1 ဘေ ယွတ်၊ ဆီငဲ ပီ ကာလာင် ဇဝ်ဖြာ ဒီ တး ဇမ်။ ဒေါ အန် တီ ဂေ ဒီ ဘော လာယ် ကာဆာင် ကြုဝ်ကြာမ် ပဲ့ ဟဲ့ ဖာတ် ဂေ ဒီ ဘေ။

2 အုဝ် ဒီ တဲး ဒူအီ ဒွန် ဇိုဝ် ဒွန် မျုဝ် တး ကာဇု ဘော လာယ် ကာဘး ဒီ မိူင် ယေရူဆာလဲမ်။ ရန်ဆူ ဒီ ဘော ပဲ မိူင် တီ တဲး ဂေ ဖာတ် ဒိုဝ်း ကြုဝ်ကြာမ် ခဲင် ကာင် ဂေ ဘော ဘူင် နာ တူ မွှိုမ် ဒီ အီဘိုန့် ဂေ။ ဂေ ဒီ မှေတ့် ဟာဝ် ဒူအီ ခဲင် မိူင် တီ အာဒါ အူ ကာတဲ။ အာဒါ ပေါ အူ ကာတဲ အီ ဆီ ဂိတ် ဆီ ကွယ် ခဲင် မိူင်၊ ဂေ ဒီ ကွယ် ခဲင် ကာင် အီ ဟဲ့ ရာမ် ဟဲ့ ကာပျာတ့်။

3 ပန် အန် တီ ဇဝ်ဖြာ ဒီ ဘော လေး ဒူင် ကွယ် အန်၊ ကာဂုဝ်း ဒီ ဂေ ဒူအီ ဒွန် ဇိုဝ် ဒွန် မျုဝ်၊ တဲး န့ ပီ ဒေါ ဟဲ့ ကာဂုဝ်း အန် ဒေါ မွိုန်။ 4 ဆီငဲ တီ ပ့လဝ် အန် ဇဝ် ဒီ ဘော စွင့် ဒဲင် နွန် ဟေ နာမန် အီ ကွယ် ဘ့လာက် နာ လေး ဆီငဲ ဒီ မိူင် ယေရူဆာလဲမ်။ နွန် ဟေ နာမန် ဒီ ဘော ဒး ဒီ ကာတဲ အန်၊ တဲး န့ ဘဲန် ဒီလယ့် အီ စုး ဘ့လာက် နာ လေး ဆီငဲ ကော ဇမ် နာ ဂေတ့် ဆီငဲ။ ခုဝ်၊ နွန် တီ အာဒါ အူ ကာတဲ ဒီ ဘော ကာထုဝ့် ဟာဝ် ဘ့လာက် နာ ကွာ။ နွန် ပေါ အူ ကာတဲ ဒီ ကာထုဝ့် ဟာဝ် ဘ့လာက် နာ တေတ့်။ 5 ဘေ ဒီ ဘော ပွိုန် ဒီ တဝ် ဟာဝ် ဒူပ် န့တေန့် ခဲင် ဒီလယ့် တီ။ ခုဝ်၊ န့ ဒီ ဇမ် ဒီ ဒူင် စိူဝ် အာဇီလာ။ ဘေ ဒီ ဘော ကာဒုး ဒီ တဝ် ဒီ မာအိမ် ယေန့် အီ ဒီ တး ပီ ဒေါ မုး စုဝ် ခုန်ဒီခမ် အာအူဇီယာ အီ အိုပ် မိူင် ယူဒါ။ ဒေါ အန် တီ ဇဝ်ဖြာ အီ မုး ဇဝ်ဖြာ ပီ ကြိုပ် အုဝ်၊ အန် ဒီ ဘော တး ဘော ဂေ ဒူအီ အန် ဘောကာဂ့လျီတ် အီ ဆီငါ ဘွတ်၊ ဂေ ဒီ တး ဒူပ် အန်။

6 ဆီငဲ တီ၊ အာဝ် မိုဝ်း ဘ့လာင် ဆီငဲ။ အာဝ် မိုဝ်း ဂတ် ဂျီတ်။ 7 န့ ဒီ ဘဲန် တူတ့် ကာတဲ ဆီငဲ။ ဟဲ့ ဇမ် ဘာ ဒီ အပ် န့ ဆီ နဲ့ မိုဝ်း ဘ့လာင်။

