1 အုဝ် ဝီ မာငး ယွတ်၊ အုဝ် ဝီ ယိုဝ် ဆီလွယ် ပဲ့ အီ ဘိုန့် ခဲင် ဘ့လေန့်။ 2 အာမူ အာမာတ် ဇဝ်ဖြာ တွိုန် ဝီ ဒီမွှတ် အုဝ် တဝ်း၊ “မာဆေ ပီ ယိုဝ် မဲ။း” အုဝ် မိူဝ် ဝီ တဝ်း ဒီ အန်၊ “အုဝ် ယိုဝ် ဆီလွယ် ပဲ့ အီ ဘိုန့် ခဲင် ဘ့လေန့်။ နာ တူင့် အန် ကွယ် အူယ် ဂိုဝ် ကာနိး။ နာ တာင် ကွယ် ဂိုဝ် ဒီ ဖန် ကာနိး။”

3 အန် တွိုန် ဝီ ကာလာင် ဒီ အုဝ် တဝ်း၊ “ခဲင် ဆီလွယ် ပဲ့ တီ ဟဲ့ ဒဲမ် ဂြုဝ်း ဒိူင် ပီ လုဝ် ခမ် ဂေ ခဲင် မိူင် ဘော မိူင်။ အူ ဘ့လာက် ဟဲ့ ဒဲမ် လွင် ဂေ ဒူအီ အီ ဆီမာ ပြာ ဘောကာဂ့လျီတ်၊ ဂေ လုဝ် ခမ် အီ ဝဲန် ဂေ။ ပေါ ဘ့လာက် န့ ဟဲ့ ဒဲမ် လွင် ဒွန် အီ ကာလုဝ် ဒီ ဒိူင်။ ဂေ လုဝ် ခမ် အီ ဝဲန် ဂေ။

4 ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ အုဝ် တဲး ဂြုဝ်း ဒိူင် တီ ဇမ် ခဲင် ကာင် ဒွန် အီ အီ ဟဲ့ ပြာ ကြုဝ် အီ ဘော ခဲင် ကာင် ဒွန် အီ ဒိူင် တဝ်း၊ တဲး ဇဝ်ဖြာ ထူမ်၊ ယီ ကာလာင် ဂြုဝ်း တူ မှာန်။ ဂြုဝ်း ဒိူင် တီ ဒီ ကွယ် ခဲင် ကာင် ဂေ တဲး န့ ကော စှိုမ် တူတ့် ဘော ရွင့် ဘော မာဝ် တဲး န့ ကာပျာတ့် လိုဝ် တူတ့်။”

5 ဟဲ့ ဟွတ့် ပါယ် တီ အာမူ အာမာတ် ဇဝ်ဖြာ အီ ကာလာင် ဂြုဝ်း ဒီ အုဝ်၊ အန် ဘော တး ကာတတ် အုဝ် ဘော တဝ်း၊ “ဒေါ တီ နီ၊ တဲး မဲ ဝီ ယွတ် မျုဝ် အီ ဟဲ့ ဘုဝ် ဘဲန် ခဲင် ဘ့လေန့်။”

6 အုဝ် မိူဝ် ဝီ ဒီမွှတ် တဝ်း၊ “န့ မုး မာဆေ။း” အုဝ် ဟဲ့ ဟွတ့် တဝ်း ပါယ် တီ၊ အန် ဝီ တဝ်း ဒီ အုဝ်၊ “န့ မုး ခွန် အီ ဂဝ် ဒီဂါဝ်။ န့ မုး မှာပ် ဂေ ဒူအီ ဘောကာဂ့လျီတ် အီ ကွယ် ခဲင် မိူင် ဘော မိူင်။”

7 ခွန် တီ၊ ဂေ ဟဲ့ ဒိုဝ်း မီစေတ့် ဘူင် ဘဲန် ဆီဘ့လိုက် အန်။ ဂေ ဘော ဝိုဝ်း ဆီဘ့လိုက် တီ၊ န့ မိုဝ်း အီဘိုန့် အူ ဝီ ကွယ် နာ ခဲင်။

8 အာမူ အာမာတ် ဇဝ်ဖြာ ဝီ တဝ်း၊ “အီဘိုန့် တီ မိုဝ်း စိူဝ် အီ တဝ်း ဟာယ် ကာဆဝ်။” အန် ဘော ဇုန် အီဘိုန့် တီ တဲး အန် ဝီ ကွယ် ခဲင် ခွန် တွိုန်။ ဟဲ့ ဟွတ့် ဘော ကာဘိတ် ဆီဘ့လိုက် အန်။

9 ဝါယ် အန် တီ အုဝ် ပီ ဝီ ယိုဝ် အီဘိုန့် အာ ဝီ ဘိုန့် တး ဒူင် ကွယ် အုဝ်။ ဂါယ် ဟဲ့ ဘ့လး ဖျီင် ဂါယ် ဒူပ် ခုန်။ ဖျီင် ဂါယ် တီ ဘော ပီ ဖျီင် နူက်ကွန်။ ဂါယ် ဘော ဂြူပ် ဟုဝ့် ခွန် တွိုန် ခဲင် ဘ့လေန့်။

10 အုဝ် ဝီ ဒီမွှတ် အာမူ အာမာတ် ဇဝ်ဖြာ တဝ်း၊ “ဂါယ် ဂြူပ် ခွန် တီ ဝဝ့် နာ မှဝ်။း”

11 အန် ဝီ တဝ်း၊ “ဂါယ် ဂြူပ် ဟာဝ် ခွန် တီ ဒီ မိူင် ဘာဘဲ၊ တဲး ဂါယ် ဆမ် ဟုဝ် ပီ ကြိုပ် ဂေ။ အီဘိုန့် အာ ဝီ တွိုန်၊ ဆေ ဟဲ့ ဟွတ့် ဆမ် ဟုဝ် ဂေ ဒီ ဘ့လေး ခွန် တီ ဒူင် ကွယ် အန် ခဲင် ဟုဝ် တီ။”