1 ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ ကာလာင် ဂြုဝ်း ဒီ အုဝ် တဝ်း၊ 2 “ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် အုန် ပါယ် နီ။ ကူပ် ရွက့် ကာဆဝ် အုဝ် ဂေ ဒူအီ ခဲင် မိူင် ယေရူဆာလဲမ်၊ အုဝ် မိူဝ် ဟဲ့ ဝီ ရူ ကာဆဝ် ဒီ ရန်ဆူ ဂေ။”

3 ဒေါ တီ နီ ဇဝ်ဖြာ ဟဲ့ တဝ်း၊ “အုဝ် ဒီ ဝီ တး ဒီ နွန် ဇီအူန်၊ ဝီ တး ကွယ် ခဲင် မိူင် ယေရူဆာလဲမ်။ အီ ဟဝ် ဒီ ဘော တဝ်း၊ ဂေ ဒူအီ အီ ကွယ် ခဲင် မိူင် ယေရူဆာလဲမ် မိုဝ်း နဝ်း ဆိူဝ် နဝ်း မှာန်။ ဂေ ဘော တဝ်း နွန် ဒူင် ကွယ် ဇဝ်ဖြာ အီ အိုပ် တူတ့် ဒွန် မျုဝ်။ န့ မုး နွန် အီ ဆီငါ ဘွတ်။”

4 ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ “ဒူအီ ကတ် ဒူအီ ဂဲ ဘော အီဘိုန့် ဘော အီမာယ်၊ ဂေ အီ ဟဲ့ မိုဝ်း အာဆာက် ကိူန်၊ ဂေ ဒီ ဘော ဂူင့် န့ကြွုန် ဝိန် ဒီလဲ ခူပ် န့တေန့် ခဲင် မိူင် ယေရူဆာလဲမ် ဘော ဝီ ကွယ် ဒီ ရိုမ် ခဲင် ဂ့လင်။ 5 န့ ဒီ ဘော မိုဝ်း ဘော ဂွန် အီဘိုန့် ဘော ဂွန် အီမာယ် အီ လာယ် ဒီလာဝ် ဒူပ် န့တေန့် ခဲင် မိူင် တီ။

6 ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ ဘေ မုး ဒူအီ အီ ဆီ ဂိတ် ဆီ ကွယ်၊ အီ တူ မိုဝ်း ဒူင် နဝ်း တာင်။ ဆေ ဘေ ဇေန့်ဇာ ဂြုဝ်း ပဲ့ ဟဲ့ ကာလာင် အုဝ်၊ န့ ဒီ တဲး ဘေ အာမ် ဘော တူ ညှိုမ်။ အုဝ် မုး အန် ဇဝ် အီ အိုပ် တူတ့် ဒွန် မျုဝ်။ န့ တူ မိုဝ်း မာဆေ ပီ တူ ပွိုန် ဘူင် အုဝ်။”

7 ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ “အုဝ် ဒီ ဝီ ချွတ် လေး ဂေ ဒူအီ ပီ အိုပ် အုဝ် အီ ကွယ် ခဲင် မိူင် ဘ့လာက် နာ လေး ဆီငဲ ဘော ခဲင် မိူင် နာ ဂေတ့် ဆီငဲ။ 8 အုဝ် ဒီ တဲး ဂေ ဝီ တး ကွယ် ခဲင် မိူင် ယေရူဆာလဲမ်။ ဂေ ဒီ ဝီ ဘဲန် ဒူအီ ပီ အိုပ် အုဝ်။ အုဝ် မိူဝ် ဒီ ဘဲန် ဇဝ်ဖြာ ပီ ကြိုပ် ဂေ ဘော ဘူင် နာ ဆိူဝ် နာ မှာန်၊ နာ ဘွတ် နာ မွှိုမ် ဒီ ဂေ။

