1 တဲး ဘေ ဆာခိုဝ် မှာန့် ဒီ ဇဝ်ဖြာ၊ တဲး ဂ့လာယ် စုဝ်း ဒေါ မုး အာခြာဝ် ဒီယာင်။ အန် မုး ဇဝ်ဖြာ အီ တဲး ဂ့လာယ် စုဝ်း၊ တဲး ပေတ့် ဂေ ပြဲ လတ့် ခဲင် မာန် ဘော ခဲင် ဒူင် နာ တဲး န့ ဂ့လိုမ် အာဒါ ဒူအီ ဒွန် အီ။

2 အာရိုပ် ရာင် ဘော ကာလာင် ဂြုဝ်း အီ တူ မိုဝ်း ဒီခုဝ်။ ဒါ ဆာရာ ဘေဒါင် ဘော ယိုဝ် မီ အီ တူ မှာန် အီ ကာလုဝ်။ ဘော ဂေ ဒူအီ အီ နပ် ဒီ ကာလာင် ဆီဖဝ် ဂေ အီ အိတ် မ့ဘာဝ်၊ ဂေ ကာလာင် မီ အီ တူ မုး အီ တူ မှာန်။ ခုဝ်၊ ဂေ ဒူအီ ကိူန် ဘော ဟာဝ် ဟာဝ် တး တး ပီ ဖိုင် မာဘူ အီ တူ နပ် န့တေန့်။ ဂေ ဘော လုဝ် ခမ် ဒုက် ကူပ် အာဝ် မိုဝ်း ဒါ အီ ယွတ် မဲန် ဂေ။

3 အုဝ် ဒီ ဘော ရူ ကာဆဝ် ဒီ ဂေ ဒါ အီ ဟျီင် မာဘူ တီ။ အုဝ် ဒီ ဒမ် မှာပ် ဒီ ဂေ ဒါ အီ ယဲတ့် ဂေ တီ။ ခုဝ်၊ ဇဝ်ဖြာ အီ အိုပ် တူတ့် ဒွန် မျုဝ် ဟဲ့ တး ယွတ် မဲန် ဂေ ဒူအီ ခြိုဝ် ယူဒါ အီ ပီ မာဘူ အန်၊ အန် ဒီ တဲး ဂေ ဝီ ပီ မ့ပြွင့် ဒါ ဆိုက် အီ ဟဲ့ မိုဝ်း ပ့လူမ် မိုဝ်း ဟဲန့်၊ မိုဝ်း ဘော အာဖုင် ဒင်ခုဝ်။

4 ဝီ အီ ဒီ အိုပ် အီ အီ ပီ စေန့် ရွင့်။ ဝီ အီ ဒီ ဘဲန် ပီ လွှက့် ထိုပ် ဘော ဒါ တာင် အီ အိုပ် မိူင်၊ ဂေ တး ခဲင် အာမျုဝ် ဒူအီ အာယူဒါ။

5 ဂေ ဒီ ဘော ပီ ဒါ ဆိုက် အီ မိုဝ်း ပ့လူမ် တာင် ဘော ပွိုန် ဒီ ညဲတ့် ဖူဖ့လမ် ရန်ဆူ ဂေ ပီ အီ ညဲတ့် ညုဝ့် ဒူပ် န့တေန့်။ ဂေ ဒီ ဘော ပွိုန် ကာဂုဝ်း ဒီ ဒါ ဆိုက် ကူပ် ဇဝ်ဖြာ ဟဲ့ ကွယ် ရိုမ် ဒူပ် ဂေ။ တဲး ဂေ ရန်ဆူ အီ ပဝ့် မင်ပြွင့် စှိုမ်။

