1 ဇဝ်ဖြာ ဘော ကာလာင် ဂြုဝ်း ဒီ ဒါ အီ ဘျာန် ဂြုဝ်း ဇဝ်ဖြာ အီ စိူဝ် အာဆာခါရာ အီ မုး ဂွန် အာဘီရာခီ ဘော လှာန် အာအီတော။ ဒေါ အန် တီ ခုန်ဒီခမ် အာတာရိတ် ဟဲ့ အိုပ် မာန် မိူင် အန် အာဒါ အာ ဆီနမ်။ ဒေါ ဇမ် မာဂျီန် န့ဒါ ဇဝ်ဖြာ ဟဲ့ တဝ်း၊

2 “အုဝ် မုး ဇဝ်ဖြာ ဟဲ့ ရူ ကာဆဝ် ဒီ ဂေ ဂုန့် ဒင် မဲ။ 3 ကူပ် န့ ပါယ် တီ တဲး မဲ ဝီ ကာလာင် ဒီ ဒူအီ ကိူန် တဝ်း၊ ဇဝ်ဖြာ အီ အိုပ် တူတ့် ဒွန် မျုဝ် ဟဲ့ တဝ်း၊ တဲး ဘေ ဝီ တး ဒူင် ကွယ် အုဝ်။ အုဝ် မိူဝ် ဒီ တး ဒူင် ကွယ် ဘေ။ ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။ 4 ကွဲ့ တဲး ဘေ ဘူင် ပီ ပီ ဒွိုမ် ဘူင် ဂေ ဂုန့် ဒင် ဘေ ဒေါ မွိုန်။ ဒါ အီ ဘျာန် ဂြုဝ်း ဇဝ်ဖြာ အီ ဟဲ့ ကွယ် အာခြာဝ် ဒေါ အန် တီ၊ ဂေ ဟဲ့ ဟွတ့် ကာလာင် ဒီ ဂေ ဂုန့် ဒင် ဘေ တဝ်း၊ ‘ဇဝ်ဖြာ အီ အိုပ် တူတ့် ဒွန် မျုဝ်၊ ဟဲ့ စ်ု ဘေ တဲး ဘေ ဝး န့တေန့် အီ တူ မွှိုမ် ဘော ဝဲန် ပီ ဘူင် ဘေ အီ တူ မွှိုမ်။’ ဇဝ်ဖြာ ဟဲ့ ကာလာင် ပါယ် တီ။ 5 ဂုန့် ဒင် ဘေ ဘော ဒါ အီ ဘျာန် ဂြုဝ်း ဇဝ်ဖြာ ဒီ ဂေ၊ ဂေ အာဝ် ဟူ ကွယ် ဟဲ့ လှေန့် ကာဆဝ် ဂေ ဟဲ့ ဟွတ့် ယမ် တူတ့်။” 6 ဂြုဝ်း ပီ ကာလာင် အုဝ် ဒီ ဒါ အီ ဘျာန် ဂြုဝ်း ဇဝ်ဖြာ အီ မုး ဒဲစေန့် အုဝ် ဟဲ့ ဟွတ့် ကာလာင် ဒီ ဂေ ဂုန့် ဒင် ဘေ။ န့ မိူဝ် ဟဲ့ ဘဲန် တူတ့် ပီ တဝ်း အုဝ် တီ။ ခုဝ်၊ ဂေ လှုဝ်း မှာပ် ဂေ ဘော တဝ်း၊ “ဇဝ်ဖြာ အီ အိုပ် တူတ့် ဒွန် မျုဝ်၊ ဟဲ့ တဲး ယေ ခမ် ခဲ့ ကာအာပ် ယေ ခမ်။ အန် မိူဝ် ဟဲ့ ဘူင် ခဲ့ ပီ တဝ်း အန် ဒီ ဘူင်။”

7 ခုန်ဒီခမ် အာတာရိတ် ဟဲ့ အိုပ် မာန် မိူင် အာဒါ အာ ဆီနမ်၊ ဒေါ ဇမ် မာဂျီန် ဂိုဝ် ဒီ လှေး အီ ဘော စိူဝ် မာဂျီန် ဆေဘာတ်၊ ဆီငဲ အာ ဂိုဝ် ဒီ မ့ဖွုန်၊ ဇဝ်ဖြာ ပီ ဝီ ကာလာင် ဂြုဝ်း ဒီ ဒါ အီ ဘျာန် ဂြုဝ်း ဇဝ်ဖြာ အီ စိူဝ် အာဆာခါရာ အီ မုး ဂွန် အာဘီရာခီ ဘော လှာန် အာအီတော။ အာဆာခါရာ တဝ်း၊

