1 အိုယ် ဘေ ဒူအီ အီဆာရေလ၊ တဲး ဘေ ထူမ် ဂြုဝ်း ပီ ငှုန် ပီ ကာလာင် အုဝ် လွင် ဟဲ့ စှိုမ် ဘေ အာဆာက်။ အုဝ် တဝ်း၊

2 “ဂေ ဒူအီ အီဆာရေလ အီ ပီ ဂွန် ဒီဘျာ၊ ဂေ ဟဲ့ ဟွတ့် ကေး စှိုမ်။ ဘေ အာဝ် ဟူ ပွိုန် ဒီ ဝီ ယိတ့် ဒေါ မှဝ်။ ဘေ ဒီ အိတ် ကာညာတ် ဒဲင် ကာဒါယ်။ အာဝ် မိုဝ်း အာဆေ အီ စွယ် ဘျိတ့် ယိတ့် ဘေ။”

3 ဇဝ်ဖြာ အီ အိုပ် တူတ့် ဒွန် မျုဝ် ဟဲ့ တဝ်း၊ “ဆေ န့ မိုဝ်း မိူင် ဒဲင် ကာဒါယ် မိူင် အီဆာရေလ အီ မိုဝ်း ဒါ ဆိုက် အူ ဟြဲန့် ဝီ၊ ဝါယ် ဟဲ့ ဟွတ့် ကာဂုဝ်း ဂေ၊ န့ ဒီ ဘော ဂိတ် အူ မာယဝ်း ဝီ။ ခဲင် မိူင် အီ ဟဲ့ ဒွိုမ် မိုဝ်း ဒါ ဆိုက် အူ မာယဝ်း ဝီ၊ ဝါယ် ဟဲ့ ဟွတ့် ကာဂုဝ်း ဂေ ဒီ ရန်ဆူ၊ န့ ဒီ ဘော ဝီ ဂိတ် ဂိုဝ် ဝီ။”

4 ဇဝ်ဖြာ ပီ ဝီ ကာလာင် ဒီ ဂေ ဒူအီ အီဆာရေလ တဝ်း၊ “တဲး ဘေ ဝီ တး ဘိုင် အုဝ်။ ဆေ ဘေ ဝီ ဒူပ် အုဝ်၊ ဘေ ဒီ ပွိုန် ကွယ် ဂတ် ဂျီတ် ဂျာမ်ဆာ၊ ဘေ ဒီ လွတ် ယမ်။

5 ကွဲ့ တဲး ဘေ ဟာဝ် ဒီ မိူင် ဘေဒါအေန် ဘော ဒီ မိူင် ဂီလဂါ။ ကွဲ့ တဲး ဘေ ဟာဝ် ခဲင် မိူင် ဘီရာဆေဘာ။ ခုဝ်၊ ဂေ ဒူအီ ခဲင် မိူင် ဂီလဂါ ဒီ ကာဒုး အီ မှေတ့် ဟာဝ် ဘော ဂေ ဒူအီ ခဲင် မိူင် ဘေဒါအေန်၊ ဂေ ဒီ စှိုမ် ဟြာယ် တူတ့်။”

6 တဲး ဘေ ဝီ တး ဘိုင် ဇဝ်ဖြာ၊ တဲး ဘေ လွတ် ယမ်။ ဆေ အာဝ် ပါယ် တီ၊ အန် ဇဝ် ဒီ ဘော တး ဒူင် ကွယ် ဘေ ဒူအီ အီဆာရေလ ပီ ငဝ် အီ ကုး ဟဲန့် ဘော ကာဆိုမ် တူတ့် ဒွန် မျုဝ်။ ဂေ အာရိုပ် ရာင် အီ ကွယ် ခဲင် မိူင် ဘေဒါအေန် မိူဝ် တူ ပဲ ဒီ ဘျတ် ငဝ် တီ။

7 အိုယ် ဘေ ဒူအီ ဟာယ်၊ ဘေ တူ ဒူပ် ဒါရာ။ န့ ပီ ဘေ ဒွါ ဆီနမ် ဆွင့် ဒီ ဒူအီ ဂိန် ဘော ဒူအီ ပီ ခါနှာပ် ဘေ။ ဒါရာ နာ ဆိူဝ် နာ မှာန် ဘော ပီ ဆုင်ဖျာတ် ဒူပ် ဒါရာ တီ၊ ဘေ ဟဲ့ ဝဲန် တူတ့်။

