1 ဆီနမ် တီ ဒေါ ဇမ် မာဂျီန် န့ဒဝ်၊ ဆီငဲ အာ ဂိုဝ် ဒီ လေး၊ ဇဝ်ဖြာ ဘော ကာလာင် ဂြုဝ်း ဒီ ဒါ အီ ဘျာန် ဂြုဝ်း ဇဝ်ဖြာ အီ စိူဝ် အာဟာကာယ် တဝ်း၊ 2 “တဲး မဲ ကာလာင် ဒီ အာဇေရူဘာဘေန် အီ မုး ဂွန် အာဆာလထီအေန် အီ မုး ဒါ တာင် အီ အိုပ် မိူင် ယူဒါ ဘော ဒီ အာယောဆူ အီ မုး ဂွန် အာယေဟုဝ်ဇာဒက်၊ ဝီ အီ မုး ဒါ တာင် အီ လှူ ဒီ ဇဝ်ဖြာ ဘော ဒီ ဂေ ဒူအီ အီ ဆီ ဂိတ် ဆီ ကွယ်။ 3 ‘ကာတဲ ဘေ အီ ဆီ ဂိတ် ဆီ ကွယ် နီ၊ န့ မုး အာဆေ အီ ဟဲ့ ဒွိုမ် ယိုဝ် ခဲ့ တာင် ဟုဝ် ဇဝ်ဖြာ အာတ့် နီ။း ဆေ ဘေ ယွတ် ဟုဝ် ဇဝ်ဖြာ အီ ကာမာယ် ဒေါ တီ နီ၊ န့ နှဲန် တူ စှိတ် တူ တာင် ပီ ဟုဝ် ဘြိမ် တီ။ 4 ပီ ဘော ဟဲ့ ပါယ် တီ မိူဝ်၊ မဲ အာဇေရူဘာဘေန်၊ ကွဲ့ တဲး နဝ်း မဲ တျီ့၊ တဲး မဲ မိုဝ်း နဝ်း ယ။ ဇဝ်ဖြာ ဟဲ့ ကာလာင် အုန် ပါယ် တီ။ ဘော မဲ အာယောဆူ အီ မုး ဂွန် အာယေဟုဝ်ဇာဒက် အီ မုး ဒါ အီ လှူ ဒီ ဇဝ်ဖြာ၊ တဲး ဘော မဲ မိုဝ်း နဝ်း ယ။ ဘော ဘေ ဒူအီ အီ ဆီ ဂိတ် ဆီ ကွယ်၊ တဲး ဘေ မိုဝ်း နဝ်း ယ ဒီ ဘူင် ဂါန် ဘေ။ ခုဝ်၊ အုဝ် ဟဲ့ ကွယ် ရိုမ် ဒူပ် ဘေ။ ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။ 5 နဝ်း ဖွိုမ် အုဝ် ဒီ ကွယ် ရိုမ် ဒူပ် ဘေ၊ တဲး န့ ဒူပ် ကာဒိက် ဆတ်ဇာ ပီ ဒွါ အုဝ် ဒီ ဘေ ဒေါ လေး ဘေ ခဲင် မိူင် အဲဂိုပ် တွိုန်။ ကူပ် န့ ပါယ် တီ ကွဲ့ တဲး ဘေ ယုဝ်။’”

6 ခုဝ်၊ ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ “ပေါ အူ ကာစန်၊ အာဝ် ဘော လှေန့် အုဝ် ဒီ ဒီယုး ဘ့လေန့် ဂေ ဂါင်ဟြာဝ် ဘော ကာဒါယ် ဘော အိုမ် နမ်မုက်ဆာရာ ဘော နွန် ဘောကာဂ့လျီတ် အုဝ် ဒီ ဒီယုး။ 7 အုဝ် ဒီ ဒီယုး ဘော ဒူအီ ဒွန် မျုဝ်။ ကြုဝ်ကြာမ် ဂေ ဒူအီ ဒွန် မျုဝ် အီ မိုဝ်း ဒီငဝ်း ဒီခန်၊ ဂေ ဒီ တး တိုယ် ဒီ ဟုဝ် ဇဝ်ဖြာ နီ။ အုဝ် ဒီ တဲး ဟုဝ် ဇဝ်ဖြာ မိုဝ်း အာဖုင် ဒင်ခုဝ်။ ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။ 8 ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ “ခဲ့ ကွယ် ရွိုန် န့ မုး ကြုဝ် အုဝ်။ ခဲ့ မိုဝ်း ခြိဝ် ဘော မုး ကြုဝ် အုဝ်။ 9 အာဖုင် ဒင်ခုဝ် ဟုဝ် ဇဝ်ဖြာ ပီ ဒီ ဘူင် ကာမာယ် တီ၊ န့ ဝဲ တာင် လွှိုမ် အာဖုင် ဒင်ခုဝ် ဟုဝ် ဇဝ်ဖြာ ဘြိမ် တွိုန်။ အုဝ် မိူဝ် ဒီ တဲး န့ ယေန်၊ တဲး ဒူအီ ကွယ် ဒါခိုယ်၊ အာဝ် လုဝ် လာယ် ကာဂုဝ်း။” အုဝ် အီ မုး ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။

