ဂေ ဒူအီ ခဲင် မိူင် နီနီဝေ မုး မီ ဒူအီ ဆီမာ ကာလုဝ် ဘော ငဝ်း ယမ် အီ ဟဝ်။ ဂေ ဒီ ဇမ် ဒုက် တာင်။ ခဲင် မိူင် တီ မိုဝ်း ကြုဝ်ကြာမ် ကိူန် ကာဆဝ် ပီ ဖာတ် တး ဂေ ဒီ ရန်ဆူ ဂေ။

2 တဲး ဘေ ထူမ် ပီ မး ဂေ အီ ပဝ့် လက်လဝ် တာ မ့ဖျီ့၊ ထူမ် ဘော ဟမ် ကာလေန့် ကာလွှယ်၊ ဟမ် မင်ပြွင့် ကာဘ့လဲပ် ဘော ဟမ် လက်လဝ် အီ ဟာဝ် ဟဲ ဟဲ ဒူပ် န့တေန့် ခဲင် မိူင်။

3 တဲး ဘေ ယွတ် ဒါ ဆိုက် အီ ပဝ့် မင်ပြွင့် အီ ဟဲ့ ဒိုဝ်း လေး မာပွါ့ လာင် ဂေ အီ ကာလ မာဘြိဝ်။ ဂေ မိူဝ် ဟဲ့ ငဝ်း ယမ် ဒူအီ ကိူန် ကာဆဝ်။ ဒုဝ် ယမ် ဂေ တီ ဘော ကွယ် ဒူပ် န့တေန့်။ ဒူအီ အီ တဝ် ဟာဝ် ဘော တာ ဒုး ဒီ ဒုဝ် ယမ် ဂေ တီ၊ ဝီ ဒီပ့လာတ် ကေး။ ဂေ ပီ ဝီ ယိတ့်၊ ပီ ဝီ ကေး ပေါ ဇေန့်။

4 ဂေ လုဝ် ခမ် ဇိုဝ် တီ ဒွန် မျုဝ် ကူပ် ဟဲ့ ကာလိုပ် ဂေ၊ တူ ဘူင် နာ မုး နာ မှာန်။ ဂေ ဘော နပ် ဒီ ပီစှိတ် အာရိုပ် ဂေ၊ တဲး န့ ကာဆုး နဝ်း အီ ဟဝ်။ ဂေ ဒူအီ ခဲင် မိူင် နီနီဝေ ဟဲ့ မာနုဝ် ဒွန် အီ တဲး ဂေ ကြိုပ် ဇဝ် ပီ ကြိုပ် ဂေ အီ တူ မုး ဇဝ်ဖြာ။ တဲး ဒူအီ ဒွန် နာ ဒွန် ပ့လုဝ့် ဘူင် ဒူပ် ပီ ဘူင် ဂေ။

5 ဇဝ်ဖြာ အီ အိုပ် တူတ့် ဒွန် မျုဝ် တဝ်း၊ “ကူပ် ဟဲ့ ဘူင် ဘေ ပါယ် တီ အုဝ် ဟဲ့ ဘဲန် ရန်ဆူ ဘေ။ အုဝ် ဒီ ဝီ ဂ့လတ့် ခြိုင် တာ ဘေ၊ တဲး န့ လိုဝ်း ဒီ အီ ဟဝ် ဘေ ဟဲ့ ဂ့လ၊ တဲး ဒူအီ ဒွန် မာန် ဒွန် မိူင် ယိုဝ် ခဲ့ မွှိုမ် ဆာယ် ဘေ။

6 အုဝ် ဒီ ဒိုဝ်း အီ မွှိုမ် ကာအိး ပ ဒီ ဘေ၊ ဘူင် တဲး ဘေ မွှိုမ် ကာဒါတ့်၊ ပီ ဝီ ဒိုဝ်း ဘေ၊ ဘ့လေး အုန် ဘေ၊ တဲး အီ ဟဝ် ယိုဝ်။

