1 ဇဝ်ဖြာ အီ အိုပ် တူတ့် ဒွန် မျုဝ် တဲး အုဝ် ယိုဝ် ပီ ဘျ အန် ပေါ အူ မျုဝ်။ န့ မုး အူ ခွန် အီ မိုဝ်း ဘ့လေ ဆိန်။ 2 အန် ဇဝ် ဝီ ဒီမွှတ် အုဝ် တဝ်း၊ “အိုယ် အာမုဝ်၊ မာဆေ ပီ ယိုဝ် မဲ။း” အုဝ် မိူဝ် ဝီ တဝ်း၊ “အုဝ် ယိုဝ် ခွန် အီ ဟဲ့ ဟပ် ဘ့လေ ဆိန်။” အုဝ် ဟဲ့ ဟွတ့် တဝ်း ပါယ် တီ ဇဝ်ဖြာ ပီ ဝီ တဝ်း ဒီ အုဝ်၊ “အာခြာဝ် ဒီ တူတ့် ဇာတ် နီ ဟဲ့ ဟွတ့် တး ဇမ် ဒီ ဂေ ဒူအီ ပီ အိုပ် အုဝ် အီ မုး ဒူအီ အီဆာရေလ။ အုဝ် မိူဝ် အာဝ် ဟူ ပဲ ဒီ ယိူန်။ ဟဲ့ လုဝ် ဒမ် မှာပ် ဒီ ဂေ အာခ်ု မှာန်။”

3 “ဆီငဲ ဒေါ အန် တီ ဂြုဝ်း ဂေ အီ တဝ်း မှုဝ် ဒီ ဟုဝ် ဇဝ်ဖြာ ဒီ ဝီ ဘဲန် တူတ့် ဂြုဝ်း အီ ယာမ် အီ ဒတ် ရျီင်။ ဒုဝ် ယမ် ဂေ ဒီ ကွယ် ဒွန် နာ ဒွန် ပ့လုဝ့်။ ဂေ ဒူအီ အီ ဒိုဝ်း ဟာဝ် ဝဲန် ဒုဝ် ယမ် ဂေ တီ၊ ဂေ ဒီ ဘော ဟာဝ် ယေန် ယေန်၊ ဟာဝ် ဘျွာ ဝဲန် ဒွန် နာ ဒွန် ပ့လုဝ့်။” ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။

4 ဘေ အီ လုက်တာယ် ဒီ ဒူအီ အီ ဇုတ် လုတ်၊ ဘေ အီ မိုဝ်း နဝ်း ဆီ ပျာတ့် ကာဆဝ် ဒူအီ ဒုက် ဒူအီ ဂိန်၊ တဲး ဂေ လိုဝ် စှိုမ် ဘော ရဝ် ဘော မိူင်၊ တဲး ဘေ ထူမ် ဂြုဝ်း နီ။ 5 ဘေ တူ ဆီ နှဝ့် တဲး ဆီငဲ ဒီလှဝ် ဘော ဆီငဲ ဘူင် ဘေ ဘ့လွယ် ပွုန်။ ဘေ ဆီ ယွင့် ကာဆဝ် ကြုဝ်ကြာမ် ဘေ၊ တဲး ဘေ ပွိုန် ဒီ ပီလွှက့် ဒီ ဒူအီ အီ တူ မိုဝ်း ဒူင် ဒီ ဘိုင်။ ဘေ ဂဝ် ဒီဂါဝ် တာ ကွက့် အီ တူ မှာန်။ တာ ဘော လစူ အီ တူ မှာန်။ 6 ဘေ ဘော ဘိး ကာဇု ဒျီပ် ငှုဝ် ဒဲင် ကာဒါယ် ဘော ကာဝ်ု ခဲင် ငှုဝ် ပီ ယွင့် ဘေ။ ဆေ ဒူအီ ဟဲ့ ကာရဝ်း ရွိုန် အူ ဘူင့် ဒီ ဘေ၊ ဆေ အန် ညှမ် မိုဝ်း ဒီ ဝျီ့ ဒီ ဘေ၊ ဘေ ခါနှာပ် ဒူအီ တီ၊ တဲး အန် ဘဲန် မှာယ် ဘေ။ ဆေ အာဝ် ပါယ် တီ ဒူအီ ဂိန် မှာန့် ခ့လဲပ် ဒီ ဘေ၊ ဘေ စ်ု တဲး အန် ဘဲန် မှာယ် ဘေ။