8 ဇဝ်ဖြာ အီ ဖာန် ဘ့လေး တဲး န့ မိုဝ်း ဖိုင် ဆီမန့် အီ စိူဝ် ပါလီအာတ် အီ ပွိုန် ယိုဝ် အာခြာဝ် ဂတ် ဂျီတ်။ အန် ဇဝ် ဟဲ့ ဖာန် ဘ့လေး ဘော ဖိုင် ဆီမန့် အီ စိူဝ် အုဝ်ရီအူတ် အီ ပွိုန် ယိုဝ် အာခြာဝ် ဆောဒါတ်။ အန် ဇဝ် ဘော ဘူင် တဲး န့ အပ် ဝွင့် ဘော ဝီ ဘဲန် အီ ဘ့လာင် ဆိန့်ဝး၊ တဲး ကာတဲ ဆီငဲ ဝီ ဘဲန် အီ အပ် ဝွင့် ခဲင် မှိုဝ်။ အန် ဇဝ် ဝီ ဘူင် တဲး အိုမ် နမ်မုက်ဆာရာ ဝီ ဘဲန် ဂ့လာယ် အီ ရိုက် ကာဒါယ်။ အန် ဇဝ် မုး ဇဝ်ဖြာ အီ အိုပ် တူတ့် ဒွန် မျုဝ်။

9 အန် ဇဝ် ဘော ဒိုဝ်း ပွုန် အန်၊ ဘူင် တဲး ပီ ဒီ ခြဲ ပီ ဒီ ဂွင့် ဒူအီ ကာပျာတ့် လိုဝ် အူ ဇေန့်။

10 န့ မိုဝ်း ဒူအီ အီ ဇွင့် ဝီ အီ ဆုင်ဖျာတ် ဒါရာ ဒူပ် နာ မုး နာ မှာန်။ ဂေ ဘော ကာအိး ဝီ အီ ကာလာင် ဆိူဝ် ဆိူဝ် မှာန် မှာန်။

11 ဘေ အိုင် ဒီ ခါနှာပ် ဒူအီ ဂိန် ဘော ပြာ ဒီ ဒိုဝ်း ကြုဝ် ခဲ့ မိုဝ်း ဂေ ဘော ဒိုဝ်း ရွိုန် စိုင် ဒီ ဂေ။ ခုဝ်၊ ဘေ ပီ ဘော ဟဲ့ ဒိုဝ်း မာဝ် ဘော ဆမ် ကာင် အီ ဟဲ့ စှိတ် ကာဆဝ်၊ ဘေ ယီ တူ ပွိုန် ဒီ ကွယ် ခဲင် ကာင် ဘေ တီ။ ဘေ မိူဝ် ဟဲ့ ဆမ် ဟေ မာငုန် အီ ဟဲ့ လဝ့် နဝ်း ဘေ၊ ဘေ ယီ တူ ပွိုန် ဒီ ဒျီင် အိုမ် ဘ့လေ မာငုန် တီ။

12 ခုဝ်၊ အုဝ် နပ် ခဲ့ ကာဘး ဘေ ဒီ အုဝ်၊ ဘော မှာပ် ပဲ့ ဟဲ့ ဘူင် ဘေ အီ ဟဲ့ ကိူန် ကာဆဝ်။ ဘေ ဘော ခါနှာပ် ဒူအီ အီ မွှိုမ် ဘော ဟူမ် ရွိုန် ပီ ပြာ အီ ဒီ ဒွါ။ ဘေ မိူဝ် တူ တဲး န့ ဒူပ် ဒါရာ အီ ဆိူဝ် အီ မှာန် ဆေ ဘေ ဆုင်ဖျာတ် ဒါရာ ဒီ ဂေ အီ တူ မိုဝ်း မာဆေ။

