1 အီ ဒီ တး ကာဂုဝ်း ဒီ ဘေ ဒူအီ ခဲင် မိူင် နီနီဝေ ဘော ဘူင် တဲး ဘေ လိုဝ် စှိုမ်၊ အန် ဟဲ့ ဟွတ့် တး။ တဲး ဘေ ဆာဒိက် ဒူင် ချြီင် ဂေ ဒါ ဆိုက် ဘေ၊ တဲး ဘေ ဘ်ု ဒူပ် န့တေန့်၊ ရိတ် ဘော ဆဲ့ ဒီ ညွယ် ဘေ ဘော ဒူမ် အုန် ခဲ့ ဆီ ဒီ မိုဝ်း ဘေ ပ့လူမ် ဂေ ဟဲန့်။

2 ခုဝ်၊ ဇဝ်ဖြာ ဟဲ့ ခြာမ် ဒီ ဝီ မ့ပြာယ် အာဖုင် ဒင်ခုဝ် ဂေ ဒူအီ အီဆာရေလ။ ဂေ ရန်ဆူ ပီ ဘော ဟဲ့ ဟွတ့် ဒိုဝ်း ဟာဝ် တူတ့် မိူဝ်၊ ဇဝ်ဖြာ ယီ ဝီ တဲး ဂေ မိုဝ်း အာဖုင် ဒင်ခုဝ် ပီ ဘြိမ်။

3 ဘ့လာင် ဆီငဲ တဲး ခြိုင် ကာဂုဝ်း ဂေ ဒါ ဆိုက် အီ မုး ရန်ဆူ ဘေ မာဘြိဝ် ရေန့် ဘော ခြိုင် ပီ တာ ပီ စှိုပ် ဂေ ဒါ ဆိုက် တီ မိူဝ် ဟဲ့ မုး တူတ့် အီ ရေန့်။ တဲး ဘေ ယွတ် ဘော လက်လဝ် ပီ ပဝ့် ဂေ ဒါ ဆိုက်၊ ဂေ ဒီ ဘော ကာလ မာဘြိဝ်။ မင်ပြွင့် ဂေ မိူဝ် ဒီ ဘော ဒဲန် ဝိဝ် ဒဲန် ဝေန့်။

4 လက်လဝ် ပီ ပဝ့် ဂေ ဒါ ဆိုက် ဒီ ဘော ကာဟဲ၊ ဆီနန် ဆီနိူင် ဟာဝ် ဒူပ် န့တေန့်။ မင်ပြွင့် ဘော ကာဘ့လဲပ် ဟုဝ့် ကာဘ့လဲပ် လူင် ဒူင် ဟဲ့ ကာဝဝ်း ခဲင် မိူင်။ ဂေ ဘော မိုဝ်း အာရူင် ဘ့လာင် ပီ ငဝ် ဘော မာဘြိဝ် ပီ ပ့လ မ့ပ့လေတ့်။

5 ခုန်ဒီခမ် ဘော ဒဲ့ တး ဂေ ဒါ တာင် အီ ယဲတ့် ဒါ ဆိုက် အန်။ ဂေ ဒီ ဘော ဒီပ့လာတ် ကေး ကူပ် ပီခြန် ကာဆဝ် ဂေ ဒီ ဟာဝ် ဒီ ရဲင် မိူင်၊ တဲး ဂေ ပွိုန် ဒီ ဘူင် အီ ဒီ ရဲ ဒီ ဂွင့် ဂေ။

6 ဂေ ယီ တူ ပဲ ဒီ ဘူင်။ မာလုဝ်း ဒီ မာ အိုမ် ဟဲ့ ဟွတ့် န့ ဝိုဝ်း တူတ့်။ ဟုဝ် ခုန်ဒီခမ် မိူဝ် ဟဲ့ ဒီယေန့်။

7 ဂေ ရန်ဆူ ဟဲ့ ဟွတ့် ဆုင်ဖျာတ် ဒီ မှေတ့် ဟာဝ် ဂေ ဒူအီ ခဲင် မိူင် နီနီဝေ ဘောကာဂ့လျီတ်။ ဇိူင် နာင် ဂေ မိူဝ်၊ ဂေ ဒီ ဘော ယာမ် ဒဲ့ ဘော ငှုန် ကော ပီ ဟမ် မာဘ့လူယ်။ ဂေ ဒီ ဘော ဝီ မး ဘင်နဝ်း ဂေ ကူပ် က့လိုဝ် ကာဆဝ် ဂေ။

