1 ဂေ အီ အိတ် ဒဲင် ကာစှူင့် အိတ် ဂေ ဘော ဇေန့်ဇာ ဒီ ဘူင် အီ တူ မွှိုမ်၊ ဂေ ဒီ ဘော ဇမ် ဒုက် တာင်။ ပြဲ ဒီ ဝး ဘေ ဘော ဟာဝ် ဘူင် အီ ဟာယ် အီ မိူက် ပဲ့ ဟဲ့ မိုဝ်း ဘေ ပွုန် ဒီ ဘူင် ပါယ် တီ။

2 ဆေ ဘေ ဆီ ပွိုန် ဒူင် နာ အီ ဟဝ်၊ ဘေ ဘော နပ် ဒီ ပီလွှက့် ဒီ အီ ဘော ဒိုဝ်း ကြုဝ် ဂေ။ ဆေ ဘေ ဆီ ပွိုန် ကာင် အီ ဟဝ် မိူဝ် ဘေ ဘော ဖာတ် ဒိုဝ်း ဒီ ဂေ။ ဘေ ဘော ခါနှာပ် ဒါ ကာညာ ကာင် ဘော ဖာတ် ဒိုဝ်း ခါဂုန် အန်။

3 ကူပ် ပါယ် တီ ဇဝ်ဖြာ တဝ်း၊ “အုဝ် ဒီ ဘူင် ကာဘး ဒီ ဒူအီ အာမျုဝ် တီ။ အုဝ် ဒီ ဘူင် တဲး ဘေ ခမ် အာဖေ အာရေ ပီ တူ ပွိုန် လွတ် ဘေ၊ ကွဲ့ တဲး ဘေ ဆီ ပွိုန် ဒီ ပီဖုင် ဘေ ပေါ အူ ဇေန့်။ န့ ဒီ ဘော ဘဲန် အာခြာဝ် အီ ဟာယ် ကာဆဝ်။”

4 ဒေါ အန် တီ ဂေ ရန်ဆူ ဘေ ဒီ တဝ်း မှုဝ် လွင် ဟဲ့ ခမ် ဘေ အာဖေ အာရေ တာင်။ ဘေ မိူဝ် ဒီ ဘော ယာမ် တာင် တဝ်း၊ “ယေ ဟဲ့ ဟွတ့် စှိုမ် တူတ့်။ အန် ဇဝ် ဟဲ့ ကာပ့လု ခါဂုန် ကာဒါယ် ယေ။ အန် ဇဝ် ဟဲ့ ဒိုဝ်း လေး ဒီ ယေ။ အန် ဇဝ် ဟဲ့ ဒိုဝ်း ဒူင် နာ ယေ၊ ဝီ အာပ် ဒွါ ဒီ ဂေ အီ တး ခါနှာပ် ယေ။”

5 ယေ အာဝ် ဟူ ပွိုန် ကာတာမ် ကာယဝ်း ကာဒါယ် ယေ။ ယေ အီ မုး ဒူအီ ပီ အိုပ် ဇဝ်ဖြာ ယေ တူ ပွိုန် ဒီ ဆုင်ဖျာတ် မှဝ် ဒီ ပါယ် ဒီ ကာဆာင် ကာဒါယ် ယေ။

6 ဂေ ဒူအီ ဘော တဝ်း ဒီ ဒူအီ အီ ဘျာန် ဂြုဝ်း ဇဝ်ဖြာ၊ “ကွဲ့ တဲး ဘေ ကာလာင် လွင် ဒုက် တာင် အီ ဒီ တး တီ။ ယေ တူ လုဝ် ခမ် အန် ဒေါ မှဝ်။”

7 အိုယ် ဘေ ဒူအီ အီဆာရေလ၊ န့ တူ ကာအာပ် ဘေ ကာလာင် ပါယ် တီ။ ဆေ ဘေ ဘူင် ပါယ် တီ ဇဝ်ဖြာ တူ ခမ်။ ဆေ ဘေ ဆီ ဘူင် ဒူပ် အီ မှာန် အီ မွှိုမ်၊ ဘေ ဒီ ဘော နပ် ဂြုဝ်း အုဝ် ဟဲ့ မွှိုမ်။