10 ခုန်ဒီခမ် အာတာရိတ် ဟဲ့ အိုပ် မာန် မိူင် အန် အာဒါ အာ ဆီနမ်၊ ဒေါ ဇမ် မာဂျီန် န့ဒိမ်၊ ဆီငဲ အာ ဂိုဝ် ဒီ မ့ဖွုန်၊ ဇဝ်ဖြာ ဝီ ကာလာင် ဂြုဝ်း ဒီ ဒါ အီ ဘျာန် ဂြုဝ်း ဇဝ်ဖြာ အာဟာကာယ်။

11 အန် တဝ်း၊ “ဇဝ်ဖြာ အီ အိုပ် တူတ့် ဒွန် မျုဝ် ဟဲ့ တဝ်း ပါယ် နီ။ တဲး ဘေ ဒီမွှတ် လွင် ဒါရာ ဒီ ဂေ ဒါ အီ လှူ ဒီ ဇဝ်ဖြာ။

12 တဲး ဘေ တဝ်း၊ ‘ဆေ န့ မိုဝ်း ဒူအီ အူ ဝီ၊ ဆေ အန် ဒိုဝ်း ယင် အီ မုး ပီ ဒီ လှူ အီ ဆီငါ ဘွတ်၊ ဝီ ဂူင့် ခဲင် ခြိုင် တာ အန်၊ ဆေ ခြိုင် တာ အန် တီ ဝီ တး ဒိုဝ် ပီ ဒီ ဟူမ် ပေါ မျုဝ်၊ ဘော မုး ပီ ဒီ ဟူမ် ခါမုန်၊ ဟာပ်၊ အိုမ် မာငုန် ဘော နာမန်။ ပီ ဒီ ဟူမ် တီ၊ န့ ဒီ ဘဲန် အီ ဆီငါ ဘွတ်။း’” ဒါ အီ လှူ ဒီ ဇဝ်ဖြာ ဝီ တဝ်း၊ “အာဝ် ဘဲန် အီ ဆီငါ ဒေါ မှဝ်။”

13 အာဟာကာယ် ပီ ဝီ ဒီမွှတ် ဂေ တဝ်း၊ “ဆေ ဒူအီ အာဝ် ဟူ ဆီငါ ကူပ် ဟဲ့ တာ ဒိုဝ် အန် ဒုဝ် ယမ်၊ ဆေ အန် ဝီ တာ ဒိုဝ် ပီ ဒီ ဟူမ် မင် မျုဝ်၊ န့ ဒီ ဘဲန် အီ ကာဒါတ့်။း” ဒါ အီ လှူ ဒီ ဇဝ်ဖြာ ပီ ဝီ တဝ်း၊ “ဟဲ့ ဘဲန် အီ ကာဒါတ့်။”

14 အာဟာကာယ် ဝီ ဝျီ့ ဂြုဝ်း ဂေ တီ တဝ်း၊ “ဇဝ်ဖြာ တဝ်း၊ ဒူအီ ဂေ နီ၊ ဂေ လှူ မီ မျုဝ် အီ ကာဒါတ့် တူတ့် ဒီ အုဝ်။

