1 အုဝ် ဝီ ယွတ်၊ အုဝ် ဘော ယိုဝ် ဒူအီ အူ ဝီ အီ ဟဲ့ ဂူင့် ဝန် ဂဝ်။ 2 အုဝ် ဝီ ဒီမွှတ် ဒူအီ ဝီ တီ တဝ်း၊ “မဲ ဒီ ဝဝ့် ဒီ မှဝ်။း” အန် ဝီ ကာလာင် ဒီ အုဝ် တဝ်း၊ “အုဝ် ဒီ ဟာဝ် တဲး အုဝ် ဂဝ် ဒီ ယွတ် မိူင် ယေရူဆာလဲမ်၊ တဲး အုဝ် နပ် နာ တူင့် နာ ကာဝဝ်း အန်။”

3 အာမူ အာမာတ် ဇဝ်ဖြာ အီ ကွယ် ရိုမ် ဒူပ် အုဝ်၊ အန် ဘော လေး ဟာဝ် တဝ်း ဒီ ရွုး အာမူ အာမာတ် ဇဝ်ဖြာ ပေါ အူ ကာဒင်။ အန် ဘော ကာလာင် ဒီ အန် တဝ်း၊ 4 “တဲး မဲ ကာဘ့လဲပ် ဟာဝ် ကာလာင် ဒီ ကာညူမ် တွိုန် တဝ်း၊ မိူင် ယေရူဆာလဲမ် ဒီ ဘော ဝီ မိုဝ်း ဒူအီ ဂေ ဒုဝ် ဆတ်ဒါဝါ ကိူန်၊ တူ တဲး ဂေ ဘောကာဂ့လျီတ် ပွိုန် ကွယ် ခဲင် မိူင်။ ခုဝ်၊ ဂေ ကိူန် လုဝ် ကွယ် နာ ရေတ့် မိူင်။ ဂေ ယီ တူ လုဝ် ယုဝ် မာဆေ။”

5 ဇဝ်ဖြာ တဝ်း၊ အုဝ် ဒီ ပီ ရဲင် အီ ပီ ငဝ်၊ တဲး န့ ကွယ် ရူပ် မိူင် ယေရူဆာလဲမ်၊ ကွဲ့ တဲး ရန်ဆူ ပွိုန် ဒီ လိုပ် ခဲင် မိူင်။ အုဝ် ဒီ ဘျ အာဖုင် ဒင်ခုဝ် အုဝ် ဒီ အီ။

6 ဇဝ်ဖြာ ပီ ဝီ တဝ်း၊ “တဲး ဘေ တဝ် လေး ခဲင် မိူင် နာ ကွာ၊ အုဝ် ဟဲ့ တဲး ဘေ လာယ် ကာယဝ်း ကာရေး၊ တဲး န့ ပီ ခုန် အီ ကွယ် ဖွုန် ဘ့လာက် ခြိုမ် ဘ့လေန့်။”

7 အိုယ် ဘေ အီ ကွယ် ခဲင် မိူင် ဘာဘဲ၊ တဲး ဘေ ဝီ တး ကွယ် ခဲင် မိူင် ယေရူဆာလဲမ်။ 8 ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ဒွါ အာဖုင် ဒင်ခုဝ် အန် ဒီ အုဝ်၊ တဲး အုဝ် ကာလာင် ဒီ ဒူအီ ဒွန် ဇိုဝ် ဒွန် မျုဝ် အီ ဟဲ့ ခါနှာပ် ဘေ။ အန် တဝ်း၊ “အာဆေ ဒွါ ဒုက် ဒီ ဘေ၊ အန် ဒွါ ဒုက် ဒီ ဒူအီ ပီ ရွက့် အုဝ် လွှိုမ် တူတ့်။” 9 “ဘ်ု ဘေ ယွတ်၊ န့ ပီ အုဝ် ဒီ ဒိုဝ်း ကာလိုမ် အုဝ် ငှာ ဒီ ဂေ။ ဂေ ဒီ လုဝ် ဝီ ခမ် မှာယ် ဂေ ဝီ ဇူန် ဂေ၊ ဖာတ် ဒိုဝ်း ကြုဝ်ကြာမ် ဂေ။” ပန် အန် တီ ဘေ ဒီ ဘော နပ် ဇဝ်ဖြာ အီ အိုပ် တူတ့် ဒွန် မျုဝ် ဟဲ့ စ်ု အုဝ် တး။

10 “အိုယ် ဘေ ဒူအီ ခဲင် မိူင် ယေရူဆာလဲမ်၊ တဲး ဘေ တဝ်း မှုဝ် ဘော ခူယ် ဒါခိုယ်။ အုဝ် ဒီ တး ကွယ် ကာတဲ ဘေ။” ဇဝ်ဖြာ ဟဲ့ ကာလာင် ပါယ် တီ။ 11 ဆီငဲ တီ၊ ဂေ အာမျုဝ် ဒူအီ ကိူန် ဒီ ဘော ဝီ တး ကွယ် ဘ့လာက် ဇဝ်ဖြာ၊ ဘဲန် ဒူအီ အာမျုဝ် အုဝ်။ အုဝ် ဒီ ဘော တး ကွယ် ကာတဲ ဘေ။ ဘေ ဒီ ဘော နပ် ဇဝ်ဖြာ အီ အိုပ် တူတ့် ဒွန် မျုဝ် ဟဲ့ စ်ု အုဝ် တး ကာလာင် ဒီ ဘေ။ 12 ဇဝ်ဖြာ ဒီ ဘော ဝီ အိုပ် မိူင် ယူဒါ၊ တဲး န့ ပီ ခါဂုန် အန် အီ ဟဲ့ အုန် ခဲင် မိူင် အီ ဆီငါ ဘွတ် တွိုန်။ အန် ဒီ ဝီ ရဝ်း တဲး မိူင် ယေရူဆာလဲမ် ဘဲန် မိူင် ပီ အိုပ် အန်။ 13 အိုယ် ဘေ ဒူအီ ဘောကာဂ့လျီတ်၊ တဲး ဘေ ကွယ် နှိမ် နှိမ်၊ ကွယ် ယေန် ယေန် ဒီ အာတ့် ဇဝ်ဖြာ။ ခုဝ်၊ အန် ဇဝ် ဒီ ဘော ယိတ့် ဒူင် ကွယ် အန်၊ ဒူင် ဆီငါ ဘွတ် ဘော တး ဒူင် ကွယ် ဘေ။