1 အိုယ် ဘေ ဒူအီ အီ လုဝ် ဆာယ် အီ၊ တဲး ဘေ ဝီ ယွတ် ဒုဝ် ဘြိမ် ဘေ၊ တဲး ဘေ လှုဝ်း အီ တူ မွှိုမ် ပဲ့ ဟဲ့ ဘူင် ဘေ။

2 တဲး ဘေ လှုဝ်း လွင် အန် တီ အာတ့် ဒမ် ဇဝ်ဖြာ မှာပ် ဘေ။ တဲး ဘေ ဘျွင် နဝ်း ဘေ အာတ့် ရူ ကာဆဝ် ဇဝ်ဖြာ ဒီ ဘေ။ ပန် အန် တီ ဘေ လုဝ် ခမ် ဒုက် တာင်။ အာဝ် ဟူ ပွိုန် ဒီ ဘျွင် နဝ်း။

3 အိုယ် ဘေ အီ မိုဝ်း နဝ်း ဂူမ် နဝ်း တျီမ်၊ ဘေ အီ ဘူင် ဒူပ် ဒါရာ၊ တဲး ဘေ ဘိုင် ဇဝ်ဖြာ ဘော ဒူပ် နာ ဆိူဝ် နာ မှာန်။ ယုဝ် ဘေ ဆော ပွိုန် ဒီ ချြီင် ဘေ ဒေါ ဟဲ့ ရူ ကာဆဝ် ဇဝ်ဖြာ တီ။

4 န့ ဒီ ဘော မိုဝ်း မိူင် ဂါဆာ၊ မိူင် အာဆာခေလူန်၊ မိူင် အာစုတ် ဘော မိူင် အေခြူန် အီ မုး ဒူင် ကွယ် ဂေ ဒူအီ ဖီလီထီ။ ဂေ ဒီ ဘော စှိုမ် ဘော ကာပျာတ့် လိုဝ် တူတ့်။

5 ဂေ ဒူအီ ဖီလီထီ အီ ကွယ် ခူပ် အိုမ် နမ်မုက်ဆာရာ ဘော ခဲင် မိူင် ကာနန့်၊ အုဝ် ဒီ ဝဲန် တူတ့် ဂေ၊ ကွဲ့ တဲး န့ ဆီ မိုဝ်း အီ ကွယ် ခဲင် မိူင် တီ။

6 ခူပ် ဘာင် အိုမ် နမ်မုက်ဆာရာ တွိုန် န့ ဒီ ဘော ဘဲန် အူင့် ပေတ့် ဘော ဒူင် ကွယ် ဂေ ဒါ အီ ဟျီင် မာဘူ ဘော မိုဝ်း ကာပိုမ် မာဘူ ဂေ။

7 န့ ဒီ ဘော ဘဲန် ဘော ဒူင် ကွယ် ဂေ ဒူအီ အာယူဒါ အီ ဆီ ဂိတ် ဆီ ကွယ်။ ဂေ ဒီ ဘော တဲး မာဘူ ဂေ ဟူမ် ပေတ့် ဒူင် တီ။ ခဲင် မှိုဝ် ဂေ ဒီ ဘော ဝီ ဝေန့် တမ် ခဲင် ကာင် အီ ရာမ် ခဲင် မိူင် အာဆာခေလူန်။ ဇဝ်ဖြာ အီ မုး ဇဝ်ဖြာ ပီ ကြိုပ် ဂေ၊ အန် ဒီ ဘော တး ယွတ် မဲန် လိုမ်လာ ဂေ၊ တဲး ဂေ ဝီ မိုဝ်း ခဲ့ ပီ လုဝ် ဂေ ပီ ဘြိမ်။

8 အုဝ် ဟဲ့ ယိုဝ် ဂြုဝ်း တူ မွှိုမ် ပီ ကာလာင် ဂေ ဒူအီ မုဝ်အာပ် ဘော ဂြုဝ်း ပီ နဲန ဂေ ဒူအီ အမ်မူန် ဒီ ဂေ ဒူအီ ပီ အိုပ် အုဝ်။ ဂေ မိူဝ် ဟဲ့ ပီဖုင် ဂေ ဘော တဝ်း ဒီ တး ဖာတ် ကာဒါယ် ဒူင် ကွယ် ဂေ ဒူအီ အာမျုဝ် အုဝ်။

9 ဇဝ်ဖြာ ပီ ကြိုပ် ဂေ ဒူအီ အီဆာရေလ အီ မုး ဇဝ်ဖြာ အီ အိုပ် တူတ့် ဒွန် မျုဝ်၊ အန် ဟဲ့ ဒိူင် တဝ်း၊ “မိူင် မုဝ်အာပ် န့ ဒီ ဘော ပီ မိူင် ဆုဝ်ဒူမ်။ မိူင် အမ်မူန် ဒီ ဘော ပီ မိူင် ဂုဝ်မုဝ်။ ကာဒါယ် မိူင် ဂေ တီ ဒီ ဝီ လတ့် ဟေ မာအာတ့် ဘော မိုဝ်း ကာဒဝ် ဆယ့် အီ လိုဝ် ကာပျာတ့် ဆေဆေ။ ဂေ ဒူအီ အာမျုဝ် အုဝ် အီ ဆီ ဂိတ် ဆီ ကွယ် ဂေ ဒီ ဘော ဝီ ဖာတ် ဒိုဝ်း ကြုဝ်ကြာမ် ဒူအီ ဂေ တီ ဘော ကာဒါယ် ဂေ တီ။”

