ဇဝ်ဖြာ ပီ ဝီ တဝ်း၊ “ဘ်ု ဘေ ယွတ်၊ အုဝ် ဒီ စ်ု အာမူ အာမာတ် အုဝ်၊ တဲး အန် ဝီ ယဲတ့် ဒီ အာတ့် အုဝ်။ အန် ဇဝ် ပီ ဟြေတ့် ဘေ တွိုန်၊ အန် ဝီ ကာပ့လုး တး ဒီ ဟုဝ် ဇဝ်ဖြာ အူ ဇေန့်။ ဘ်ု ဘေ ယွတ်၊ အာမူ အာမာတ် ဇဝ်ဖြာ အီ ဟဲ့ ကာလာင် ဒီ ဘေ လွင် ကာဒိက် ဆတ်ဇာ ဇဝ်ဖြာ ပဲ့ ဟဲ့ နှဝ့် န့ဒဝ့် ဘေ၊ န့ ဒီ တး အာခ်ု မှာန်။” ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။

2 အာဆေ ဒီ ဘော ပွိုန် ခမ် ဆီငဲ ဒီ တး ဇမ် အန် ဇဝ် တီ။း အာဆေ ဒီ ဘော ပွိုန် ကွယ် ဒီ အာတ့် အန် ဇဝ် ဆီငဲ ဒီ တး အန် တီ။း ခုဝ်၊ အန် ဇဝ် ဒီ ဘော ပီ ငဝ် အီ ထာရွင် ရွိုန် ဘော ဆာပျာ ပီ တာ ဒါ အီ လး ခြိုင် တဲး န့ လုယ်။ 3 အန် ဇဝ် ဒီ ဘော တုတ့် ပီ ဒူအီ အီ ထာရွင် ရွိုန် တဲး န့ ဆီငါ။ အန် ဒီ ဘော ဒမ် မှာပ် ဒီ ဂေ ဒူအီ အာမျုဝ် အာလေဝီ၊ တဲး န့ ပီ အီ ထာရွင် ရွိုန် ဂေ ခြိဝ် တဲး န့ ဇဲတ်။ တဲး ဂေ ပွိုန် ဒီ လှူ ပီ ဒီ လှူ အီ လဝ့် နဝ်း ဇဝ်ဖြာ။ 4 ဒေါ အန် တီ ပီ ဒီ လှူ ဂေ ဒူအီ အာယူဒါ ဘော ဒူအီ ခဲင် မိူင် ယေရူဆာလဲမ် ဒီ ဘော ဝီ လဝ့် နဝ်း ဇဝ်ဖြာ ပီ ဒေါ မုး အာခြာဝ် ဒေါ မွိုန်။

5 ဇဝ်ဖြာ ပီ ဝီ တဝ်း၊ “ဒေါ အန် တီ အုဝ် ဒီ ဘော တး ကွယ် ကာတတ် ဘေ၊ တဲး အုဝ် ဆုင်ဖျာတ် အာမူ ဘေ။ အုဝ် ဒီ ဘဲန် ဆက်ဆေ အီ လာယ် ကာဘး ဒီ ဝီ အီ နပ် ဒီ ဘုတ် ကာထာ ဘော ဘူင် အာဒါတ်။ ဝီ အီ လုတ့် အီဘိုန့် အီ ဟဝ်၊ ဝီ အီ ဒိူင် အီ တူ မုး တူ မှာန်၊ ဝီ အီ တူ ဒွါ ရုး ရန့် ရုး ဇာင် အီ ဟဝ်၊ ဝီ အီ ခါနှာပ် ယာ ဆီပြး ဘော ဂေ ဂွန် အီ တူ မိုဝ်း ဂုန့် မာ၊ ဝီ အီ ဘူင် ဒီ ဒူအီ အာမျုဝ် ဟဝ် အီ တူ ဒူပ် ဒါရာ နာ မှာန် အုဝ် ဒီ ဘူင် ကာဘး ဒီ ဂေ ဒူအီ ဇိုဝ် တီ။ ခုဝ်၊ ဂေ တူ ရုဝ်ဆေ ရီမာတ် အုဝ်။” ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။

