1 အုဝ် ဝီ ယိုဝ် ဇဝ်ဖြာ စွင့် ခူပ် ကာစှူင့် လှူ ဘော ဝီ ကာလာင် ဒီ အုဝ် တဝ်း၊ “မး ကာဆဝ် ကာဒဲ့ ဟုဝ် ဇဝ်ဖြာ တီ၊ တဲး ဒင် ရွင့် ဂေ စေန့် ရွင့် ကော ဒီယေန့်။ ဟဲ့ ဟွတ့်၊ ဝီ ပျာတ့် ဝဲန် ရွင့် တဲး ကာတု ဟုဝ် ဒီဂြပ် လူင်၊ တဲး န့ ငဝ်း ယမ် ဒူအီ ကိူန်။ ဂေ အီ ဆီ ဂိတ် ဆီ ကွယ် အုဝ် ဒီ ဝီ တဲး ဂေ ယမ် ဒီ မာပွါ့ လာင်။ န့ မိူဝ် တူ မိုဝ်း ခေါ အူ ဝီ အီ ဒီ ပွိုန် လေး တဝ်။

2 ဆေ ဂေ ပီ ဘော နပ် ဒီ ဂိုဝ်း ကာဒဝ်၊ တဲး န့ ကော ဇမ် ခဲင် မိူင် မာရာန မိူဝ်၊ အုဝ် ယီ ဒီ ဝီ တာ ဒဲ အုဝ်၊ ဒိုဝ်း လေး ဂေ ဒူင် တီ။ ဂေ ပီ ဘော နပ် ဒီ ဟုဝ့် ခဲင် ဂါင်ဟြာဝ် မိူဝ်၊ အုဝ် ဒီ ဝီ ဒိုဝ်း လူင် ဂေ။

3 ဂေ ပီ ဘော ဟုဝ့် ဒီ ကာဒဲ့ နွန် ဂါမေလ မိူဝ်၊ အုဝ် ဒီ ဝီ ဟြေတ့် ဂေ ဘော မှေတ့် ဂေ ဒီ တီ။ ဂေ ပီ ဘော ချြီင် ဒီ ကာဒမ် အိုမ် နမ်မုက်ဆာရာ၊ အုဝ် ယီ ဒီ ဝီ စ်ု မာကြာယ် တဲး အန် ကဝ့် ဂေ ဒီ တီ။

4 ဂေ ပီ ဘော ဟဲ့ ကာဒုး ရန်ဆူ ဂေ၊ မှေတ့် ဟာဝ် ဘဲန် မှာယ် အီ ဟဝ် မိူဝ်၊ အုဝ် ဒီ ဝီ စ်ု ဂေ အီ ဂူင့် မာပွါ့ လာင်၊ တဲး ဂေ ငဝ်း ယမ် ဒူအီ ဒူင် တီ။ အုဝ် ဒီ တဲး ဂေ ခမ် ဒုက်၊ တူ ဂေဇူ ဂေ၊ တူ စွယ် ဂေ။”

5 ဆေ ဇဝ်ဖြာ အီ အိုပ် တူတ့် ဒွန် မျုဝ် တး ဒိုဝ် ကာဒါယ်၊ ကာဒါယ် ဒီ ဘော လာတ့် ပီ အိုမ်။ ဂေ ဒူအီ ဘောကာဂ့လျီတ် အီ ကွယ် ဒဲင် ကာဒါယ် တီ၊ ဂေ ဒီ ဘော က့လိုဝ် ဘော ငှုန်။ ကာဒါယ် ဒီ ဒီယေန့် ဘော ဘြိုယ် ဟုဝ့်၊ ပီ ဝီ စေတ့် လူင် ပီ အိုမ် ဘ့လဲင် နီလာ ခဲင် မိူင် အဲဂိုပ်။

6 အန် ဇဝ် ဘူင် ဒူင် ကွယ် အန် ခြွင့် ဒဲင် ခဲင် ဂါင်ဟြာဝ်။ ဒင် ဒူင် ကွယ် အန် ယီ ကွယ် ဒဲင် ကာဒါယ်။ အန် ဘော ဒိုဝ်း အိုမ် နမ်မုက်ဆာရာ ဟုဝ့် နာ ဒဲင်၊ တဲး ဂ့လာယ် ဝီ စုဝ်း ဒဲင် ကာဒါယ်။ ဇဝ်ဖြာ မုး ဇဝ်ဖြာ အီ စိူဝ် အန် ဇဝ် အီ အိုပ် တူတ့် ဒွန် မျုဝ်။

7 ဇဝ်ဖြာ ဝီ ဒီမွှတ်၊ “အိုယ် ဘေ ဒူအီ အီဆာရေလ၊ ဘေ ထာင် အုဝ် ဟဲ့ မာတ် ဘေ မွှိုမ် လွှိုမ် ဒူအီ ခဲင် မိူင် ဂူဆာ။း အုဝ် ဟဲ့ ဒိုဝ်း လေး ဘေ ခဲင် မိူင် အဲဂိုပ်။ အုဝ် မိူဝ် ဟဲ့ ဘူင် ဇိုဝ် တီ ဒီ ဒူအီ အာမျုဝ် ဟဝ်။ အုဝ် ဟဲ့ ဒိုဝ်း လေး ဂေ ဒူအီ ဖီလီထီ ခဲင် မိူင် ကြေထာ ဘော တဲး ဂေ ဒူအီ အာရာမ် လေး ခဲင် မိူင် ကီရ။

