1 ဝါယ် အန် တီ အာမူ အာမာတ် ဇဝ်ဖြာ ဟဲ့ ဘျ ဒီ အုဝ်၊ တဲး အုဝ် ယိုဝ် ဒါ တာင် အီ လှူ ဒီ ဇဝ်ဖြာ အီ စိူဝ် အာယုဝ်ဆူအာ။ အန် ကွယ် နာ အာတ့် အာမူ အာမာတ် ဇဝ်ဖြာ တွိုန်။ ဘုဝ် ကာနမ် အီ စိူဝ် ဆာတာန် မိူဝ် စွင့် ဘ့လာက် အာအး အာယုဝ်ဆူအာ။ အန် ဘော ဖျာက် အာယုဝ်ဆူအာ ကာလာင် နာ တူ မွှိုမ် ဘဲန် မျုဝ် ဘဲန် မျုဝ် လွင် အန်။

2 အာမူ အာမာတ် ဇဝ်ဖြာ တီ ဝီ ကာလာင် ဒီ ဘုဝ် ကာနမ် တဝ်း၊ “အိုယ် မဲ ဘုဝ် ကာနမ်၊ အုဝ် အီ မုး ဇဝ်ဖြာ အုဝ် တူ ညှိုမ် ပီ ဖျာက် မဲ တီ။ တဲး ဇဝ်ဖြာ အီ ဟဲ့ ရဝ်း မိူင် ယေရူဆာလဲမ် မာနုဝ် မဲ။ ဒူအီ ဝီ နီ၊ အန် ဟဲ့ ပီ မာဆီဘ့လာဝ် အီ ဟဲ့ ဟွတ့် ထာ့ လေး ခဲင် ငဝ်။”

3 အာယုဝ်ဆူအာ တာ ခြိုင် ကာဒိး ဒေါ စွင့် အန် နာ အာတ့် အာမူ အာမာတ် ဇဝ်ဖြာ တွိုန်။ 4 အာမူ အာမာတ် ဇဝ်ဖြာ တွိုန် ဝီ ကာလာင် ဒီ ဂေ အီ ဟဝ် အီ ကွယ် နာ အာတ့် အန် တဝ်း၊ “တဲး ဘေ ကာပ့လု ဝဲန် ခြိုင် အန် အီ ကာဒိး တီ။” အန် ဝီ ကာလာင် ဘော ဒီ အာယုဝ်ဆူအာ တဝ်း၊ “ယွတ်၊ အုဝ် ဟဲ့ ဟွတ့် ဂဝ်း ဝဲန် မှာပ် မဲ။ န့ ပီ အုဝ် ဒီ ဝီ တဲး မဲ တာ ခြိုင် အီ ဆီငါ အီ စှိတ်။” 5 အုဝ် မိူဝ် ဝီ တဝ်း၊ “တဲး ဘေ ဒိုဝ်း ကာမယ့် အီ ဆီငါ တွိုန် ဘြဝ့် ဒီ ဂိန့် အန်။” ပါယ် တီ ဂေ မိူဝ် ဒိုဝ်း ကာမယ့် အီ ဆီငါ၊ ဘြဝ့် ဒီ ဂိန့် အန် ဒူပ် ပီ တဝ်း အုဝ် တွိုန်။ ဂေ ဒိုဝ်း ဘော ခြိုင် တာ အီ ကာမာယ်၊ စှိုပ် ဒီ အန်။ ဒေါ အန် တီ အာမူ အာမာတ် ဇဝ်ဖြာ ဘော ကွယ် ခူပ် ဂေ တီ။

6 အာမူ အာမာတ် ဇဝ်ဖြာ ဝီ ကာလာင် ဒီ အာယုဝ်ဆူအာ တဝ်း၊ 7 “ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် နီ။ ဆေ မဲ ဒူပ် ပီ အိုင် အုဝ် ဘော ဘူင် ဒူပ် ဒါရာ ပီ တဲး အုဝ်၊ မဲ ဒီ ပွိုန် ဒီ အိုပ် ခဲင် ဟုဝ် အုဝ်၊ ပွိုန် ဘော ဒီ အိုပ် ခဲင် ဝဲင် ဟုဝ် အုဝ်။ အုဝ် ဒီ ခ့ဝါင် တဲး မဲ ဟာဝ် လိုပ် ဟာဝ် လေး ဒူင် ကွယ် အုဝ် ပီ ဂေ အီ ဟဝ် အီ ကွယ် ဒီ နီ။ 8 အိုယ် မဲ အာယုဝ်ဆူအာ အီ မုး ဒါ တာင် အီ လှူ ဒီ ဇဝ်ဖြာ၊ ဘော ဂေ ဒါ အီ လှူ ဒီ ဇဝ်ဖြာ အီ ကွယ် ရိုမ် ဒူပ် မဲ၊ မဲ တဲး ဘော ဂေ ထူမ်။ ကူပ် ကွယ် ဘေ ဒီ နီ၊ န့ ဘျ လွင် နာ မွှိုမ် ဘဲန် မျုဝ် ဘဲန် မျုဝ် အီ ဒီ တး နာ အာတ့် နီ ဟာဝ်။ ဘေ ယိုဝ်၊ အာဝ် လှေန့် အုဝ် ဒီ တဲး ဒဲစေန့် အုဝ် အီ ပီ ရာ ဟေ တး။ 9 တဲး ဘေ ယွတ် ဆဲန့် ပီ အုန် ဂေ နာ အာတ့် အာယုဝ်ဆူအာ တီ။ ဆဲန့် အူ ဘူင့် တီ န့ ဘော မိုဝ်း ဘူ နာ။ အူ ဆီငဲ အုဝ် ဒီ ဘော ဘ့လုဝ်း ဆဲန့် တီ။ အုဝ် ဒီ ဂဝ်း ဝဲန် ဘော မှာပ် ဂေ ဒူအီ ခဲင် မိူင် တီ။ ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။

10 ဆီငဲ တီ ဘေ ဒီ ဘော ဝီ လာယ် ဘာင် ကာတဲ ဘေ၊ တဲး ဘေ ဟာဝ် ကွယ် ခြိုမ် ဟေ မာငုန် ဘော ခြိုမ် ဟေ ဒီပူ ဘေ။” ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။