1 ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ ဘျ တဲး အုဝ် ယိုဝ် ပါယ် နီ။ အန် ဇဝ် ဘော ရဲန် တဲး န့ မိုဝ်း မာ အာဇူင့်၊ တဲး ဂေ လိုပ် ခဲင် မိူင် ဒွန် နာ ဒွန် ပ့လုဝ့်။ ဒေါ အန် တီ န့ မုး အာခြာဝ် ဒေါ ဟွတ့် ဆုဝ့် ဂေ ခဲ့ ပီ လုဝ် ဒွါ ဂေ ဒီ ခုန်ဒီခမ်။ 2 မာ အာဇူင့် ဂေ တီ၊ ဟဲ့ ဟွတ့် ဟူမ် တူတ့် ပေတ့် ဂေ ပြဲ အီ ငျီန် ခဲင် မိူင် ဂေ တီ။ အုဝ် ဘော ဝီ တဝ်း၊ “အိုယ် မဲ ဇဝ်ဖြာ အီ အိုပ် တူတ့် ဒွန် မျုဝ်၊ အုဝ် မှာန့်၊ တဲး မဲ ဂဝ်း ဝဲန် မှာပ် ယေ အီ မုး ဒူအီ ပီ အိုပ် မဲ။ ခုဝ်၊ ဆေ မဲ တူ ဂဝ်း ဝဲန် မှာပ် ယေ၊ ယေ မိူဝ် တူ ပွိုန် ကွယ်။ ခုဝ်၊ ယေ မုး အာမျုဝ် ဒူအီ အီ တူ မိုဝ်း ပ့လူမ် မိုဝ်း ဟဲန့်။”

3 ပါယ် တီ ဇဝ်ဖြာ အီ အိုပ် တူတ့် ဒွန် မျုဝ်၊ အန် ဝီ ဘျွင် နဝ်း၊ တူ ဘူင် ဒူပ် ပီ ဘျ အန် ဒီ အုဝ်။ အန် တဝ်း၊ “န့ တူ ဘဲန် ပါယ် တီ။”

4 ဝါယ် အန် တီ ဇဝ်ဖြာ အီ အိုပ် တူတ့် ဒွန် မျုဝ် တဲး အုဝ် ယိုဝ် ပေါ အူ မျုဝ်။ အုဝ် ယိုဝ် ဇဝ်ဖြာ ဟဲ့ ရဲန် အုန် ငဝ်၊ တဲး အန် ဒမ် မှာပ် ဒီ ဂေ ဒူအီ ပီ အိုပ် အန်။ ငဝ် တီ ဟဲ့ တာင် ကာဆဝ် ဘော ကာဆိုမ် အိုမ် နမ်မုက်ဆာရာ အီ လိုက် ကာဆဝ် ဘော ကာဆိုမ် ကာဒါယ် ဒွန် နာ ဒွန် ပ့လုဝ့်။

5 အုဝ် မိူဝ် ဝီ တဝ်း၊ “အိုယ် မဲ ဇဝ်ဖြာ အီ အိုပ် တူတ့် ဒွန် မျုဝ်၊ အုဝ် မှာန့်၊ ကွဲ့ တဲး မဲ ဘူင် ပါယ် တီ။ ဆေ မဲ ဒီ ဘူင် ပါယ် တီ၊ ယေ ဒူအီ အီဆာရေလ တူ လွတ် ယမ် ဘော ကာပျာတ့် လိုဝ် တူတ့်။ ခုဝ်၊ ယေ မုး အာမျုဝ် ဒူအီ အီ ပြေတ့် ကာဆဝ်။”

6 ပါယ် တီ ဇဝ်ဖြာ အီ အိုပ် တူတ့် ဒွန် မျုဝ်၊ အန် ဝီ ဘျွင် နဝ်း၊ တူ ဝီ ဘူင် ဒူပ် ပီ ဘျ အန် ဒီ အုဝ်။ အန် တဝ်း၊ “န့ မိူဝ် တူ ဘဲန် ပါယ် တီ။”

