1 အုဝ် တဝ်း၊ “အိုယ် ဘေ ဒူအီ အီ အိုပ် ဒူအီ အီဆာရေလ၊ ဘေ ကာအာပ် နပ် ဒီ ကာယဝ်း အီ မှာန် ဘော အီ တူ မှာန်။

2 ဘေ ယီ မုး ဒူအီ အီ နပ် ဒီ ဇွင့် နာ ဘွတ် နာ မွှိုမ် ဘော ဝီ ရွက့် အီ ဟာယ် အီ စီစိဝ်။ န့ ပီ ဘေ ဝီ ယာတ့် ဟူမ် ဟုန် ဂေ ဒူအီ အာမျုဝ် အုဝ်၊ ဝီ ဒိုဝ်း ဘော ယင် အီ ဒိုက် ဒီ ကာအာင် ဂေ။

3 ဘေ ဘော ဟူမ် ယင် ဂေ ဘော လျီ့ လေး ဟုန် ဂေ၊ ဘော ကာဘက် ကာအာင် ဂေ ဘဲန် ဆိ ဘဲန် ဆိ။ ဘေ ဘော ကာဇိတ့် ကာအာင် ဂေ ဘော ယင် ဂေ၊ တဲး န့ ကော ပီ ယင် အီ ကွယ် ခဲင် ကာလုဝ့် ပီ ဒီ ဒင် အီ ဒီ ဟာပ်။”

4 ဝါယ် အန် တီ ဘေ ပီ ဘော ဆာခိုဝ် ဒီ ဇဝ်ဖြာ၊ အန် ဇဝ် ယီ တူ ထူမ် ဂြုဝ်း ဘေ။ ခုဝ်၊ ဘေ ဟဲ့ ဘူင် မှာပ်၊ ဘူင် အီ တူ မွှိုမ် အီ ဟဲ့ ကိူန် ကာဆဝ်။ ကူပ် န့ ပါယ် တီ အန် ဇဝ် တူ ယွတ် တူ ထူမ် ဘေ။

5 ဇဝ်ဖြာ မိူဝ် တဝ်း၊ “ဆေ န့ မိုဝ်း ဂေ ဒါ အီ ဘျာန် ဂြုဝ်း ဇဝ်ဖြာ အီ ကာလုဝ် ဒီ ဒူအီ ပီ အိုပ် အုဝ်၊ ဆေ ဒူအီ ပီ အိုပ် အုဝ် တီ ဒွါ ပီ ဒီ ဟူမ်၊ ဂေ ဒီ တဝ်း န့ ဒီ ယေန် ဒါခိုယ်။ ဆေ ဂေ ယီ တူ ပွိုန် ပီ ဒီ ဟူမ် အီ ဆီငဲး၊ ဂေ ဒီ ရဲန် ဒီ ကာဂုဝ်း။”

6 ကူပ် န့ ပါယ် တီ န့ ဒီ ဘဲန် ဒီ ဘေ ပီ ခဲင် မှိုဝ်၊ ကွဲ့ တဲး ဘေ ယိုဝ် မာဆေ ပီ ဘျ အုဝ်။ န့ ဒီ ဘော အပ် ဝွင့် ကာဆဝ် ဒီ ဘေ၊ ကွဲ့ တဲး ဘေ ဆီ ယိုဝ် ပီ ဒီ ဘျ အုဝ် ဒီ ဘေ။ ဘ့လာင် ဆီငဲ ဒီ ဘော ဟြာယ် ဒီ ဂေ ဒါ အီ ဘျာန် ဂြုဝ်း ဇဝ်ဖြာ။ ကာတဲ ဆီငဲ ဒီ အပ် ဝွင့် ဘော ဝီ ဆီဘ့လိုက် တူတ့် ဒွန် မျုဝ်။

