အိုယ် ဘေ ဒါ အီ လှူ ဒီ ဇဝ်ဖြာ၊ ဂြုဝ်း ပီ ကာလာင် ဇဝ်ဖြာ ဒေါ တီ နီ ဘော မုး အာမိင် ပီ ဒွါ အန် ဒီ ဘေ။ 2 ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် နီ။ “ဆေ ဘေ တူ ရုဝ်ဆေ အုဝ်၊ အုဝ် ဒီ ဒိူင် ဘေ၊ တဲး ဘေ ခမ် အာဖေ အာရေ။ တဲး နာ ဘွတ် နာ မွှိုမ် ပီ မွင့်ကာရာ ဒွါ အုဝ် ဒီ ဘေ ဝီ ဘဲန် ဝူတ်။ ဘူင့် မှာန် အန်၊ အုဝ် ဟဲ့ ဟွတ့် ဒိူင် ဘေ။ ခုဝ်၊ ဒေါ ဒမ် အုဝ် ဆာဒိက် ဒီ ဘေ၊ ဘေ တူ ထူမ် ဂြုဝ်း အုဝ်။

3 အုဝ် ဒီ ဝီ အေး လှုက်လှာန် ဘေ၊ န့ ပီ အုဝ် ဒီ ဒိုဝ်း အျီင် မာဒုဝ် ဆတ် အီ မုး ဒုဝ် ပီ ဒီ လှူ ဂေ၊ ဝီ ဖဝ်း ဒီ နာ ဘေ။ အုဝ် မိူဝ် ဒီ ဟုဝ် တဝ် ဘေ၊ ကွဲ့ တဲး အုဝ် ဆီ ယိုဝ် ဘေ။ 4 ပန် တီ ဘေ ဒီ ဘော နပ် န့ မုး အုဝ် အီ ဟဲ့ ဒမ် ဆာဒိက် ဒီ ဘေ၊ တဲး ကာဒိက် ဆတ်ဇာ ပီ ဒွါ အုဝ် ဒီ ဂေ ဒူအီ ခြိုဝ် အာလေဝီ တူ လိုဝ် ဒေါ မှဝ်။” ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။ 5 “ကာဒိက် ဆတ်ဇာ ပီ ဒွါ အုဝ် ဒီ ဂေ ဒူအီ ခြိုဝ် အာလေဝီ တီ၊ အုဝ် ဆီ တဲး န့ ဒွါ အာဆာက် ဒီ ဂေ ဘော ဘဲန် နဝ်း ဂျီတ် နဝ်း ယေန်။ ခဲ့ တီ အုဝ် မိူဝ် ဟဲ့ ဒွါ အုန် ဒီ ဂေ။ ခုဝ်၊ ဂေ ရုဝ်ဆေ အုဝ် ဘော အာမ် အုဝ် အီ မိုဝ်း ပွုန် တာင်။ 6 နာ မုး နာ မှာန် ပဲ့ ဟဲ့ ကာလာင် အုဝ် ဒီ ဂေ၊ ဂေ ဝီ ကာလာင် ဒီ အီ ဟဝ်။ ဂေ မိူဝ် တူ ကာလုဝ် ဘော တူ ပီလွှက့် ဒီ အီ ဘော ဒူပ် အုဝ်။ ဂေ ဘူင် နာ မုး နာ မှာန် ဘော စွယ် ဒူအီ ကိူန် ဝး မှာပ် ဘော ဝဲန် နာ တူ မွှိုမ်။