6 “အုဝ် မုး ဇဝ်ဖြာ အီ တူ နပ် ဒီ ကာပ့လု တူ နပ် ဒီ ဘျွင်။ ခုဝ်၊ ဘေ လှုက်လှာန် အာကူပ်၊ ဘေ ညှမ် လိုဝ် စှိုမ် တူတ့်။ 7 စုး ဆိန့် စုဝ် ဘာန် ဒါ ဒါ ဘေ၊ ဘေ ဟဲ့ ဝဲန် ဒါရာ ပီ ဒမ် အုန် အုဝ် ဘော တူ ဘူင် ဒူပ်။ ဒေါ တီ နီ တဲး ဘေ ဝီ တး ဒူပ် အုဝ်၊ ဟဲ့ ဟွတ့် အုဝ် မိူဝ် ဒီ တး ဒူင် ကွယ် ဘေ။” ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။ မာလဲ၊ ဘေ ယီ ဝီ ဒီမွှတ် တဝ်း၊ “မှဝ် ယေ ဒီ ပါယ် ဒီ ဝီ တး ဒူင် ကွယ် မဲ ဇဝ်။း” 8 “ဒူအီ တူ ပွိုန် ကာလုဝ် ဇဝ်ဖြာ။ မာလဲ၊ ဘေ ယီ ဟဲ့ ဟွတ့် ကာလုဝ် အုဝ်။ ဘေ ပီ ဝီ ဒီမွှတ် တဝ်း၊ ‘အာ မှဝ် ပဲ့ ဟဲ့ ကာလုဝ် ယေ ဒီ မဲ ဇဝ်။း’ ‘ဘေ ဟဲ့ ကာလုဝ် အုဝ် ဒေါ ဒိုဝ်း ဘေ ဂိုဝ် ဘုန် အူ ဘုန် ဘော တူ ဒွါ ပီ ဒီ လုဝ် လှူ ဘေ ဒီ အုဝ်။ 9 ဘေ ဘောကာဂ့လျီတ် လုဝ် ခမ် ဒုက် တာင်၊ ခမ် ကာဆမ် ဒိူင်။ ခုဝ်၊ ခဲ့ ကွယ် ဘေ ဘောကာဂ့လျီတ်၊ ဘေ ဟဲ့ ဖာတ် ဒိုဝ်း ကြုဝ် အုဝ်။ 10 တဲး ဘေ ဒိုဝ်း ဂိုဝ် ဘုန် အူ ဘုန်၊ ဟပ် အုန် ခဲင် ဇီဒိူက် ဇဝ်ဖြာ၊ တဲး ပီ ဒီ ဟူမ် ပီ ဒီ တာ ကော နုဝ့် ခဲင် ဟုဝ် ဇဝ်ဖြာ။ ဆေ ဘေ ဘူင် ပါယ် တီ တဲး ဘေ ယွတ် ယုဝ် အုဝ် ဒီ ဝိုဝ်း မာလုဝ်း ဂါင်ဟြာဝ်၊ တဲး အုဝ် မွင့်ကာရာ ဒွါ နာ ဘွတ် နာ မွှိုမ်၊ တဲး န့ ကော နုဝ့် လုတ့် ဒီ ဘေ။’” ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။ 11 “ပီ ပိတ် ပီ ဆမ် ဘေ၊ န့ ဒီ လေး ကိူန် ကာဆဝ်။ ခုဝ်၊ အုဝ် တူ တဲး ဒုဝ် ဆတ် ဟူမ် ပီ ပိတ် ပီ ဆမ် ဘေ။ ဘော ဘ့လေ မာငုန် ဘေ အုဝ် တူ တဲး ဘ့လေ အန် ဆီဂ့လုး စုဝ်း အာတ့် ဆိန့်။” ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။ 12 “ဒူအီ ဒွန် ဇိုဝ် ဒွန် မျုဝ် ဒီ ဘော တဝ်း၊ ဘေ ဟဲ့ မုး ဒူအီ အီ ဟဲ့ ပွိုန် မွင့်ကာရာ ပီ ဒွါ ဇဝ်ဖြာ။ မိူင် ဘေ မိူဝ် ဒီ ဘော ဘဲန် မိူင် ဘွတ် မိူင် မွှိုမ် အီ လဝ့် နဝ်း ဘေ။” ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် အုန် ပါယ် တီ။