7 ဝါယ် အန် တီ၊ အန် ပီ ဝီ ဘျ ဒီ အုဝ် ပေါ အူ မျုဝ်။ အုဝ် ယိုဝ် ဇဝ်ဖြာ ဂူင့် ဝန် ဂဝ် ဘော စွင့် ခူပ် ရဲင် မာဝ်။ အန် ဘော တာ ဝန် ဂဝ် တီ ယွတ် ယုဝ် ရဲင် မာဝ် ဟဲ့ ဆိူဝ်။

8 ဇဝ်ဖြာ ပီ ဝီ ဒီမွှတ် အုဝ် တဝ်း၊ “အိုယ် အာမုဝ်၊ မာဆေ ပီ ယိုဝ် မဲ။း” အန် ဟဲ့ ဟွတ့် တဝ်း ပါယ် တီ။ အုဝ် မိူဝ် ဝီ တဝ်း၊ “အုဝ် ယိုဝ် ဝန် ဂဝ်။” ဇဝ်ဖြာ ဝီ တဝ်း၊ “ဘ်ု မဲ ယွတ်၊ အုဝ် ဒီ ဒိုဝ်း ဝန် ဂဝ် နီ၊ ဘျွာ စုဝ်း ကာတဲ ဂေ ဒူအီ ပီ အိုပ် အုဝ် အီ မုး ဒူအီ အီဆာရေလ၊ တဲး အုဝ် နပ် ယုဝ် ပီ ဘူင် ဂေ ဒူပ် နာ ဆိူဝ် နာ မှာန်။ ဟဲ့ ဟွတ့် အုဝ် ဒီ ဒမ် မှာပ် ဒီ ဂေ။

9 ဒူင် ဒွိုမ် ကြိုပ် ဂေ ဂုန့် ဒင် ဘေ ဒဲင် နွန် စာ၊ ဂေ ဒီ ကာပျာတ့် လိုဝ် တူတ့်။ ဘော ဟုဝ် ဒူင် ကြိုပ် ဂေ ဒူအီ အီဆာရေလ ဇဝ် ကာဒင် ဟဝ်၊ ဂေ ဒီ ဘော ကာပျာတ့် လိုဝ် တူတ့်။ ဘော လှုက်လှာန် ခုန်ဒီခမ် အာယေရုဝ်ဘုဝ် ဘောကာဂ့လျီတ် ဒီ ယမ် အူ ဇေန့်။”

10 မာလဲ၊ အာမာဇီယာ အီ မုး ဒါ အီ လှူ ဒီ ဇဝ်ဖြာ အီ ကွယ် ခဲင် မိူင် ဘေဒါအေန်၊ အန် ယိုဝ် ဂြုဝ်း အာမုဝ်၊ အန် ဘော တိုယ် ဒါလာမ် အန် ဟာဝ် ကာလာင် ဒီ ခုန်ဒီခမ် အာယေရုဝ်ဘုဝ်။ အန် တဝ်း၊ “အာမုဝ် ဟဲ့ ခြာမ် ဒီ ဘူင် ကာဘး၊ ဘူင် နာ တူ မွှိုမ် ဒီ မဲ။ ကာတဲ ဂေ ဒူအီ အီဆာရေလ အာဝ် ကာအာပ် ကာလာင် ဂြုဝ်း ပါယ် တီ။ န့ ဒီ တဲး မိူင် ဘော မိူင် ကာပျာတ့် လိုဝ်။ 11 အန် တဝ်း၊ ‘အာဝ် လှေန့် ရန်ဆူ ဒီ တး ငဝ်း ယမ် အာယေရုဝ်ဘုဝ် ဘော မှေတ့် ဟာဝ် ဒူအီ အီဆာရေလ ခဲင် မိူင် ဂေ။’”

