1 အုဝ် ဒီ ဘော ဟုဝ့် ကွယ် ဒဲင် ဟုဝ် စာ အုဝ်။ အုဝ် ဒီ ကွယ် ဘော ဒဲင် ဒူင် ဒီ ချြီင် အုဝ် ဘော ဘ်ု ဒီ ထူမ် ယုဝ် ဇဝ်ဖြာ ဒီ ကာလာင် မာဆေ ဒီ အုဝ်၊ ယုဝ် အန် ဇဝ် ဒီ ဝီ ဝျီ့ ပါယ် မှဝ် လွင် ပဲ့ ဟဲ့ ပိုန့် အုဝ်။

2 ဇဝ်ဖြာ ဝီ တဝ်း ဒီ အုဝ်၊ “တဲး မဲ ဒဲမ် အုန် ပီ ကာလာင် အုဝ် ဒီ မဲ ဒေါ တီ နီ။ တဲး မဲ ဒဲမ် ဒုဝ် တာင်၊ တဲး ဝီ အီ ကာဘ့လဲပ် ဟာဝ် ကော နပ် ဒီ တိး၊ တဲး အီ ဟဝ် ထူမ်။

3 ပီ ကာလာင် အုဝ် နီ တူ ဘုဝ် ဘဲန် ဒေါ တီ နီ။ အာခြာဝ် ဒီ ဘုဝ် ဘဲန် အာတီ ဝီ ကြဲ ဒီ တး နာ အာတ့် နီ ဟာဝ်၊ ယီ ဒီ တး အာခ်ု မှာန်။ ဆေ ဘေ ထာင် ဘေ ဟဲ့ နှဝ့် လှေန့်၊ တဲး ဘေ နှဝ့် ပေါ မ့ပွါ။ ခုဝ်၊ န့ ဒီ ဘုဝ် ဘဲန် ဆေ အာခြာဝ် အန် ဟဲ့ ဟွတ့် တး။ အာဝ် လုဝ် နှဝ့် ပေါ မ့ပွါ။

4 တဲး ဘေ ယွတ် ဒူအီ အီ ပီခိုက်။ ဂေ မိူဝ် တူ မိုဝ်း နဝ်း ဆိူဝ် နဝ်း မှာန်။ ဝီ အီ မိုဝ်း နဝ်း ဆိူဝ် နဝ်း မှာန်၊ အန် တူ လုဝ် ယမ် ဘော မိုဝ်း အာဆာက် ကူပ် ညှိုမ် အန်။

5 ဆေ ဘေ ဘိုင် ကြုဝ်ကြာမ် ဘေ၊ န့ ဘော မုး အီ ကာလုဝ် အီ တူ မှာန် ဒီလူယ်။ ဒူအီ ပီခိုက်၊ ဂေ ယီ တူ ပွိုန် ကွယ် ဒါခိုယ်။ န့ ဘော တဲး နဝ်း လောဖ ဂေ ကြဲ ဒီ တာင် ပီ မိူင် မာရာန။ ခဲင် နဝ်း ဂေ န့ ဘော ပီ အီ တူ နပ် ဒီ ဖဲ ဒေါ မှဝ်။ နဝ်း လောဖ ဂေ ဟဲ့ တဲး ဂေ မှေတ့် ဒူအီ အာမျုဝ် ကိူန်၊ တဲး ဂေ ဒူအီ ကိူန် တီ ဘဲန် ဒူအီ ပီ အိုပ် ဂေ။

6 ဒူအီ ပဲ့ ဟဲ့ မှေတ့် ဂေ တီ၊ ဂေ ဒီ ဒိုဝ်း ဂြုဝ်း မာကာထ၊ ဝီ နဲန ဒူအီ ပီခိုက် ဘော ကာလာင် တဲး န့ ကာဘး ဒီ ဂေ။ ဂေ ဒီ တဝ်း၊ “ဘေ အီ ဟဲ့ ဒိုဝ်း တး ကာဇု အုန် ကြုဝ်ကြာမ် ပီ တူ ကာဒုး ဘေ ဒီ ရန့်၊ ဘေ ဒီ ဇမ် ဒုက် တာင်။ ဘေ လုဝ် ခမ် မှာပ် ဘေ။ ခုဝ်၊ ဘေ ဟဲ့ ဒိုဝ်း အုန် ကြုဝ် ပီ တး ငါမ် တး ကမ် အီ ဟဝ် ဒီ ဘေ။”

