1 ခုန်ဒီခမ် အာတာရိတ် ဟဲ့ အိုပ် မိူင် ဘာဘဲ အာဒါ ဖွုန် ဆီနမ်၊ ဒေါ ဇမ် မာဂျီန် န့ဒိမ် အီ စိူဝ် မာဂျီန် ခီဆာလူ ဆီငဲ မ့ဖွုန်၊ ဇဝ်ဖြာ ဝီ ကာလာင် ဂြုဝ်း ဒီ အာဆာခါရာ။ 2 ဒေါ အန် တီ ဂေ အီ ကွယ် ခဲင် မိူင် ဘေဒါအေန်၊ ဂေ ဝီ စ်ု အာဆာရေဇာ၊ အာရေကီမေလေက် ဘော ဒူအီ ဂေ မင် အီ၊ တဲး ဂေ ဟာဝ် ဆာခိုဝ် မှာန့် ဇဝ်ဖြာ မွင့်ကာရာ ဒီ ဂေ။ 3 ဂေ တဝ်း ဒီ ဒီမွှတ် ဂေ ဒါ အီ လှူ ဒီ ဇဝ်ဖြာ ဘော ဂေ ဒါ အီ ဘျာန် ဂြုဝ်း ဇဝ်ဖြာ အီ ကွယ် ခဲင် ဟုဝ် ဇဝ်ဖြာ အီ မုး ဇဝ်ဖြာ အီ အိုပ် တူတ့် ဒွန် မျုဝ်။ ဂေ တဝ်း၊ “ဟဲ့ မှာန်၊ ဒွန် ဆီနမ် ဆေ ဇမ် မာဂျီန် မ့ဖန်၊ ယေ လုဝ် ယိူန် ပီ ဒီ ဟူမ် ဘော က့လိုဝ် ဘော လှုဝ်း ဂေ ရန်ဆူ အီ ဟဲ့ တး ပျာတ့် မိူင် ယေရူဆာလဲမ်၊ တဲး န့ ပီ ပဲ့ ဟဲ့ ဘူင် ယေ ဘဲန် ဆီနမ် ဘဲန် ဆီနမ် နီ။း”

4 ဇဝ်ဖြာ အီ အိုပ် တူတ့် ဒွန် မျုဝ် ဝီ ကာလာင် ဂြုဝ်း ဒီ အုဝ် တဝ်း၊ 5 “တဲး မဲ ဝီ ကာလာင် ဒီ ဂေ ဒူအီ ဘော ရဝ် ဘော ကာင်၊ ကာလာင် ဘော ဒီ ဂေ ဒါ အီ လှူ ဒီ ဇဝ်ဖြာ တဝ်း၊ ‘ပဲ့ ဟဲ့ ယိူန် ဘေ ပီ ဒီ ဟူမ် ဘော ပဲ့ ဟဲ့ ယာမ် ဟဲ့ ငှုန် ဘေ ဒေါ မုး မာဂျီန် မ့ဖန် ဘော မာဂျီန် မ့ဘူ အာဒါ ဘူ ဂိုဝ် ဆီနမ်၊ န့ မှာန် အာခါခ်ု ဘေ ဟဲ့ ယိူန် ကူပ် အုဝ်။း 6 ဘော ဒေါ တီ နီ ဒေါ ဟူမ် ဘေ ဘ့လွယ် ဘေ၊ ဘေ တူ ဟူမ် ကူပ် လှုဝ်း ဘေ ဒီ အုဝ်။ ဘေ ဟူမ် ဒူပ် ပီ အိုင် နဝ်း ဖွိုမ် ဘေ။ 7 ပါယ် တီ ဇဝ်ဖြာ ဟဲ့ ကာလာင် အုန် ဒီ ဒါ အီ ဘျာန် ဂြုဝ်း ဇဝ်ဖြာ ဆိန့် ဘာန် ဒေါ မွိုန်။ ဒေါ အန် တီ မိူင် ယေရူဆာလဲမ် ဘော မိူင် အီ ကွယ် ခဲင် ကာဒါယ် မိူင် ယူဒါ ဘော မိူင် အီ ကွယ် ဒီ နွန် ဒီတဲတ် ဘ့လာက် နာ တေတ့်၊ ဂေ ဘောကာဂ့လျီတ် ဟဲ့ ကွယ် ဒါခိုယ်။’”