8 အုဝ် ဇဝ်ဖြာ အီ အိုပ် တူတ့် ဒွန် မျုဝ်၊ အုဝ် ဒီ ယွတ် ဒူအီ အီဆာရေလ အီ ဘူင် မှာပ် ဆေဆေ။ အုဝ် ဒီ ဘော ပျာတ့် ဝဲန် ဂေ၊ ကွဲ့ တဲး ဂေ ကွယ် ဒဲင် ကာဒါယ်။ အုဝ် ယီ ဟဲ့ ဒွါ ကာဒိက် ဆတ်ဇာ လွင် အုဝ် တူ တဲး ဂေ လှုက်လှာန် အာကူပ် ဘောကာဂ့လျီတ် ယမ်။” ဇဝ်ဖြာ ဟဲ့ ဟွတ့် ကာလာင် ပါယ် တီ။

9 ခုဝ်၊ အုဝ် ဟဲ့ ဒွါ အာမိင် တဲး ဒူအီ အာမျုဝ် ဟဝ် ခါနှာပ် ဂေ ဒူအီ အီဆာရေလ၊ တဲး န့ ပီ ဒူအီ ခြိုင် ဒီဂါဝ်။ အုဝ် ယီ တူ တဲး ခေါ အူ ဝီ လွတ် ဒုက် တီ ပီ ဒီဂါဝ် အူ ဘူင့် အီ စုဝ်း ဒဲင် ကာဒါယ်။

10 ဒွန် အီ အီ ဟဲ့ ဘူင် မှာပ်၊ ဂေ ဒီ ယမ် ဒီ မာပွါ့ လာင်။ န့ မုး ဂေ အီ နပ် ဒီ တဝ်း၊ “ဒုက် တာင် တီ၊ န့ တူ ခြပ် ယေ၊ န့ တူ ပွိုန် ခြဲ ယေ။”

11 ဇဝ်ဖြာ ပီ ဝီ တဝ်း၊ “အာခြာဝ် ဒေါ အန် တီ အုဝ် ဒီ ဘော ဝီ မ့ပြာယ် မာန် မိူင် အာဒါဝိတ် အီ ဟဲ့ လိုဝ် စှိုမ်။ ဒေါ တီ နီ န့ ပီ ကာင် အီ ဟဲ့ ရာမ်။ မာလဲ၊ အုဝ် ယီ မ့ပြာယ် ရဲင် အန် ဘော တဲး န့ မိုဝ်း အာဖုင် ဒင်ခုဝ် ပီ ဘြိမ်။

12 ဂေ ဒူအီ အီဆာရေလ ဒီ ဝီ ပွိုန် ကာဒါယ် အီ ဆီ ဂိူတ် ဆီ ကွယ် ခဲင် မိူင် အေဒူမ် ဘော ဒူအီ အာမျုဝ် ဟဝ် ဘဲန် မျုဝ် ဘဲန် မျုဝ် ဂေ ဘဲန် ဒူအီ ပီ အိုပ် အုဝ်။” အုဝ် အီ မုး အန် ဇဝ်၊ အုဝ် ဟဲ့ ကာလာင် ပါယ် တီ။ အုဝ် မိူဝ် ဒီ ဘူင် တဲး န့ ဘုဝ် ဘဲန်။

13 ဇဝ်ဖြာ ဟဲ့ တဝ်း၊ “အာခြာဝ် အန် ဒီ ဘော ဇမ် ဒေါ ဒူအီ အီ ထဲ ဒူင် နာ ဒီ ဘော ခြပ် ဒူအီ အီ ဆုဝ့် ငှုဝ်။ ဒူအီ အီ ကြိတ် ဘ့လေ မာငုန် ဒီ ဘော ခြပ် ဒူအီ အီ ဆမ် ဘ့လေ မာငုန် ကာမာယ်။ ဒေါ အန် တီ ဒီ မာန် မာငုန် န့ လေး ကိူန် အိုမ် မာငုန် အီ ဆီငဲး ကာဆဝ်။

14 အုဝ် ဒီ ဘော ဝီ ဒိုဝ်း တး ဂေ ဒူအီ ပီ အိုပ် အုဝ် အီ မုး ဒူအီ အီဆာရေလ ပဲ့ ဟဲ့ မှေတ့် ဟာဝ် အီ ဟဝ်။ ဂေ ဒီ ဘော ဝီ တး မ့ပြာယ် မိူင် ဘြိမ် ဂေ အီ ဟဲ့ လိုဝ် ကာပျာတ့်။ ဟဲ့ ဟွတ့်၊ ဂေ ဒီ ဘော ဝီ ကွယ် ခဲင် မိူင် ဂေ တီ။ ဂေ ဒီ ဘော ဝီ ဆမ် မာန် မာငုန်၊ တဲး ဂေ ဝီ ပွိုန် ဒီ ဒျီင် အိုမ် ဘ့လေ မာငုန်။ ဂေ ဒီ ဘော ဝီ တး လိုမ်လာ မာန် ဘော ဒူင် နာ ဂေ၊ တဲး ဂေ ဝီ ပွိုန် ဒီ ဟူမ် ဘ့လေ အန် ဂေ ကာယူင့် အန်။

15 အုဝ် ဒီ တဲး ဂေ ကွယ် ဆီချာ ခဲင် မိူင် ဘြိမ် ဂေ တီ။ ဝါယ် အန် တီ ဂေ မိူဝ် အာဝ် ဟူ လုဝ် လေး ခဲင် မိူင် ဂေ တီ။” ဇဝ်ဖြာ အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ ဟဲ့ ကာလာင် ပါယ် တီ။