1 အာယုဝ်နာ ယီ တူ အိုင် ပီ ဘူင် ဂေ တီ၊ အန် ဘော ရူ ကာဆဝ်။ အန် ဝီ ဆာခိုဝ် ဒီ ဇဝ်ဖြာ တဝ်း၊ “အိုယ် မဲ ဇဝ်ဖြာ၊ ဒေါ ကွယ် အုဝ် ခဲင် မိူင် ဘြိမ် အုဝ် တွိုန်၊ အုဝ် ဟဲ့ ဟွတ့် တဝ်း၊ န့ ဒီ ဘဲန် ပါယ် နီ။ ခုဝ်၊ အုဝ် ပီခြန် အုဝ် ဒီ တဝ် ဟာဝ် မိူင် ထာဆိတ်၊ 2 အုဝ် ဟဲ့ နပ် ဒီ အာတ့်၊ မဲ ဇဝ်၊ မဲ မုး ဇဝ်ဖြာ အီ နပ် ဒီ ရွက့်၊ နပ် ဒီ ကာဝေ အီ။ မဲ ဘော မိုဝ်း နဝ်း ခမ် ဒီ ယိူန်၊ တူ ငှိုယ် ရူ။ မဲ ဘော မိုဝ်း နဝ်း ဆီ ဂေဇူ အီ၊ တူ ဆီ ဒမ် မှာပ် ဒီ အီ။ 3 ခုဝ် အန် တီ၊ တဲး မဲ ဇဝ်ဖြာ တဲး အုဝ် ယမ်။ ဆေ အုဝ် ယမ်၊ န့ မွှိုမ် လွှိုမ် အုဝ် ကွယ်။”

4 ဇဝ်ဖြာ ဝီ ဒီမွှတ် အန်၊ “ဟဲ့ ကာအာပ် မဲ ရူ ပါယ် တီ။း”

5 ဟဲ့ ဟွတ့်၊ အာယုဝ်နာ ဘော လေး နာ ရေတ့် မိူင်၊ ဟာဝ် နာ လေး ဆီငဲ။ အန် ဘော ဟာဝ် ဘူင် ထိုပ် ဒီ အန် ဘော ကွယ် ခြိုမ် ထိုပ် တီ၊ ဘ်ု ဒီ ယွတ်၊ န့ ဒီ ပါယ် မှဝ် ခဲင် မိူင် တွိုန်။ 6 ဟဲ့ ဟွတ့်၊ ဇဝ်ဖြာ ဘော ဘူင် တဲး န့ မိုဝ်း ယွုန် ကာပဝ် အူ ကာဒင် လတ့် အူ ဇေန့်၊ တဲး အာယုဝ်နာ ပွိုန် ဒီ ကွယ် ယာပ် အန် တီ၊ တဲး အန် ပွိုန် ဒီ ကွယ် ဒါခိုယ်။ အာယုဝ်နာ မိူဝ် ဘော ခူယ် ကူပ် ယွုန် တီ။ 7 ဘော ဝီ ဇမ် ပါ ခဲညှာ ဆိန့်ဝး၊ ဇဝ်ဖြာ ဘော ဝီ တဲး န့ မိုဝ်း ဝလွာ အူ ဒုဝ်၊ တဲး အန် ကဝ့် ဟူမ် ယွုန် တွိုန်၊ တဲး အန် ဘော ဟျီ့ အူ ဇေန့်။ 8 ဟဲ့ ဟွတ့်၊ ဆီငဲ ဘော လေး၊ ဇဝ်ဖြာ ဘော ဘူင် တဲး န့ မိုဝ်း ခုန် တး နာ လေး ဆီငဲ၊ တဲး န့ ဆောဒါတ် ကာဆဝ် ထွင် ဒီ အာယုဝ်နာ။ အန် ဘော ဒီလှး ကာဆဝ် ဘော ဝီ မိုဝ်း နဝ်း ဆီ ယမ်။ အန် ဘော တဝ်း၊ “ဆေ အုဝ် ယမ်၊ န့ မွှိုမ် လွှိုမ် ဒေါ အိမ် အုဝ် နီ။”

9 ဇဝ်ဖြာ ယီ ဝီ တဝ်း ဒီ အန်၊ “န့ ကာအာပ် မဲ ရူ ဒီ ယွုန် ကာပဝ် တီ။း” အန် ဝီ တဝ်း၊ “အုဝ် ဒီ ရူ၊ တဲး အုဝ် ကော ယမ်။”

10 ဇဝ်ဖြာ ပီ ဝီ တဝ်း ဒီ အန်၊ “မဲ တူ ကာဒုး ဒီ လိုမ်လာ ယွုန် ကာပဝ် တီ၊ တဲး အန် ဟြေး၊ တဲး အန် တာင်။ အန် လတ့် ရာင် အန် အူ မှိုဝ်၊ အန် ပီ ဝီ ယမ် ရာင် အန် ပေါ အူ မှိုဝ်။ မဲ ယီ ရူ ကူပ် ယမ် အန်။ 11 အီ ယီ မုး မိူင် နီနီဝေ တီ၊ န့ ဘော မိုဝ်း ဒူအီ အူ ဆဲန် ဒီ အာ မှိုန့် ဝီ ဘော ဒုဝ် ဆတ်ဒါဝါ အီ ကိူန် ကာဆဝ်။ ဂေ ယီ တူ နပ် မာဆေ။ န့ ပီ ဂေ တူ နပ် အာဂ အာအး။ မဲ ယီ ရူ ဒီ အုဝ် ပီယေန့်၊ ကူပ် ကာဝေ အုဝ် ဒူအီ ဂေ တီ။”