8 ပီ ဘျ ဇဝ်ဖြာ ဒီ အုဝ် ခဲင် မှိုဝ် န့ ပါယ် နီ။ အုဝ် ယိုဝ် ဒါ အူ ဝီ၊ အန် ပဝ့် မင်ပြွင့် ရေန့်၊ ကာပ့လုး တး စွင့် ဒီ ကာတဲ ဟေ မူရာတူ အီ ကွယ် ကာတဲ ဒီလယ့် ကာချီ့။ နာ ပန် အန် တီ န့ ဝီ မိုဝ်း မင်ပြွင့် ရေန့်၊ မင်ပြွင့် ဒီဂမ် ဘော မင်ပြွင့် လုယ် ဘော ဒွန် ဒုဝ် မိုဝ်း ဒါ အီ ပဝ့်။

9 အုဝ် ဘော ဒီမွှတ် အာမူ အာမာတ် ဇဝ်ဖြာ အီ ကာလာင် ဂြုဝ်း ဒီ အုဝ် တဝ်း၊ “မဲ ဒါ ကာညာ အုဝ်၊ လွင် မင်ပြွင့် တီ န့ မုး မာဆေ။း” အာမူ အာမာတ် ဇဝ်ဖြာ ဝီ တဝ်း၊ “အုဝ် ဘျ ဒုဝ် ဂေ တီ ဒီ မဲ၊ တဲး မဲ နပ် လွင် မာဆေ န့ မုး။”

10 ဝီ အီ ကွယ် ဒီ ကာတဲ ဟေ မူရာတူ တွိုန် ဝီ ကာလာင် ဒီ အုဝ် တဝ်း၊ ‘ဂေ တီ ဂေ မုး ပီ စ်ု ဇဝ်ဖြာ၊ တဲး ဂေ ဝိန် ဒီ ယွတ် ဒဲင် ကာဒါယ် နီ ဒွန် နာ ဒွန် ပ့လုဝ့်။’

11 ဂေ အီ ပဝ့် မင်ပြွင့် တွိုန် မိူဝ် ဝီ ဝျီ့ ဂြုဝ်း အာမူ အာမာတ် ဇဝ်ဖြာ အီ ကွယ် ဒီ ကာတဲ ဟေ မူရာတူ တွိုန် တဝ်း၊ ‘ယေ ဟဲ့ ဟွတ့် ဝိန် ဒီလဲ ဒဲင် ကာဒါယ် နီ ဒွန် ပ့လုဝ့်၊ န့ ဟဲ့ ယေန် ဒါခိုယ်။’

12 ဟဲ့ ဟွတ့်၊ အာမူ အာမာတ် ဇဝ်ဖြာ တွိုန် ဝီ တဝ်း၊ “အိုယ် မဲ ဇဝ်ဖြာ အီ အိုပ် တူတ့် ဒွန် မျုဝ်၊ မဲ ဇဝ် အာဝ် ဟူ ကာဝေ ဒူအီ ခဲင် မိူင် ယေရူဆာလဲမ် ဘော အာဝ် ဟူ ကာဝေ ဒူအီ ခဲင် မိူင် ယူဒါ ဂေ တွိုန်။း မဲ ဇဝ် ဟဲ့ ရူ ဒီ ဂေ အာဒါ ဘူ ဂိုဝ် ဆီနမ်၊ ပန် မှဝ် မဲ ဒီ ကာဝေ ဂေ။း” 13 ဝါယ် အန် တီ ဇဝ်ဖြာ ဘော ဝီ ကာလာင် ဂြုဝ်း ငါမ်၊ ဂြုဝ်း ဒါခိုယ် ဒီ အာမူ အာမာတ် ဇဝ်ဖြာ အီ ဟဲ့ ကာလာင် ဂြုဝ်း ဒီ အုဝ် တွိုန်။

14 အာမူ အာမာတ် ဇဝ်ဖြာ တီ ဝီ ကာလာင် ဒီ အုဝ် တဝ်း၊ “တဲး မဲ ဒတ် ကာလာင် ပါယ် နီ၊ တဲး ဒွန် အီ ထူမ်၊ တဲး မဲ တဝ်း၊ ဇဝ်ဖြာ အီ အိုပ် တူတ့် ဒွန် မျုဝ် ဟဲ့ တဝ်း၊ အုဝ် ဘော ကာဝေ ကာဆဝ် မိူင် ယေရူဆာလဲမ် ဘော နွန် ဇီအူန်။” 15 အုဝ် ယီ ရူ ကာဆဝ် ဒီ ဂေ ဒူအီ အာမျုဝ် ဟဝ် အီ ဟဲ့ ကွယ် နှိမ် နှိမ် ဘော ကွယ် ဒါခိုယ် ဒါခိုယ်။ ခုဝ်၊ အုဝ် ဟဲ့ ရူ အီ စဲက် ဒီ ဂေ ဒူအီ ပီ အိုပ် အုဝ်၊ တဲး ဂေ ဒူအီ အာမျုဝ် ဟဝ် ဒမ် မှာပ် ဒီ ဂေ။ ဂေ ယီ ဝီ ဘူင် တဲး ဒုက် ဝဲ ကိူန် ဒီ ဒူအီ ပီ အိုပ် အုဝ်။