13 ပါယ် တီ ဝီ အီ မိုဝ်း အာငျာန်၊ ဂေ ဒီ ကွယ် ယေန် ယေန်၊ တူ ယ ကာလာင် မာဆေ။ ခုဝ်၊ အာခြာဝ် တီ မုး အာခြာဝ် ဟာယ်၊ အာခြာဝ် တူ မွှိုမ်။

14 တဲး ဘေ ဘူင် အီ မွှိုမ်၊ တဲး ဘေ ဝး နာ ဟာယ် နာ မိူက်။ ဘေ ဒီ ပွိုန် ကွယ် ဂတ် ဂျီတ် ဂျာမ်ဆာ ဘော လွတ် ယမ်။ ဆေ ဘေ ဘူင် ပါယ် တီ ဇဝ်ဖြာ အီ မုး ဇဝ်ဖြာ အီ အိုပ် တူတ့် ဒွန် မျုဝ်၊ အန် ဒီ ကွယ် ရိုမ် ဒူပ် ဘေ ဘော စွယ် ဘေ၊ တဲး န့ ဒူပ် ခဲ့ ပီ ဒွိုမ် ကာလာင် အန် ဒီ ဘေ တွိုန်။

15 တဲး ဘေ ဇွင့် နာ ဟာယ် နာ မိူက်၊ ဝီ ရွက့် နာ ဘွတ် နာ မွှိုမ်။ တဲး ဒါရာ နာ ဆိူဝ် နာ မှာန် ကွယ် ဒူင် ဆုင်ဖျာတ် ဘေ အာမူ အီ။ ဆေ ဘေ ဘူင် ပါယ် တီ ဇဝ်ဖြာ ဘော နပ် ဒီ ကာဝေ ဒူအီ ပီ အိုပ် အန် အီ ဆီ ဂိတ် ဆီ ကွယ်။

16 ကူပ် န့ ပါယ် တီ ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ “န့ ဒီ ဘော မိုဝ်း အီ ယာမ် အီ ငှုန် ဒီ ဒီဂ့လ ဘော ဒူပ် န့တေန့် ခဲင် မိူင် ဒွန် မိူင်။ ဂေ ဒီ ဘော ဒဲ့ တး ဒူအီ အီ ရန့် မာန် ဂေ ဒူင် နာ၊ တဲး ဂေ တး ငှုန် တး ယာမ်။ ဂေ ဒဲ့ ဘော ဒူအီ အီ နပ် ဒီ ယာမ်၊ တဲး ဂေ တး ငှုန် တး ယာမ် ပေါ မ့ပွါ။

17 ခဲင် မာန် မာငုန် ဒွန် ပ့လုဝ့် န့ ဘော မိုဝ်း ဂြုဝ်း အီ ငှုန် အီ ယာမ်။ ခုဝ်၊ အုဝ် ဒီ ကာလုဝ်း ဒူင် တီ တဲး အုဝ် ဒမ် မှာပ် ဒီ ဘေ။” အုဝ် အီ မုး အန် ဇဝ် ဟဲ့ ကာလာင် ပါယ် တီ။

18 “ဒေါ အန် တီ န့ ဒီ မိုဝ်း မင် အီ အီ ဆီ တဲး ဆီငဲ ဒီ ဆုင်ဖျာတ် ဇဝ်ဖြာ အာမူ အီ တး။ ခုဝ်၊ ဂေ ထာင်၊ ဆေ ဇဝ်ဖြာ ကွယ် ကာတဲ ဂေ၊ န့ ဒီ တဲး ဂေ လွတ် ဒီ ရန်ဆူ ဂေ။ ဂေ ယီ တူ နပ် ပီ ဆီ လုဝ် ဂေ။ ခုဝ်၊ ဆီငဲ အန် တီ တူ မိုဝ်း ဘ့လာင်၊ တူ မိုဝ်း ဂျာမ်ဆာ။ န့ ဒီ မိုဝ်း အပ် ဝွင့် ဘော ဒုက် တာင်။

