1 ဘေ ဒူအီ အီ ဟဲ့ ကွယ် ဒါခိုယ် ဒါခိုယ်၊ ဘေ အီ တူ မိုဝ်း ပီ ဒီ လုဝ် မာဆေ၊ အီ ကွယ် ခဲင် မိူင် ယေရူဆာလဲမ် ဘော ခဲင် မိူင် ဆာမာရီ၊ ဘေ အီ မုး ဒူအီ ဘွတ် ကာတဲ ဂေ ဒူအီ ကိူန် ဘော ဘေ ဒူအီ ပီ ဘိုင် ဟာဝ် ဂေ ဒူအီ အီဆာရေလ၊ ဘေ ဒီ ဇမ် ဒုက် တာင်။

2 တဲး ဘေ ဟာဝ် ယွတ် မိူင် ကာလေန်၊ ပီ ဝီ ဟာဝ် ဒီ မိူင် ဟာမာတ် အီ တာင်၊ တဲး ဘေ ဝီ လူင် ဒီ မိူင် အာဂထ အီ မုး ဒူင် ကွယ် ဂေ ဒူအီ ဖီလီထီ။ ဘေ ဒူအီ အာယူဒါ ဘော ဒူအီ အီဆာရေလ တူ မွှိုမ် လွှိုမ် အီ ဟဝ်။ ဂေ ဒူအီ ခဲင် မိူင် ဂေ တီ ဟဲ့ ဇမ် ဒုက် တာင်။

3 ဘေ တူ ဆီ ဇေန့်ဇာ လွင် ဆီငဲ အီ တူ မွှိုမ် တီ။ ဘေ ယီ ဘူင် တဲး ဒုက် တာင် တီ စေဝ် တး။

4 ဘေ အီ အိတ် ကာညာတ် ဒဲင် ကာစှူင့် အိတ် အီ ဟဲ့ ဘူင် တာ ပ့လဲ့ မာဆာင်၊ တဲး န့ စှိတ် ကာဆဝ် ဘော ဘေ အီ ဟူမ် ဂွန် မာဘူ ဘော ဂွန် မာမက် အီ ဟဲ့ ဆီငဲး ကာဆဝ်၊ ဘေ ဘောကာဂ့လျီတ် ဒီ ဇမ် ဒုက် တာင်။

5 ဘေ အီ တဝ်း မှုဝ် ဘော ဘး ဒိင်၊ ဘေ ထာင် ဘေ ဟဲ့ လှဲဝ် ပီ ခုန်ဒီခမ် အာဒါဝိတ် တွိုန်။ ပီ တဝ်း ဘေ မှုဝ် ယီ တူ မိုဝ်း ဒီခုဝ်။

6 ဘေ အိုင် ဒီ ဒိုဝ်း ဆီလယ့် ဂေ ကွက့်၊ ဒျီင် အိုမ် မာငုန် ကိူန် ကာဆဝ်။ ဘေ ဒိုဝ်း နာမန် အုး ငှုန်၊ ဝီ ဖဝ်း ဒီ ဒုဝ် ဘေ။ ဘေ ယီ တူ ဇေန့်ဇာ ဒူအီ အာမျုဝ် ဘေ အီ ဟဲ့ ဇမ် ဒုက် တာင်။

7 ကူပ် န့ ပါယ် တီ ဘေ လုဝ် ခမ် အီ မှေတ့် ဟာဝ် ဘေ ဒီ အာတ့်။ ဂြုဝ်း ဒူအီ ဘော ဟမ် ပီ ဘူင် ဘေ ဘ့လွယ် အီ ဆီနန် ဆီနိူင်၊ န့ ဒီ ဟြာယ် အူ ဇေန့်။

8 ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ဂါဝ် ပွုန် အန် ဘော ဒိူင် တဝ်း၊ “အုဝ် ကာအိး ကာဆဝ် နဝ်း ပီခိုက် ဂေ ဒူအီ အီဆာရေလ။ အုဝ် ဘော ဇွင့် ပီ ညိုင်ရာင် ဂေ အီ မိုဝ်း အာဖုင် ဒင်ခုဝ်။ အုဝ် ဘော ဇွင့် ကာင် ဂေ အီ စှိတ် ကာဆဝ်။ အုဝ် ဒီ ဒိုဝ်း မိူင် ဂေ တီ ဘော အီ ကွယ် ခဲင် မိူင် ဂေ တီ ဘောကာဂ့လျီတ်၊ ဝီ အာပ် ဒီ ရန်ဆူ ဂေ။”