9 ဇဝ်ဖြာ အီ အိုပ် တူတ့် ဒွန် မျုဝ် ဟဲ့ တဝ်း၊ ဘေ ဟဲ့ ယိုဝ် ဂြုဝ်း ဇဝ်ဖြာ ပီ ကာလာင် ဂေ ဒါ အီ ဘျာန် ဂြုဝ်း ဇဝ်ဖြာ ဒေါ ဆမ် ဂေ စေန့် ရွင့် ဟုဝ် ဇဝ်ဖြာ။ ဒေါ တီ နီ တဲး ဘေ မိုဝ်း ပ့လူမ် မိုဝ်း ဟဲန့်၊ တဲး ဘေ ဘူင် တဲး ဟုဝ် ဇဝ်ဖြာ ကော ဟွတ့်။ 10 ဒေါ အန် တီ၊ အာတ့် ကာစုး ဂေ ဒီ မ့ပြာယ် ဟုဝ် ဇဝ်ဖြာ အာဝ် ပွိုန် ဒီ ရန့် ဂါန် ဘော အာဝ် မိုဝ်း ရုး ရန့် အာဒါ ဂေ ဒူအီ ဘော ဒုဝ် ဆတ်ဒါဝါ။ ဂေ အီ ဟာဝ် ဒူပ် န့တေန့်၊ အာဝ် ဘော ဂတ် ဂျီတ် ဒီ ဂေ ကူပ် မိုဝ်း ရန်ဆူ ဂေ ဒွန် နာ ဒွန် ပ့လုဝ့်။ ခုဝ်၊ အုဝ် ဟဲ့ တဲး ဂေ ဒူအီ အီ ကွယ် လာယ် ကာချြီ့၊ ဝီ လာယ် ကာလုတ့် လာယ် ဘဲန် ရန်ဆူ။ 11 ဒေါ တီ နီ၊ အုဝ် မိူဝ် အာဝ် ဟူ ဘူင် ဒီ ဂေ ဒူအီ အီ ဆီ ဂိတ် ဆီ ကွယ် တဲး န့ ပီ ဒေါ မွိုန်။ ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။

12 ခုဝ်၊ ပီ ပိတ် ပီ ဆမ် ဂေ ဒီ လေး ကိူန်။ ဟေ မာငုန် ဂေ ဒီ ဘော ဝီ မိုဝ်း ဘ့လေ အန်။ ကာဒါယ် ဒီ ဘော ဝီ တဲး ပီ ဆမ် ပီ ပိတ် ဂေ မိုဝ်း ဘုဝ်း မိုဝ်း ဘ့လေ အန် ဘော ဘ့လေန့် ဒီ ဘော ဝီ တဲး မိုဝ်း အိုမ် ဒီငါန်။ အုဝ် မိူဝ် ဒီ ဝီ တဲး ဂေ ဒူအီ အီ ဆီ ဂိတ် ဆီ ကွယ် ဝီ ပွိုန် ဒီ ဘိုင် ခါဂုန် ဂေ တီ။ 13 အိုယ် ဘေ ဒူအီ အာယူဒါ ဘော ဒူအီ အီဆာရေလ၊ ဇဝ်ဖြာ ဟဲ့ ဘျ ဒီ ဒူအီ အာမျုဝ် ဟဝ် ဘဲန် မျုဝ် ဘဲန် မျုဝ် လွင် ဘေ ပါယ် မှဝ် ဆေ ဇဝ်ဖြာ ဒိူင် ဘေ။ အုဝ် ယီ ဒီ ဝီ ချွတ် ဘေ တဲး ဘေ ဒွါ မွင့်ကာရာ ဒီ အီ ဟဝ်။ ဘေ ယီ တူ လုဝ် ယုဝ် မာဆေ၊ တဲး ဘေ ဝီ ပီပ့လူမ် ပီတာင် နဝ်း ဘေ ဘော ဘူင် ဟာဝ် ဝီ ဆမ် ဟုဝ် ဇဝ်ဖြာ။”

14 ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ ကာလာင် ပေါ န့ ပွါ တဝ်း၊ “ဒေါ မွိုန် ဂေ ဂုန့် ဒင် ဘေ ဟဲ့ ကာဆုး တဲး အုဝ် ရူ ကာဆဝ်။ အုဝ် ယီ တူ ကာပ့လု တူ ဘျွင် ပဲ့ ဟဲ့ ခြာမ် အုဝ် ဒီ ဘူင် ပီ တဝ်း အုဝ် ဘော ဒမ် မှာပ် ဒီ ဂေ။ 15 အာတိုဝ် နီ အုဝ် ဟဲ့ ဝီ ခြာမ် ဒီ မွင့်ကာရာ ဒွါ ဒီ မိူင် ယေရူဆာလဲမ် ဘော ဒီ ဒူအီ အာယူဒါ၊ ကွဲ့ တဲး ဘေ ယုဝ် မာဆေ။ ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။ 16 ပီ လုဝ် ဘူင် ဘေ ဒေါ တီ နီ န့ ပါယ် နီ။ ဘေ လုဝ် လာယ် ကာလာင် ဂြုဝ်း ဆိူဝ် ဂြုဝ်း မှာန်။ ဆေ ဘေ ဘော ဆုင်ဖျာတ် အာမူ အီ၊ တဲး ဘေ ဆုင်ဖျာတ် နာ ဆိူဝ် နာ မှာန်၊ တဲး ဘေ လာယ် ကာလဝ့်။ 17 ကွဲ့ တဲး ဘေ လာယ် ခြာမ် ဒီ ဘူင် နာ တူ မွှိုမ် နာ စီစိဝ် ကာတဲ ဘေ။ ကွဲ့ တဲး ဘေ ဒိူင် ဂြုဝ်း တူ မုး တူ မှာန်။ အုဝ် ဇွင့် ကာဆဝ် အာမျုဝ် တီ။” ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။

