1 ဇဝ်ဖြာ ကာလာင် ဂြုဝ်း လွင် ဒီ ဆုင်ဖျာတ် အာမူ ဂေ ဒူအီ ခဲင် မိူင် ဟာတာရက်၊ အီ ကွယ် ခဲင် မိူင် ဒါမာခူ။ ခုဝ်၊ ဒူအီ ဘောကာဂ့လျီတ် အီ ကွယ် ခဲင် ကာဒါယ် ဒူအီ အီဆာရေလ ဘော ယွတ် ပီ ဘူင် ဇဝ်ဖြာ။

2 မိူင် ဟာမာတ် အီ ဟဲ့ ကွယ် ချြီ့ မိူင် ဒါမာခူ၊ မိူင် ထူရုဝ် ဘော မိူင် ဆီဒူန်၊ ဂေ အီ ဟဲ့ လွှက့် ကာဆဝ်၊ အန် ဇဝ် ဒီ ဘူင် တဲး ဂေ ကာပျာတ့် တူတ့်။

3 မိူင် ထူရုဝ် ပီ ဘော ဟဲ့ ဘူင် ဒူင် ဒီ ချြီင် ဒါ ဆိုက် အီ ဟဲ့ မန် ဆီချာ၊ ဟဲ့ ဒိုဝ်း ကာဇု ရွိုန် ဂေ ခြိဝ်၊ တဲး န့ ခြေ ပီ မ့ပိုမ် ကာပုး အီ ကွယ် ဒူပ် န့တေန့်။

4 ဇဝ်ဖြာ ဒီ ဘော ဒိုဝ်း ဝဲန် ရွိုန် ဂေ ခြိဝ် တီ။ အန် ဒီ ဘော ဒိုဝ်း ခြမ် ဂေ တီ ဘော ဒူင် ချြီင် ဒါ ဆိုက် ဂေ၊ ဝိုန့် ဝဲန် ခဲင် အိုမ် နမ်မုက်ဆာရာ။ အန် တဲး အီ ဒုဝ့် ကာဆိုမ် မိူင် ထူရုဝ်၊ တဲး န့ ဟြာယ် တူတ့်။

5 ဂေ ဒူအီ အီ ကွယ် ခဲင် မိူင် အာဆာခေလူန်၊ ဂေ ဟီ ယိုဝ် လွင် အန် တီ၊ ဂေ ဒီ ဘော ယုဝ် ကာဆဝ်။ ဂေ အီ ကွယ် ခဲင် မိူင် ဂါဆာ ဟီ ယိုဝ်၊ ဂေ ဒီ ယုဝ် ဒီယုး ဒီယေန့်။ မိူင် အေခြူန် ဒီ ဘော ဘဲန် ပါယ် တီ။ ခုဝ်၊ အာဝ် မိုဝ်း မာဆေ ပီ နှဝ့် န့ဒဝ့် ဂေ။ ဂေ ဒီ ငဝ်း ယမ် ခုန်ဒီခမ် တာင် ဘော မိူင် ဂါဆာ ဒီ လိုဝ် စှိုမ်။ မိူင် အာဆာခေလူန် ဒီ ဘော ဘဲန် ဒူင် ယေန် ဒူင် ငွင့် ဒူအီ။

6 ဂေ ဒူအီ ခဲင် မိူင် ဟဝ် ဒီ ဘော တး ကွယ် ခဲင် မိူင် အာစုတ်။ ပါယ် တီ အုဝ် ဒီ ဘော ဒိုဝ်း ဝဲန် နဝ်း ပီခိုက် ဂေ ဒူအီ ဖီလီထီ။

7 ဂေ အာဝ် ဟူ ဟူမ် ယင် အီ ဆီ မိုဝ်း နှာမ် ဘော တူ ဟူမ် ပီ ဒီ ဟူမ် ပီ တူ တဲး ဇဝ်ဖြာ အီ ဟူမ်။ ဂေ ဒူအီ ဖီလီထီ အီ ဆီ ဂိတ် ဆီ ကွယ်၊ ဂေ ဒီ ဘော ပီ ဒူအီ အာယူဒါ။ ဘော ဒူအီ ဖီလီထီ အီ ကွယ် ခဲင် မိူင် အေခြူန် ဂေ ဒီ ဘော ပီ ဒူအီ ပီ အိုပ် အုဝ်၊ တဲး ဂေ ပီ ဒူအီ ယေဘူဆိတ် အီ ဟဲ့ ဒွိုမ် ဒူပ် ဒူအီ အီဆာရေလ။

