အိုယ် ဘေ အီ ကွယ် ဒီ ဒူင် စိူဝ် လေဘာနုန်၊ တဲး ဘေ ဝိုဝ်း မာလုဝ်း မိူင် ဘေ၊ တဲး ငဝ် ပွိုန် ဒီ လိုပ် ကာဆိုမ် ဟေ အာရိတ်။

2 အိုယ် ဘေ အီ ပီ ဟေ န့ကေ၊ တဲး ဘေ ယာမ် ဘော ငှုန် ကူပ် ဟဲ့ ကေး တူတ့် ဟေ အာရိတ် ဂေ တီ။ ဟေ အီ ဘွတ် အီ မွှိုမ် ဟဲ့ ဟွတ့် လိုဝ် ကာပျာတ့် တူတ့်။ အိုယ် ဘေ အီ ပီ ဟေ ထေရေပ် အီ ကွယ် မိူင် ဘာဆန်၊ တဲး ဘေ က့လိုဝ် ဘော ငှုန် ကူပ် နင် ဟေ အီ ဟဲ့ ကာဒန် ကာဆဝ်၊ ဟဲ့ ဟွတ့် ဂ်ု ကေး တူတ့်။

3 တဲး ဘေ ထူမ် ဂြုဝ်း ပီ ငှုန် ဂေ ဒါ အီ ဟျီင် မာဘူ ကူပ် ဟဲ့ စှိုမ် ကြုဝ်ကြာမ် ဂေ။ တဲး ဘေ ထူမ် ဟမ် မာခြင်ဆီ နှိုမ်။ အန် ဟဲ့ ဒတ် ရျီင် ကူပ် ကာပ့လုယ် ဂေ န့လုဝ်း ဟေ ဒူပ် ဘ့လဲင် ယောဒါန် ဟဲ့ ဟွတ့် လိုဝ် တူတ့်။

4 ဇဝ်ဖြာ ပီ ကြိုပ် အုဝ် ဝီ ကာလာင် ဒီ အုဝ်။ အန် တဝ်း၊ “တဲး မဲ ယွတ် လိုမ်လာ ဖိုင် မာဘူ ပီ ဒီ ငဝ်း ယမ် ဂေ။ 5 ဂေ ဒါ အီ စိုဝ်း မာဘူ ဂေ တီ ဂေ မိူဝ် တူ မိုဝ်း နဝ်း ကာဝေ။ ဂေ ဒါ အီ ယွင့် မိူဝ် တဝ်း၊ ‘ယေ ဟဲ့ ခြမ် ယေ ဟဲ့ မိုဝ်း ကိူန်။ ခုဝ်၊ ယေ အိူပ် ဇဝ်ဖြာ။’ ပါယ် တီ ဒါ အီ ယွတ် မဲန် ဒူအီ ခဲင် မိူင် တီ၊ ဂေ တူ မိုဝ်း နဝ်း ကာဝေ ခေါ အီ စဲက်။ 6 ဇဝ်ဖြာ ပီ ဝီ တဝ်း၊ ဝါယ် အန် တီ အုဝ် မိူဝ် အာဝ် ဟူ မိုဝ်း နဝ်း ကာဝေ ဂေ ဒူအီ ခဲင် ရဝ် ခဲင် မိူင် အုဝ်။ အုဝ် ဒီ ဝီ အာပ် ဂေ ဒီ ဒူအီ အီ ကွယ် ကာတတ် ဂေ ဘော ဒီ ခုန်ဒီခမ် အီ အိုပ် ဂေ။ ခုန်ဒီခမ် တီ ဒီ ဘော ခါနှာပ် ဂေ ဒူအီ ဘော မာန် ဘော မိူင်။ အုဝ် မိူဝ် တူ တဲး ဂေ ပွိုန် ဒီ လွတ် ဒီ ခုန်ဒီခမ် တီ။