12 ဝါယ် အန် တီ၊ အာမာဇီယာ ပီ ဝီ စ်ု အာမုဝ် တဝ်း၊ “အိုယ် မဲ အီ မုး ဒူအီ အီ နပ် အီ ယိုဝ် ဘဲန် မျုဝ် ဘဲန် မျုဝ်၊ တဲး မဲ တဝ် ဟာဝ်၊ ကွယ် ခဲင် မိူင် ယူဒါ၊ တဲး မဲ ဘျာန် ဂြုဝ်း ဇဝ်ဖြာ ဒီ တီ။ 13 ကွဲ့ ဟူ တဲး မဲ ဘျာန် ဂြုဝ်း ဇဝ်ဖြာ ခဲင် မိူင် ဘေဒါအေန် နီ။ ခုဝ်၊ န့ မိုဝ်း ဒူင် ကြိုပ် ခုန်ဒီခမ်။”

14 အာမုဝ် ဝီ တဝ်း ဒီ အာမာဇီယာ၊ “အုဝ် နီ၊ အုဝ် တူ မုး ဒါ အီ ဘျာန် ဂြုဝ်း ဇဝ်ဖြာ ပီ ဂေ အီ ကွယ် ခဲင် မိူင် အီဆာရေလ။ အုဝ် မိူဝ် တူ ဒွိုမ် ဟေန် လွင် အန် တီ။ အုဝ် မုး ခဲ့ ဒါ အီ ဟျီင် မာဘူ ဘော ရန့် မာန် ဘ့လေ ဒီပူ။ 15 ဇဝ်ဖြာ ယီ ဟဲ့ ရဝ်း အုဝ်၊ တဲး အုဝ် လေး ခဲင် ဒူင် ဟျီင် အုဝ် မာဘူ တီ ဘော ဝီ ကာလာင် ဒီ အုဝ် တဝ်း၊ ‘ဟာဝ်၊ တဲး မဲ ဘဲန် ဒါ အီ ဘျာန် ဂြုဝ်း ဇဝ်ဖြာ။ ဟာဝ် ကာလာင် ဂြုဝ်း အုဝ် ဒီ ဂေ ဒူအီ ပီ အိုပ် အုဝ် အီ မုး ဒူအီ အီဆာရေလ။’

16 ကူပ် န့ ပါယ် တီ ဒေါ တီ နီ တဲး မဲ ထူမ် ဂြုဝ်း ပီ ကာလာင် ဇဝ်ဖြာ။ မဲ ဟဲ့ တဝ်း၊ ‘ကွဲ့ ဘျာန် ဂြုဝ်း ဇဝ်ဖြာ၊ ကွဲ့ ကာလာင် နာ တူ မွှိုမ် ဒီ ဂေ ဒူအီ အီဆာရေလ။ ကွဲ့ ဟုဝ် ဒါရာ အီ ကာဘး ဒီ ဂေ။’

17 ဇဝ်ဖြာ ယီ တဝ်း ဒီ မဲ ပါယ် နီ။ အီဘိုန့် မဲ၊ အန် ဒီ ဘော ဘဲန် ယာ မာလမ် ခဲင် မိူင် နီ။ ဂွန် အီမာယ် ဘော ဂွန် ဒီဘျာ မဲ၊ ဂေ ဒီ ဘော ယမ်။ ကာဒါယ် မဲ အီ ဟဝ် ဒီ ဘော ဒိုဝ်း ကာယဝ်း ကာဆာင်။ မဲ မိူဝ် ဒီ ယမ် ခဲင် မိူင် အီ ဟဝ်။ ဂေ ဒူအီ အီဆာရေလ ဘောကာဂ့လျီတ် ဒီ ကာဒုး အီ မှေတ့် ဟာဝ် ဂေ ဘော ကွယ် ကာတူင့် ဒီ မိူင် ဂေ။”