9 ဆေ ဒူအီ ဂိုဝ် ဝီ ပီ ဘော ဟဲ့ ကွယ် ကာဇု ခဲင် ကာင် အူ ကာင်၊ ဂေ ဒီ ယမ် တူတ့်။ 10 ဆေ န့ မိုဝ်း ဘီနွင် ဝေါဝဲ အီ ဒီ ဒိပ် ဒုဝ် ယမ် ဂေ တီ၊ ဆေ အန် လိုပ် ခဲင် ကာင်၊ တဝ်း ဒီ ဒိုဝ်း ဝဲန် ဒုဝ် ယမ် ဂေ တီ၊ အန် ဝီ ဒီမွှတ် တဝ်း၊ “န့ ဆီ မိုဝ်း အီ ဆီ ကွယ် ဆီ ဂိတ် ဒူင် ကွယ် နီ။း” ဟဲ့ ဟွတ့် ဒီမွှတ် ပါယ် တီ ပေါ အူ ဝီ ဒီ ဝျီ့ ဂြုဝ်း တီ တဝ်း၊ “အာဝ် ဟူ မိုဝ်း ခေါ အူ ဝီ။” ဟဲ့ ဟွတ့် ဒူအီ တွိုန် ပီ ဝီ တဝ်း၊ “ကွဲ့ တဝ်း မာဆေ လွင် ဇဝ်ဖြာ။ ဂြုဝ်း မဲ ဒီ ဘော လိုဝ်း ဒီ အန် ဇဝ်။”

11 ဘ်ု ဘေ ယွတ်၊ ဆေ ဇဝ်ဖြာ ဒွါ အာမိင်၊ ကာင် အီ တာင် ဒီ ကာပျာတ့် လိုဝ် တူတ့်။ ကာင် အီ ဒီတဲတ် မိူဝ်၊ အန် ဇဝ် ဒီ ဘော တဲး န့ လိုဝ် တူတ့်။

12 မင်ပြွင့် တူ ပွိုန် ကာဘ့လဲပ် ဟာဝ် ဒဲင် ဒါအာင် မာဝ်။ ဒူအီ မိူဝ် တူ ပွိုန် ဒိုဝ်း မာမက်၊ ထဲ ဒါအာင် မာဝ်။ ပါယ် တီ န့ တူ မိုဝ်း ဒီခုဝ် ဆေ ဘေ ဆုင်ဖျာတ် အာမူ အီ တူ ဒူပ် နာ မုး နာ မှာန်၊ တဲး န့ ပီ ဘေ ဘျွင် အီ မွှိုမ်၊ ဝီ ဘူင် တဲး န့ ဆွင့်။

13 ဘေ ဟဲ့ ပီခိုက် နဝ်း ဘေ တဝ်း၊ ဘေ ဟဲ့ အွင် မိူင် လောဒေဘာ။ ဘေ မိူဝ် ဟဲ့ နဝ်း တာင် တဝ်း၊ န့ မုး ပွုန် ဘေ ဂေ ဟဲန့် ဘေ အီ ဟဲ့ ပဲ မိူင် ခါနေအိမ်။

14 ဇဝ်ဖြာ ပီ ဝီ တဝ်း၊ “အာဝ် လှေန့် အုဝ် ဒီ တဲး ရန်ဆူ ဘေ တး ကာဂုဝ်း ဒီ ဘေ။ ဂေ ဒီ ခါနှာပ် ကာဆဝ် ဘေ ခဲင် မိူင် ဘော မိူင်။ စုး ဒီ မိူင် လေဘုဝ်ဟာမာတ် အီ ကွယ် နာ ကွာ၊ တဲး န့ ကော ဇမ် ဒီ ဒီလယ့် အာရာဖ အီ ကွယ် နာ တေတ့်။”