8 ဇဝ်ဖြာ ပီ ဝီ ကာလာင် ဂြုဝ်း ဒီ အာဆာခါရာ တဝ်း၊ 9 “ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် နီ။ ဆေ ဘေ ဆုင်ဖျာတ် အာမူ ဒူအီ၊ တဲး န့ ဒူပ် ဒါရာ။ တဲး ဘေ မိုဝ်း နဝ်း ရွက့် ကာဝေ ဘော မိုဝ်း နဝ်း ဆီ လာယ် စွယ် လာယ် ဂေဇူ။ 10 ကွဲ့ တဲး ဘေ ခါနှာပ် ယာ ဆီပြး၊ ဂေ ဂွန် အီ တူ မိုဝ်း ဂုန့် မာ၊ ဒူအီ အာမျုဝ် ဟဝ် ဘော ဒူအီ ဂိန် ဒူအီ ဖ့လာန်။ ကွဲ့ တဲး ဘေ လာယ် ဘူင် နာ တူ မွှိုမ်၊ နာ စီစိဝ်။”

11 ဇဝ်ဖြာ ပီ ဘော ဟဲ့ ကာလာင် ပါယ် တီ မိူဝ်၊ ဂေ ယီ တူ မိုဝ်း နဝ်း ဆီ ထူမ်။ ဂေ ဘော ဝီ ဘူင် ပီ အိုင် ဂေ အီ ကာဘး ဒီ ဇဝ်ဖြာ။ ဂေ ဘော ဝီ ကာဘိတ် ဟျုဝ့် ဂေ၊ ကွဲ့ တဲး ဂေ ယိုဝ် ဒီ ထူမ်။ 12 ဂေ ပီပ့လူမ် နဝ်း ဂေ၊ တဲး န့ ကော ပီ မာဝ်၊ ကွဲ့ တဲး ဂေ ထူမ် ဒါရာ ဘော ဂြုဝ်း ပီ ကာလာင် ဇဝ်ဖြာ အီ အိုပ် တူတ့် ဒွန် မျုဝ်။ ဇဝ်ဖြာ ဟဲ့ ဒွိုမ် ကာလာင် ပါယ် တီ ဒီ ဒူအီ အီ ဘျာန် ဂြုဝ်း ဇဝ်ဖြာ အီ ကွယ် ဒေါ မွိုန်။ ကူပ် န့ ပါယ် တီ ဇဝ်ဖြာ အီ အိုပ် တူတ့် ဒွန် မျုဝ် ဘော ရူ ကာဆဝ် ဒီ ဂေ။

13 ဇဝ်ဖြာ အီ အိုပ် တူတ့် ဒွန် မျုဝ် ဟဲ့ တဝ်း၊ အုဝ် ဟဲ့ ဒတ် ဒဲ့ ဂေ၊ ဂေ ယီ တူ ထူမ် ဂြုဝ်း အုဝ်။ ဒေါ ဝီ ဒတ် ဒဲ့ ဂေ ဒီ အုဝ်၊ အုဝ် မိူဝ် တူ ထူမ် ဂြုဝ်း ဂေ။ 14 ပါယ် တီ အုဝ် ဟဲ့ ဘူင် တဲး န့ ပီ ခုန် လာင် ဟဲ့ တး ဘုတ် ဂေ၊ တဲး ဂေ ကွယ် ကာယဝ်း ကာရေး ကာတဲ ဒူအီ ဒွန် ဇိုဝ် ဒွန် မျုဝ် အီ မုး ဒူအီ ပီ တူ နပ် ဂေ။ မိူင် ဂေ တီ ဘော ဟဲ့ ဘဲန် ဒူင် ယေန် ဒူင် ငွင့် ဒူအီ။ န့ မိူဝ် တူ မိုဝ်း ဒူအီ အီ ဟာဝ် ဟာဝ် တး တး ခဲင် မိူင် တီ။ မိူင် အီ ဟဲ့ ဒွိုမ် တာင် ဒါခိုယ် ဘော ဝီ ဘဲန် မိူင် လိုဝ် မိူင် ရာမ်။