1 အာခြာဝ် အာတ့် တူတ့် ဇာတ် နီ၊ နွန် ဒူင် ကွယ် ဟုဝ် ဇဝ်ဖြာ တွိုန်၊ န့ ဒီ ဘဲန် နွန် အီ အာရေ တာင် လွှိုမ် ဒွန် ပ့လုဝ့် ဒွန် နာ။ ဂေ ဒူအီ အီ ကွယ် ဒဲင် ကာဒါယ် နီ ဒွန် နာ ဒွန် ပ့လုဝ့်၊ ဂေ ဒီ တး ကြိုပ် ဇဝ်ဖြာ ဒီ နွန် တီ။

2 အာမျုဝ် ဒူအီ ကိူန် ဒီ ဘော တး တဝ်း၊ “တဲး အေ ဟုဝ့် ဒီ နွန် ဒူင် ကွယ် ဟုဝ် ဇဝ်ဖြာ အီ မုး ဇဝ်ဖြာ ပီ ကြိုပ် ဒူအီ အီဆာရေလ။ ဒဲင် နွန် တီ အန် ဇဝ် ဒီ မာနုဝ် အေ၊ တဲး အေ နပ် ဒီ ဒူပ် ဂြုဝ်း အန်။” အာခြာဝ် ဒေါ အန် တီ ဒါရာ ဘော ဂြုဝ်း ပီ ကာလာင် အန် ဇဝ် ဒီ ဝီ လေး ဒီ မိူင် ယေရူဆာလဲမ်။

3 အန် ဇဝ် ဒီ ဆုင်ဖျာတ် အာမူ ဂေ အာမျုဝ် ဒူအီ ကိူန်။ ဂေ ဒီ ဘော ဒိုဝ်း မာပွါ့ လာင် ဂေ၊ ဝီ စိုမ် ဘဲန် ဘ့လာ န့ထဲ ဂေ န့ဝှိုဝ်။ ဂေ ဝီ ဒိုဝ်း ဘ့လာ လျီး ဂေ၊ ဝီ စိုမ် ဘဲန် န့ဝါတ့်။ အာဝ် ဟူ မိုဝ်း မိူင် အီ လာယ် ကာဂုဝ်း။ အာဝ် ဟူ မိုဝ်း ဒူအီ အီ မာနုဝ် ပီ ပါယ် ဒီ လာယ် ကာဂုဝ်း။

4 ဂေ ဘောကာဂ့လျီတ် ကွယ် ဒါခိုယ် ခြိုမ် ဟေ မာငုန် ဂေ ဘော ခြိုမ် ဟေ ဒီပူ ရာင် အာဆေ ရာင် အန်။ န့ မိူဝ် တူ မိုဝ်း ခေါ အူ ဝီ အီ ဒီ ဘူင် တဲး ဂေ ယုဝ်။ ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ဒွါ ကာဒိက် ဆတ်ဇာ ပါယ် တီ။

5 အာမျုဝ် ဂေ ဒူအီ ဘောကာဂ့လျီတ် အီ ကွယ် ခူပ် မိူင် အေ၊ ဂေ ဒီ ဘော ဂါဝ် ပွုန် ဇဝ် ပီ ကြိုပ် ဂေ။ အီ မုး အေ၊ အေ ဂါဝ် ပွုန် ဇဝ်ဖြာ အီ မုး ဇဝ်ဖြာ ပီ ကြိုပ် အေ ဆေဆေ။

6 ဇဝ်ဖြာ တဝ်း၊ “အာခြာဝ် ပန် အန် တီ အုဝ် ဒီ ဝီ ဒဲ့ တး ဂေ အီ ပ့လဝ် ဂဲ့ ပဲ့ ဟဲ့ ဟုဝ် ဝဲန် အီ ဘော ဂေ အီ ဟဲ့ ဇမ် ဒုက် တာင်။ အုဝ် ဒီ ဝီ တဲး ဂေ ဝီ တး ကွယ် ကာဇု ကာဒိုမ်။

7 ဒေါ တီ နီ ဂေ ညှမ် မိုဝ်း ပ့လူမ် မိုဝ်း ဟဲန့် ဘော ကွယ် ကာတူင့် ဒီ မိူင် ဘြိမ် ဂေ။ အုဝ် ယီ ဒီ တဲး ဂေ အီ ဆီ ဂိတ် ဆီ ကွယ် ဝီ ဘဲန် ဒူအီ အာမျုဝ် ကိူန် အီ မိုဝ်း ပွုန် မိုဝ်း ဟဲန့်။ ဟဲ့ ဟွတ့် ပန် တီ အုဝ် ဒီ ဘဲန် ခုန်ဒီခမ် အီ အိုပ် ဂေ ဆေဆေ ခဲင် မိူင် ယေရူဆာလဲမ်။