7 ခဲ့ ကွယ် ဂေ အီ တး ယိုဝ် ဘေ တီ၊ ဂေ ဒီ ဘော ကာစွာ ဘော တဝ်း၊ “ဒူအီ ခဲင် မိူင် နီနီဝေ ဟဲ့ ဟွတ့် လိုဝ် စှိုမ် တူတ့်။ န့ ယီ တူ မိုဝ်း အာဆေ ဒီ ဘော က့လိုဝ် ဘော ငှုန် အာဒါ ဂေ။” န့ ယီ တူ မိုဝ်း အာဆေ အီ ဒီ တး လှဝ် နဝ်း ဘေ။”

8 အိုယ် ဘေ ဒူအီ ခဲင် မိူင် နီနီဝေ၊ ဘေ တူ မွှိုမ် လွှိုမ် မိူင် ဆေဘီ။ မိူင် တီ ဟဲ့ ကွယ် ဒီ ကာတဲ ဘ့လဲင် အိုမ် အီ ဟဲ့ ပီ ရဲင် မိူင်၊ အီ ဟဲ့ ဂွင့် ဟဲ့ ရဲ ဂေ။

9 ဘ့လဲင် အိုမ် နီလာ ဟဲ့ ပီ ဒူင် ဒီ ချြီင် ဂေ ဒါ ဆိုက် ဂေ အီ ဟဲ့ မန် ဆီချာ။ မိူင် ဂူဆာ ဘော မိူင် အဲဂိုပ် ဟဲ့ ဘဲန် ပ့လူမ် ဘဲန် ဟဲန့် ပီ မိူင် နီနီဝေ။ ပ့လူမ် ဂေ ဟဲန့် တီ ဟဲ့ ပီ န့ တူ နပ် ဒီ တူတ့် ဒေါ မှဝ်။ ဂေ ဒူအီ ခဲင် မိူင် ဖုတ် ဂါယ် မိူင် လီဘီ ဟဲ့ ဒွိုမ် ဘဲန် အီ စွယ် အီ ဂမ် ဂေ ဒူအီ ခဲင် မိူင် နီနီဝေ တီ။

10 ဂေ ရန်ဆူ ယီ ပဲ မိူင် ဆေဘီ ဘော ဂေ ဒူအီ ခဲင် မိူင် တီ ကာဒုး ဒီ မှေတ့် ဟာဝ် ပေါ ပ့လုဝ့်။ ဂွန် င ဂေ ကာဒုး ဒီ ငဝ်း ယမ် ဆတ့် ဝဲန် ဒီ န့တေန့် ဒွန် ညွင့်။ ဂေ ဒူအီ အီ မိုဝ်း ဆာရေ ခဲင် မိူင် တီ၊ ဂေ ကာဒုး ဒီ ခမ် တဲး ရန်ဆူ ကာတာမ် အာဆေ ဒီ လုဝ် ဘဲန် မှာယ် ဂေ။ ဂေ ဒူအီ တာင် အီ မိုဝ်း ဆာရေ ကာဒုး ဒီ ခမ် အီ ပက် ဂေ တာ ဝန် ဟိန်။

11 ဘေ ဒူအီ ခဲင် မိူင် နီနီဝေ၊ ဘေ ဒီ ဟာဝ် ဂုဝ့် ဂဲ့ ပီ ဒူအီ ယိုတ့် ပဝ်း။ ဘေ ဒီ ယုဝ် ဘော ချြီင် ဒီ အာတ့် ဒါ ဆိုက်။ ရန်ဆူ ဘေ ဒီ တး ကာဂုဝ်း ဒီ ဘေ။

12 ဒူင် ချြီင် ဂေ ဒါ ဆိုက် ဘေ၊ ဂေ ဒီ ကာပျာတ့် လိုဝ် တူတ့်။ ဂေ ဒီ ဟြာယ် ပီ ဘ့လေ ဒီပူ ဟဲ့ ဆိန် ဒီ အာတ့် ဒီ စုဝ်း ခဲင် မူတ့် ဒူအီ အီ ဒီယုး ဒင် ဟေ ဘ့လေ တီ။

13 ဒါ ဆိုက် ဘေ တူ မိုဝ်း ပ့လူမ် တူ မိုဝ်း ဟဲန့် ပီ အီဘိုန့်။ မာလုဝ်း မိူင် ဘေ ဒီ ဘော ဝိုဝ်း တာင် တာင်၊ တဲး ရန်ဆူ ဘေ လိုပ်၊ တဲး ဂေ ဒုဝ့် ကာဆိုမ် မိူင် ဘေ။