7 ပါယ် တီ အုဝ် ဟဲ့ ဟျီင် ယွတ် လိုမ်လာ ဖိုင် မာဘူ ပီ ဒီ ဟာဝ် ငဝ်း ယမ် ဂေ တီ။ အုဝ် မိူဝ် ဟဲ့ ဒိုဝ်း မ့ဖျီ့ အာ ညွင့် ဘော ဝဲတ် မာဘူ ဂေ တီ။ အာဒါ အူ ညွင့် အုဝ် ဟဲ့ တဲး န့ စိူဝ် “အီ နပ် ဒီ ဘူင် ဂေဇူ။” အာဒါ ပေါ အူ ညွင့် န့ ဘော စိူဝ်၊ “လွင် အီ ဘဲန် ဖိုင်။” အုဝ် ဘော ဟျီင် မာဘူ ဂေ တီ။ 8 အုဝ် မိူဝ် ဟဲ့ ဒိုဝ်း လေး ဂေ ဒါ အီ ဟျီင် မာဘူ အူယ် ဝီ ဒေါ မုး အူ မာဂျီန်။ ကူပ် အာဝ် ပဲ ခမ် အုဝ် ဒီ ယိူန် ဒီ ဂေ၊ ဂေ မိူဝ် ဟဲ့ ကာအိး အုဝ်။ 9 အုဝ် မိူဝ် ဟဲ့ တဝ်း ဒီ ဂေ၊ “အုဝ် အာဝ် ဟူ ဘဲန် ဒါ အီ ဟျီင် မာဘူ။ ဆေ ဒုဝ် မှဝ် လုဝ် ယမ်၊ တဲး ဂေ ယမ်။ ဒုဝ် အီ ဒီ လိုဝ် စှိုမ်၊ တဲး ဂေ လိုဝ် စှိုမ်။ ဂေ အီ ဆီ ဂိတ် ဆီ ကွယ်၊ တဲး ဂေ ဝီ လာယ် ကာကဝ့် လာယ် ဟူမ် ယင် ဂေ။”

10 အုဝ် မိူဝ် ဟဲ့ ဒိုဝ်း မ့ဖျီ့ အုဝ် အီ စိူဝ် “အီ နပ် ဒီ ဘူင် ဂေဇူ ဒီ အီ” ဟဲ့ ကာဘက် ဝဲန်၊ တဲး ကာဒိက် ဆတ်ဇာ ပဲ့ ဟဲ့ ဒွိုမ် ဒွါ အုဝ် ဒီ ဂေ ဒူအီ ကိူန် လိုဝ် တူတ့်။ 11 ကူပ် ဟဲ့ လိုဝ် ကာဒိက် ဆတ်ဇာ ဆီငဲ တီ၊ ဂေ ဒါ အီ စိုဝ်း ဒီ ယွင့် မာဘူ၊ ဂေ ဒီ ဘော နပ် ပီ ဘျ အုဝ် ဒီ ဂေ ဟဲ့ မုး ဂြုဝ်း ဇဝ်ဖြာ။

12 အုဝ် ပီ ဝီ ကာလာင် ဒီ ဂေ တဝ်း၊ “ဆေ ဘေ ထာင် ဟဲ့ ကာအာပ် ဒွါ ရုး အန် ဒီ အုဝ်၊ တဲး ဘေ ဒွါ။ ဆေ ဘေ ယီ ထာင် အာဝ် ကာအာပ် ဒွါ၊ ကွဲ့ တဲး ဘေ ဒွါ။” အုဝ် ဟဲ့ ဟွတ့် တဝ်း ပါယ် တီ ဂေ မိူဝ် ဝီ ဆ ရွိုန် အာဒါ အူယ် ဂိုဝ် ဘူင့်၊ ဝီ ဒွါ တဲး န့ ဘဲန် ရုး ပီ ဒွါ ဂေ ဒီ အုဝ်။