15 ဆိန့် ဒေါ တီ နီ၊ တဲး ဘေ ဝီ ကာဒွါ့ ကာဖာ အီ ဟဲ့ ဘုဝ် ဘဲန် ဆိန့် အာတ့် စုး ဘေ ဒီ ဆမ် ဟုဝ် ဇဝ်ဖြာ။ 16 ဒေါ အန် တီ ဝါယ် ဟဲ့ ဟွတ့် ဆမ် ဘေ ငှုဝ်၊ ဒေါ ဟဲ့ ထာင် ဘေ၊ ဘေ ဒီ ပွိုန် အာ ဂိုဝ် ပုင်၊ ဘေ ယီ ပွိုန် မီ ဂိုဝ် ပုင်။ ဒေါ ကြိတ် ဘေ အိုမ် မာငုန်၊ ဘေ ထာင် ဘေ ဒီ ပွိုန် အိုမ် မာငုန် ဖန် ဂိုဝ် ပုင်၊ ဘေ ယီ ဝီ ပွိုန် ခဲ့ အာ ဂိုဝ် ပုင်။ 17 အုဝ် ဟဲ့ တဲး ခုန် တာင် ဘုတ်၊ တဲး ငှုဝ် ဘေ ဝွင့် အျီ့၊ တဲး ဘော ဘျြီ ဘူင် တဲး ငှုဝ် ဘေ စှိုမ်။ တဲး ဂါန် ဘေ စှိုမ် တူ မိုဝ်း ဒီခုဝ်။ ပီ ဘော ဟဲ့ ပါယ် တီ မိူဝ်၊ ဘေ တူ ဒူပ် အုဝ်။ ဇဝ်ဖြာ ဟဲ့ ကာလာင် ပါယ် တီ။ 18 စုး အာတိုဝ် နီ ဟာဝ် တဲး ဘေ ဝီ ကာဒွါ့ ကာဖာ လွင် မာဂျီန် န့ဒိမ်၊ ဆီငဲ အာ ဂိုဝ် ဒီ မ့ဖွုန်၊ အီ မုး ဆီငဲ ဟဲ့ ဟွတ့် ဆမ် ဘေ ဟုဝ် ဇဝ်ဖြာ။ တဲး ဘေ လှုဝ်း အာခြာဝ် ဒေါ အန် တီ။ 19 ခဲင် ဂြွာ ဘေ၊ န့ ဆီ မိုဝ်း ငှုဝ် အီ ဆီ ဂိတ်။း ဟေ မာငုန်၊ ဟေ ဘ့လေ ဒီပူ၊ ဟေ ဘ့လေ မာစက် ဘော ဟေ နာမန် ဘေ၊ န့ ညှမ် ဘုဝ်း၊ န့ ညှမ် ဘ့လေ။ စုး ဆိန့် ဆီငဲ အာတိုဝ် နီ၊ အုဝ် ဒီ မွင့်ကာရာ ဒွါ နာ ဘွတ် နာ မွှိုမ် ဒီ ဘေ။”

20 ဒေါ ဇမ် မာဂျီန် န့ဒိမ် ဆီငဲ အာ ဂိုဝ် ဒီ မ့ဖွုန်၊ ဇဝ်ဖြာ ပီ ဝီ ကာလာင် ဂြုဝ်း ဒီ အာဟာကာယ် ပေါ အူ ဇေန့် တဝ်း၊ 21 “တဲး မဲ ကာလာင် ဒီ အာဇေရူဘာဘေန် အီ မုး ဒါ တာင် အီ အိုပ် မိူင် ယူဒါ၊ တဲး မဲ တဝ်း၊ အုဝ် ဒီ ဒီယုး ဂါင်ဟြာဝ် ဘော ကာဒါယ်။ 22 အုဝ် ဒီ ဆီဂိုပ် ဝဲန် မာန် မိူင် ကိူန်။ အုဝ် ဒီ ဒိုဝ်း ဝဲန် အာဖုင် ဒင်ခုဝ် ခဲင် မာန် မိူင် ဒူအီ ဘဲန် မျုဝ်။ လက်လဝ် ဂေ ဒါ ဆိုက် ဘော ဂေ ဒါ ဆိုက် အီ ပဝ့် လက်လဝ် တီ၊ အုဝ် ဒီ ဆာဂိုပ် ဝဲန် တူတ့်။ မင်ပြွင့် ဘော ဂေ ဒါ ဆိုက် အီ ပဝ့် မင်ပြွင့် တီ၊ ဂေ ဒီ ဘော ဝီ ဒိုဝ်း မာပွါ့ လာင် ဂေ၊ ဝီ လာယ် ကာဂုဝ်း ကာငဝ်း ရာင် ဂေ၊ တဲး ဂေ ယမ် တူတ့်။

23 ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် အုန် ပါယ် နီ။ မဲ အာဇေရူဘာဘေန် အီ မုး ဂွန် အာဆာလထီအေန်၊ မဲ မုး ဒဲစေန့် အုဝ်၊ အုဝ် ဒီ ဝီ မျုက် မဲ၊ တဲး မဲ ပီ ဆီကာနူ အီ မိုဝ်း ဇိုမ်။ ခုဝ်၊ အုဝ် ဟဲ့ ဟွတ့် ရဝ်း အုန် မဲ။” အုဝ် အီ မုး ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။