1 ဇဝ်ဖြာ ဝီ ကာလာင် ဂြုဝ်း ဒီ အာမီခါ အီ တး ခဲင် ဒူင် စိူဝ် မောရာဆာ။ ဒေါ အန် တီ န့ ဘော မုး စုဝ် ဘာန် ခုန်ဒီခမ် အာယုဝ်ထာမ် ဘော ခုန်ဒီခမ် အာခါတ် ဘော ခုန်ဒီခမ် အာဟေစကီ အိုပ် မိူင် ယူဒါ။ ဇဝ်ဖြာ တဲး အာမီခါ ယိုဝ် လွင် အီ ဒီ ပါယ် မိူင် ဆာမာရီ ဂါယ် မိူင် ယေရူဆာလဲမ်။

2 ဟန် တဝ်း၊ “အိုယ် ဘေ ဒူအီ ဒွန် ဇိုဝ် ဒွန် ခြိုဝ် အီ ကွယ် ဒဲင် ကာဒါယ် နီ၊ တဲး ဘေ ထူမ်။ ဇဝ်ဖြာ အီ အိုပ် တူတ့် ဒွန် မျုဝ်၊ အန် မိုဝ်း ပီ ကာလာင် အီ တူ မွှိုမ် လွင် ဘေ။ အန် ဇဝ် ကွယ် ခဲင် ဟုဝ် ဇဝ်ဖြာ ဘော ကာလာင် ဂြုဝ်း ဇိုဝ် တီ။

3 ဘ်ု ဘေ ယွတ်၊ ဇဝ်ဖြာ ဒီ ဘော ယိတ့် ဒူင် ကွယ် အန် အီ ကွယ် ခဲင် ဂါင်ဟြာဝ်၊ ဝီ လေး လူင် ဒဲင် ကာဒါယ်၊ ကွယ် ဒဲင် နွန် စာ။

4 နွန် ဂေ တီ ဒီ ဘော လာတ့် ဒွန် ပ့လုဝ့် ဒူင် ညဲတ့် ဇဝ်ဖြာ။ အန် ဇဝ် လူင် ခဲင် ဒီလယ့် ဒူပ် ဘာင် ဘ့လဲင် ပီ ဘ့လမ် အီ ဟဲ့ ကွယ် ခူပ် ငဝ် ဘော အိုမ် အီ ဟဲ့ တး ဒူင် စာ အီ ဟဲ့ ဘ ကာဆဝ်။

5 န့ ဘဲန် ပါယ် တီ ကူပ် ပီ ကာလိုပ် ဂေ ဒူအီ အီဆာရေလ ဘော ဂေ ဒူအီ အာယူဒါ။ ဂေ ဒူအီ အီဆာရေလ တီ၊ ဟဲ့ ဘူင် ကာလိုပ် ခဲင် မိူင် ဆာမာရီ။ ဂေ ဒူအီ အာယူဒါ ဟဲ့ ဘူင် ကာလိုပ် ဒူင် စာ ခဲင် မိူင် ယေရူဆာလဲမ်။

6 ကူပ် န့ ပါယ် တီ အုဝ် အီ မုး ဇဝ်ဖြာ ဘူင် တဲး မိူင် ဆာမာရီ ဘဲန် မ့ပိုမ် မာဝ် ဘော ပီ မ့ပိုမ် ကာဒါယ် အီ ကွယ် ခဲင် ဒူင် နာ။ ဂေ ဒီ ဝီ ထဲ န့တေန့် ခဲင် မိူင် ဂေ၊ တဲး ဂေ ဝီ ပွိုန် ဒီ ဆမ် မာန် မာငုန်။” ဇဝ်ဖြာ ဝီ တဝ်း၊ “အုဝ် ဒီ ဒိုဝ်း မာဝ် ရဲင် မိူင် တီ၊ ဟာဝ် ဟုး ဝဲန် ခဲင် ဒီလယ့် ဘ့လဲင်၊ တဲး န့ ကော လိုဝ်း ဒင် စေန့် ရဲင် တီ။

7 ခဲ့ ကွယ် အာရိုပ် ရာင် ခဲင် မိူင် တီ ဒီ ဘော ကာဘက် လိုဝ် တူတ့်။ ခဲ့ ကွယ် ဘော ဒွန် မျုဝ် ပီ ပွိုန် ဂေ ငဝ်း ခန် အီ မုး ရုး ယာ မာလမ်၊ အီ ဒီ ဒိုဝ်း ဝဲန် တဲး န့ ဝီ ဘဲန် ရုး ယာ မာလမ် ပေါ ပ့လုဝ့်။”

8 ကူပ် န့ ပါယ် တီ အုဝ် ဘော ယာမ် ဘော ငှုန်။ အုဝ် မိူဝ် ဟာဝ် ဒီ ပ့လဝ် ဘော ကွယ် ဒုဝ် ဂ့လ။ အုဝ် ဒီ ဘော ဟမ် ကော ပီ ဟမ် မာဆုဝ် ကာဒါယ်။ အုဝ် ဘော ဒတ် ရျီင် ကော ပီ ဟမ် မာဆိမ် ကာဟာတ့်။

