင် မိူင် အူ မိူင်၊ တူ ဝီ တဲး န့ စုဝ်း ခဲင် မိူင် ပေါ အူ မိူင်။ အူ ပ့လုဝ့် ဂ့လာယ် ဟဲ့ စုဝ်း၊ ပေါ အူ ပ့လုဝ့် ဂ့လာယ် ယီ တူ စုဝ်း၊ တဲး န့ ကာဟဝ်း တွင့်။

8 ဒူအီ ဒီ ဟာဝ် ဘဲန် မိူင် ဘဲန် မိူင်၊ ဟာဝ် ဟြေတ့် ဒီ ဒျီင် အိုမ်။ န့ ယီ တူ တဲး ဂေ ဖဲ ဒေါ မှဝ်။ မာလဲ၊ ဘေ ယီ တူ တး ဘိုင် အုဝ်။” ဇဝ်ဖြာ ဟဲ့ ကာလာင် ပါယ် တီ။

9 အန် ဝီ တဝ်း၊ “အုဝ် ဟဲ့ တဲး ခုန် ဒါတ် တး ဘုတ် ဒူင် နာ ဘော ကာပိုမ် မာငုန် ဘေ၊ တဲး ပီ ဆမ် ဘေ ကာပျာတ့် လိုဝ် တူတ့်။ မာ အာဇူင့် ဟဲ့ တး ဟူမ် ဟေ ဘ့လေ ဒီပူ ဘေ ဘော ဟေ နာမန် ဘေ။ မာလဲ၊ ဘေ ယီ တူ တး ဘိုင် အုဝ်။” ဇဝ်ဖြာ ဟဲ့ ကာလာင် ပါယ် တီ။

10 အန် ဝီ တဝ်း၊ “အုဝ် ဟဲ့ တဲး ဘေ ကာဒုး ဒုက်၊ တဲး န့ ပီ ပီ ဒွိုမ် ခမ် ဂေ ဒူအီ ခဲင် မိူင် အဲဂိုပ် တွိုန်။ အုဝ် ဟဲ့ တဲး ဂွန် ကာညူမ် ဘေ ယမ် ဒီ မာပွါ့ လာင်။ အုဝ် ဟဲ့ ငဝ်း ယမ် ဘော မင်ပြွင့် ဘေ၊ တဲး န့ အုး အမ် ဒွန် ပ့လုဝ့်။ မာလဲ၊ ဘေ ယီ တူ တး ဘိုင် အုဝ်။” ဇဝ်ဖြာ ဟဲ့ ကာလာင် ပါယ် တီ။

11 အန် ဝီ တဝ်း၊ “အုဝ် ဟဲ့ ပျာတ့် ဝဲန် မိူင် ဘေ မင် မိူင်၊ တဲး န့ ပီ အုဝ် ဟဲ့ ဒွိုမ် ပျာတ့် ဝဲန် မိူင် ဆုဝ်ဒူမ် ဂါယ် ဂုဝ်မုဝ်။ ဘေ အီ ဆီ ဂိတ် ဆီ ကွယ် ဟဲ့ ပီ မာဆီဘ့လာဝ် ပီ ထာ့ လေး အီ ခဲင် ငဝ်။ မာလဲ၊ ဘေ ယီ တူ ဝီ တး ဘိုင် အုဝ်။” ဇဝ်ဖြာ ဟဲ့ ကာလာင် ပါယ် တီ။

12 ကူပ် န့ ပါယ် တီ ဘေ လုဝ် ခမ် မှာပ် ဘေ။ ခုဝ်၊ အုဝ် ဒီ ဘူင် တူတ့် ဒွန် မျုဝ် ပဲ့ ဟဲ့ တဝ်း အုဝ်။ အိုယ် ဘေ ဒူအီ အီဆာရေလ၊ တဲး ဘေ ဝီ မ့ပြာယ် နဝ်း ဘေ၊ တဲး ဘေ ဝီ ကာတုန့် ဇဝ်ဖြာ ပီ ကြိုပ် ဘေ အီ ဒီ ဆုင်ဖျာတ် အာမူ ဘေ။

13 ခုဝ်၊ န့ မုး အန် ဇဝ် အီ ဖာန် ဘ့လေး နွန် ဘောကာဂ့လျီတ်။ အန် ဘော ဘူင် တဲး ခုန် ဘုတ်၊ အန် ဇဝ် ဘော ဘျ အာကျာမ် အာငျာန် အန် ဒီ ဂေ ဒူအီ။ အန် ဘော တဲး န့ ဘ့လာင် ဆိန့်ဝး၊ တဲး န့ ဝီ ဘဲန် အပ် ဝွင့်။ အန် ဘော ဟာဝ် ဒဲင် နွန် စာ ဘော အိုပ် ကာဒါယ်။ အန် မုး ဇဝ်ဖြာ အီ အိုပ် တူတ့် ဒွန် မျုဝ်။ အာတီ န့ မုး စိူဝ် အန်။