7 ဂေ အီ ဟဲ့ ထုက် နီ ဘေ၊ ဂေ ဝီ တး အူ ဇေန့်။ ဂေ ရူ ကာဆဝ် ဒီ ဘေ ဘော ဖာတ် ဒိုဝ်း တူတ့် ကြုဝ်ကြာမ် ဘေ။ ဘေ ယီ တူ နပ် ဒီ ဘူင် မာဆေ။ ဘေ နပ် မီ ဒီ ယုဝ် ဒီယုး ဒီယေန့်။

8 ဘေ မိူဝ် ဟဲ့ ဖာတ် ဒိုဝ်း ကြုဝ်ကြာမ် အာမျုဝ် ဒူအီ ကိူန်။ ဒေါ တီ နီ ဂေ ဒီ ဝီ ဖာတ် ဝီ ဒိုဝ်း ကြုဝ် ဘေ။ ဂေ ဒီ ဘော ဘူင် ဒီ ဘေ ခုဝ်၊ ဘေ ဟဲ့ ငဝ်း ယမ် ဒူအီ ကိူန် ဘော ဟဲ့ ဘူင် မှာပ် အီ ခါနှာပ် ဒူအီ ဘောကာဂ့လျီတ် အီ ကွယ် ခဲင် မာန် မိူင်။

9 အာဆေ ဟြေတ့် တဲး အန် ခြမ် ဘော ပီလွှက့် ဒီ န့ဟူမ် အန်၊ အန် ဒီ ခမ် ဒုက် တာင်။ အန် ထာင်၊ ကူပ် ခြမ် အန် ဘော န့ဟူမ် အန် တူ ဇမ် ဒုက် မာဆေ။ ပီ ထာင် အန် တီ ယီ တူ မှာန်။

10 ကူပ် ဟဲ့ ငဝ်း ယမ် ဘေ အာဆာက် အီ ဟဝ်၊ တဲး ဘေ စှိုမ် ဘော မွှိုမ် ဆာယ် ကာဆဝ်။

11 န့ ပီ မာဝ် အီ ကွယ် ခဲင် ရဲင် ကာင် ဘေ၊ ဒတ် ရျီင် ကူပ် မှာပ် ဘေ ဘော ဟေ မာနက် အီ ကွယ် ခဲင် ကာင် ဘေ ဒီ ဒူပ် ပီ တဝ်း မာဝ် တီ။

12 ဂေ အီ ငဝ်း ယမ် ဒူအီ ဘော ဒိုဝ်း ကြုဝ်ကြာမ်၊ ဝီ ဒဲ မိူင် အာဒါ ဂေ၊ ဂေ ဒီ ဇမ် ဒုက် တာင်။ ဘော ဂေ ဒူအီ အီ ပြာ ဒီ ဒိုဝ်း ရွိုန် အီ ဘူင် တဲး မိူင် ဂေ မန် ဆီချာ၊ ဂေ ဒီ ဇမ် ဒုက် အာခ်ု မှာန်။

13 ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ဒွါ ကာဒိက် ဆတ်ဇာ ဒီ ဒူအီ ဘဲန် မျုဝ် ဘဲန် မျုဝ် လွင် ကြုဝ်ကြာမ် ဂေ ဒီ ကာဆိုမ် တူတ့်။ ဂါန် ပဲ့ ဟဲ့ ဘူင် ဂေ ဟဲ့ ကိူန် ကာဆဝ်၊ ယီ တူ မိုဝ်း ဒီခုဝ်။

14 ခုဝ်၊ ဒဲင် ကာဒါယ် နီ ဂေ ဒူအီ ကိူန် ဒီ ဘော နပ် ဘော ရုဝ်ဆေ ဇဝ်ဖြာ။ န့ ဒီ ပီ အိုမ် ဟဲ့ မ့ပုန် နမ်မုက်ဆာရာ။