7 ကူပ် န့ ပါယ် တီ ဇဝ်ဖြာ အီ မုး ဇဝ်ဖြာ ပီ နဝ်း တာင် ဂေ ဒူအီ အီဆာရေလ၊ အန် ဟဲ့ ဒိူင် တဝ်း၊ “အုဝ် တူ ပိဝ် ခဲ့ ပီ ဘူင် ဂေ ဒွန် မျုဝ်။

8 ကူပ် မှာပ် ဂေ တီ၊ မိူင် ဂေ ဒီ ဘော ဒီယုး ဒီယေန့်။ ဒူအီ ခဲင် မိူင် ဂေ ဘောကာဂ့လျီတ် ဒီ ဘော ငှုန် ဘော ယာမ် တာင်။ မာန် မိူင် ဂေ ဘောကာဂ့လျီတ် ဒီ ဘော ဒီယေန့် ဘော ဘြိုယ် ဟုဝ့်၊ ပီ ဝီ စေတ့် လူင် ပီ အိုမ် ဘ့လဲင် နီလာ ခဲင် မိူင် အဲဂိုပ် တွိုန်။

9 ဒေါ အန် တီ အုဝ် ဒီ တဲး ဆီငဲ ဂေတ့် ဒေါ ကာတဲ ဆီငဲ။ တဲး န့ ဘော အပ် ဝွင့် ဒဲင် ကာဒါယ် နီ ဒေါ ဆီ ဘ့လာင် ဆီငဲ။

10 ဆီငဲ ဘူင် ဘေ ဘ့လွယ် ဟူမ် ဒါခိုယ် ဒါခိုယ်၊ အုဝ် ဒီ ဘူင် တဲး န့ ဝီ ဘဲန် ဆီငဲ ငှုန် ဆီငဲ ယာမ် တာင်။ အုဝ် ဒီ ဘူင် တဲး ဒူအီ ဘောကာဂ့လျီတ် စှိုပ် ခြိုင် စာန်၊ တဲး ဒွန် အီ ဂါ့ ဝဲန် ဟိုက် ဂိန့် ဂေ၊ တဲး န့ ဘျ ခဲ့ က့လိုဝ် ဂေ။ ဘေ ဒီ က့လိုဝ် ပီ ဂွန် အီမာယ် ပီ မိုဝ်း ဘေ ခဲ့ အူ ဝီ တီ ဟဲ့ ယမ်။ န့ ဒီ ဘဲန် နဝ်း ဆွင့် ဒီ ဘေ အာခ်ု မှာန်။”

11 ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ “ဆီငဲ ဒီ ခမ် ဘေ ဒုက် တာင် ဟဲ့ ကာတတ် ဒီ တး။ န့ တူ မုး ဒုက် အေတ့် ပီ ဒီ ဟူမ် ပီ ဒီ တာ၊ န့ မုး ဒုက် တူ ပွိုန် ဒီ ထူမ် ဂြုဝ်း ဇဝ်ဖြာ။

12 ဂေ ဒူအီ ကိူန် ဂေ ဒီ ဘော လဲ လဲပ် ဒီ ယွတ်၊ စုး ဒီ ဘာင် အိုမ် နမ်မုက်ဆာရာ ဒူင် ဂေတ့် ဆီငဲ ကော ဇမ် ဒူင် လေး ဆီငဲ။ စုး နာ ကွာ ကော ဝီ ဇမ် နာ တေတ့်၊ တဲး ဂေ ဒူအီ ဟြေတ့် အီ ကာလာင် ဂြုဝ်း ဇဝ်ဖြာ ဒီ ဂေ။ ဂေ ယီ တူ ယိုဝ် မာဆေ။

13 ဂေ ဒီဘျာ အီ ဒီ စှိတ် ဘော ဂေ ကာညူမ် အီ မိုဝ်း ပ့လူမ် မိုဝ်း ဟဲန့်၊ ဂေ ဒီ ဘော ဒီလှး ကူပ် ဆီ ထူမ် ဂေ ဂြုဝ်း ဇဝ်ဖြာ ပီ ဂေ ဆီ ဒျီင် ကာဆဝ် အိုမ်။

14 ဂေ ဒူအီ အီ ဟဲ့ ဒိူင် ဘော ဂါဝ် ပွုန် အာရိုပ် ရာင် အီ ကွယ် ခဲင် မိူင် ဆာမာရီ၊ မိူင် ဒါန် ဘော မိူင် ဘီရာဆေဘာ၊ ဂေ ဒီ ကေး လူင် တူတ့်၊ တူ ပွိုန် ဒီ ဝီ ယိတ့် ဒေါ မှဝ်။”