1 အာနီ မုး ဂြုဝ်း ပီ ကာလာင် ဇဝ်ဖြာ ဒီ အာမာလာခီ အီ မုး ဒါ အီ ဘျာန် ဂြုဝ်း အန် ဇဝ်။

2 ဇဝ်ဖြာ ဟဲ့ တဝ်း၊ “အုဝ် ဟဲ့ ရွက့် ကာဆဝ် ဘေ ဘောကာဂ့လျီတ်။” မာလဲ၊ ဘေ ယီ ဝီ တဝ်း၊ “မှဝ် အန် ဇဝ် ပါယ် ဒီ ရွက့် အေ။း” ဇဝ်ဖြာ ဝီ ဝျီ့ ဂြုဝ်း ဘေ တီ တဝ်း၊ “အုဝ် ရွက့် အာကူပ် အီ မုး ဂုန့် ဒင် ဘေ။ ပါယ် တီ အုဝ် ရွက့် ဘော ဘေ။ 3 အုဝ် ယီ ဇွင့် အာဆုဝ်။ အုဝ် ဟဲ့ တဲး နွန် ဒူင် ကွယ် အန် ကာပျာတ့် လိုဝ် တူတ့်။ အုဝ် ဟဲ့ ဒိုဝ်း ကာဒါယ် အီ ဟဲ့ ဘဲန် ခါဂုန် အန်၊ တဲး န့ ဘဲန် ပြဲ ကာဟဝ်း ဒူင် ကွယ် မာဆုဝ် ပြဲ။”

4 ဂေ ဒူအီ ခဲင် မိူင် အေဒူမ် ဘော နပ် ဒီ တဝ်း၊ “ယေ ဟဲ့ ဟွတ့် လိုဝ် စှိုမ် တူတ့်။ မာလဲ၊ ယေ ပီ ဒီ ဝီ မ့ပြာယ် ကာဆိူဝ် အီ ဟဲ့ ကာပျာတ့် လိုဝ် ဂေ တီ။” ဂေ ပီ ဘော ဟဲ့ တဝ်း ပါယ် တီ မိူဝ်၊ ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ “ဂေ ပီ ဘော ဝီ ဆမ်၊ အုဝ် ယီ ဒီ ပျာတ့် ဝဲန်၊ တဲး ဂေ ဒူအီ ဟဝ် ကော တဝ်း၊ ‘ဂေ မုး ဒူအီ အီ ကွယ် ခဲင် ကာဒါယ် မာန် မိူင် အီ တူ မွှိုမ် ဘော ဘူင် တဲး ဇဝ်ဖြာ ရူ ဒီ ဂေ ဆေဆေ။’” 5 ဘေ ဒီ ဘော ယိုဝ် ဒီ ငါယ် ဘေ လွင် အန် တီ။ ဘေ ဒီ ဘော ဝီ တဝ်း၊ “ဇဝ်ဖြာ ဟဲ့ မိုဝ်း ပွုန်၊ မိုဝ်း အာဖုင် ဒင်ခုဝ် တာင် ကာဆဝ်။ နာ ရေတ့် ကာအုန် ကာဒါယ် မိူင် အီဆာရေလ မိူဝ်၊ ပွုန် အန် ဘော တာင် ကာဆဝ်။”

6 ဇဝ်ဖြာ အီ အိုပ် တူတ့် ဒွန် မျုဝ် ဝီ ကာလာင် ဒီ ဒါ အီ လှူ ဒီ ဇဝ်ဖြာ တဝ်း၊ “ဂွန် ကာညူမ် ဘော နပ် ဒီ ရုဝ်ဆေ ဂုန့် အန်။ ဒဲစေန့် ဘော နပ် ဒီ ရုဝ်ဆေ ဒါ ကာညာ အန်။ အုဝ် ယီ မုး ဂုန့် ဘေ ဘော ဒါ ကာညာ ဘေ၊ မှဝ် န့ ပါယ် ပီ တူ ရုဝ်ဆေ ဘေ ဒီ အုဝ်။း” ပါယ် တီ ဇဝ်ဖြာ အီ အိုပ် တူတ့် ဒွန် မျုဝ် ဒီမွှတ် ဂေ အီ မုး ဒါ အီ လှူ ဒီ ဇဝ်ဖြာ အီ လုက်တာယ် ပွုန် အန် ဇဝ်။ မာလဲ၊ ဘေ ယီ ဝီ ဒီမွှတ် တဝ်း၊ “မာဆေ ပီ ဘူင် ယေ ဒေါ လုက်တာယ် ယေ မဲ ဇဝ်။း”

7 ဇဝ်ဖြာ ပီ ဝီ တဝ်း၊ “ဘေ ဟဲ့ ဒိုဝ်း ပီ ဒီ ဟူမ် အီ မွှိုမ် ကာဒါတ့် လှူ ဒီ အုဝ်။ ဘေ ယီ ဝီ ဒီမွှတ် တဝ်း၊ ‘မှဝ် ယေ ဟဲ့ ဘူင် တဲး ပီ ဒီ လှူ ယေ ကာဒါတ့်။း’ အုဝ် တဝ်း ဒီ ဘေ၊ ‘ဘေ ဟဲ့ ထာင် ကာစှူင့် လှူ ဒီ ဇဝ်ဖြာ ဟဲ့ ပွိုန် လုက်တာယ်။’ 8 ဘေ ယီ လှူ ဒုဝ် ဆတ် အီ ငါယ် အပ် ဘော ထာင် အာဝ် ဘဲန် မှာပ်။ ဘေ ဘော လှူ ဒုဝ် အီ ပ့လဝ် ဂဲ့ ဘော ဒုဝ် အီ မိုဝ်း ဆဝ် ရောဂါ၊ ဘေ ဘော တဝ်း ဘော ထာင် အာဝ် ဘဲန် မှာပ်။ ဆေ ဘေ ထေဝ် ဒီ ဟာဝ် အာပ် ဒွါ ဒီ ဒါ ကာညာ အီ အိုပ် မိူင်၊ ဘေ ထာင် န့ ဒီ လဝ့် နဝ်း အန်။ တဲး ဘေ ယွတ်၊ အန် ဒီ ပါယ် မှဝ် ဒီ ဘေ အန် အိုင် တူ အိုင်။” ဇဝ်ဖြာ အီ အိုပ် တူတ့် ဒွန် မျုဝ် ဟဲ့ တဝ်း ပါယ် တီ။