13 ဇဝ်ဖြာ ပီ ဝီ တဝ်း ဒီ အုဝ်၊ “တဲး မဲ ဒိုဝ်း ရွိုန် တီ၊ ပီ မာတ် ဂေ မုး ငဝ်း မဲ ဘော ဒွါ ဒီ ဒူအီ အီ ဘူင် ကာလုဝ့် ကာဒါယ်၊ ဟပ် အုန် ခဲင် ဇီဒိူက် ဇဝ်ဖြာ။” ပါယ် တီ အုဝ် မိူဝ် ဝီ ဒိုဝ်း ရွိုန် အူယ် ဂိုဝ် ဘူင့် ပဲ့ ဟဲ့ မာတ် ဂေ ငဝ်း အုဝ်၊ ပဲ့ ဟဲ့ ဆုင်ဖျာတ် ဂေ တဲး န့ ဘဲန် ရုး ပီ ဒွါ ဂေ ဒီ အုဝ်။ အုဝ် ဝီ ဟပ် ရွိုန် တီ ခဲင် ဇီဒိူက် ဒါ အီ ဘူင် ကာလုဝ့် ကာဒါယ် အီ ကွယ် ခဲင် ဟုဝ် ဇဝ်ဖြာ။

14 ဒေါ အန် တီ အုဝ် ဘော ဝီ ကာဘက် မ့ဖျီ့ အုဝ် ပေါ အူ ညွင့် အီ စိူဝ် “လွင် အီ ဘဲန် ဖိုင်။” ပါယ် တီ ဟဲ့ ပျာတ့် ဝဲန် လွင် လာယ် ဘဲန် ဂေ ဒူအီ အာယူဒါ ဘော ဒူအီ အီဆာရေလ အူ ဂိုက်။

15 ဇဝ်ဖြာ ပီ ဝီ တဝ်း ဒီ အုဝ်၊ “တဲး မဲ ဝီ ဒိုဝ်း ခြိုင် တာ ဂေ ဒါ အီ ဟျီင် မာဘူ အီ တူ မိုဝ်း အာငျာန်။ 16 ခုဝ်၊ အုဝ် ဒီ ဝီ တဲး န့ မိုဝ်း ဒါ အီ ဟျီင် မာဘူ အူ ဝီ အီ တး ကွယ် ခဲင် မိူင် တီ။ အန် မိူဝ် တူ ယွတ် မဲန် ဒုဝ် အီ ဟဲ့ ကာတတ် ဒီ ယမ်။ အန် မိူဝ် တူ ဝီ ဟြေတ့် ဒုဝ် အီ ဒီတဲတ်။ အန် မိူဝ် တူ ဆီနမ် ဒုဝ် အီ ဆဝ် အီ ဒိမ်၊ တဲး ဆဝ် ဂေ ဒိမ် ဂေ ကဲန်။ အန် မိူဝ် တူ ယွတ် လိုမ်လာ ဒုဝ် အီ ဟဲ့ ဂ့လန့် ဆီချာ။ အန် ဒီ ဘော ငဝ်း ဟူမ် ယင် ဒုဝ် အီ ဟဲ့ ဂ့လန့် ဆီချာ လွှိုမ် ဒုဝ် ဟဝ်၊ တဲး န့ ကော ဇမ် ဂိပ် ဂေ။

17 ဒါ အီ ဟျီင် မာဘူ အီ တူ မိုဝ်း ဒီခုဝ်၊ အီ ဟဲ့ ဘ့လေး ဝဲန် မာဘူ ဂေ တီ၊ အန် ဒီ ဇမ် ဒုက် တာင်။ တဲး အန် ခမ် အီ ဒဲပ် ဒဲ ဘော ငါယ် အန် ဘ့လာက် အာအး၊ တာ မာပွါ့ လာင်။ ဒဲ အန် တီ၊ န့ ဒီ ဘော ဟျီ့ ကာဟဝ်း။ ငါယ် အန် ဘ့လာက် အာအး မိူဝ် ဒီ ဘော အပ် ဝွင့် တူတ့်။”