8 အုဝ် ဒီ ဘော ဘ်ု ဟုဝ် ဇဝ်ဖြာ၊ ကွဲ့ တဲး ရန်ဆူ တး လိုပ်။ အုဝ် ဒီ ဘ်ု ဆီချာ၊ ကွဲ့ တဲး န့ ဆီ မိုဝ်း အီ ဟဝ် လိုပ်။ ဂေ အီ ဆီ ခါနှာပ် ဒူအီ ပီ အိုပ် အုဝ်၊ ဂေ အာဝ် ပွိုန် တး ပေါ အူ ဇေန့်။ ခုဝ်၊ န့ မုး အုဝ် အီ ဒီ ယွတ် မဲန် ဂေ။

9 အိုယ် ဘေ ဒူအီ အီ ကွယ် နွန် ဇီအူန်၊ တဲး ဘေ ဘျုဝ် ဒါခိုယ် ကာဆဝ်။ အိုယ် ဘေ ဒူအီ အီ ကွယ် ခဲင် မိူင် ယေရူဆာလဲမ်၊ တဲး ဘေ ဒတ် တာင် ကူပ် ခုန်ဒီခမ် ကာမာယ် အီ ဒီ အိုပ် ဘေ၊ အီ ဒီ တး ဒူင် ကွယ် ဘေ။ အန် မိုဝ်း နဝ်း ဆိူဝ် နဝ်း မှာန် ဘော ချွတ် ဘေ။ အန် ယီ မိုဝ်း နဝ်း တျီမ် ဘော ပဝ့် မာလာ ဘော ဂွန် မာလာ ဒေါ တး အန် ဒူင် ကွယ် ဘေ။

10 အုဝ် ဒီ ဒိုဝ်း ဝဲန် လက်လဝ် ဂေ ဒါ ဆိုက် ခဲင် မိူင် အီဆာရေလ။ အုဝ် ဒီ ဒိုဝ်း ဝဲန် မ့ပြွင့် ပီ ပဝ့် ဂေ ဒါ ဆိုက် ခဲင် မိူင် ယေရူဆာလဲမ်။ အုဝ် ဒီ ဒိုဝ်း ဝဲန် ခြိုင် ကာဂုဝ်း ဒီ ဂေ ဒါ ဆိုက်။ ခုန်ဒီခမ် ကာမာယ် အီ ဒီ အိုပ် ဘေ၊ အန် ဒီ တဲး ဂေ ဒူအီ ဒွန် မျုဝ် ပွိုန် ကွယ် ယေန် ဒါခိုယ်။ မိူင် ပီ အိုပ် အန် ဒီ စုး ဒီ အိုမ် နမ်မုက်ဆာရာ အူ ဘ့လာက် ဝီ ဇမ် ဒီ အိုမ် နမ်မုက်ဆာရာ ပေါ အူ ဘ့လာက်။ န့ ဘော စုး ဒီ ဘ့လဲင် အိုမ် အူဖာရာတ် ကော ဝီ ဟာဝ် ဇမ် ဒူင် ဆိူတ် ကာဒါယ်။

11 အီ မုး အာဒါ ဘေ၊ အုဝ် ဟဲ့ ဒွါ ကာဒိက် ဆတ်ဇာ ဘော လှူ နှာမ် ဒုဝ် ဆတ်ဒါဝါ။ ခုဝ်၊ အုဝ် ဒီ ဘူင် ပီ ကာဆဲန့် အုဝ် တီ။ အုဝ် ဒီ တဲး ဂေ ဝီ လွတ် ခဲင် ကာပိုမ်၊ တဲး န့ ပီ ဂေ လေး ခဲင် အိုမ် ခိုမ် ကာဟဝ်း။