14 တဲး ဘေ တဝ့် အုန် အိုမ် ဘေ အာဒါ အာခြာဝ် ပန် ဒီ တး ဝဲင် ရူပ် ရန်ဆူ ဘေ ဒီ ဘေ။ တဲး ဒူင် ချြီင် ဂေ ဒါ ဆိုက် ဘေ မန် ဆီချာ။ တဲး ဘေ ဒိုဝ်း ညုဝ့် အာဒါ ဒီ ညဲတ့် မာဝ် မာအုတ်။ တဲး ဘေ ဘော ရဲန် အုန် ပိူင် အန်။

15 ငဝ် ဒီ ဘော ကာဆိုမ် ဘေ။ မာပွါ့ လာင် ဒီ ဘော ဒဲပ် ဝဲန် ဘေ။ ရန်ဆူ ဘေ ဒီ ဘော ပျာတ့် ဝဲန် ဘေ၊ တဲး န့ ပီ မာ အာဇူင့် ဒီ ဟူမ် ငှုဝ်။ ဘေ ပီ ဘော မိုဝ်း ဒူအီ ကိူန် ကာဆဝ်၊ တဲး န့ ကော ပီ မာ အာမူင့် မိူဝ်၊ ဘေ ဒီ စှိုမ် တူတ့်။

16 ဂေ ဒူအီ အီ ကာစိုဝ်း ကာယွင့် ကြုဝ်ကြာမ် ဘဲန် မျုဝ် ဘဲန် မျုဝ်၊ ဂေ ဟဲ့ တဲး မိူင် ခြမ် ကာဆဝ်။ မာလဲ၊ ခြမ် တီ ဒီ ဟြာယ် တူတ့်၊ ပီ ဖိုင် မာ အာဇူင့် ဟဲ့ တး ဟူမ် တူတ့် ဘော ဝီ ဘိုန့် ဟာဝ်။

17 ဘော ဒါ ကာညာ ဘေ ဟဲ့ ပီ မာ အာဇူင့် အီ ကွယ် ရိုမ် ဒဲင် လူင့် ဟေ ဒေါ ဇမ် ဆီငဲ ဂတ် ကာဆဝ်။ ဆေ ဒါတ် ဟီ ဝီ ထွင်၊ ဂေ ဘော နပ် ဒီ ဝီ ဘိုန့် ဟာဝ်၊ ဝီ ဟြာယ် တူတ့်။

18 အိုယ် မဲ ခုန်ဒီခမ် အီ အိုပ် မိူင် အာဆူရီယာ၊ ဂေ အာမူ အာမာတ် မဲ ဟဲ့ ဟွတ့် ယမ် တူတ့်။ ဂေ ဒူအီ ပီ အိုပ် မဲ မိူဝ် ဟဲ့ ကွယ် ကာယဝ်း ကာရေး ဒဲင် နွန် ဒွန် နာ ဒွန် ပ့လုဝ့်။ အာဝ် ဟူ မိုဝ်း ဒူအီ အီ ပီ ဒါ အီ ဟျီင် မာဘူ၊ အီ တဲး ဂေ တး ကွယ် ကာဇု ကာဒိုမ်။

19 န့ ပီ မဲ ဟဲ့ မိုဝ်း ဆဝ် ဘော ဒိမ် အီ တူ နပ် ဒီ ဟြာယ်။ ဒိမ် ပဲ့ ဟဲ့ ပွိုန် မဲ ဟဲ့ တာင် ဟဲ့ လိုက် ကာဆဝ်၊ တဲး မဲ ယမ်။ ခဲ့ ကွယ် ဂေ အီ ယိုဝ် လွင် မဲ တီ၊ ဂေ ဒီ ဘော ဒါခိုယ် ဘော ကာထ ဒဲ ဂေ ဘော နဲန မဲ။ ခုဝ်၊ န့ တူ မိုဝ်း အာဆေ အီ တူ ဒွိုမ် ခမ် နာ ဟာယ် နာ မိူက် ပဲ့ ဟဲ့ ဘူင် မဲ။