9 တဲး ဘေ ဆာခိုဝ် မှာန့် ဒီ ဇဝ်ဖြာ၊ တဲး အန် ဇဝ် မိုဝ်း နဝ်း ကာဝေ ဘေ။ ဆေ ဘေ ယီ လှူ ပီ ဒီ လှူ အီ ကာဒါတ့် တီ၊ ဇဝ်ဖြာ တူ လုဝ် ဘျ နဝ်း ရွက့် အန် ဒီ ဘေ။

10 အုဝ် ဆီ တဲး န့ မိုဝ်း ခေါ အူ ဝီ ကာတဲ ဘေ၊ တဲး အန် ဟာဝ် ကာဘိတ် မာလုဝ်း ဟုဝ် ဇဝ်ဖြာ၊ ကွဲ့ တဲး ဘေ လှူ မျုဝ် အီ ကာဒါတ့် ဒဲင် ကာစှူင့် လှူ အုဝ်။ ဇဝ်ဖြာ အီ အိုပ် တူတ့် ဒွန် မျုဝ် ဟဲ့ တဝ်း၊ အုဝ် တူ အိုင် ပီ ပါယ် ဘေ တီ။ အုဝ် မိူဝ် တူ လှုဝ်း ပီ လှူ ဘေ တီ။ 11 ဂေ ဒူအီ ဒွန် ဇိုဝ် ဒွန် မျုဝ် ဒီ ရုဝ်ဆေ အုဝ် စုး ဒူင် လေး ဆီငဲ ကော ဝီ ဇမ် ဒူင် ဂေတ့် ဆီငဲ။ ဂေ ဒီ ဘော လှူ ပီ ဒီ လှူ အီ ဒုဝ့် ဒီ ငဝ်၊ ဘော ပီ ဒီ လှူ အီ ဆီငါ ဘွတ် ဒွန် မျုဝ်။ ခုဝ်၊ ဂေ ရုဝ်ဆေ အုဝ် အီ ဘွတ် မျာတ် ကာဆဝ် ကာတဲ ဂေ ဒူအီ ဒွန် ဇိုဝ် ဒွန် မျုဝ်။ ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။ 12 မာလဲ၊ ဘေ တူ ရုဝ်ဆေ အုဝ် ဆေ ဘေ တဝ်း ကာစှူင့် လှူ ဒီ ဇဝ်ဖြာ အာဝ် ဘွတ်။ ခုဝ်၊ ဘေ တဝ်း၊ ဒူင် ဒီ လှူ ဘေ ဒီ ဇဝ်ဖြာ ဟဲ့ ပွိုန် ဘူင် တဲး န့ ကာဒါတ့်။ ပါယ် တီ ဘေ ဘျ ဘေ တူ ရုဝ်ဆေ ဇဝ်ဖြာ။ 13 ဘေ မိူဝ် ဟဲ့ တဝ်း၊ န့ ညှာပ် ကာဆဝ် ဒီ ဒူပ် ပီ တဝ်း ဇဝ်ဖြာ။ ပါယ် တီ ဘေ ဘော လုက်တာယ် အန် ဇဝ်။ ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ “တဲး ဘေ ဇေန့်ဇာ လွင် ပီ ဘူင် ဘေ။ ဘေ နပ် ဒီ ပြာ ဒုဝ် ပီ ဆီ လှူ ဘေ ဘော ဒိုဝ်း ဒုဝ် အီ ပ့လဝ် ဂုဝ့် ပ့လဝ် ဂဲ့၊ ဘော ဒုဝ် အီ မိုဝ်း ဆဝ် ရောဂါ၊ ဝီ လှူ ဒီ အုဝ်။ ဟဲ့ ဟွတ့် ဘေ ထာင် အုဝ် ဒီ ဒိုဝ်း ဒုဝ် ဂေ တီ ဘော အိုင် ပီ ဘူင် ဘေ။း ပါယ် တီ ဇဝ်ဖြာ ဝီ ဒီမွှတ် ဘေ။ 14 ဆေ ဝီ အီ မိုဝ်း မာဘူ အာလူင့် အီ တူ မိုဝ်း ဒူင် စှေ ဒူင် နဲ ခဲင် ဖိုင် မာဘူ အန်၊ အန် မိူဝ် ဟဲ့ ကာဆဲန့် ဒီ လှူ၊ အန် ယီ တူ ဝီ ဘူင် ဒူပ် ပီ ကာဆဲန့် အန် တီ၊ ဝီ လှူ ဒုဝ် အီ မိုဝ်း ဒူင် စှေ ဒူင် နဲ၊ အန် လုဝ် ခမ် မှာပ် အန်။ ခုဝ်၊ အုဝ် မုး ခုန်ဒီခမ် အီ တာင် ကာဆဝ်။ ဂေ ဒူအီ ဘဲန် မျုဝ် ဘဲန် မျုဝ် ဘော ရုဝ်ဆေ အုဝ်။”