8 မာလဲ၊ ကော ဇမ် ဒေါ တီ နီ ဂေ ဒူအီ ပီ အိုပ် အုဝ် ဂေ ဝီ ဘူင် ကာဘး ဒီ အုဝ်။ ဘေ ဘော ဝီ ဖာတ် ဒိုဝ်း ဘုတ့် လေး ခြိုင် ပီ တာ ဂေ ဒူအီ အီ ညှိုမ် ဘိုင် ဘေ၊ တဲး ဘေ ပီ ဒါ ဆိုက် အီ ဟဲ့ လေး တး ဒူင် ကာဂုဝ်း ဂေ။

9 ဘေ ဘော ဝီ ဟုဝ် လေး အီဘိုန့် ဂေ ဒူအီ ပီ အိုပ် အုဝ် ခဲင် ကာင် ဒူင် ဟဲ့ ကွယ် ဂေ။ ဘေ ဘော ဒိုဝ်း ဝဲန် ပွုန် ပဲ့ ဟဲ့ ဒွါ အုဝ် ဒီ ဂွန် ဂေ။

10 ဘေ ယိတ့် ဟာဝ် ဒေါ တီ နီ။ မိူင် နီ အာဝ် ဟူ မုး ဒူင် ဟဲ့ ပွိုန် ကွယ် ဆီချာ ဘေ။ ခုဝ်၊ ဒူင် တီ ဟဲ့ မိုဝ်း မှာပ် ဒီလူယ်။ န့ ဘော ကာပျာတ့် လိုဝ် တူတ့်။

11 ဆေ န့ မိုဝ်း ဒူအီ အီ ဘျာန် ဂြုဝ်း ဇဝ်ဖြာ ဘော ဒူပ် နဝ်း ဒုဝ် ဘြိမ် အန် ဘော ကာလာင် ဂြုဝ်း တူ မှာန် တဝ်း၊ “အုဝ် ဒီ ဘဲန် ဒါ အီ ဘျာန် ဂြုဝ်း ဇဝ်ဖြာ၊ အုဝ် ဒီ ဟုဝ် ဒါရာ လွင် အိုမ် မာငုန် ဟဲ့ တဲး နဝ်း ဒါခိုယ်၊” ဘေ ဒီ ခူယ် ကာဆဝ်။ ဒူအီ ဝီ တီ ဒီ ဘဲန် ဒါ အီ ဘျာန် ဂြုဝ်း ဇဝ်ဖြာ ပီ အိုင် ဘေ။

12 အိုယ် ဘေ ဒူအီ အီဆာရေလ၊ န့ ဒီ ဇမ် အူ ဆီငဲ အုဝ် ဒီ တဲး ဒူအီ ဘေ အီ ဆီ ဂိတ် ဆီ ကွယ် ဝီ တး ကာဇု ကာဒိုမ်။ အုဝ် ဒီ ဝီ တဲး ဂေ ဒူအီ အီဆာရေလ ဝီ ပီ ဖိုင် မာဘူ၊ တဲး ဂေ ပီ မာဘူ အီ ဟဲ့ ကွယ် ခဲင် ကာပိုမ်၊ ပီ ဘော ဖိုင် မာဘူ အီ ဟဲ့ ကွယ် ဒူင် ဒွိုမ် ကွယ် ဟူမ် ဂေ ဆေဆေ။ ခဲင် မိူင် ဘေ န့ ဒီ ဝီ မိုဝ်း ဒူအီ ကိူန် အီ ဆီနန် ဆီနိူင်။

13 ဇဝ်ဖြာ ဒီ ဘော တဲး ဘေ လေး ဒူင် မှေတ့် ဟာဝ် ရန်ဆူ ဘေ။ ဒါ ကာညာ ဘေ တဲး ဘေ ဝီ လေး ခဲင် မာလုဝ်း မိူင် ဘဲန် မိူင် အီ မုး ဒူင် မှေတ့် ဟာဝ် ဂေ ဒီ ဘေ။ ခုန်ဒီခမ် ဒီ တိုယ် ဘေ ဘော ဇဝ်ဖြာ ဒီ ယဲတ့် ဘေ။