8 ဂေ ဒူအီ ကိူန် ဒီ ဘော ပီခြန် ဂေ ဒီ ကာဘ့လဲပ် လေး ခဲင် မိူင် နီနီဝေ၊ ပီ အိုမ် ရူင်ဝှါယ် အီ ဟဲ့ ဆီဂ့လုး။ ဂေ ပီ ဘော ဒဲ့ တဝ်း၊ “ဂိူတ်၊ ဂိူတ်။” န့ ယီ တူ မိုဝ်း ခေါ အူ ဝီ အီ ထူမ် ဘော ဝီ ယွတ် ဝိဝ် နာ ပန်။

9 တဲး ဘေ ရန်ဆူ ဒိုဝ်း ရွိုန် ဂေ ဘော ခြိဝ် ဂေ၊ တဲး ဘေ ဖာတ် ဒိုဝ်း တူတ့်။ ကြုဝ်ကြာမ် ဘော ခြိုင် တာ အီ မိုဝ်း ဒီငဝ်း ဒီခန် ဟဲ့ ကိူန် ကာဆဝ် ကော ဟူ နပ် ဒီ တူတ့် ဒေါ မှဝ်။

10 အာဝ် လှေန့် မိူင် တီ ဒီ လိုဝ် စှိုမ် တူတ့်၊ အာဝ် ဟူ မိုဝ်း မာဆေ။ ဟဲ့ ဝီ ဘဲန် ဒူင် ယေန် ဒူင် ငွင့် ဒူအီ။ နဝ်း ဂေ မိူဝ် ဟဲ့ လိုဝ်၊ ဂိန့်ကြူင့် ဂေ မိူဝ် ဒီယုး ဒီယေန့်။ ဟဲန့် ဂေ ပ့လူမ် ဂေ မိူဝ် ဟဲ့ ဟွတ့် တူတ့်။ နာ ဂေ မိူဝ် ဟဲ့ ဟေန့် ကာဟဝ်း တွင့်။

11 မိူင် နီနီဝေ အီ ပီ ကာဒဝ် မာဝ် ဒူင် ကွယ် မာခြင်ဆီ၊ န့ ကွယ် ဒီ မှဝ်။း န့ ဟဲ့ ဒွိုမ် ပီ မာခြင်ဆီ နှိုမ် အီ ဟဲ့ မိုဝ်း ဟဲန့် လွှိုမ် ဒူအီ ဒွန် မျုဝ်။ ခဲင် မိူင် တီ ဂေ ဒူအီ ကတ် ဒူအီ ဂဲ ဘော ဒူအီ နှိုမ် ဟဲ့ ဒွိုမ် ကွယ် ဒါခိုယ်၊ တူ လုဝ် ယုဝ် အာဖေ အာရေ မာဆေ။

12 အိုယ် မဲ မိူင် နီနီဝေ၊ မဲ ဟဲ့ ဒွိုမ် ပီ မာခြင်ဆီ အီ တာင်။ မဲ ဟဲ့ ငဝ်း ရန်ဆူ မဲ၊ တဲး ဂေ ဘဲန် ပီ ဒီ ဟူမ် အာဒါ ဂွန် မဲ ဘော ဂေ အီဘိုန့် မဲ။ မဲ ဟဲ့ ဒွိုမ် မိုဝ်း ကြုဝ်ကြာမ် ကိူန် ပဲ့ ဟဲ့ ဖာတ် တး မဲ ဘော ဒူအီ ပဲ့ ဟဲ့ မှေတ့် ဟာဝ် မဲ။

13 ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ “အုဝ် ဟဲ့ ဘဲန် ရန်ဆူ မဲ။ အာဝ် လှေန့် အုဝ် ဒီ ကာဂုဝ်း ဒီ မဲ၊ တဲး လက်လဝ် မဲ ကာဆိုမ်။ တဲး ကာညူမ် မဲ အီ ကျ ယမ် ဒေါ ကာဂုဝ်း ဂေ။ ဂေ ဒူအီ အီ ကွယ် ခဲင် မိူင် နီနီဝေ တူ ဝီ ဖာတ် ဒိုဝ်း ကြုဝ်ကြာမ် အီ ဟဝ်။ န့ မိူဝ် တူ မိုဝ်း ခေါ အူ ဝီ အီ ပွိုန် ယိုဝ် ဂြုဝ်း ပီ ကာလာင် ဂေ ဒါလာမ် ခဲင် မိူင် ဘေ။”