1 အာမူ အာမာတ် ဇဝ်ဖြာ အီ ကာလာင် ဂြုဝ်း ဒီ အုဝ် တွိုန်၊ အန် ဘော ဝီ တး ဘျိတ့် အုဝ်၊ ပီ အီ ဘျိတ့် ဒူအီ အီ ဟဲ့ ပွိုန် ဒီ အိတ်။ 2 အန် ဝီ ဒီမွှတ် အုဝ် တဝ်း၊ “မာဆေ ပီ ယိုဝ် မဲ။း” ဟဲ့ ဟွတ့်၊ အုဝ် မိူဝ် ဝီ တဝ်း၊ “အုဝ် ယိုဝ် ကာစှူင့် ဒူင် ဘ့လေး ဂေ ငဝ် ရာင် န့ ဘော မုး ခြိဝ် ဒီလူယ်။ ဒီ ကာဒဲ့ ငဝ် ရာင် တီ န့ ဝီ မိုဝ်း ငဝ် အွမ် အူ ဘူင့် ဘော ဆီလယ့် ဒူင် ဒီ ဒုဝ့် ငဝ် ဘူ ဘ့လ။ န့ ဝီ မိုဝ်း ဘော လွှတ် ဘူ လွှတ် အီ ဟဲ့ ကာဒိုက် ဒီ ငဝ် အွမ် ဘော ဒီ ဆီလယ့် ဘူ ဘ့လ တွိုန်။

3 ဒီ ခူပ် ငဝ် ရာင် တီ ဝီ မိုဝ်း ရာင် ဟေ နာမန် အာ ကာဒင်။ အူ ဘ့လာက် အူ ကာဒင်။”

4 အုဝ် ပီ ဝီ ဒီမွှတ် အာမူ အာမာတ် ဇဝ်ဖြာ အီ ကာလာင် ဂြုဝ်း ဒီ အုဝ် တဝ်း၊ “အိုယ် မဲ ဒါ ကာညာ အုဝ်၊ အာဇ တီ၊ န့ ဘော မုး မာဆေ။း”

5 အာမူ အာမာတ် တီ၊ အန် ပီ ဝီ ဒီမွှတ် အုဝ် တဝ်း၊ “မဲ တူ နပ် လွင် အာဇ တီ။း” အုဝ် မိူဝ် ဝီ တဝ်း၊ “အုဝ် တူ နပ်။”

6 အန် ဘော ဝီ ကာလာင် ဒီ အုဝ် တဝ်း၊ “အာနီ န့ ဘော မုး ဂြုဝ်း ဇဝ်ဖြာ ပီ ကာလာင် အန် ဒီ အာဇေရူဘာဘေန် အန် တဝ်း၊ န့ တူ မုး ကူပ် ပ့လူမ် ဂေ ဟဲန့်။ န့ တူ မုး ကူပ် ပွုန် ဂေ အာဖုင် ဒင်ခုဝ်။ န့ ယီ မုး ကူပ် နဝ်း ဖွိုမ် အုဝ်။” ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။

7 န့ တူ မိုဝ်း အာဆေ ပွိုန် ခြဲ အာဇေရူဘာဘေန် တး။ ဆေ န့ ပီ ဘော မုး နွန် တာင်၊ န့ ဒီ ဟြာယ် နာ အာတ့် အာဇေရူဘာဘေန်။ အန် ဒီ ဘော ဘ့လေး မာဝ် ဒီ ကာဒဲ့ ခဲင် ဟုဝ် ဇဝ်ဖြာ။ ဂေ ဒူအီ ကိူန် ဝီ ဒတ် တဝ်း၊ ‘တဲး ဇဝ်ဖြာ ဂေဇူ အန်၊ တဲး ဇဝ်ဖြာ ဂေဇူ အန်။’

8 ဝါယ် အန် တီ ဇဝ်ဖြာ ပီ ဝီ ကာလာင် ဂြုဝ်း ဒီ အုဝ် ပေါ မ့ပွါ။ 9 အန် တဝ်း၊ “အာဇေရူဘာဘေန် ဟဲ့ ဟွတ့် ဆမ် အုန် စေန့် ရွင့် ခဲင် ဟုဝ် ဇဝ်ဖြာ။ အန် ဒီ ဘော ဘူင် ဟာဝ် တဲး န့ ကော ဟွတ့်။ ပါယ် တီ မဲ ဒီ ဘော နပ် ဇဝ်ဖြာ အီ အိုပ် တူတ့် ဒွန် မျုဝ် ဟဲ့ စ်ု တဲး အုဝ် တး ဒူင် ကွယ် မဲ။

10 ကွဲ့ တဲး အာဆေ လုက်တာယ် ဆီငဲ ဒေါ ကာစုး ဂေ ဒီ ဘူင် အီ စဲက် အီ စဲက်၊ ဇဝ်ဖြာ ဟဲ့ ခူယ် ကာဆဝ်။ ခုဝ်၊ အန် ဒီ ပွိုန် ယိုဝ် ဝန် ဂဝ် ပီ ဂူင့် အာဇေရူဘာဘေန် တွိုန်။ ငဝ် အွမ် ဘူ ဘူင့် တီ၊ ပီ ငါယ် ဇဝ်ဖြာ အီ ယွတ် ဒဲင် ကာဒါယ် နီ ဒွန် နာ ဒွန် ပ့လုဝ့်။”

11 ဟဲ့ ဟွတ့် ပါယ် တီ အုဝ် ပီ ဝီ ဒီမွှတ် တဝ်း၊ “ဟေ နာမန် အီ ကွယ် ဘ့လာက် အာအး ဘော ဘ့လာက် အာဂ ငဝ် အွမ် တီ၊ န့ မုး မာဆေ။း”

12 အုဝ် ပီ ဝီ ဒီမွှတ် ပေါ အူ ဇေန့် တဝ်း၊ “ရာ ဟေ နာမန် အာ ရာ ပဲ့ ဟဲ့ ဘူင် ဂေ တာ ခြိဝ် တီ၊ အီ လှုဝ် နာမန် ခြိဝ်၊ န့ မုး မာဆေ။း”

13 အန် တွိုန် ပီ ဝီ ဒီမွှတ် အုဝ် တဝ်း၊ “မှဝ် န့ ပါယ် ပီ တူ နပ် မဲ လွင် အန် တီ။း” အုဝ် မိူဝ် ဝီ တဝ်း၊ “အုဝ် တူ နပ်။”

14 အန် ဝီ တဝ်း ဒီ အုဝ်၊ “ရာ အာ ရာ တီ ဘော မုး အာ ကာဒင် ဝီ ပဲ့ ဟဲ့ ဖဝ်း ဇဝ်ဖြာ နာမန်၊ တဲး ဂါယ် ဘူင် ဂါန် ဇဝ်ဖြာ ဒဲင် ကာဒါယ် နီ ဒွန် ပ့လုဝ့်။”