7 မူတ့် ဒါ အီ လှူ ဒီ ဇဝ်ဖြာ လုဝ် ကာလာင် ဂြုဝ်း အီ မိုဝ်း အာငျာန်။ ဂေ ဒူအီ ကိူန် ဒီ ဘော တဲး ဒါ အီ လှူ ဒီ ဇဝ်ဖြာ မာနုဝ် ဂေ။ ခုဝ်၊ ဇဝ်ဖြာ ဟဲ့ တဲး ဂေ ဘဲန် အာမူ အာမာတ် အန် အီ မုး အန် ဇဝ် အီ အိုပ် တူတ့် ဒွန် မျုဝ်။ 8 မာလဲ၊ အီ မုး ဘေ၊ ဘေ ယီ တူ ဘူင် ပါယ် တီ။ ဘေ ဟဲ့ ဝး န့တေန့် အီ ဒူပ် ဇဝ်ဖြာ။ ဘေ မိူဝ် ဘူင် တဲး ဒူအီ ကိူန် ကာလိုပ် ကူပ် ဂြုဝ်း ပီ မာနုဝ် ဘေ။ ဘေ ဟဲ့ ပျာတ့် ဝဲန် ကာဒိက် ဆတ်ဇာ ပီ လာယ် ကာဆဲန့် အုဝ် ဒီ ဂေ ဒူအီ ခြိုဝ် အာလေဝီ တွိုန်။” ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။ 9 “ကူပ် တူ ဒူပ် ဘေ န့တေန့် ပီ ကာလာင် အုဝ် ဒီ ဘေ ဘော မိုဝ်း ဒူင် ရွက့် ဒူင် ဇွင့် ဒေါ ဝီ မာနုဝ် ဘေ အီ ဟဝ်၊ အုဝ် ဝီ တဲး ဘေ ဘဲန် ပီ လုက်တာယ် ပီ နဲန ဒူအီ ကိူန် ဘော ကွဲ့ တဲး ဂေ ရုဝ်ဆေ ဘေ။”

10 အေ ဘောကာဂ့လျီတ် မိုဝ်း ဂုန့် အူ ဝီ။ ဇဝ်ဖြာ အူ ကာဒင် ဟဲ့ ဖာန် ဘ့လေး အေ။ ဆေ န့ ပါယ် တီ၊ မှဝ် န့ ပါယ် ပီ ဝီ ပျာတ့် အေ ကာဒိက် ဆတ်ဇာ ပီ ဒွါ ဇဝ်ဖြာ ဒီ ဂုန့် ဒင် အေ ဘော တူ ဘူင် နာ ဆိူဝ် နာ မှာန် ဒီ ဘီနွင် အေ။း

11 ဒူအီ အာမျုဝ် ယူဒါ၊ ဂေ တူ မိုဝ်း နဝ်း ဆိူဝ် နဝ်း မှာန်။ ဒူအီ အာမျုဝ် အီဆာရေလ ဘော ဒူအီ ခဲင် မိူင် ယေရူဆာလဲမ်၊ ဂေ ဘော ဘူင် အီ မွှိုမ် ကာအိး မွှိုမ် ကာဒါတ့်။ ဂေ ဒူအီ အာယူဒါ ဟဲ့ ဘူင် တဲး ဟုဝ် ဇဝ်ဖြာ ကာဒါတ့်။ ဂေ ဟဲ့ ခတ် ဒိုဝ်း အီဘိုန့် အီ ကြိုပ် ဇဝ် ပီ ကြိုပ် ဒူအီ အာမျုဝ် ဟဝ်။ 12 ကာတဲ ဒူအီ အီဆာရေလ ဇဝ်ဖြာ ဒီ ဒိုဝ်း လေး ဒွန် အီ အီ ဘူင် ပါယ် တီ။ ကွဲ့ တဲး အန် ပွိုန် ဒီ ဒိုဝ်း တး ပီ ဒီ လှူ အန်၊ ဝီ ဟာဝ် လှူ ဒီ ဇဝ်ဖြာ အီ အိုပ် တူတ့် ဒွန် မျုဝ်။