19 ဆီငဲ တီ ဘေ ဘော ပီ ဒူအီ အီ တဝ် လေး ဒီ မာခြင်ဆီ၊ ပီ ဝီ ဟာဝ် ကာတုန့် မာဂြေး။ ဟဲ့ ဟွတ့်၊ အန် ဝီ ဝေန့် ခဲင် ကာင် အန် ဘော ပါ ရဲင်၊ ပီ ဝီ ကာဒုး မာဟန့် စုဝ့် အန်။

20 ဆီငဲ ဒီ ဆုင်ဖျာတ် ဇဝ်ဖြာ အာမူ အီ န့ တူ ဘ့လာင်။ န့ ဒီ ဘော အပ် ဝွင့် ကာဆဝ်။ အာဝ် မိုဝ်း ပီ ဒီ နှဝ့် န့ဒဝ့် မာဆေ။ န့ ဒီ ဘော ဘဲန် အီ အပ် ဝွင့် ဒီလူယ်။”

21 ဇဝ်ဖြာ ပီ ဝီ တဝ်း၊ “အုဝ် ဘော ဇွင့် ဆီငဲ ဘ့လွယ် ဘေ အီ တဲး ဘေ ညိုင်ရာင် မုး ဒူအီ မွှိုမ်။ အုဝ် မိူဝ် ကာအိး ဒေါ တး ကာဇု ဘေ၊ ဘေ ထာင် ဘေ မုး ဒူအီ မွှိုမ် ဝီ ကြိုပ် ဇဝ်ဖြာ။

22 ဘေ ပီ ဘော ဟဲ့ လှူ ပီ ဒီ လှူ အီ ဒုဝ့် ခဲင် ငဝ် ဘော ပီ ဒီ လှူ ငှုဝ် ဒီဂါဝ် ဒီ အုဝ် မိူဝ်၊ န့ တူ လဝ့် နဝ်း အုဝ်။ အုဝ် မိူဝ် တူ အိုင်။ ဘေ ပီ ဘော ဒိုဝ်း ဒုဝ် ဆတ်ဒါဝါ ဒုဝ် အီ ဟဲ့ ဂ့လန့် ဆီချာ၊ တဲး န့ ဘဲန် ပီ ဒီ လှူ အီ ကွယ် ကာဇု ဟူမ် ရိုမ် မိူဝ်၊ အုဝ် တူ လုဝ် ပီ လှူ ဘေ တီ။

23 ကွဲ့ တဲး ဘေ တဝ်း မှုဝ် ဒူင် ကွယ် အုဝ်။ အုဝ် တူ ဆီ ထူမ် ဟမ် ဒိင် ပီ ဘး ဘေ တီ။

24 မာလဲ၊ အုဝ် ဆီ ယိုဝ် ပီ ဆုင်ဖျာတ် ဘေ ဒူပ် ဒါရာ၊ တဲး န့ ပီ အိုမ် အီ လှဲ ကိူန်။ တဲး နာ မုး နာ မှာန် ပီ အိုမ် ဘ့လဲင် အီ တူ နပ် ဒီ ဟိတ်။

25 အိုယ် ဘေ ဒူအီ အီဆာရေလ၊ ဟဲ့ မှာန်၊ ဘေ ဟဲ့ ဒွိုမ် ဒိုဝ်း ဒုဝ် ဆတ်ဒါဝါ ဘော ပီ ဒီ လှူ ဘဲန် မျုဝ် ဘဲန် မျုဝ်၊ တး လှူ ဒီ အုဝ် ဒေါ ကွယ် ဘေ ခဲင် ပြဲ ကာဟဝ်း အာဒါ ဖွုန် ဂိုဝ် ဆီနမ် တွိုန်။း

26 အာဝ် မှာန်။ နဝ်း ဘေ ကွယ် ဒူပ် အာရိုပ် ရာင် အီ စိူဝ် ဆူခူတ် ဘော အာရိုပ် ရာင် အီ စိူဝ် ကာယာဝိန်။ အာရိုပ် ရာင် တီ ဘေ ဟဲ့ ဘူင် တာ ဒဲ ဘေ။

27 ကူပ် န့ ပါယ် တီ အုဝ် ဒီ တဲး အီ မှေတ့် ဟာဝ် ဘေ ဒီ မိူင် ဒါမာခူ။” ဇဝ်ဖြာ အီ မုး ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။