7 ဒေါ အန် တီ ဂေ အီ နပ် ဒီ ယိုဝ် ဘဲန် မျုဝ် ဘဲန် မျုဝ် ဂေ ဒီ စှိုမ် ဆာရေ။ ဂေ ဒါ ဆာရာ အီ နပ် ဒီ မဲန် ဘေဒါင် ဒီ ဘော ဆာယ် အီ။ ခုဝ်၊ ဇဝ်ဖြာ အာဝ် ဟူ ယဝ်း ဂြုဝ်း ဂေ။ ဂေ ဘောကာဂ့လျီတ် ဒီ ဘော တဝ်း၊ ပဲ့ ဟဲ့ ကာလာင် ဂေ အာဝ် မုး ဂြုဝ်း ဇဝ်ဖြာ။

8 မာလဲ အီ မုး အုဝ် အုဝ် ယီ မိုဝ်း ပွုန်။ အုဝ် မိုဝ်း ဘော နဝ်း ဖွိုမ် ဇဝ်ဖြာ ဘော နပ် အီ မုး အီ မှာန်။ အုဝ် ယ ကာလာင် မှာပ် ပဲ့ ဟဲ့ ဘူင် ဂေ ဒူအီ အီဆာရေလ ဘော ပဲ့ ဟဲ့ ကာဘး ဂေ ဒီ ဇဝ်ဖြာ။

9 ဘေ အီ အိုပ် ဒူအီ အီဆာရေလ၊ တဲး ဘေ ထူမ် ဂြုဝ်း အုဝ် နီ။ ဘေ ဘော ကာအိး နာ ဆိူဝ် နာ မှာန် ဘော ပျာတ့် ဝဲန် တူတ့် ဒွန် မျုဝ် အီ ဒူပ် နာ ဆိူဝ် နာ မှာန်။ 10 ဘေ ဒူအီ အီ ဒဲ မိူင် ယေရူဆာလဲမ်၊ ဘေ ငဝ်း ယမ် ဒူအီ တဲး န့ ဘဲန် ဒင် မိူင်။ ဘေ ဘော ဘူင် လုတ့် ဘူင် ကာလိုပ် ဆေဆေ။

11 ဘေ ဒူအီ အီ အိုပ် မိူင်၊ ဘေ ပြာ ဒီ ဒိုဝ်း ရွိုန် ပီ ဒွါ အီ။ ဘေ ဒါ အီ လှူ ဒီ ဇဝ်ဖြာ ဘေ မာနုဝ် ကူပ် ဒွါ ဂေ ဒူအီ ရွိုန် ဒီ ဘေ။ ဘော ဘေ ဒါ အီ ဘျာန် ဂြုဝ်း ဇဝ်ဖြာ၊ ဘေ တူ ဆီ ကာလာင် ဂြုဝ်း ဇဝ်ဖြာ ဆေ ဒူအီ တူ ဒွါ ရွိုန် ဒီ ဘေ။ ဘေ ဘောကာဂ့လျီတ် ယီ ထာင် ဘေ ဘိုင် ဇဝ်ဖြာ။ ဘေ တဝ်း၊ “ဇဝ်ဖြာ ကွယ် ရိုမ် ဒူပ် ယေ အာခါခ်ု မှာန်။ ဒုက် တာင် တူ တး ဇမ် ဒေါ မှဝ်။”

12 ကူပ် ဘူင် ဘေ ပါယ် တီ အီ ဒီ ထဲ နွန် ဇီအူန် ပီ ဒူင် နာ။ မိူင် ယေရူဆာလဲမ် ဒီ ဘဲန် မ့ပိုမ် မာဝ် ရူပ် ကာင် ဂေ။ ခုဝ်၊ ကာင် ဂေ ဟဲ့ ကာပျာတ့် လိုဝ် တူတ့်။ နွန် ဒူင် ကွယ် ဟုဝ် ဇဝ်ဖြာ မိူဝ် ဒီ ဘော ပီ ပြဲ အီ မိုဝ်း ယွုန် ဘော ဟေ တာင်။