13 ဘေ မိူဝ် ဟဲ့ ဘူင် ပေါ မ့ပွါ။ ဘေ ဘော ယာမ် ဘော ငှုန်၊ တဲး အိုမ် ငါယ် ဘေ ကော ဘိန် တူတ့် ကာစှူင့် လှူ ဒီ ဇဝ်ဖြာ ကူပ် တူ အိုင် အန် ဇဝ် ပီ လှူ ဘေ ဘော အာဝ် မိုဝ်း အီ လဝ့် နဝ်း အန်။ အန် မိူဝ် တူ ဒိုဝ်း ပီ လှူ ဘေ။ 14 ဘေ ဝီ ဒီမွှတ် တဝ်း၊ “မှဝ် န့ ပါယ် ပီ ဝဲန် မဲ ဇဝ် ဒီ ယေ။း” အုဝ် တဲး ဘေ နပ်၊ န့ မုး ဇဝ်ဖြာ အီ ဟဲ့ ထူမ် ပဲ့ ဟဲ့ လာယ် ကာဆဲန့် ဘေ ဘော အီဘိုန့် ဘေ ဆီငဲ ဒေါ ဟဲ့ ခတ် ဘေ ဒေါ ဆီ နှိုမ် ဘေ။ အီဘိုန့် တီ မိူဝ် ဟဲ့ မုး ဂိုက် ဘေ၊ ဟဲ့ မုး အီဘိုန့် ဘေ ဘော ဟဲ့ ဒူပ် ကာဒိက် ဆတ်ဇာ ပဲ့ ဟဲ့ ဒွါ ဘေ ဒီ အန်၊ ဘေ ယီ တူ မိုဝ်း နဝ်း ဆိူဝ် နဝ်း မှာန် ဒီ အန် ဘော ဝီ ဘူင် အီ ကာလိုပ်။

15 အန် ဇဝ် ယီ ဟဲ့ ဖာန် ဘ့လေး ဂါယ် အာ ဝီ၊ တဲး ဂါယ် ပီ အူ ဝီ။ န့ မုး အန် ဇဝ် အီ အိုပ် ဘော ဒုဝ် ဘော နဝ်း ဖွိုမ် ဘေ။ ကူပ် မာဆေ အန် ဇဝ် ဟဲ့ ဖာန် ဘ့လေး ဂါယ် အာ ဝီ၊ တဲး ဂါယ် ဘဲန် ပီ အူ ဝီ။း အန် ဇဝ် ဆီ တဲး ဂါယ် မိုဝ်း ဂွန် အီ ရုဝ်ဆေ ဇဝ်ဖြာ။ ခုဝ်၊ တဲး ဘေ အိုပ် နဝ်း ဘေ၊ ကွဲ့ ဘူင် အီ တူ ကာဆိူဝ် အီ တူ မွှိုမ် ဒီ အီဘိုန့် ပဲ့ ဟဲ့ ခတ် ဒိုဝ်း ဘေ ဆိန့် ဒေါ ဆီ နှိုမ် ဘေ။

16 ဇဝ်ဖြာ အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ၊ အန် ဟဲ့ တဝ်း၊ “အုဝ် ကာအိး ကာဆဝ် ဆေ အီ ဝဲန် အီဘိုန့် ဂေ။ အုဝ် ဘော ဇွင့် ကာဆဝ် ဝီ အီ ဘူင် နာ တူ မွှိုမ် ဒီ အီဘိုန့် အန်၊ တဲး န့ ပီ အန် တာ ခြိုင်၊ ကာဘိတ် ဒုဝ် အန် ကွဲ့ တဲး အီ ယိုဝ်။” ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။ ခုဝ်၊ တဲး ဘေ ဆာဒိက် နဝ်း ဘေ၊ ကွဲ့ ဘူင် အီ တူ ကာဆိူဝ် ဒီ အီဘိုန့် ဘေ။

17 ဘေ ဟဲ့ တဲး ဇဝ်ဖြာ နုန် ကူပ် ဟဲ့ ကာလာင် ဘေ ဂြုဝ်း ကိူန်။ ဘေ ယီ နပ် ဒီ တဝ်း၊ “မှဝ် ယေ ပါယ် ဒီ ဘူင်၊ တဲး အန် ဇဝ် နုန်။း” န့ ဘော မုး ကူပ် ပဲ့ ဟဲ့ ကာလာင် ဘေ တဝ်း၊ “ဇဝ်ဖြာ တူ ဒမ် မှာပ် ဒီ ဂေ အီ ဘူင် နာ တူ မွှိုမ်။ ကူပ် အိုင် အန် ဒီ ဂေ။” ဟဲ့ ဟွတ့် ဘေ ဘော နပ် ဒီ တဝ်း၊ “ဇဝ်ဖြာ အီ ဒီ ဆုင်ဖျာတ် ဒါရာ ဒီ အီ၊ အန် ကွယ် ဒီ မှဝ်။း”