8 အိုယ် ဘေ ဒူအီ ခဲင် မိူင် ယေရူဆာလဲမ်၊ ဇဝ်ဖြာ အီ ပီ ဒါ အီ ဟျီင် မာဘူ ကွယ် ဒူင် စာ ဘော ဘ်ု ဒူအီ ပီ အိုပ် အန်။ အန် ဇဝ် ဒီ ဝီ တဲး ဘေ ဝီ အာရေ တာင် ပီ ဘြိမ်။”

9 ဒေါ တီ နီ၊ မှဝ် န့ ပါယ် ပီ ဒတ် ရျီင် တာင် ဘေ ပါယ် တီ။း ဒူင် ကွယ် ဘေ တီ၊ မှဝ် န့ ပါယ် အာဝ် ဟူ မိုဝ်း ခုန်ဒီခမ် ခေါ အူ ကာဒင်။း ဂေ အာမူ အာမာတ် ခုန်ဒီခမ် အီ ဒွါ အာကျာမ် အာငျာန် ဂေ ဟဲ့ ဟွတ့် ဟြာယ် တူတ့်။ ဘေ ဟဲ့ ဆဝ် ပီ အီဘိုန့် အီ ဟဲ့ ဆဝ် ဒီ မိုဝ်း ဂွန်။

10 ဘေ ဒူအီ အီ ကွယ် ခဲင် မိူင် ယေရူဆာလဲမ်၊ ဘေ ဒီ ခမ် ဒုက် တာင် ပီ အီဘိုန့် အီ ဂွိုတ် ဂွန်။ ဘေ ဒီ ကာဒုး ဒီ လေး ခဲင် မိူင် တီ၊ ဝီ ဟာဝ် ကွယ် ခဲင် မာန် ဘော ခဲင် ဒူင် နာ။ ဟဲ့ ဟွတ့်၊ ဘေ လုဝ် ဟာဝ် ခဲင် မိူင် ဘာဘဲ။ ဇဝ်ဖြာ ယီ ဒီ ဝီ ထုတ် လေး ဘေ ဒီ ရန်ဆူ ဘေ ခဲင် မိူင် တီ။

11 ဟဲ့ မှာန် အာခါခ်ု၊ ဂေ ဒူအီ ဒွန် မျုဝ် ဒွန် ခြိုဝ် အီ ကိူန် ကာဆဝ် ဂေ ဟဲ့ တး ကာဇု ဘော ဘ်ု ဒီ ကာခဲန့် ဒီ ဘေ။ ဂေ မိူဝ် ဟဲ့ ကာညး ဘေ တဝ်း၊ “တဲး မိူင် ယေရူဆာလဲမ် စှိုမ် တူတ့်။”

12 မာလဲ၊ ဂေ ယီ တူ နပ် နဝ်း ဇဝ်ဖြာ။ န့ တူ ကာလှုး ဒီ နဝ်း ဂေ ပီ ခြာမ် အန် ဇဝ် ဒီ ဘူင်။ ဂေ တူ နပ် အန် ဇဝ် ဒိုဝ်း တး ဂေ၊ တဲး ဂေ ကာဇု ကာဒိုမ် ဘော ဘူင် တဲး န့ ပီ အီ ဘူင် မ့ပိုမ် ဟျြီင် ဒီ အူင့် ကာင်နဝ်း။

13 “အိုယ် ဘေ ဒူအီ ခဲင် မိူင် ယေရူဆာလဲမ်၊ တဲး ဘေ ယိတ့် ပျာတ့် ဒူအီ ဘဲန် မျုဝ် ဘဲန် မျုဝ်၊ တဲး ဂေ စှိုမ် တူတ့်။ ခုဝ်၊ အုဝ် ဒီ ဘူင် ဒီ ဘေ တဲး န့ ပီ နိုင် ဘတ့် မက် အာလူင့်၊ တဲး န့ ဝီ ဘဲန် နိုင် ဟိန်။ ဂိပ် ဒီ ပ့လဝ် ဂေ၊ တဲး န့ ဝီ ဘဲန် ပီ ဂိပ် ဘွင့် ဒေန့်။ ဘေ ဒီ ဘော ပွိုန် ဒီ ညဲတ့်၊ တဲး ဒူအီ ကိူန် ကော စှိုမ် တူတ့်။ ဟဲ့ ဟွတ့် ဘေ ဒီ ဘော ဒိုဝ်း ပီ ပွိုန် ဘေ ဒီ ဂေ တီ ဘော ခြိုင် တာ ဘော ကြုဝ်ကြာမ် ဂေ တီ၊ ဝီ လှူ ဒီ အုဝ် အီ မုး ဇဝ်ဖြာ အီ အိုပ် တူတ့် ဒဲင် ကာဒါယ် ဒွန် ပ့လုဝ့်။”