6 “အုဝ် ဒီ ဘော ဘူင် တဲး ဂေ ဒူအီ အာယူဒါ ဝီ မန် ဆီချာ၊ ဘော ချွတ် ဂေ ဒူအီ အီဆာရေလ။ ကူပ် ရွက့် အုဝ် ဒီ ဂေ အုဝ် ဒီ ဘော ဝီ ဒိုဝ်း တး ဂေ။ ဂေ ဒီ ဘော ပီ ဒူအီ ပီ တူ ဒွိုမ် ရူ အုဝ် ဒီ ဂေ။ ခုဝ်၊ အုဝ် ဘော မုး ဇဝ်ဖြာ ပီ ကြိုပ် ဂေ။ အုဝ် ဘော ထူမ် ပီ မှာန့် ဂေ။

7 ဂေ ဒူအီ အာမျုဝ် အီဆာရေလ ဂေ ဘော ပီ ဒါ ဆိုက် အီ မိုဝ်း ပ့လူမ် တာင်။ နဝ်း ဂေ ဒီ ဘော ဘျုဝ် ဒါခိုယ် ပီ ဒူအီ အီ ဟဲ့ ယိုတ့် အိုမ် မာငုန်။ ဘော ဂွန် ဂေ ဝီ ယိုဝ် ဘော ခူယ် ကာဆဝ်။ နဝ်း ဂေ ဒီ ခူယ် ဘော အိူပ် ဇဝ်ဖြာ။

8 အုဝ် ဒီ ဘော ဒတ် ဒဲ့ တဲး ဂေ တး ကွယ် ကာဇု ကာဒိုမ်။ ခုဝ်၊ အုဝ် ဟဲ့ ဟွတ့် ထုတ် လေး ဂေ။ ဂေ ဒီ ဘော ကြဲ ဒီ ဝီ ကိူန် ပီ ဒေါ မွိုန် ဒေါ မိုဝ်း ကိူန် ကာဆဝ် ဂေ။

9 အုဝ် ပီ ဘော ဟဲ့ တဲး ဂေ ကွယ် ကာယဝ်း ကာရေး ကာတဲ ဒူအီ အာမျုဝ် ဟဝ် တဲး န့ ပီ အုဝ် ဟဲ့ ဘြတ် ဂေ မိူဝ်၊ ဂေ ဒီ ဘော နမ်လှုဝ်း အုဝ် ဒေါ ကွယ် ဂေ ခဲင် မိူင် တူင့် တီ။ ဂေ ဒီ ဘော ကွယ် ရိုမ် ဒူပ် ဂွန် ဂေ၊ တး ကွယ် ခဲင် မိူင် အီဆာရေလ။

10 အုဝ် တဲး ဂေ လေး ခဲင် မိူင် အဲဂိုပ် ဘော ခဲင် မိူင် အာဆူရီယာ၊ တဲး ဂေ ဝီ တး ကွယ် ကာဇု ကာဒိုမ် ခဲင် မိူင် ဂီလေအာတ် ဘော ဒဲင် နွန် လေဘာနုန်။ ဒူင် ဒီ ကွယ် ဂေ တီ၊ န့ ကော ဟူ ဂ့လိုမ် အာဒါ ဂေ အီ ကိူန်။

11 ဂေ ဒီ ဘော ကာလုဝ်း ဟာဝ် ကာတဲ အိုမ် နမ်မုက်ဆာရာ ဘော ခမ် ဒုက်။ အန် ဇဝ် ဒီ ဘော ရဲ အိုမ် ခဲင် ဘ့လဲင် နီလာ တဲး န့ ကာယဝ်း။ ဂေ ဒူအီ အာဆူရီယာ အီ ဟဲ့ ပီခိုက် ကာဆဝ် ဂေ ဒီ ဝီ စုဝ်း တျီမ်။ ဂ့လွင့် လျီး ပီ တာ ဂေ ဒူအီ အဲဂိုပ် မိူဝ်၊ န့ ဒီ ဘော ဘျုဝ်း။

12 အုဝ် ဒီ ဘူင် တဲး ဂေ ဒူအီ ပီ အိုပ် အုဝ် မိုဝ်း ပ့လူမ် မိုဝ်း ဟဲန့်၊ တဲး ဂေ ဘော ဒူပ် အုဝ်။” ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။