12 အိုယ် ဘေ ဒူအီ ပဲ့ ဟဲ့ မှေတ့် ခြွင့် ရန်ဆူ၊ တဲး ဘေ ဝီ တး ဒူင် ချြီင် ဂေ ဒါ ဆိုက်။ ခုဝ်၊ န့ ဆီ မိုဝ်း ပီ နှဝ့် န့ဒဝ့်။ အုဝ် ကာလာင် အုန် ဒီ ဘေ အာတိုဝ် နီ၊ အုဝ် ဒီ ဝီ ဘူင် တဲး န့ ဘဲန် ဂေဇူ အာ ဘုန် ဒီ ဘေ အာဒါ ဒုက် ဒွန် မျုဝ် ပဲ့ ဟဲ့ ခမ် ဘေ။

13 အုဝ် ဒီ ဝီ စ်ု မိူင် ယူဒါ၊ တဲး န့ ပီ အီ စ်ု အ။ မိူင် အေဖာရိမ် ဒီ ဘော ပီ ဘ့လာ အ။ အုဝ် ဒီ ဘော ကာဆုး ဂေ ဒူအီ ခဲင် မိူင် ဇီအူန်၊ တဲး ဂေ ဘဲန် ရန်ဆူ ဒူအီ ဂြိက်။ အုဝ် ဒီ ဘူင် တဲး ဂေ ပီ မာပွါ့ လာင် ပီ ဂူင့် ဒါ ဆိုက် အီ မိုဝ်း ဟဲန့် ကိူန်။

14 ဇဝ်ဖြာ ဒီ ဘော ကာပ့လုး တး ဒဲင် ဂေ ဒူအီ ပီ အိုပ် အန်။ ဘ့လာ အ အန် ဇဝ် ဒီ ဟာဝ် ခြန် ပီ ပ့လ မ့ပ့လေတ့်။ ဇဝ်ဖြာ အီ အိုပ် တူတ့် ဒွန် မျုဝ်၊ အန် ဒီ ဘော ဘုတ် ဝဝ် ဘော ဟာဝ် ဘ့လာက် နာ တေတ့် ပီ ခုန် လာင်။

15 ဇဝ်ဖြာ အီ အိုပ် တူတ့် ဒွန် မျုဝ်၊ အန် ဒီ ဘော ဂွင့် ဘော ရဲ ဂေ ဒူအီ ပီ အိုပ် အန်။ ဂေ ဘော ပွိုန် ဒီ ဟပ် မာဝ် ဒီ ဝန် ဘော ဝိုန့် ရန်ဆူ ဂေ ဘော ပဲ။ ဂေ ဒီ ဘော ဒတ် တာင် တဲး န့ ပီ ဂေ ယိုတ့် ပဝ်း ဘော ဒျီင် နှာမ် ရန်ဆူ ဂေ။ ဂေ ဒီ ဘော ဒျီင် တဲး န့ ပီ အီ ဒျီင် အိုမ် မာငုန်။ ဂေ ဒီ ဘော ဖဲ ဆီချာ၊ တဲး န့ ပီ ကာလုဝ့် အီ ဟဲ့ နုဝ့် နာ ခဲင်။ န့ ဒီ ဘော ပီ ကာတုဝ့် ကာစှူင့် လှူ အီ အမ် ည။

16 ဆီငဲ တီ၊ ဇဝ်ဖြာ အီ မုး ဒါ ကာညာ အီ အိုပ် ဂေ၊ အန် ဒီ ဘော ချွတ် ဂေ။ တဲး န့ ပီ ဒါ အီ ဟျီင် မာဘူ ချွတ် မာဘူ အန်။ ဂေ ဒီ ဘော မာဘြိဝ် ခဲင် မိူင် ပီ အိုပ် ဇဝ်ဖြာ ပီ ဆဲန့် အီ ဒိုက် ဒီ မင်ဂိုမ်။

17 ဂေ ဒူအီ ပီ အိုပ် အန် ဇဝ် ဒီ ဘော စှိတ် ကာဆဝ် ဘော မိုဝ်း ဆာရေ။ ဂေ ဂွန် ကာညူမ် ဘော ဂွန် ဒီဘျာ ဒီ မိုဝ်း ဒီဂါဝ် ဘော အိုမ် မာငုန် အီ လိုင် ကာဆဝ်။