10 ဂေ လုဝ် ခမ် မှာပ် ဂေ ကူပ် ဟဲ့ ပီခိုက် ကာဆဝ် ဂေ ဒီ ဂေ။ ခုဝ်၊ ဂေ ဟဲ့ နဲန ဘော ပီဖုင် ဂေ ဒဲင် ဂေ ဒူအီ ပီ အိုပ် ဇဝ်ဖြာ အီ မုး ဇဝ်ဖြာ အီ အိုပ် တူတ့် ဒွန် မျုဝ်။

11 ဇဝ်ဖြာ ဒီ ဘော ဘဲန် အီ မွှိုမ် ယုဝ် ကာဆဝ် အာဒါ ဂေ။ အန် ဇဝ် ဒီ ဘူင် တဲး ဇဝ် ပီ ကြိုပ် အီ ဟဝ် ဒွန် ကာဒင် ကာပျာတ့် လိုဝ်။ ဝါယ် အန် တီ ခဲ့ ကွယ် ဒူအီ ဒွန် ဇိုဝ် ဒွန် မျုဝ် ဒဲင် ကာဒါယ်၊ ဂေ ဒီ ဘော ကွယ် ဒူင် ကွယ် ဂေ ရာင် အာဆေ ရာင် အန် ဘော ကြိုပ် မီ ဇဝ်ဖြာ။

12 ဇဝ်ဖြာ ပီ ဝီ တဝ်း၊ “အိုယ် ဘေ ဒူအီ အီ ကွယ် ခဲင် မိူင် ဂူဆာ၊ ဘေ မိူဝ် ဒီ ကာဒုး ဒီ ယမ် ဒီ မာပွါ့ လာင် အုဝ်။”

13 န့ ပီ အန် ဇဝ် ဒီ ဘော ဆူင့် ဒဲ အန် ဟုဝ့် နာ ကွာ ဘော ပျာတ့် ဝဲန် မိူင် အာဆူရီယာ။ အန် ဇဝ် ဒီ ဘူင် တဲး မိူင် နီနီဝေ၊ ဘဲန် ဒူင် ယေန် ဒူင် ငွင့် ဒူအီ ဘော ကာဟဝ်း တူတ့် ပီ ပြဲ ကာဟဝ်း။

14 ဖိုင် မာဘူ၊ ဖိုင် မာမက် ဘော ဂေ မာဒုဝ် ပြဲ အီ ဟာယ်၊ ဂေ ဒီ ဘော အိတ် ကာတဲ မိူင် တီ။ မာဒီဘုဝ့် ဘဲန် မျုဝ် ဘဲန် မျုဝ် ဒီ ဘော ကွယ် ခဲင် ကာင် ရာမ် ဘော ခဲင် ဟုဝ် စှိတ် ကာဆဝ်။ ဂေ ဒီ ဘော ဟမ် ကွယ် ဒီ ဘာင် ကာဒဝ် ပါတဲင် အီ တူ ပွိုန် ကာဘိတ်။ ဘော ကာအး ဒီ ကွယ် ဒွန် ပ့လုဝ့်၊ တူ တဲး မာလုဝ်း ကာဘိတ်။ ဘဲန် ဟေ အာရိတ် အီ ဒိုက် ဒီ ရဲင် ခဲင် ကာင် စှိတ် တွိုန်၊ ဟဲ့ ဟွတ့် စုဝ်း အာဝ် ဟူ စှိတ်။

15 မိူင် တီ ဟဲ့ ဒွိုမ် မုး မိူင် အီ ဘျုဝ် ဒါခိုယ် ဘော အာဝ် မိုဝ်း ဒီ ဒုက် ဒီ ညှာပ် မာဆေ။ ဂေ ဒူအီ ခဲင် မိူင် တီ ဘော ကာဖာ ခဲင် နဝ်း ဂေ တဝ်း၊ “ဒဲင် ကာဒါယ် ဒွန် နာ ဒွန် ပ့လုဝ့် အာဝ် မိုဝ်း မိူင် အီ ပီ မိူင် ယေ။” ဒေါ တီ နီ၊ မိူင် တီ ဟဲ့ ဝီ ဘဲန် ပီ ဘ့လေး ဝဲန် အီ၊ ဘဲန် ဒူင် အိတ် ဂေ မာဒုဝ် ပြဲ ဟာယ်။ ဂေ ဒူအီ အီ တး ဝဝ့် ဟာဝ် ခူပ် မိူင် တီ၊ ဂေ ဒီ ဘော နဲန ဘော ကာအိး ဒူင် တီ။ ခုဝ်၊ န့ ဟဲ့ ကာပျာတ့် လိုဝ် တူတ့်။