9 ဒိမ် ပီ ကာဒုး ဂေ ဒူအီ ပီ အိုပ် အုဝ် ဟဲ့ ဟွတ့် ဇမ် ဘော တူ နပ် ဒီ ဟြာယ်။ ဒိမ် ဂေ တီ၊ ဂေ လုဝ် ခမ် တဲး န့ ကော ဇမ် မိူင် ယူဒါ။ န့ ဒီ ဘော ဇမ် ဘော ဒူင် ကွယ် ဂေ ဒူအီ ပီ အိုပ် အုဝ် ဒီ ဘာင် မာလုဝ်း မိူင် ယေရူဆာလဲမ်။

10 ကွဲ့ တဲး ဘေ ကာလာင် လွင် အန် တီ ခဲင် မိူင် အာဂထ၊ အာဝ် လုဝ် ယာမ် ဒေါ မှဝ်။ ဘေ ဒူအီ ခဲင် မိူင် ဘေတ်လေအာဖာရာ တဲး ဘေ အိတ် ကာလွှယ် ခဲင် ကာပုး၊ တဲး န့ ဘျ နဝ်း က့လိုဝ် ဘေ။

11 အိုယ် ဘေ အီ ကွယ် ခဲင် မိူင် ဆာဖီရာ၊ တဲး ဘေ ဘုတ့် ဂ့လ ဘော ဟာဝ် ဒူပ် န့တေန့်၊ တဲး ဘေ ဆာယ် အီ။ ပါယ် တီ ဘေ ကာဒုး အီ မှေတ့် ဟာဝ် ဘေ ပေါ မိူင်။ ဘော ဂေ ဒူအီ အီ ကွယ် ခဲင် မိူင် စာနန် တူ ပွိုန် လေး ဟာဝ်။ ဂေ ဒူအီ အီ ကွယ် ခဲင် မိူင် ဘေတ်အာစေလာ ဂေ ဒီ ယာမ် ဘော ငှုန် ကူပ် အာဝ် ဟူ မိုဝ်း ဂေ ဒူင် ဒီ ဘိုင်။

12 ဂေ ဒူအီ အီ ကွယ် ခဲင် မိူင် ရာမာအာတ်၊ ဂေ ဘော နဝ်း မှဲ ဘော နှဝ့် န့ဒဝ့် အီ ဒီ တး စွယ် ဂေ။ ခုဝ်၊ အာဖေ အာရေ ပီ ဘူင် ဇဝ်ဖြာ ဟဲ့ တး ဇမ် ဒီ ဘာင် မာလုဝ်း မိူင် ယေရူဆာလဲမ်။

13 အိုယ် ဘေ အီ ကွယ် ခဲင် မိူင် လာခိတ်၊ တဲး ဘေ ဒိုဝ်း တး လက်လဝ် မင်ပြွင့် အီ ခြန် ကာဆဝ်။ ဒေါ စုး ဘေ ဒူအီ အီဆာရေလ ဒီ ကြိုပ် အာရိုပ် ရာင်၊ ဘေ ဟဲ့ ယဲတ့် ဒွန် အီ။ ပါယ် တီ ဘေ ဘော ကာဆုး ဂေ ဒူအီ ခဲင် မိူင် ယေရူဆာလဲမ်၊ တဲး ဂေ ဘူင် မှာပ်။

14 အာတ့် လာယ် ကာဂဝ်း ဘေ၊ တဲး ဘေ ဒွါ ခေါဆွင် ဒီ ဒူအီ ခဲင် မိူင် မောရာဆိတ်ဂါထ။ ဒူအီ ခဲင် မိူင် အာခါစိပ် ဂေ မိူဝ် ဟဲ့ ကာလုဝ် ခုန်ဒီခမ် ခဲင် မိူင် အီဆာရေလ။ ခုဝ်၊ ဂေ ဒွါ ကာဒိက် ဆတ်ဇာ၊ တဝ်း ဒီ စွယ်။ ဂေ ယီ တူ ပွိုန် ဘူင် ဒူပ် ကာဒိက် ဆတ်ဇာ ပီ ဒွါ ဂေ တီ။

15 အိုယ် ဘေ ဒူအီ အီ ကွယ် ခဲင် မိူင် မာရေဆာ၊ အုဝ် ဒီ ဒဲ့ ဝီ အီ ဒီ တး ပဲ ဘေ၊ တး ဒူင် ကွယ် ဘေ။ ဂေ အီ မိုဝ်း အာဖုင် ဆာရေ ခဲင် မိူင် အီဆာရေလ၊ ဂေ ဒီ ဘော ဟာဝ် ချြီင် ခဲင် မိူင် အာဒူလမ်။

16 တဲး ဘေ ဂါ့ ဝဲန် ဟိုက် ဂိန့် ဘေ၊ တဲး န့ ဘျ ခဲ့ က့လိုဝ် ဘေ ကူပ် ဂွန် ပီ ရွက့် ကာဆဝ် ဘေ။ တဲး ဘေ ဂါ့ ဂ့လ ဂိန့် ဘေ၊ တဲး န့ ကော ပီ ဂိန့် မာလင်ဒါ။ ခုဝ်၊ လှုက်လှာန် ဘေ အီ ဒီ မှေတ့် ဟာဝ်၊ တဲး ဂေ ဝီ ကာဂဝ်း ဒီ ဘေ၊ ကွဲ့ တဲး ဘေ ဝီ ယိုဝ် ဒေါ မှဝ်။