18 ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ ကာလာင် ဂြုဝ်း ပေါ မ့ပွါ ဒီ အုဝ် အန် တဝ်း၊ 19 “ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် နီ။ ဘေ ယိူန် ပီ ဒီ ဟူမ် ဒေါ မာဂျီန် မ့ဖွုန်၊ မာဂျီန် မ့ဖန်၊ မာဂျီန် မ့ဘူ ဘော မာဂျီန် ဂိုဝ်။ ဒေါ အန် တီ ဘေ အာဝ် ဒါခိုယ်။ ဒေါ တီ နီ အုဝ် ယီ တဲး န့ ဘဲန် ဘ့လွယ် အီ ဘျုဝ် ဒါခိုယ် ဒီ ဂေ ဒူအီ အာယူဒါ။ ပါယ် တီ တဲး ဘေ ဒါခိုယ် ဒီ ဘူင် နာ ဆိူဝ် နာ မှာန် ဘော ကွယ် ယေန် ဒါခိုယ်။”

20 ဇဝ်ဖြာ ပီ ဝီ ကာလာင် ပေါ မ့ပွါ တဝ်း၊ “အာမျုဝ် ဂေ ဒူအီ ကိူန် ဘော ဂေ ဒူအီ အီ ကွယ် ခဲင် မိူင် ဘဲန် မိူင် ဘဲန် မိူင်၊ ဂေ ဒီ ဘော ကာဖြူမ် ဒီ တး ဇမ် ခဲင် မိူင် ယေရူဆာလဲမ်။ 21 ဂေ ဒူအီ ခဲင် မိူင် အူ မိူင် ဒီ ဘော ဝီ ဟာဝ် ညိူဝ် ဒူအီ ပေါ အူ မိူင် ဘော လာယ် ကာလာင် တဝ်း၊ ‘တဲး အေ ဟာဝ် ဟြေတ့် ဇဝ်ဖြာ အီ အိုပ် တူတ့် ဒွန် မျုဝ်။ မှာန့်၊ တဲး အန် ဇဝ် မွင့်ကာရာ ဒွါ ဒီ အေ။ အုဝ် မိူဝ် ဒီ ဟာဝ် ဒူပ်။’ 22 ဂေ ဒူအီ ကိူန် ဘော ဂေ ဒူအီ အာမျုဝ် ဟဝ် အီ ဟဲ့ မိုဝ်း ပ့လူမ် တာင်၊ ဂေ မိူဝ် ဒီ တး ခဲင် မိူင် ယေရူဆာလဲမ် အီ မုး ဒူင် ကွယ် ဇဝ်ဖြာ အီ အိုပ် တူတ့် ဒွန် မျုဝ်။ ဂေ ဒီ ဘော ဆာခိုဝ် မှာန့်၊ တဲး ဇဝ်ဖြာ မွင့်ကာရာ ဒွါ ဒီ ဂေ။”

23 ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ “ပန် အန် တီ ဒူအီ ဂိုဝ် ဝီ အီ တး ခဲင် ဒူအီ ဒွန် မျုဝ်၊ အီ ကာလာင် ဂြုဝ်း မျုဝ် မှဝ် မျုဝ် အန်၊ ဂေ ဒီ ဘော ကာဖြူမ် ဒီ ပါ ဘြုဝ် ဆီတုဝ် ဂေ ဒူအီ အာယူဒါ ဘော တဝ်း၊ ‘ကူပ် ယေ ဟဲ့ နပ် ဟဲ့ ယိုဝ် လွင် ဇဝ်ဖြာ ကွယ် ရိုမ် ဒူပ် ဘေ၊ ယေ မိူဝ် မှာန့် ဒီ ဒူပ် ဘေ။’”