1 ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ “ဆီငဲ ဒီ ဆုင်ဖျာတ် ဇဝ်ဖြာ အာမူ အီ န့ ဒီ ပီ ငဝ် ခဲင် ကာဝှါင်။ ခဲ့ ကွယ် ဂေ အီ မိုဝ်း နဝ်း ပီခိုက် ဘော ဂေ အီ မိုဝ်း နဝ်း ဟာယ်၊ ဂေ ဒီ ဘော ပီ ဟျြီင် ကာဟဝ်း ပီ ဒီ ဒုဝ့် ကာဆိုမ် အီ ခဲင် ငဝ်။ ဂေ ဒီ ဘော ကာဆိုမ် တူတ့် ပီ ဟေ ဘော ဒင် ဘော ကာဒဲ့ အန်။” 2 အီ မုး ဘေ အီ ရုဝ်ဆေ အုဝ်၊ ဘေ ဘူင် နာ ဆိူဝ် နာ မှာန် တဲး န့ ပီ ဘ့လာင် ဆီငဲ အီ တဲး ဆဝ် ရောဂါ ဘေ ကဲန်။ ဘေ ဒီ ကွယ် ဒါခိုယ် ပီ ဂွန် မက် အီ ဒဲန် ဝိဝ် ဒဲန် ဝေန့် ဒေါ လေး ဂေ ရေတ့် ကာပိုမ် ဒူင် ကွယ် ဂေ။ 3 ဆီငဲ ဒေါ ဘူင် ဒူပ် အုဝ် ကာဒိက် ဆတ်ဇာ ပဲ့ ဟဲ့ ဒွါ အုဝ် ဒီ ဘေ တီ၊ ဘေ ဒီ ဘော ညဲတ့် ဒဲင် ဂေ ဒူအီ ဟာယ်၊ တဲး ဂေ ပီ ကာပုး။ ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။

4 “တဲး ဘေ ဝီ လှုဝ်း ဒါရာ အုဝ် ပီ ကာလာင် အုန် အုဝ် ဒီ အာမုဝ်ဆဲ အီ မုး ဒဲစေန့် အုဝ် ဒေါ ကွယ် အန် ဒီ နွန် ဆီနာယ်၊ တဲး အန် ကာလာင် ဒီ ဂေ ဒူအီ အီဆာရေလ ဘောကာဂ့လျီတ်။

5 ဘ်ု ဘေ ယွတ်၊ အာတ့် ဇမ် ဆီငဲ အီ အာရေ တာင် ဘော ဆီငဲ အီ မွှိုမ် ယုဝ် ကာဆဝ် တီ၊ အုဝ် ဒီ စ်ု ဒါ အီ ဘျာန် ဂြုဝ်း ဇဝ်ဖြာ အီ စိူဝ် အာအေလီယ၊ တဲး အန် တး ဒူင် ကွယ် ဘေ။ 6 ကွဲ့ တဲး အုဝ် လုဝ် တး ဒမ် မှာပ် ဒီ မိူင် ဘေ ဒူပ် ဂြုဝ်း ကာဆမ် ဒိူင် ကာဆမ် အေး တွိုန်။ အန် ဒီ တဲး ဂုန့် မာ ဘော ဂွန် ဝီ လာယ် ကာလဝ့်။ ဘော ဂွန် ဘော ဂုန့် မာ ဒီ ဝီ လာယ် ကာလဝ့်။ ဆေ အာဝ် ပါယ် တီ အုဝ် ဒီ တး ဘော ဒိူင် ကာဒါယ် ဒူင် ကွယ် ဘေ။”