8 အာခြာဝ် ဒေါ အန် တီ အိုမ် အီ ဒွါ အာဆာက် ဒီ ဘော တုဝ်း လေး ခဲင် မိူင် ယေရူဆာလဲမ်။ ဘော မုး အာခြာဝ် မှဲ အာဝ် တဝ်း၊ အာခြာဝ် ဂတ် အာဝ် တဝ်း၊ အာဒါ အူ ကာတဲ ဒီ ဘော လှဲ ဟာဝ် ဒီ အိုမ် ဒိုင် ဆယ့် ဆွင့် ဘ့လာက် နာ လေး ဆီငဲ။ ပေါ အူ ကာတဲ ဒီ ဘော လှဲ ဟာဝ် ဒီ အိုမ် နမ်မုက်ဆာရာ ဘ့လာက် နာ ဂေတ့် ဆီငဲ။

9 ဇဝ်ဖြာ ဒီ ဘော ဘဲန် ခုန်ဒီခမ် အီ အိုပ် တူတ့် ဒွန် မျုဝ် ဒဲင် ကာဒါယ်။ ဆီငဲ ဒေါ အန် တီ န့ ဘော မုး အန် ဇဝ် အူ ကာဒင် ပီ ကြိုပ် ဂေ ဒူအီ။ ဂေ ဒီ ဂါဝ် မီ ပွုန် အန် ဇဝ် အူ ကာဒင် တီ။

10 မိူင် ပီ အိုပ် အန် ဇဝ် ဘော မိူင်၊ န့ ဒီ ဘော ဂ့လင် ဆီချာ။ ဂ့လင် တီ စုး ဒီ မိူင် ဂီဘာ ကော ဝီ ဇမ် ဒီ မိူင် ရိမ်မူန် အီ ကွယ် ဘ့လာက် နာ တေတ့် မိူင် ယေရူဆာလဲမ်။ မိူင် ယေရူဆာလဲမ် ဂေ ဒီ ဘော မ့ပြာယ် ဒူင် ဘြိမ် အန်။ န့ ဘော စုး ဒီ မာလုဝ်း အာဘေန်ယာမ် ကော ဝီ ဇမ် ဒီ မာလုဝ်း ဘြိမ်။ ဟဲ့ ဟွတ့် န့ ဒီ ဘော ဇမ် ဒီ မာလုဝ်း ဒီ ကာတုဝ့် ရဲင်၊ ဇမ် ဘော ဒီ ဒူင် စာ ဒူင် ချြီင် ဂေ ဒါ ဆိုက် အီ စိူဝ် ဒူင် စာ စီဟာနာနေလာ ကော ဝီ ဇမ် ဒီ ဒူင် ကြိတ် အီ ဘ့လေ မာငုန် ခုန်ဒီခမ်။ 11 ဝါယ် အန် တီ ဂေ ဒူအီ ဒီ ဘော ဝီ တး ကွယ် ခဲင် မိူင် ယေရူဆာလဲမ်။ ဂေ မိူဝ် ပွိုန် ကွယ် ဆီချာ အာဝ် ဟူ လုဝ် ခမ် အာဖေ အာရေ ဘော ဂြုဝ်း ပီ ဒိူင် အီ။

12 ဂေ ဒူအီ ဘောကာဂ့လျီတ် အီ ဟဲ့ ဒွိုမ် တး ကာဂုဝ်း ဒီ ဂေ ဒူအီ ခဲင် မိူင် ယေရူဆာလဲမ်၊ ဇဝ်ဖြာ ဒီ တဲး ဂေ ခမ် ဆဝ် ရောဂါ။ ဒူအီ ဂေ တီ ဂေ ဒီ ဆဝ် ပီ ယင် ဂေ အမ် လာတ့် ဒေါ ဆီ အိမ် ဂေ။ ခေါ ငါယ် ဂေ ဒီ ဘော အမ် လာတ့် ခဲင် ကာဒဝ် ငါယ် ဂေ။ ဆီဒ ဂေ မိူဝ် ဒီ ဘော အမ် လာတ့် ခဲင် မူတ့် ဂေ။ 13 ဒေါ အန် တီ ဇဝ်ဖြာ ဒီ ဘော တဲး ဂေ ဒတ် ဆီနန် ဆီနိူင် ဘော ယုဝ် ကာဆဝ်။ ဂေ ဒီ ဝီ လာယ် မှေတ့် လာယ် ကာမး ရာင် ဂေ။ 14 ဂေ ဒူအီ အာယူဒါ ဒီ ဘော ကာဂုဝ်း ဒီ ဒူအီ ခဲင် မိူင် ယေရူဆာလဲမ်။ ကြုဝ်ကြာမ် ဂေ ဒူအီ အာမျုဝ် ဟဝ် အီ ကွယ် ခူပ် ဂေ ဒူအီ အာယူဒါ ဘော ဒူအီ ခဲင် မိူင် ယေရူဆာလဲမ် ဒီ ဖာတ် ဒိုဝ်း ကိူန်။ န့ ဘော မုး ခြိဝ် ဘော ရွိုန် ကိူန် ကာဆဝ် ဘော ခြိုင် တာ အီ စှိတ် ကာဆဝ်။ 15 ဆဝ် ရောဂါ ပီ ဒီ ဒမ် ဇဝ်ဖြာ ဒီ ရန်ဆူ ဒီ ဘော ဒိုက် ဒီ မင်ပြွင့် ဂေ မာလာ၊ မင်ပြွင့် ကာဟာတ့်၊ မာလုဝ် ဘော ဒုဝ် ဆတ်ဒါဝါ ဘောကာဂ့လျီတ် အီ ကွယ် ဒူပ် ရန်ဆူ ဂေ။