16 ကူပ် န့ ပါယ် တီ ဇဝ်ဖြာ ဝီ တဝ်း၊ “အုဝ် ဟဲ့ ဝီ ဆီ ဂေဇူ မိူင် ယေရူဆာလဲမ်။ အုဝ် ဆီ တဲး န့ ဝီ ပွိုန် ဆမ် ဟုဝ် အုဝ် ဘော ဝီ ဒဲ ဝီ မ့ပြာယ် မိူင် ယေရူဆာလဲမ်။ ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။

17 ပါယ် တီ တဲး မဲ ကာလာင် ပေါ အူ မျုဝ်၊ ဇဝ်ဖြာ အီ အိုပ် တူတ့် ဒွန် မျုဝ် တဝ်း၊ ခဲင် ရဝ် ခဲင် မိူင် ပီ အိုပ် အုဝ် တီ၊ ဒူအီ ဒီ ဘော ဝီ ကွယ် ဒါခိုယ် ဘော မိုဝ်း ခဲ့ ပီ လုဝ် ဂေ။ ဇဝ်ဖြာ ဒီ ဝီ ဘူင် တဲး နွန် ဇီအူန် ဝီ ဇေ့ဇုင်၊ ဝီ ဘျုဝ် ဒီ နဝ်း။ အန် ဇဝ် ဒီ ဘော ဝီ ရဝ်း မိူင် ယေရူဆာလဲမ် ပေါ အူ ဇေန့်၊ တဲး န့ ဘဲန် ဒူင် ကွယ် အန်။”

18 ဝါယ် အန် တီ အုဝ် ဝီ မာငး ယွတ်၊ အုဝ် ဝီ ယိုဝ် နိုင် ဘတ့် ဖွုန် ဘူင့်။ 19 အုဝ် ဝီ ဒီမွှတ် အာမူ အာမာတ် ဇဝ်ဖြာ အီ ကာလာင် ဂြုဝ်း ဒီ အုဝ် တဝ်း၊ “အာဇ တီ၊ န့ မုး မာဆေ။း” အန် ဝီ တဝ်း၊ “န့ မုး မိူင် ဒူအီ အာမျုဝ် ဟဝ် အီ ပီ နိုင် ဘတ့် အီ ဟဲ့ ဘူင် တဲး ဂေ ဒူအီ ခဲင် မိူင် ယူဒါ၊ မိူင် အီဆာရေလ ဘော မိူင် ယေရူဆာလဲမ် လာယ် ကာယဝ်း ကာရေး ဟာဝ် ဒွန် ဘ့လာက် ဒွန် နာ။”

20 ဟဲ့ ဟွတ့်၊ ဇဝ်ဖြာ ပီ ဝီ ဘျ တဲး အုဝ် ယိုဝ် ဒါ ဖွုန် ဝီ အီ နပ် ဒီ စိုမ် ဟိန်။ 21 အုဝ် ဝီ ဒီမွှတ် တဝ်း၊ “ဒါ ဂေ တီ၊ ဂေ တး ဘူင် မာဆေ။း” အန် ဇဝ် ဝီ တဝ်း ဒီ အုဝ်၊ “ဒူအီ စိုမ် ဟိန် ဂေ တီ၊ ဂေ မုး ဒူအီ အာမျုဝ် အီ ဟဲ့ ပီ နိုင် ဘတ့် ဖွုန် ဒုဝ် တွိုန် အီ ဟဲ့ တဲး ဒူအီ အာယူဒါ ဇမ် ဒုက်။ ဂေ ဟဲ့ တဲး ဒူအီ အာယူဒါ လာယ် ကာယဝ်း ကာရေး။ ဟဲ့ ဟွတ့် ဒူအီ အီ စိုမ် ဟိန် တီ ဝီ ဘူင် တဲး ဒူအီ အီ ပီ နိုင် ဘတ့် စှိုမ် တူတ့်။”