15 ဘေ ဒူအီ အီ ဒွါ ပဝ်း ဒီ ဘီနွင် ဘေ၊ တဲး ဂေ ယိုတ့် ပဝ်း၊ ဘေ ဒီ ဇမ် ဒုက် တာင်။ ဘေ ဒီ ခါနှာပ် ဂေ ဒျီင် ပဝ်း၊ တဲး ဘေ ပွိုန် ဒီ ကာညး ဂေ ကူပ် ဟဲ့ ဂ့လ ဂေ ဘော မွှိုမ် ဆာယ်။

16 ဘေ ပီ ဘော ဘူင် ပါယ် တီ မိူဝ်၊ အာဝ် လှေန့် န့ မုး ဘေ အီ ဒီ ဇမ် ဒုက်။ ဘေ လုဝ် ခမ် ဇဝ်ဖြာ ဆုင်ဖျာတ် ဒါရာ ဒီ ဘေ၊ တဲး န့ ပီ ဘေ လုဝ် ဒျီင် ပဝ်း။ ဒေါ အန် တီ အာဖုင် ဒင်ခုဝ် ဘေ ဒီ ဘျွင် တဲး ဘေ မွှိုမ် ဆာယ်။

17 ဘေ ဟဲ့ ဒဲပ် ဟေ ဒီ နွန် လေဘာနုန်။ ဒေါ တီ နီ အီ ဒီ ဝီ တး ဒဲပ် ဘေ။ ဘေ မိူဝ် ဟဲ့ တဲး ဒုဝ် ဆတ်ဒါဝါ ခဲင် ပြဲ ယုဝ် ဒီယုး ဒီယေန့်။ ဒေါ တီ နီ ဘေ ဒီ ဝီ ယုဝ် ဒီယုး ဒီယေန့် ကူပ် ငဝ်း ယမ် ဘေ ဒူအီ ခဲင် မိူင် ဒွန် မိူင်။

18 ဘေ ဟဲ့ ကြိုပ် အာရိုပ် ရာင် ပဲ့ ဟဲ့ ဘူင် ဒူအီ။ ဂေ ယီ တူ နပ် ဒီ ဒွါ အာဂျိုဝ် မာဆေ ဒီ ဘေ။ ခုဝ်၊ အာဆေ ဘိုင် အာမျုဝ် ပီ ဘူင် ဒူအီ၊ အန် တူ မိုဝ်း အာငျာန်။ ဘော ဘေ တူ မိုဝ်း အာငျာန် ကူပ် ဘိုင် ဘေ ပီ ကာလုဝ် အီ လွင် အန် တီ။

19 ဒူအီ နပ် ဒီ ကာလာင် ဒီ ဟေ တဝ်း၊ “တဲး မဲ န့ဆိုဝ်း။” ဘော ကာလာင် ဒီ မာဝ် အီ တူ နပ် ဒီ ဂြုဝ်း တဝ်း “ယိတ့် စွင့်။” ဝီ အီ တဝ်း ပါယ် တီ အန် ဒီ ဇမ် ဒုက် တာင်။ အာရိုပ် ရာင် တီ တူ နပ် ဒီ မာနုဝ် အီ။ ဂေ ဒူအီ ပီ ဘော ဟဲ့ ဒိုဝ်း ရွိုန် ဂေ ခြိဝ် ဘော ဘူင် တဲး န့ စှိတ်၊ နာ ခဲင် ဂေ ယီ တူ မိုဝ်း ဖွိုမ်။

20 ယီ မုး ဇဝ်ဖြာ အာခါခ်ု၊ အန် ကွယ် ခဲင် ဟုဝ် အန် အီ ဆီငါ ဘွတ်။ အိုယ် ဘေ ဒူအီ အီ ကွယ် ဒဲင် ကာဒါယ်၊ တဲး ဘေ ကွယ် နှိမ် နှိမ်၊ ကွယ် ယေန် ယေန် ဒီ အာတ့် အန် ဇဝ်။”