16 ဝါယ် အန် တီ၊ ဂေ ရန်ဆူ အီ တး ကာဂုဝ်း ဒီ မိူင် ယေရူဆာလဲမ် ဂေ အီ ဟဲ့ ကဲန် ဒီ ဆဝ် ရောဂါ တီ၊ ဂေ ဒီ ဟာဝ် ခဲင် မိူင် ယေရူဆာလဲမ် ဒွန် ဆီနမ် ဒွန် ဆီနမ်၊ တဲး ဂေ ကြိုပ် ခုန်ဒီခမ် အီ မုး ဇဝ်ဖြာ အီ အိုပ် တူတ့် ဒွန် မျုဝ်။ ဂေ ဘူင် ဘ့လွယ် အီ လုဝ် ကွယ် ခဲင် ထိုပ်။ 17 ဆေ ဒူအီ တူ တး ဒီ မိူင် ယေရူဆာလဲမ် ဒီ ကြိုပ် ခုန်ဒီခမ် အီ မုး ဇဝ်ဖြာ အီ အိုပ် တူတ့် ဒွန် မျုဝ်၊ ဂ့လာယ် တူ စုဝ်း ခဲင် ကာဒါယ် မိူင် ဂေ တီ။ 18 ဆေ ဂေ ဒူအီ ခဲင် မိူင် အဲဂိုပ် ယီ တူ တး လိုပ် ဘ့လွယ် တီ၊ ဇဝ်ဖြာ ဒီ တဲး ဂေ မိုဝ်း ဆဝ် ရောဂါ ပီ ပဲ့ ဟဲ့ ဒွါ အန် ဒီ ဂေ ဒူအီ ဒွန် မျုဝ် အီ တူ တး လိုပ် ဘ့လွယ် တီ။ 19 မိူင် အဲဂိုပ် ဘော ဂေ အီ တူ တး လိုပ် ဘ့လွယ် တီ၊ ဂေ လုဝ် ခမ် မှာပ် ဂေ။

20 ဆီငဲ တီ၊ န့ ဒီ ဘော မိုဝ်း ဒုဝ် ပဲ့ အီ ဒဲမ် ဒိုက် ဒီ ဟိင် အီ ဟွယ် ဒီ မဲင် မင်ပြွင့် တဝ်း၊ “ဟဲ့ ဆီငါ ဘွတ် ဒီ အာတ့် ဇဝ်ဖြာ။” ဘော ကာလုဝ့် အီ ကွယ် ခဲင် ဟုဝ် ဇဝ်ဖြာ ဒီ ဆီငါ ဘွတ် ပီ ဆီလယ့် အီ ကွယ် ဒီ ကာစှူင့် လှူ။ 21 အာဝ် ဝန် ခဲ့ တီ။ ကာလုဝ့် အီ ကွယ် ခဲင် မိူင် ယေရူဆာလဲမ် ဘော ခဲင် မိူင် ယူဒါ၊ ဂေ ဘောကာဂ့လျီတ် ဒီ ဆီငါ ဘွတ် ဒီ အာတ့် ဇဝ်ဖြာ အီ အိုပ် တူတ့် ဒွန် မျုဝ်။ ခဲ့ ကွယ် ဂေ အီ တး လှူ ဒီ ဇဝ်ဖြာ၊ ဂေ ဒီ ဘော ပွိုန် တး ဒိုဝ်း ကာလုဝ့် ဂေ တီ၊ ဝီ ဒင် ပီ ဒီ လှူ ဂေ။ စုး ဆိန့် ဆီငဲ တီ၊ အာဝ် မိုဝ်း အီ တး ကာစိုဝ်း ကာယွင့် ခဲင် ဟုဝ် ဇဝ်ဖြာ အီ မုး ဇဝ်ဖြာ အီ အိုပ် တူတ့် ဒွန် မျုဝ်။