1 ဇဝ်ဖြာ ပီ ဝီ စ်ု အာယုဝ်နာ ပေါ အူ ဇေန့် တဝ်း၊ 2 “တဲး မဲ ဟာဝ် ခဲင် မိူင် တာင် အီ မုး မိူင် နီနီဝေ တွိုန်။ တဲး မဲ ကာလာင် ခဲ့ ပီ ကာလာင် အုဝ် ဒီ မဲ။”

3 ပန် တီ အာယုဝ်နာ ဘော ထူမ် ဂြုဝ်း ဇဝ်ဖြာ။ အန် ဘော ဟာဝ် ဒီ မိူင် နီနီဝေ။ မိူင် နီနီဝေ န့ ဘော မုး မိူင် တာင်၊ မိူင် ကာဝဝ်း ကာဆဝ်။ ဆေ ဒူအီ ဟာဝ် ခဲင် မိူင်၊ ခြာဝ် န့တေန့် အူယ် ဆီငဲ န့ ကော ပွုန်။ 4 အာယုဝ်နာ အန် ဆွ့ ကာစုး ဒီ လိုပ် အာဒါ အူ ဆီငဲ ခဲင် မိူင် တွိုန်။ အန် တဝ်း၊ “ဆေ ဟီ ဇမ် ပေါ ဖွုန် ဂိုဝ် ဆီငဲ၊ မိူင် နီနီဝေ နီ ဒီ လိုဝ် ကာပျာတ့် စှိုမ် တူတ့်။” 5 ပန် တီ ခဲ့ ကွယ် ဒူအီ ခဲင် မိူင် နီနီဝေ ဘောကာဂ့လျီတ် ဘော ဂွန် ဘော ဒူအီ တာင်၊ ဂေ ဘော ညှိုမ် ဂြုဝ်း ဇဝ်ဖြာ တီ။ ဂေ ဘော ယိူန် ပီ ဒီ ဟူမ် ဘော စှိုပ် ဒီ တာ ခြိုင် စာန်၊ တဲး န့ ဘျ၊ ဂေ ဟဲ့ လှုဝ်း မှာပ် ဂေ။

6 ခုန်ဒီခမ် ဘော နပ် လွင် ဂြုဝ်း အာယုဝ်နာ တီ၊ အန် ဘော လေး ဒဲင် မာလာင် အန်၊ ဝီ ကာပ့လု ခြိုင် ခုန်ဒီခမ် အန်၊ ဝီ စှိုပ် ဒီ တာ ခြိုင် စာန်၊ တုတ့် ကွယ် ခဲင် ကာဝှါင်၊ တဲး ဇဝ်ဖြာ ယိုဝ် ခဲ့ က့လိုဝ် အန် ကူပ် မှာပ် အန်။ 7 အန် ဘော ကာလာင် ဒီ ဂေ အာမူ အာမာတ် အန် ဘော ဒီ ဂေ ဒူအီ ဘောကာဂ့လျီတ် ခဲင် မိူင် နီနီဝေ။ အန် တဝ်း၊

“ကွဲ့ တဲး အာဆေ ဟူမ် ပီ ဒီ ဟူမ်။ ဘော ဒူအီ ဘော ဒုဝ် ဆတ်ဒါဝါ၊ ဘော မာမက် ဂေ မာဘူ၊ ကွဲ့ တဲး မျုဝ် မှဝ် ဟူမ် ပီ ဒီ ဟူမ် ဘော ဒျီင် အိုမ်။ 8 တဲး ဘော ဒူအီ ဘော ဒုဝ် ဆတ်ဒါဝါ စှိုပ် တူတ့် ခြိုင် စာန်။ တဲး ဘေ ဆာခိုဝ် မှာန့် ဒီ ဇဝ်ဖြာ။ တဲး ဘေ ဝဲန် နာ တူ ဘွတ် နာ တူ မွှိုမ်။ 9 ဆေ အေ ဘောကာဂ့လျီတ် ဘူင် ပါယ် တီ ယုဝ် ဇဝ်ဖြာ ဆော ဝီ ကာပ့လု နဝ်း အန်၊ တူ တဲး အေ ယမ်၊ တူ တဲး အေ စှိုမ်၊ ယုဝ် အန် ဆော ဟူ ဝီ ဘူင် ပီ တဝ်း အန် ဒီ ဘူင်။”

10 ပန် တီ ဇဝ်ဖြာ ဘော ယိုဝ်၊ ဂေ ဒူအီ ခဲင် မိူင် နီနီဝေ ဟဲ့ ဝဲန် ပီ ဘူင် ဂေ အီ တူ ဘွတ် အီ တူ မွှိုမ်။ ဇဝ်ဖြာ ဘော ကာဝေ ဂေ၊ အာဝ် ဟူ ဝီ ဒမ် မှာပ် ပဲ့ ဟဲ့ တဝ်း အန် ဒီ ဘူင်။