13 ဇဝ်ဖြာ ပီ ဝီ တဝ်း၊ “ဘေ ဟဲ့ ယ ကာလာင် ဂြုဝ်း အီ ဟဲ့ လာယ် ကာဘး ကာဆဝ် ဒီ အုဝ်။” မာလဲ၊ ဘေ ပီ ဝီ ဒီမွှတ် တဝ်း၊ “အာ မှဝ် ပဲ့ ဟဲ့ ကာလာင် ကာဘး ယေ ဒီ မဲ ဇဝ်။း”

14 ဘေ မိူဝ် ဟဲ့ တဝ်း၊ “လွင် ဘူင် ဂါန် ဇဝ်ဖြာ၊ အာဝ် မိုဝ်း အာဂျိုဝ် မာဆေ။ ဆေ ယေ ဘူင် ဒူပ် ဒါရာ ဘော ဂြုဝ်း ပီ ဒမ် အန် ဇဝ်၊ ဆေ ယေ ဘော ဘျ ဒီ ဇဝ်ဖြာ အီ အိုပ် တူတ့် ဒွန် မျုဝ် လွင် မှာပ် ပဲ့ ဟဲ့ ဘူင် ယေ၊ ကွဲ့ တဲး နဝ်း ယေ ဒါခိုယ်၊ န့ တူ မိုဝ်း အာဂျိုဝ် မာဆေ။ 15 ဒေါ တီ နီ အေ ဝီ တဝ်း၊ ‘ဝီ အီ ပီခိုက် ပီဖုင် အန်၊ အန် ဟဲ့ ပွိုန် မွင့်ကာရာ ဘွတ်။ ဂေ အီ ဘူင် နာ တူ မွှိုမ် ဘော ဘဲန် ဒူအီ ခြမ် ဘော ဂေ အီ ယ တဝ်း၊ တဲး ဇဝ်ဖြာ ဒမ် မှာပ် ဒီ ဂေ၊ ဂေ ဒီ လွတ် ခမ် ဒုက် မာဆေ။’”

16 ဝါယ် အန် တီ ဂေ အီ ရုဝ်ဆေ ဇဝ်ဖြာ ဘော လာယ် ကာမွုန် ကာတဲ ဂေ။ အန် ဇဝ် ဘော ထူမ် ဂြုဝ်း ဂေ။ န့ မိူဝ် မိုဝ်း ဒူအီ အီ ဒဲမ် ဇာရာင် ဂေ ဒူအီ အီ ရုဝ်ဆေ အန် ဇဝ် ဘော အိုင် ဒီ ဇေန့်ဇာ လွင် အန်။

17 ဇဝ်ဖြာ အီ အိုပ် တူတ့် ဒွန် မျုဝ် ဟဲ့ တဝ်း၊ “ဂေ တီ ဒီ ဘဲန် ဒူအီ ပီ အိုပ် အုဝ်။ ဆီငဲ ဒီ ဘူင် အုဝ် ပဲ့ ဟဲ့ ကာဆဲန့် အုဝ်၊ ဂေ ဒီ ပီ ကြုဝ်ကြာမ် အီ ငဝ်း ကာဆဝ် ပီ ယွတ် မဲန် အုဝ်။ အုဝ် ဒီ ဘော ရွက့် ကာဝေ ဂေ၊ တဲး န့ ပီ ဂုန့် အီ ရွက့် ကာဝေ ဂွန် အီ ဘူင် ပီ ဆုတ့် ပီ စ်ု ဂုန့် အန်။” 18 ပန် တီ ဘေ ဒီ ဘော ပွိုန် ဒီ ယိုဝ် လွင် ဒူအီ အီ ဘူင် နာ ဆိူဝ် နာ မှာန် ဘော ဒူအီ အီ တူ ဘူင် နာ ဆိူဝ် နာ မှာန် အာဝ် မုး အူ မျုဝ်။ ဘေ ဒီ နပ် ဆီချာ၊ ဝီ အီ ဘူင် ဂါန် ဇဝ်ဖြာ ဘော ဝီ အီ တူ ဘူင် ဂါန် ဇဝ်ဖြာ ဟဲ့ လာယ် ဘ့လိူင် ခဲ့ မှဝ်။